Náá Da’ahiiltsą́ąjį
Naakijį́ azlį́į́’ Diyin Iisizíinii nihitah hólǫ́ǫ dóó náásgo t’áá ákwííjį́ t’áá baaneedáhígíí ałdó nihił hólǫ́ǫdo.
Shik’is dóó shilahké, nizhónígo álah siidlį́į́’. Hastoi dóó sáanii diyin bizaad yee nihich’į̨ hada’hasdzíí’ígíí dahsidiits’ą́ą dóó bits’ą́ą́dóó diyin k’ehjí hwiidahsiidlį́į́’. Sin t’áá’íyisíí nizhóní dóó nihich’į ha’oodzíí’ígíí éí Diyin bi Ii’sizíinii bíká’eelwodgo ha’oodzíí’ dóó sodizin éí bee yá’ąąsh nihinaagó nahalin. T’áá ałtsǫhgó nihitah hóozhǫǫd ahił sodasidiilzįįd dóó dahosiitááł dóó ídahwil’ą́ą́’.
Laanaa nisin, díí áłah haleeh biyi’ nihich’į ha’oodzíí’ígíí yíídííłta, éí LDS.org jí hodíínáá’ígo béésh nitsíkeesí biyi’ wólta’ dooleeł áádóó naałtsoos Ensign dóó Liahona biyi’ ak’é’éschį́įdo, éí ałdó’ hazhó’í yíídííłtah dóó nidííłkaah.
Shił bééhózin, dii áłah hazlį́į́’ góne’ hastoi dóó sáanii bi naanish ałtso ádayiilaa áko k’ad béé’doolniih, dóó baa ahééh daniidzin. T’áá át’é nizhónígo nihiká’ííjéé’ dóó Bóhólníihii binaanish náásgó ádayiilaa. Bił ílį́įgo yindashnish.
Nihílá bee deigo dahsidiilnii’go, ła’ hastoi bik’ihodiinii’go binaanish bá ánáádaalyago bee lą́ dahsidlį́į́’. Baa ’ahéhasin dóó náásgo Bóhóníihii bá bił nideelnishgo bídaniidlį́įgo bił béédahózin do.
Nihich’į ha’oodzíí dóó dasidiits’ą́ą́, áko hazhó’ó baantsíikeesdo, adą́ą́dą́ą́ ádaniit’éhęę łahgo ádaniit’éedo. Ła’ doo nihígi’ át’ao da’oodlą́ą́da dóó beehaz’áanii łaho át’é ndi k’é daniidzindo dóó adajííníiba’do. Yisdá’iinííłii nahasdzáán yikáágii hastoi dóó sáani t’áá át’e ayóó’ó’ní dóó k’é yaa naneeztą́. Bí ákót’ééndę́ę́ ákoh nihí bik’eh áda’diilnííł.
Dííshjį́ nahasdzáán bikáagi nihidáágoo ach’į’anáhóót’i’ dahólǫ́, ndi nił hashne’, Nihizhé’é Yá’ąąshdi Hólóonii nihaa’ákonízin. Éí nihoo’ish dóó nihik’ijódlíido, nihee oodlą dóó ba’ííníidlíido dóó t’áá ha’át’íshį́į́ nanihił’ahígíí nihí ká’ adoolwoł.
Yá’ąąshdę́ę́’ nihik’ijódlíi doo. Nihighandi ayóó’ó’ní dóó hazhó’ó ałch’į adaniit’éedo dóó Diyin God Bi Iisizíinii nihighandi hólǫ́ǫ dooleeł. T’ááłahjį nihee oodłą baa’ádahwiilyą́ą̨do, áko ch’į́įdi nihaanát’į́įgo bitsą́ą́dóó niha’áhályą́ądo. Naakijį́ azlį́į́’ Diyin Iisizíínii nihita hólǫ́ áko t’áá ákwííjį́ ha’át’íshį́į́ baaneedá ndi ałdó’ nihiłholǫ́ǫdo, dóó t’áá łahjį Bóholníihii binaanish nihi naanishdo.
Shee oodlą́ nihił hashne’, díí naanish t’áá’aníí át’é, nihiIistá’iinííłii hiiná, dóó nahasdzáán bikáági Bisodizin Báhoghan yołwoł. Díí shił beehózin dóó shee oodlą át’é, Diyin God Hooláágo nihiZhé’é hiiná dóó ayóó’ánihó’ní. T’áá aníí nihiZhé’é nilį́, dóó biłahéehonidzin dóó t’áá’aníí nilį́. Díí baa’ ákódadiilzįįł, t’áá’íyisíí diyin k’ehjí nihaadoogááł yinízin, dóó t’áá’íyisíí nihíká’adoolwolgo yinízin, dóó ayóó’ánihó’ní.
Shik’is dóó Shilaké, Diyin God nik’ijódlíido dooleeł. Bí nihił nahoní’a, k’ad dóó t’ááłahjį nihita hózǫ́ǫdo dooleeł.
Hágoone’ nihidisní, hast’ą́ą́ nínáádeezidgo náá da’ahiidiiltsééł, dóó díí Jesus Christ bízhi binahjį ádishshí, nihi Bóhółníihii dóó nihi Yisdá’ Íiníiłii, amen.