O Le Alii Perisitua
E mafai ona avea oe ma se faataitaiga maoae, o se tasi e faaleogalua, po o se faataitaiga leaga. Atonu e te mafaufau e le afaina lea ia te oe, ae e afaina i le Alii.
E tofu uma i tatou ma toa, aemaise lava a o tatou laiti. Na ou fanau ma ola ae i Princeton, New Jersey, i le Iunaite Setete. O le au taaalo sili ona tautaua e lata i le mea sa matou nonofo ai na faamautu lea i le Aai o Niu Ioka. O le nofoaga lea o au peisipolo faapolofesa e tolu i na aso ua leva: o le Brooklyn Dodgers, le New York Giants, ma le New York Yankees. Na sili foi ona lata ane Filatofiā i lo matou fale ma sa nonofo ai au peisipolo o le Athletics ma Phillies. Sa toatele ni toa peisipolo faaolioli mo au i na au.
O Joe DiMaggio, lea sa taalo i le New York Yankees, na avea ma au toa peisipolo. A matou taaalo peisipolo ma ou uso ma au uo i lotoa o le aoga i autafa o lo matou fale, ou te taumafai lava e sasau le pate i le ala ou te mafaufau o sasau ai e Joe DiMaggio. O vaitaimi na a o lei i ai ni televise (o le talafaasolopito anamua lenei), o lea sa na o ata mai nusipepa sa ou mauaina e faaaoga e kopi ai lana sasau.
A o ou tuputupu ae, sa ave au e lou tama i le Faletaalo tele a le Yankee. Na o le pau lena o le taimi sa ou vaai ai o taalo Joe DiMaggio. E pei lava o ou i ai iina, i lou vaai faalemafaufau ia te ia o sasauina le pate ma iloa atu le lele sao i luga o le peisipolo paepae i tulaga i le malae ogatotonu.
E lei taitai lava lalata atu ou tomai faapeisipolo i ou toa na a o ou tamaitiiti. Ae o nai taimi ia sa lelei ai lau ta i le peisipolo, sa ou kopiina le tulaga o le malosi o lana sasau i le mea e gata ai lou mafai.
A tatou filifiliina ni toa, tatou te amata i le kopiina, ma le iloa po o le leiloa, o le mea e sili ona tatou faamemelo i ai ia i latou.
O le mea e sili ai, na tuuina e ou matua atamamai ni toa maoae i lou ala a o ou laitiiti. E na o le faatasi lava ona aveina au e lou tama i le Faletaalo tele o le Yankee e matamata i lau toa peisipolo o taalo, ae o Aso Sa uma na te tuu mai ai ia te au e matamata i se alii perisitua lea na avea ma se toa. O lena toa na faatulagaina lou olaga. Na avea lou tama ma peresitene o le paranesi i lo matou tamai paranesi lea na faia i lo matou fale. I le isi auala, afai e te oo mai i lalo o le fogafale muamua i le taeao o le Aso Sa, ua e i ai i totonu o le lotu. E lei silia lava ma le 30 tagata e auai i lo matou paranesi.
Sa i ai se alii talavou na te aumaia lona tina i le taavale i lo matou fale mo le sauniga, ae na te le sau i totonu o le fale. E le auai i le lotu. O lou tama lea sa faamanuiaina e ala i le alu atu i fafo ia te ia i le mea sa paka ai lana taavale ma valaauina o ia i totonu o lo matou fale. Na papatisoina o ia ma avea ma ou taitai Perisitua Arona muamua ma na o le pau lava lena. Na avea o ia ma ou toa perisitua. Ou te manatua pea le faatagata laau sa ia aumai ia te au o se taui ina ua uma ona ma faataunuuina se galuega faatino o le tataina o fafie mo se fafine ua maliu lana tane. Sa ou taumafai ia pei o ia i soo se taimi lava ou te tuuina atu ai ni faaviiviiga talafeagai i se auauna a le Atua.
