Pain nuh ke Toeni uh

Sel Prestuhn Thomas S. Monson

Lwelah kuht in lohng pweng uh …, tuh kuht kuh in puhla Nguhn luhn Leum ac eis lahlmwetmwet El kena kuht in eis.

Oacna ke ma nga kuh in liye uh, siyah nuh kwewa nwacnwaclah—sahyacn kuhtuh ma oan tok uh ingoh. Oasr infuckihl nuh ke orwaclah wo. Ma inge pa sie kahsruh nuh sin mwet suc ma pahtlac kuhtuh an, ke srihpen kahfofo luhn inkacnek uh, in sokwack sie siyah ke elos tuhkuh uh.

Lwen na wowo se pa inge—lwen in toeni se. Kuht lohng on kahto wolacna mihsenge. Pacl nuh kwewa nga lohng choir kuh organ kuh piano, nga nuhnkuh ke ninac kiyuck, suc fahk, “Nga luhngse ma yohk nuh kwewa ma utuckoht nuh sum, ma wo kom tuh eis, ac orekma nuh kwewa kom oruh uh. Auli sefanna luhk pa kom tiac muhtweng ke piano.” Kuloh, Ninac. Nga finsrak pac.

Fuhkah woiyac, tamuhlwel ac tahmtahel wiyuck, in pain kowos nuh ke Toeni Luhlahp ke Tahfuhn Yac ahk Siofok Alngucul Luo ke Alu luhn Jisus Kraist luhn Mwet Luhlahlfongi ke Lwen-sahflah.

Ke pacl kuht ohsun ke mahlwem ohnkohsr tari ah, tempuhl tolu kihsaclah, ac tempuhl se sulpac kihsaclah. Ke Mei, nga kuloh in kihsackuhnlah Tempuhl kahto Kansas City Missouri ac wi ahkfuhlwactye luhn tempuhl uh. Nga ac sruhmuhn ahkfuhlwactye se ingacn in yohk ke sramsram luhk olutu uh.

Ke Jun, Prestuhn Dieter F. Uchtdorf el kihsackuhnlah tempuhl fin acn Manaus, Brazil, ma mwet ingacn tuhpan ke pacl loeloes, ac ke Septempuh, Prestuhn Henry B. Eyring el sulpac kihsackuhnlah tempuhl luhn Buenos Aires, Argentina, tempuhl se ma nga sruikihn in kihsackuhnlah ke yac 27 tari ah. Ke wik luo tari ah, Prestuhn Boyd K. Packer el kihsackuhnlah Brigham City Tempuhl wolacna ke acn sel ma el isuslac ac tuhfweyucklac we.

Oacna ke nga fahk tari, wacngihn lohm in Alu yohk srihpac likina tempuhl se, ac kuht kuloh lah oasr tempuhl 139 orekmakihnyuck fin facluh ingena, ac oasr tempuhl 27 sruhmuhnyuck kuh in oreklac. Kuht tarilacna ke lohm sacohk inge ac mwe insewowo elos use nuh ke moul lasr uh.

Olutu nga engan in ahkkahlwemye tempuhl luo, suc ke mahlwem ac yac fahsruh uh, fah muhsahiyucklac ke yac inge: Tucson, Arizona, ac Arequipa, Peru. Mwe ahkuhtweyac ke tempuhl inge fah utuckuh ke pacl fahsruh uh ke eltahl eis lwelah kac uh.

Tamuhlwel ac tahmtahel, nga ac ingena som nuh ke sie pacna ma sahyac—kuhlwacnsap luhn misineri.

Ke kuhtuh pacl Prestuhnsi Se Met ac U luhn Mwet Sap Singucul Luo lwelah mukul fuhsr ke kain in acn uh in kuhlwacnsap ke yac 18 ke elos suwohs, kuh, ac ahksahfyelah high school ac ahkkahlwemye kena pwacye in kuhlwacnsap uh. Ma inge pa sie masap ke kain acn ac lwelah tausin sin mukul fuhsr in kuhlwacnsapuh misin suwohs ac oacyacpac ahkfalye ma enenuh nuh ke military ac pacl wowo ke lutlut.

Puhlakihn lasr yurin misineri yac 18 inge pa ma wo uh. Misin prestuhn lalos uh ripohrti lah elos ahkostwen, luhlahlfongi, mahtuh, ac kuhlwacnsap oacna misineri mahtuh suc kuhlwacnsapuh misin sac pacna uh. Luhlahlfongi, ahkostwen, mahtuh lalos uh orwaclah kuht in kena ohiyac ingacn pacna in kuhlwacnsapuh misineri sa nuh sin mukul fuhsr nuh kwewa, macnsis acn elos tuhkuh we me an.

Nga pwacr in ahkkahlwemye lah muhtwacwacack ingena, mukul fuhsr suwohs ac kuh nuh kwewa suc srolah liki high school kuh ma oacna sie, macnsis acn elos muhta we an, elos kuh suleyucklac nuh ke kuhlwacnsap luhn misineri muhtwacwacack ke yac 18 sahyacn yac 19. Nga tiacna fahk lah mukul fuhsr nuh kwewa fah—kuh enenuh—in sa in kuhlwacnsap ke yac inge. Likina, fal nuh ke ohiyac luhn kais sie, oacna ke sie nuhnuhnkuh luhn mwet kol ke pristut uh, ma inge oasr ingena.

Ke kuht motko in pruhe ke yac ma mukul fuhsr uh kuh in muhtwacwacack kuhlwacnsap ke misineri lalos uh, kuht oacyacpac sang nuhnak nuh ke matwac ma sie muhtwacn fuhsr kuh in kuhlwacnsap. Mihsenge nga pwacr in ahkkahlwemye lah muhtwacn fuhsr ma kuh ac suwohs suc kena in kuhlwacnsap uh kuh in suleyucklac nuh ke kuhlwacnsap luhn misineri muhtwacwacack ke yac 19, sahyacn na yac 21.

Kuht ahkkweyelah lah orekma luhn misineri uh pa sie kunohkohn luhn pristut—ac kuht ahkkweye mukul fuhsr nuh kwewa suc suwohs ac suc fokoko in mahno ac kuh in nuhnak, in topuk pahng in kuhlwacnsap uh. Muhtwacn fuhsr pucspucs kuhlwacnsap pac, tuhsruhktuh elos tiac enenuh ma ingacn in kuhlwacnsap oacna mukul fuhsr uh. Kuht ahkkweye tahmtahel fuhsr ke Alu uh, lah elos orwaclah sie kahsruh yohk srihpac oacna misineri uh, ac kuht pain kuhlwacnsap lalos uh.

Kuht srwackna enenuh siyacnyacn mahtuh uh in kahsruh. Kowos fin kuh, ke kowos ahkolah ke retirement, ac fin kowos tiac mas, nga kaifwe kowos in ahkolah in wi misineri ke pacl nuh kwewa. Kwewana mukul ac muhtwacn pahyuck fah eis yohk engan likina met ah ke elos tuhkweni kuhlwacnsapuh tuhlihk nuhtin Pahpah tuhmwacsr uh.

Ingena, tamuhlwel ac tahmtahel wiyuck, lwelah kuht in lohng pweng ma ac tuhkuh ke toeni nuh kwewa ke lwen luo inge, tuh kuht kuh in puhla Nguhn luhn Leum ac eis lahlmwetmwet El kena kuht in eis. Nga pruhe tuh ma inge kuh in sikyak nuh sesr ke inen Jisus Kraist, amen.