O Le Toetu o Iesu Keriso
O Iesu le Nasareta o le Togiola toetu, ma ou te molimau atu i mea uma o mulimuli mai e uiga i le moni o Lona Toetu.
O se lagona lofituina o le toilalo ma le faanoanoa na fusia ai Ona soo a o puapuagatia Iesu ma maliu ai i luga o le satauro ma tuuina atu Lona tino i le tuugamau. E ui i le faatele ona ta’u atu e le Faaola Lona maliu ma le toetu, ae sa latou te lei malamalama lava. Peitai, o le aoauli faanoanoa o Lona Faasatauroga na vave ona sosoo ai ma le taeao olioli o Lona Toetu. Ae sa na o le pau le mea na oo mai ai lena olioli ina ua avea le au soo ma molimau patino o le Toetu, aua na oo lava i le tautinoga a agelu ua toetu o Ia sa lei muai malamalama i ai—o se mea sa matuai lē mafaufauina lava.
O Maria le Makatala ma nai isi tamaitai faamaoni na vave o mai i le tuugamau o le Faaola i lena taeao o le Aso Sa, e aumai mea manogi ma suauu e faamaea ai le uuina o le tino o le Alii lea na amata uu ina ua vave tuuina i le tuugamau ae ua tulata i le Sapati. I lea taeao faapitoa, sa faafeiloaia ai i latou e se tuugamau avanoa, ua fuli ese le maa na pupuni ai, ma sa tautino mai agelu e toalua:
“Se a le mea tou te saili ai le ua soifua i e ua oti?
“E le o iinei o ia, a ua tu; ia outou manatu i lona fetalai atu ia te outou, ina o i Kalilaia o ia,
“Ua faapea atu, E tatau ona tuuina atu o le Atalii o le tagata i lima o tagata agasala, ma ia faasatauroina, ma toe tu mai i le aso tolu.”1
“O mai, ina matamata i le mea na tuu ai le Alii.
“Ina o atu ia ia vave, lua te tau atu i ona soo, ua toe tu mai o ia nai e ua oti.”2
E pei ona poloaiina ai e agelu, na vaai atu Maria le Makatala i totonu o le tuugamau, ae na foliga mai na pau lava le mea na ia matauina ua leai se tino o le Alii. Sa tele’a’i atu o ia e ta’u atu i Aposetolo, ma na mauaina Peteru ma Ioane ma ta’u atu ia i laua, “Ua latou aveeseina le Alii i le tuugamau; matou te le iloa foi le mea ua latou tuuina ai o ia.”3 Na taufetuli atu Peteru ma Ioane i le nofoaga ma faamaonia ai e moni lava ua avanoa le tuugamau, ua vaai i le “ie na tanumia ua tuu … ma le solosolo sa i lona ao … ma taataai i le tasi mea.”4 Na foliga mai o Ioane lea na muai iloa le savali matagofie o le toetu. Na ia tusia “ua vaai atu ona talitonu lea o ia,” ae o isi i lena taimi, “e lei iloa ai e i latou le Tusi, e toe tu [Iesu] nai e ua oti e tatau ai.”5
Na o ese Peteru ma Ioane, ae nofo ai pea Maria ma le tagi. I lena taimi na toe foi atu agelu ma fesili atu ma le alofa ia te ia, “Funa e, se a le mea e te tagi ai? Ua faapea atu ia ia te i laua, Aua ua latou ave ese lou alii, ou te lei iloa foi le mea ua latou tuuina ai o ia.”6 I lena taimi na tu le Faaola toetu i ona tua ma fetalai atu, “Funa e, se a le mea e te tagi ai, O ai ea e te sailia? A o le fafine, fa te ia o le leoleo ia o le fanua, ua fai mai ia te ia, Le alii e, afai ua e ave ese ia te ia, tau mai ia ia te au po o fea le mea ua e tuuina ai o ia; ona ou aveeseina lea o ia.”7