Sa ou filifiliina se isi toa i lena lava tamai paranesi o le Ekalesia. O ia o se Maligi o le Iunaite Setete lea na sau i la matou sauniga o ofuina lona toniga maligi lanumeamata. O le taimi lea o le taua, ma i lena lava mea na avea ai o ia ma ou toa. Na auina atu o ia i le Iunivesite o Princeton e le maligi e faalautele lana aoga. Ae o le mea na sili atu nai lo le matauina o lona toniga faamiliteli, sa ou matamata o ia taalo i le Faletaalo tele i Palmer o se kapeteni o le au lakapi [faa Amerika] a le Iunivesite a Princeton. Sa ou vaai o ia taalo i le au pasiketipolo a le iunivesite ma matamata foi o ia taalo o le sapo polo tautaua a le latou au peisipolo.
Ae o le mea na sili atu, sa ia sau i lou fale i le aluga o le vaiaso e faasino mai ia te au le togiina o se pasiketipolo i ou lima uma tauagavale ma le taumatau. Sa ia tau mai ia te au o le a ou manaomia lena tomai aua o le a ou taalo pasiketipolo i se aso. Sa ou leiloaina i lena taimi, ae mo le tele o tausaga sa avea o ia ma se faataitaiga o se alii perisitua faamaoni ia te au.
O le a avea outou taitoatasi o se faataitaiga o se alii perisitua e tusa lava pe tou te mananao i ai pe leai. Ua avea outou ma se lamepa susulu ina ua outou taliaina le perisitua. Na tuuina outou e le Alii i se tuugalamepa e faamalamalamaina le ala mo tagata uma o siomiaina outou. E matua moni lava lena mea mo i latou o loo i la outou korama o le perisitua. E mafai ona avea oe ma se faataitaiga maoae, o se tasi e faaleogalua, po o se faataitaiga leaga. Atonu e te mafaufau e le afaina lea ia te oe, ae e afaina i le Alii. Na Ia fetalai mai i le ala lenei:
“O outou o le malamalama o le lalolagi outou. E le mafai ona lilo le aai ua tu i luga o le mauga.
“Latou te le tutuina foi le lamepa i le tuu ai i lalo o le mea e fua ai saito, a e tuu i luga lava o le tuugalamepa ia pupula atu ai i e o i le fale uma.
“Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi.”1
Ua ou manuia i faataitaiga a tagata maoae na umia le perisitua i korama sa faamanuiaina au ou te galue ai. E mafai ona outou faia mea sa latou faia mo au i le avea ma se faataitaiga mo isi e mulimuli i ai.
Ua ou iloaina ni uiga masani se tolu o e umia le perisitua na avea ma ou toa. O le tasi o se mamanu o le tatalo, o le lua o se uiga masani o le auauna atu, ma le tolu o se filifiliga mausali ina ia faamaoni.
Tatou te tatalo uma lava, ae o le tagata e umiaina le perisitua tou te fia avea ai e tatalo soo ma le loto i ai. I afiafi o le a outou tootutuli ma faafetai i le Atua mo faamanuiaga o le aso. O le a outou faafetai ia te Ia mo matua, mo faiaoga, ma mo faataitaiga maoae e mulimuli i ai. O le a outou faamatalaina faapitoa i a outou tatalo po o ai ma pe na faapefea foi ona faamanuiaina o outou olaga i lena aso. O le a alu ai ni nai minute ma e sili atu foi nai lo sina manatu. O le a faateia ma suia ai oe.
A outou tatalo mo le faamagaloga, o le a outou faamagalo atu i isi. A outou faafetai atu i le Atua mo Lona agalelei, o le a outou mafaufau i isi, e ala i o latou igoa, o e manaomia lo outou agalelei atu. O le a toe faateia outou i aso uma i lena aafiaga, ma o le a suia ai oe e lena mea i le aluga o taimi.
O se tasi o auala o le a suia ai oe i sea ituaiga tatalo faatauanau, ou te folafola atu ia te oe, o le a e lagonaina moni o oe o se atalii o le Atua. A e iloaina o oe o se atalii o le Atua, o le a e iloaina foi e tele mea o Ia faamoemoe mai ia te oe. Ona o oe o Lona atalii, Na te faamoemoeina oe e te mulimuli i Ana aoaoga ma aoaoga a Lona Alo pele, o Iesu Keriso. O le a Ia faamoemoeina oe ina ia limafoai ma agalelei atu i isi. O le a faanoanoa o Ia pe afai e te faasausili ma manatu faapito. O le a Ia faamanuiaina oe ina ia i ai le naunautaiga e faamuamua mea e fiafia i ai isi nai lo oe lava.
