Mwe Engan luhn Pristut
Sel Prestuhn Dieter F. Uchtdorf
Mwet in Kahsruh Ahkluo ke Prestuhnsi Se Met
Lwelah kuht in sruokyac ac kahlwem ke ma wolacna ac mwe insewowo luhn pristut. Lwelah kuht in insese ac luhngse kunohkohn siyuckyuck kuht in ahkfalye.
Mwe Engan ke Sohksohk
Yac pucspucs somlah ah nga wi kuhtuh mwet utuck oaksohk in oruh sie finsrak ke kuht fuhsr in ahkwoyelah soko oaksohk mahtuh. Kuht tuhkweni moli soko oaksohk oreklac ke yac 1938 pahngpahng Piper Cub ac muhtwacwacack in ahkwoyelah ma nuh kwewa in sasuclac. Orekma se inge pa orekma ke luhngse. Yohk srihpac nuh sihk ke srihpen nga lotwelah in sohksohk ke oaksohk soko pacna inge ke nga sie mukul fuhsr ah.
Oaksohk soko inge muhsahiyucklac emet met tukun yac 35 ke tamuhlwel Wright ma orwaclah oaksohk soko emet. In nuhnkuh ke ma inge oruh nga in puhla mahtuh.
Insin sac wacngihn sahrom in ahkosack; ke kom ahkosack insin sac ke acn met an, mwet se sahyac infohk an enenuh in sruokyac mwe for sac ac furohkwack ke kuhiyaclos nuh ke insin sac kuh in sifacna kahsruhsr. Kais sie pacl in ahkosack insin an pa pacl pwacr ac puhlaik uh.
Ke ac sohkwack uh, fihsracsr in liye lah Piper Cub el tiac oreklac in muhi. Kuhtuh pacl uh, ke oasr ke eng upac uh, oacna kuht in tiacna mukwikwi. Nga esam ke pacl mukul se nuhtihk wi yuc sohksohk lucng liki autobahn fin acn Germany, ac ma na pwacye se, stosah ten uh kahsruhsr muhi liki kuht!
Tuhsruhktuh, o, nga arulacna luhngse oaksohk srihsrihk soko inge! Pa ohiyac suwohs in wi ma wolacna ac kahto luhn sohk uh. Kowos kuh in lohng, puhla, ngohk, ac liye ma nuh kwewa ke sohk. Tamuhlwel Wright el ahkuhtweyac ohinge: “Wacngihn ma oacna ma mwet sohksohk uh engankihn ke elos sohkwack nuh lucng ke poun oaksohk uh.”1
Ke ohiyac sahyac, ke yac se inge nga eis pacl wowo se in sohksohkkihn soko jet F-18 luhn military ke mwet pwengpweng luhn Blue Angels, u suhmaht ke United States Navy. Sohksohk se inge ahkacsmakihnyeyuc ke pacl se ke yac 50 tari ah, apkuhran in lwen se pacna, nga ahksahfyelah lutlut luhk ke mwet utuck oaksohk luhn air force.
Sohksohk ke F-18 soko ah, pwacyena, siena liki sohksohk ke Piper Cub uh. Ahkkahlwemye ohiyac siena ac kahto ke sohksohk uh. Oacna ke kapsra masap ma oasr ke sohksohk ke sie ohiyac suwohswohs likina met ah. Tuhsruhktuh, sohksohkkihn Blue Angels uh oacyacpac sa in ahkacsmakihnyeyuc lah sie mwet utuck oaksohk ke jet uh pa ma se mwet fuhsr muhkwena kuh in oruh. In sulpac riti ma tamuhlwel Wright el fahk ah, “Yohk likina ma nuh kwewa sahyac, puhla [luhn sohksohk] pa sie puhla mihslac, ac wi pac puhla rahrah ma som nuh ke ip nuh kwewa luhn mahno lom.”2 Oacyacpac, sohksohk ke Blue Angels pa ohiyac siena ke in sang “lihpufacn uh” in siskowos in sruhk kowosyak.
Kowos fin siyuck sihk lah piyac kac sin sohksohk luo inge ma nga luhngse yohk uh, nga nihkihn lah nga kuh in fahk nuh suwohs. Ke ohiyac fihsracsr in liye, elos siena, in fahk na. Ac ke ohiyac sahyac, elos oacna sie.