Na tusia e Elder James E. Talmage: “O Iesu lava lea na ia talanoa i ai, o lona Alii pele, ae na te lei iloaina. E tasi lava le upu mai Lona fofoga na suia ai lona mafatia tiga i le matuai fiafia. ‘Ua fetalai atu Iesu ia te ia, Maria e.’ O le siufofoga, o le matāleo, o le fofoga mālū sa ia faalogo ma fiafia i ai i aso na muamua atu na ia le toe lagonaina ai le matuitui o le faanoanoa lea na lofituina ai o ia. Sa ia faliu atu, ma vaaia le Alii. I le olioli tele ai sa ia aapa atu ai e opo mai o Ia i ona lima, ma tau atu na o upu faatauanau ma migao, ‘Raponi e,’ o lona uiga, Lou Matai pele.”8
Ma sa avea lenei tamaitai faamanuiaina ma uluai tagata na vaai ma talanoa i le Keriso toetu. I se taimi mulimuli ane i lena lava aso sa Ia faaali atu ia Peteru i Ierusalema po o se mea e latalata i ai;9 i soo e toalua i le ala i Emau;10 ma i le afiafi i Aposetolo e toa 10 faapea ma isi, lea na faafuasei ona Ia faaali atu ia i latou, ma fetalai atu, “Ia outou vaavaai mai i ou lima ma ou vae, aua o au lava lenei; ia outou tagotago mai ia te au, ma ia vaavaai mai; aua o le agaga e leai sona aano ma ni ivi, pei o au nei ua outou vaavaai i ai.”11 Ona toe faatalitonuina atili lea o i latou ona sa “lei talitonu i latou ona ua olioli, ma ua ofo,”12 Na Ia taumafaina se fasi i’a tunu ma le melikerio i o latou luma.13 Mulimuli ane sa Ia faatonuina i latou, “E fai foi outou ma molimau ia te au i Ierusalema ma Iutaia uma lava, ma Samaria, e oo lava i le tuluiga o le lalolagi.”14
E ese mai i nei molimau maumaututu i Ierusalema, ua i ai ia i tatou le galuega lemafaatusalia a le Alii toetu i tagata anamua o le Itulagi i Sisifo. Na Ia afio ifo mai le lagi i le laueleele o Nuumau, ma valaaulia le motu o tagata na potopoto ai, pe a ma le 2,500, ina ia taitoatasi ma o atu uma, ma pa’i atu o latou lima i Lona itu ma tagotago i pu o fao i Ona lima ma Ona vae.15
“Ma ina ua uma ona latou o atu uma ma molimau mo i latou lava, sa latou alalaga faatasi, ua fai mai:
“Osana! Ia faamanuina lava le suafa o le Atua Silisili Ese! Ma sa latou faapauu i lalo i vae o Iesu, ma tapuai atu ia te ia.”16
O le Toetu o Keriso na faaalia ai e tutoatasi ma faavavau lava o Ia. “Aua faapei o le Tama e i totonu ia te ia lava le ola; e faapea foi ona foai mai e ia i le Atalii, ia i totonu ia te ia lava le ola.”17 na fetalai mai ai Iesu:
“O le mea lea e alofa mai ai le Tama ia te au, aua ou te tuuina atu lou ola, ina ia ou toe au mai ai.
“E leai se tasi na te aveeseina ia te au, a e peitai au, ou te tuuina atu e au lava. O ia te au le pule e tuuina atu, o ia te au foi le pule e toe au mai ai.”18
E le faalagolago le Faaola i meaai po o vai po o le okesene po o soo se isi lava elemene, mana, po o se tagata mo le ola. O Ia o Ieova ma le Mesia, o Ia o le O A’u Silisili, o le Atua e soifua i Lona lava mana.19 O loo soifua ma e soifua pea e faavavau.
E ala i Lana Togiola ma le Toetu, ua manumalo ai Iesu Keriso i vaega uma o le Pa’ū. O le oti faaletino o le a na o sina taimi le tumau, ma e oo lava i le oti faaleagaga ua i ai sona mutaaga, aua o le a tatou toe foi uma i le afioaga o le Atua, mo na o sina taimi le tumau, ina ia faamasinoina. E mafai ona tatou tuuina atu atoa lo tatou faatuatuaga ma le talitonuga i Lona mana ina ia faatoilaloina mea uma ma aumaia ia i tatou le ola e faavavau.
“Aua ua oo mai le oti talu le tagata, ua oo mai foi le toe tutu o e ua oti talu le tagata.