O nisi o outou ua leva ona avea ma faataitaiga o auaunaga faaleperisitua le manatu faapito. I malumalu i le lalolagi atoa, e taunuu ē umia le perisitua a o lei tafa ata. Ma o nisi e auauna pea e oo i le leva o le po. E leai se faamamaluga po o se faalauiloa faalauaitele i lenei lalolagi mo lena ositaulaga o le taimi ma taumafaiga. Na matou o ma tagata talavou a o latou auauna atu ia i latou o i le lalolagi o agaga, o e ua le mafai ona maua faamanuiaga o le malumalu mo i latou lava.
A ou vaai atu i le fiafia nai lo le lelavava i foliga o i latou o e auauna atu iina i le taeao ma le afiafi, ou te iloa e maoae taui i lenei olaga mo lena ituaiga auaunaga faaleperisitua le manatu faapito, ae ua na o se faatusa itiiti o le olioli o le a latou faasoaina ma i latou o loo latou auauna atu i ai i le lalolagi o agaga.
Ua ou vaai i lena lava fiafia i foliga o i latou o e talanoa atu i isi e uiga i faamanuiaga lea e oo mai i le auai i le malo o le Atua. Ou te iloa se peresitene o se paranesi e toeitiiti lava o aso uma na te aumaia ai tagata i faifeautalai ia latou aoaoina. I ni nai masina na muamua atu sa lei avea o ia o se tasi o le Ekalesia. I le taimi nei ua i ai faifeautalai o loo aoao atu ma ua i ai se paranesi ua faatupulaia le aofai ma le malosi ona o ia. Ae e sili atu nai lo lena, o ia o se malamalama i isi o e o le a tatalaina o latou gutu ma faanatinati le faapotopotoina e le Alii o le fanau a le Tama Faalelagi.
A o e tatalo ma auauna atu i isi, o le a tuputupu ae lou malamalama o oe o se atalii o le Atua ma ou faalogona e uiga ia te Ia. O le a e nofouta atili e faanoanoa o Ia pe afai e te le faamaoni i soo se auala. O le a e naunau atili e tausia lau upu i le Atua faapea ma isi. O le a leai sou naunautaiga i le aveina o soo se mea e le o oe e anaina. O le a e faamaoni atili i ou pule. O le a e naunau atili ina ia taunuu i le taimi sao ma faamaea soo se galuega ua tuuina atu ia te oe e le Alii lea na e talia e fai.
Nai lo le mafaufau pe o le a o atu a latou faiaoga o aiga, o le a tulimatai atu ma le naunautai tamaiti o aiga ua tofia oe e te faiaoga ai, i lau asiasiga. Na maua e la’u fanau na faamanuiaga. A o latou tuputupu ae, sa latou maua ni toa perisitua na fesoasoani ia i latou i le setiina o o latou lava ala i le auauna atu i le Alii. O lena faataitaiga faamanuiaina ua pasi atu nei i le augatupulaga lona tolu.
O lau savali o se tasi foi o le lotofaafetai.
Ou te faafetai ia te outou mo a outou tatalo. Ou te faafetai ia te outou mo le o ifo i o outou tulivae i le iloaina o le mea moni e le o ia te outou uma ni tali. Tou te tatalo i le Atua o le lagi e faailoa atu lou agaga faafetai ma ina ia aioi atu mo Ana faamanuiaga i luga o outou olaga ma o outou aiga. Ou te faafetai ia te outou mo a outou auaunaga i isi ma mo taimi na e te le lagonaina ai se manaoga mo le faamamaluina o lau auaunaga.
Ua tatou taliaina le lapataiga a le Alii afai tatou te sailia viiga i lenei lalolagi mo a tatou auaunaga e ono taofia mai ia i tatou faamanuiaga silisili. O le a e manatuaina nei upu:
“Ia outou, nei avatu ni a outou mea alofa i luma o tagata, ina ia iloa ai e i latou: a faapea, ona leai ai lea o so outou taui mai lo outou Tama o i le lagi.
“O lea a e avatu ai ni mea alofa, aua nei e ilia le pu i ou luma, pei ona faia e tagata pepelo i sunako ma ala, ina ia viia o i latou e tagata. E moni, ou te fai atu ia te outou, ua maua e i latou lo latou taui.