Ke kwewana Piper Cub ac F-18, nga puhla rahrah, kahto, ac engankihn sohksohk uh. Ke kwewana nga kuh in kahlwem ke mwet sihm fahk muh “[som] liki ma koluk luhn Facluh ac [tacn] ke acn engyeng ke isracsr. “3
Pristut Oacna Sie Acn Nuh Kwewa
Ingena, sahp kowos siyuck, meac sohksohk siena luo inge ac oruh ke toeni se mihsenge uh kuh ke pristut kuht sruikihn in oasr yohrohsr kuh kuhlwacnsap ke pristut ma kuht luhngse yohk uh?
Tamuhlwel, ma na pwacye lah mukwikwi lasr sifacna ke kuhlwacnsap luhn pristut uh siena? Kuht kuh in fahk kuhtuh suwohs sohkwack ke jet F-18 uh, ke mwet sahyac uh sohkwack ke Piper Cubs uh. Kuhtuh suwohs muhta ke ward kuht stek ma kunohkohn nuh kwewa sesseslah, ke mwet kahsruh nuh ke mwet kol luhn prist fuhlwact nuh ke mwet sihm ke u luhn tikin, oasr mukul suc sruok pristut mukwikwi kac. Oasr pacl wowo lowos in wi ke sie ward ma puhs ac fal mwet kac an.
Kuhtuh suwos muhta ke eria luhn facluh ma oasr mempucr ac mwet pristut ekahsr na ke Alu uh we. Sahp kowos puhla muhkuh ac toasr ke ma nuh kwewa kowos enenuh in oruh. Nuh suwos sahp kowos enenuh in oruh ma puhspuhs in muhtwacwacack insin ke kuhlwacnsap luhn pristut uh. Kuhtuh pacl uh oacna kowos in tiac mukwikwi ke pracns kuh ward lowos an.
Tuhsruhktuh, tiac yohk srihpac ma kunaclos kuh ohiyac lalos, kowos ac nga etuh lah oasr engan sacohk kuh in tuhkuh ke kuhlwacnsap oaru luhn pristut.
Nga luhngse sohksohk pacl nuh kwewa, finne ke sie Piper Cub, kuh F-18, kuh kuhtwena oaksohk. Ke oasr lun Piper Cub, nga tiac tohrkahskahs lah suhmuhi; na ke F-18, nga tiac tohrkahskahs ke upaclac luhn aerobatic maneuvers nuh ke mahno luhk ke srihpen nga mahtuh.
Ahok, oasr ma tiac suwohswohs ke kuhtwena acn. Ahok, oasr ma fihsracsr in konwacack in tohrkahskahs kac.
Tuhsruhktuh tamuhlwel, kuht pa mwet suc sruok Pristut Muhtahl, ke Ohiyacn Wen nuhtin God! Oasr mwet suc fihliyac paholos nuh ke insifacsr, ac kuht eis pristut luhn God. Kuht eis kuh ac kunohkohn in orekma ke Inel ke mwet kuhlwacnsap Lal fin facluh. Finne oasr ke ward luhlahp kuh pracns srihsrihk, kuht pahngonyuck in kuhlwacnsap, ahkinsewowoye, ac mukwikwi pacl nuh kwewa nuh ke ma wo luhn mwet nuh kwewa ac ma nuh kwewa kuht eis in karihngihn. Yac oasr ma sahyac yohk likina in rahrah kac?
Lwelah kuht in kahlwem, kulohkihn, ac puhla engan ke kuhlwacnsap ke pristut uh.
Engan luhn Pristut
Luhngse luhk ke sohksohk kol orekma luhk ke moul luhk nohfohn. Tuhsruhktuh ma wo ac engan ma sikyak ke nga mwet sohksohk se ah, tiac yohk, engan, ac wolacna oacna ma sikyak ke nga mempucr ke Alu se inge. Ke nga wi kuhlwacnsap luhn Alu uh, nga puhla kuh wolacna luhn God ac kuhlwacng puhsisacl Lal.
Oacna sie mwet sohksohk, nga kahlyac acn engyeng uh. Oacna sie mempucr ke Alu uh, nga puhla luhngse ac karihngihnyuck ke inkuhsrao.
Kais kuhtuh pacl, nga ke sulpac sohksohk. Tuhsruhktuh in kuhlwacnsap yurin tamuhlwel ac tahmtahel luhk ke Alu uh wo likina. In puhla mihslac ac engan wo ma tuhkuh ke kowos wi ip se ke orekma ac srihpac luhlahp ke alu se inge, nga sruhnga in tiac wi ke kuhtwena ma sahyac fin facluh.