“Aua faapei ona oti uma ia Atamu e faapea foi ona faaolaina uma ia Keriso.”20
I upu a Elder Neal A. Maxwell: “O le manumalo o Keriso i le oti na faamutaina ai faigata faaletagata. I le taimi nei ua na o faigata a le tagata lava ia, ma o nei foi mea e mafai ona laveaiina ai i tatou e ala i le mulimuli i aoaoga a ia o le na laveaiina i tatou mai le oti lautele.”21
O le faamalieina o manaoga o le faamasinotonu, ua afio ai nei Keriso i le nofoa o le faamasinotonu; pe atonu tatou te faapea, o Ia o le faamasinotonu, e pei lava foi o Ia o le alofa.22 E faapena foi, e le gata i le avea ai ma Atua ua atoatoa, ae o Ia foi o se Atua alofa mutimutivale.23 O lea, ua faasa’oina ai e le Faaola ia mea uma. E le tumau le faailogatagata i le olaga faaletino, e oo lava i le oti, aua na Ia toefuatai mai le ola. E leai se manua, le atoatoa, faalataina, po o le sauaina e le tauia i le iuga ona o Lana faamasinotonu mulimuli ma le alofa mutimutivale.
I lena lava faailoga e tasi, tatou te tali atu ai ia te Ia mo o tatou olaga, a tatou filifiliga, ma a tatou amioga, e oo lava i o tatou manatu. Ona sa Ia togiolaina i tatou mai le Pa’ū, ua moni ai o Ia e Anaina o tatou ola. Na Ia tautino mai:
“Faauta, ua ou tuu atu ia te outou lau talalelei, ma o le talalelei lenei ua ou tuu atu ia te outou—e faapea, ua ou sau i le lalolagi e fai le finagalo o lou Tama, aua na auina mai au e lou Tama.
“Ma na auina mai au e lou Tama ina ia sii ae au i luga o le satauro; ma a mavae ona sii ae o au i luga o le satauro, ina ia mafai ona ou aumai o tagata uma ia te au, ina ia pei ona sii ae o au i luga e tagata ia faapea foi ona sii ae i luga o tagata e le Tama, e tutu i ou luma, e faamasinoina i a latou galuega.”24
Mafaufau mo sina taimi i le taua o le Toetu i le iloaina ai atoatoa o le faasinomaga moni o Iesu le Nasareta ma foia ai finauga ma fesili faalefilisofia o le olaga. Afai e moni lava na toetu Iesu, o lona uiga e mautinoa lava o Ia o se tagata paia. E leai se tagata ola ua i ai se mana e toe ola mai ai pe a mavae le oti. Ona sa toetu o Ia, e le mafai ai la ona faapea o Iesu ua na o se kamuta, se faiaoga, se aoao, po o se perofeta. Ona sa toetu o Ia, e ao la ona avea Iesu ma se Atua, o le Alo e Toatasi na Fanaua o le Tama.
O lea, o mea sa Ia aoaoina e moni; e le mafai ona pepelo le Atua.25
O lea, o Ia o le Foafoa o le lalolagi, e pei ona Ia fetalai mai.26
O lea, e moni le lagi ma seoli, e pei ona Ia aoao mai.27
O lea, e i ai se lalolagi o agaga lea sa Ia asiasi i ai ina ua mavae Lona maliu.28
O lea, o le a Ia toe afio mai, e pei ona fetalaia e agelu,29 ma “nofotupu patino i luga o le fogaeleele.”30
O lea, o le a i ai se toetutu ma se faamasinoga mulimuli mo tagata uma.31
Ona o le moni o le Toetu o Keriso, o masalosaloga la e uiga i le mana silisiliese, malamalama atoatoa, ma le agalelei o le Atua le Tama—o le sa tuuina mai Lona Alo e Toatasi na Fanaua mo le togiolaina o le lalolagi—ua le moni ia. O masalosaloga e faatatau i le uiga ma le faamoemoega o le olaga e le faamaoniaina. E moni lava ua na o Iesu Keriso le suafa po o le ala lea e oo mai ai le olataga i tagata. E moni le alofa tunoa o Keriso, ua maua uma ai le faamagaloina ma le faamamaina o le tagata agasala ua salamo. E moni e sili atu le faatuatua i lo mea e mafaufauina po o se mea e fatuina e le mafaufau. O loo i ai le upumoni silisili ma le lautele, ma e i ai ni tulaga faatonuina lē faaituau ma lēmasuia e pei ona Ia aoaoina.