“A e avatu ni mea alofa, aua nei iloa e lou lima tauagavale le mea ua faia e lou lima taumatau:
“Ina ia lilo au mea alofa: o lou Tama foi, o le silafia i le mea lilo o ia lava na te avatu faaaliali se taui ia te oe.”2
E lei iloaina e i latou na avea ma ou faataitaiga sili o e umia le perisitua, o loo ia i latou ni uiga faatagatatoa. O le mea moni, e foliga mai na faigata ona latou vaaia na mea na sili ona ou faamemelo i ai. Sa ou ta’ua lou tama o se peresitene faamaoni o se tamai paranesi o le Ekalesia i New Jersey. Na avea mulimuli ane o ia o se tasi o le au faatonu aoao o le Aoga Sa mo le Ekalesia. Ae ou te faaeteete e talanoa atu i le asō ma le faamaualalo e uiga i lana auaunaga i le perisitua, aua sa tauagafau o ia.
E moni e faapena foi mo le maligi lea sa avea ma ou toa i lou laitiiti. Na te le talanoa mai ia te au e uiga i lana auaunaga faaleperisitua po o mea na ia faia. Na o le tuuina atu lava o se auaunaga. Na ou iloa lona faamaoni mai isi. Afai na i ai se taimi na ia iloa ai ia uiga ia te ia lava lea sa ou faamemelo i ai, sa le mafai ona ou iloaina.
O lea la o lau fautuaga ia te oe lea e manao e faamanuia isi i o outou perisitua, e tatau ona faia i lou olaga le mea e faalilolilo i tagata uma vagana ai le Atua.
Tatalo atu ia te Ia. Faafetai atu ia te Ia mo mea lelei uma i lou olaga. Fesili atu ia te Ia ina ia iloa po o ai tagata sa na Ia tuu i lou ala e te auauna atu i ai. Ole atu ia te Ia ina ia fesoasoani ia te oe e tuu atu lena auaunaga. Tatalo ina ia mafai ona e faamagalo atu ma mafai ona faamagaloina oe. Ona auauna atu lea ia i latou, alofa ia i latou, ma faamagalo ia i latou.
O le mea sili o na mea uma, manatua o auaunaga uma e te tuuina atu, e leai se mea e sili atu nai lo le fesoasoani atu i tagata e filifili ina ia agavaa mo le ola e faavavau. Ua tuuina mai e le Atua ia i tatou lena taitaiga sili i le ala e faaaoga ai la tatou perisitua. O Ia o se faataitaiga sili. O le faataitaiga lenei ua tatou vaai i ai i se vaega itiiti o le mea sili o Ana auaunaga faaletino:
“Ma sa fetalai mai le Alii le Atua ia Mose, ua fai mai: O lagi, e tele, ma e le mafai ona faitaulia i latou i le tagata; ae ua faitaulia i latou ia te a’u, ona e a a’u i latou.
“Ma e pei ona o le a mavae atu le tasi lalolagi, ma ona lagi o le a faapea foi ona tu mai se isi; ma e leai se gataaga i a’u galuega, pe i a’u upu.
“Aua faauta, o la’u galuega ma lo’u mamalu lenei—ia aumaia le tino ola pea ma le ola faavavau o le tagata.”3
O i tatou e fesoasoani i lena galuega. E mafai e i tatou taitoatasi ona faia se eseesega. Ua uma ona saunia o tatou taimi ma nofoaga i aso amuli mo lena galuega paia. Ua faamanuiaina i tatou taitoatasi i faataitaiga a i latou o e ua avea lena galuega ma faamoemoega sili ona taua o o latou taimi i le fogaeleele.
Ou te tatalo ina ia mafai ona tatou fesoasoani i isi ina ia tulai ae i lena avanoa.
O loo soifua le Atua le Tama ma o le a taliina a outou tatalo mo le fesoasoani o loo outou manaomia e auauna lelei atu ai ia te Ia. O Iesu Keriso o le Alii toetu. O Lana Ekalesia lenei. O le perisitua o loo outou umiaina o le mana lea e galue ai i Lona suafa i Lana galuega e auauna atu ai i fanau a le Atua. A o outou tuuina atu o outou loto atoa i lenei galuega, o le a Ia faalauteleina outou. Ou te folafola atu ai i le suafa o Iesu Keriso, lo tatou Faaola, amene.