Mihsenge kuht pa sie u luhlahp luhn pristut. Engan ac pacl wo lasr pa in kuhlwacnsap nuh sin Leum ac mwet tuhlan lasr, in olwelah in oruh ma wo emet lasr in kahsruh mwet sahyac ac muhsahi tohkohsrahi luhn God.
Kuht etuh ac kahlwem kac lah pristut pa kuh ac wal ma pahtpaht luhn God. Kuht kuh in sulpac fahk ma inge fihsracsr. Tuhsruhktuh, yac kuht ac kahlwem suwohs ke ma yohk srihpac ma kuht fahk uh? Lwelah nga in sulpac fahk: Pristut pa kuh ac wal ma pahtpaht luhn God.
Nuhnkuh kac. Ke pristut, God el oraclah ac kol inkuhsrao ac facluh.
Ke kuh se inge, El molwelah ac ahkinsewowoye tuhlihk Nahtuhl, “in oruh mwet in eis moul ma pahtpaht yurin God.”4
Pristut an, oacna Mwet Pahluh Joseph Smith el ahkuhtweyac, pa “ohiyac luhn God Wolacna in muhtwacwacack ahkkahlwemye wolacna Lal ke … oraclah luhn facluh, ac ohiyac ma El kalweni in ahkkahlwemye El sifacna nuh sin tuhlihk nuhtin mwet nuh ke pacl se inge, ac ohiyac El ac ahkkahlwemye srihpac Lal nuh ke sahflahiyacn pacl uh.”5
Pahpah kuh tuhmasr Inkuhsrao el use wal luhn pristut nuh sesr—mwet moul suc, ke ahkuhtweyucki, tiac suwohswohs. El use wal Lal nuh sesr in mukwikwi ke Inel nuh ke molwelah luhn tuhlihk Nahtuhl. Ke kuh yohk se inge kuht kuh in luti wosasuc, in sang akwuck luhn molwelah, ac kahsruh muhsahi tohkohsrahi luhn God fin facluh, ac ahkinsewowoye ac kuhlwacnsapuh sucu ac mwet tuhlan lasr uh.
Mwesahs Nuh Sin Mwet Nuh Kwewa
Pa inge pristut muhtahl kuht us uh.
Pristut an, kuh kuhtwena ma oasr kac, tiac kuh in moliyuck kuh sapkihnyuck. Orekmakihnyacn kuh luhn pristut uh tiac kuh in kaiyuck, eklac, kuh ahkkohsyeyuck ke mwet fuhlwact, ke mani, kuh ke kaiyuck. El pa kuh luhn nguhn ma sikyak ke masap luhn inkuhsrao. Tuhkuh sin Pahpah Lucng wolacna nuh sesr nuh kwewa. Kuh lal kuh in orek ac kolyuck nuh ke ip luhn suwohswohs muhkwena,6 tiac luhngse luhn mwet.
Kraist pa ohiyacn kuh ac wal luhn pristut pwacye fin facluh.7 Pa inge orekma Lal, ma kuht kuh in wi kahsruh pac. El fahk lah wacngihn mwet kuh in kahsruh ke orekma se inge el fin tiac inse puhsisacl ac sesseslah ke luhngse, ac oasr luhlahlfongi, finsrak, ac luhngse pwacye, ac oruh fal ke ma nuh kwewa, ac tiac yohk srihpac ke ma el siyuckyuck in oruh.8
Kuht tiac orekma in sifacna eis, tuhsruhktuh in suk in kuhlwacnsap ac kahsruh mwet sahyac. Kuht tiac kol in ahkkohsye mwet tuhsruhktuh ke kai suwohs, oaru, kuhlwacng, ac inse puhsisacl, ac ke luhngse pwacye.9
Pristut luhn God Kuhlwacna kuh in tuhkuh nuh sin kais sie mukul nwacsnwacs ke kuhtwena acn elos oasr we uh—tiac yohk srihpac mwet mahtuh lalos, kuh ohiyac puhsisacl lalos, kuh fin elos muhta acn fototo kuh loes fin facluh. Oasr ke facluh ke wacngihn molo. In fahk oacna mwet pahluh mahtuh Isaiah, mwet nuh kwewa suc maluh kuh in tuhkuh nuh ke kof uh, ac wacngihn molo in tuhkuh mongo!10
Ac ke srihpen Iwaclah ma pahtpaht ac tiac kuh in kahlwem luhn Mwet Lahngo lasr, Jisus Kraist, pristut luhn God kuh in tuhkuh nuh suwos finne kowos tahfonglac kuh oruh ma koluk ke pacl met ah. Nuh ke ohiyac luhn nguhn ac ahknwacsnwacsyeyuck luhn auliyak, kowos kuh in tuyak ac ahkkahlwemye nuh met!11 Ke srihpen luhngse ma pahtpaht ac nuhnak muhnahs sin Mwet Lahngo ac Mwet in Molwelah lasr, kowos kuh in sulpac liye, ac ahknwacsnwacsyeyucklac, ac eklac nuh ke sie mwet suwohs nuhtin God—suc nwacsnwacs in sruokyac pristut muhtahl luhn God Kuhlwacna.