Ona o le moni o le Toetu o Keriso, o le salamo mai la i soo se soliga o Lana tulafono ma poloaiga o se mea e mafai ona fai ma ia vave ona faia. E moni vavega a le Faaola, e pei lava o Lana folafolaga i Ona soo ina ia latou faia foi lea lava mea e tasi, e oo lava i galuega sili atu.32 O Lana perisitua ua mautinoa lava o se mana moni lea e “pulea le talalelei ma umia le ki o mealilo o le malo, o le ki lava lea o le malamalama e uiga i le Atua. O lea, o ona sauniga, ua faaalia ai le mana o le faale-atua.”33 Ona o le moni o le Toetu o Keriso, o le oti la e le o lo tatou mutaaga lea, ma e ui foi e faatamaia e ilo o tatou tino, ae tatou te iloa atu le Atua i o tatou tino.34
Na faamatala e Peresitene Thomas S. Monson se alii e suafa ia Robert Blatchford, i le 100 tausaga ua mavae “i lana tusi God and My Neighbor, na ia matuai osofaia lava talitonuga faaKerisiano ua taliaina, e pei o le Atua, Keriso, tatalo, ma le tino ola pea. Na ia tautino ma le toa, ‘Ou te tautino atu ua ou faamaonia mea uma na ou manao e faamaoniaina atoatoa ma le sa’o e faapea e leai se Kerisiano, po o le a lava lona maoae ma lona atamai, e mafai ona taliina mai au finauga pe masalomia mea ua ou finauina.’ Sa matua malosi ona talitonuga sese na le mafai ai ona talia ni fautuaga mai nisi. Ona tupu lea o se mea na faate’ia ai. Na faafuaseia ona suia ona manatu sese. … Sa amata lemu ona ia toe foi i le faatuatua sa ia taufaifai ma ula i ai. O le a le mea na mafua ai lenei suiga tele i ona manatu? Na maliu lona toalua. Faatasi ai ma se loto nutimomoia, sa ia alu atu ai i totonu o le potu sa taoto ai lona tino maliu. Sa ia toe vaai i foliga sa ia alofa tele i ai. Ina ua alu ese mai o ia i fafo, sa ia faapea atu i se uo: ‘O ia lava le la, ae e le o ia le la. Ua suia mea uma. O se mea sa i ai muamua iina ua aveesea. Ua le toe tutusa o ia. O le a se isi mea e mafai ona aluese, e ese mai le agaga?’”35
Pe moni ea na maliu ma toetu mai le Alii? Ioe. “O mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso, e faapea na Ia maliu, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai.”36
A o latalata le fanau mai o Iesu lea na valoia, sa i ai faatasi i totonu o tagata sa Nifae ma sa Lamana anamua i latou o e sa talitonu, e ui o le toatele na masalosalo. Mulimuli ane, na oo mai ai le faailoga o Lona fanau mai—o se aso ma se po ma se aso sa leai se pogisa—ma na iloa e tagata uma.37 E oo lava i lenei vaitaimi, o nisi e talitonu i le Toetu moni o Keriso, ae toatele lava e masalosalo pe le talitonu. Ae o nisi ua iloa. I le faaiuga, o le a vaai ai ma iloa e tagata uma; e moni, “o le a tootuli tulivae uma, ma tautino atu laulaufaiva uma i ona luma.”38
Seia oo i lena taimi, ou te talitonu i le toatele o molimau i le Toetu o le Faaola o loo maua o latou aafiaga ma molimau i le Feagaiga Fou—o Peteru ma ona soo o le Toasefululua ma le pele o Maria le Makatala, faatasi ai ma isi. Ou te talitonu i molimau o loo maua i le Tusi a Mamona—o Nifae le Aposetolo ma le motu o tagata e lemailoa i le laueleele o Nuumau, faatasi ai ma isi. Ma ou te talitonu i le molimau a Iosefa Samita ma Sini Rikitone o e, i le mavae ai o le tele o isi molimau na folafola mai ai le molimau sili o lenei tisipenisione mulimuli, “o loo soifua o ia! Aua sa ma vaai ia te ia.”39 I lalo o le vaaiga a Ona fofoga e silafia mea uma, ou te tu atu ai o se molimau, o Iesu le Nasareta o le Togiola toetu, ma ou te molimau atu i mea uma o mulimuli mai e uiga i le moni o Lona Toetu. Tau ina ia e mauaina le talitonuga maumaututu ma le mafanafana o lena lava molimau e tasi, ou te tatalo ai i le suafa o Iesu Keriso, amene.