Ma Wolacna ac Sukohsohk luhn Pristut
Nga puhla ahsor nuh sin mwet suc tiac sruokyac ac sang kuloh ke ma wolacna ac sukohsohk luhn pristut uh. Elos oacna mwet lun oaksohk suc eis pacl lalos in tohrkahskahs ke mongo srihk ke elos sohkwack nuh lucng, loes likina puhkuhnyeng uh—kuhtuh ma tohkohsrah mahtuh uh luhngse in sang ma nuh kwewa lalos in srihke ac wi pacl sefanna!
Tamuhlwel, kuht insewowo ac puhsisacl in eis kuh ac wal luhlahp inge ke pristut. Lwelah kuht in ngwetwack ac liye, akihlen, ac insese nuh ke pacl wowo in etuh ma pwacye kac.
Nuh ke kuhlwacnsap suwohswohs, luhngse, ac oaru, kuht ac ahkkahlwemye ma pwacye sruhmuhnyuck ke fwackyuck luhn Leum ma el fahk nuh sin mwet suc sruok pristut an ma El ac som met liki muhtahlos, tuh El ac oasr sisken paholos lacyot ac lacsac, ac Nguhn Lal ac oasr lun insiyaclos, ac lihpufacn Lal raunweloslac, in ahkkweyaclos.12
Lwelah kuht in sruokyac ac kahlwem ke ma wolacna ac mwe insewowo luhn pristut. Lwelah kuht in insese ac luhngse kunohkohn siyuckyuck kuht in ahkfalye—ma kunac ke lohm sesr ac lohm Alu lasr, finne ma luhlahp kuh srihk. Lwelah kuht in ahkyohkye ohiyac suwohswohs, oaru, ac kuhlwacnsap luhn pristut lasr. Lwelah kuht in sokwack mwe engan ke pristut uh!
Kuht kuh in oruh ma inge ke kuht ahkos ip yohk ke lahlmwetmwet, ahkostwen, ac luhlahlfongi.
Kalmac pa, ma se met, kuht enenuh in etuh ac ukwe mwe luti luhn pristut konweyuckyak luhn kahs fwackyuck luhn God. Yohk srihpac nuh sesr in kahlwem ke wuhlweacng ac masap ma orekmakihnyeyuck ke pristut uh.13
Na tohkoh, lwelah kuht in lahlmwetmwet ac mukwikwi ke mwe etuh kowos eis pacl nuh kwewa. Ke kuht ahkos masap luhn God, oruh nuhnak lasr ac mahnosr in suwohs, mukwikwi ke ohiyac suwohs oacna lutiyuck sin mwet pahluh, kuht ac puhlakihn engan ke kuhlwacnsap luhn pristut.
Ac sahflah, lwelah kuht in ahkfokokoye luhlahlfongi lasr nuh sin Leum, Jisus Kraist. Lwelah kuht in eis Inel ac olwelah in Ukwacl lwen nuh kwewa ke inkacnek luhn mwet tuhma lutlut. Lwelah kahs lasr in ahksuwohsye luhlahlfongi lasr.14 Ke mwet tuhma lutlut kuht kuh in ahksuwohsye ip nuh ke ip ke kuhlwacnsap luhn sucu lasr, mwet tuhlan lasr uh, ac God.
Ke kuht kuhlwacnsap ke pristut ke insiyacsr, kuhiyacsr, nuhnak, ac kuh lasr uh, oasr olwelah kuht in eis lahlmwetmwet, mihslac, ac mwe sang luhn nguhn. Ke kuht ahkfuhlwactye pristut muhtahl, God El ac ahkfuhlwactye kuht, ac kuht ac tu nwacsnwacs ye Muhtahl ke lwen sahflah.15
Nga pruhe tuh kuht in liye suwohs ma wolacna ac engan ke pristut luhn God Kuhlwacna lasr ke inen Jisus Kraist, amen.