![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fe4%2F8d%2Fe48df991f60664c34fd9b1e762be3dd8d3d754d0%2Fe48df991f60664c34fd9b1e762be3dd8d3d754d0.jpeg/full/!250,/0/default)
Pwe Ren kin Tamatamanki Ih Ahnsou Koaros
I kin pereniki kaskuhlki oh medemedewe mour en Ihr me kieng ie soahng koaros oh pil ong kitail koaros.
Ih mwahuki koul en Primary me kosoia:
Kosoiaiengie kosoipen Sises me I kin pereniki rong,
Soahng kan me I pahn peidengki ma e mih wasaht.
Kosoiepen ah mihmi pohn sahpw, kosoiepen ah mihmi pohn sehd,
Indadohng ie kosoipen Sises kan.1
I koapworopworki me ma kitail pahn tepda wiahkihla tiahk ehu en padahkiong neitail serih kan oh peneinei kan duwen Sises, e pahn wia kaskuhl mwau ehu ohng nan imwatail kan en kapwaiada kosoned en rahn en Sabad.
Met uhdahn pahn kin wahdo ngehno nan ihmwatail oh kounopada atail peneinei kan sang ni karasaras me kohsang rehn Sounkomouro.
I kin pereniki onopiki oh medewe duwen Sapwellime mour, me e ketkieng ngehi oh pil koaros.
I kin pereniki wadek ire kan me pidada duwen sapwellime mour me sohte dipe, oh mwurin ai kin wadek ire kan me kin kosoia duwen soahng kan koaros me e kin lelohng, I kin kihpene meseikat oh song en medewe mwekid sarawi kan me kin kaweid ie oh kakelakaiehda ni palingehn.
Soangen ahnsouo me:
-
Ni Ahnsou me e kandipih nan pwehlo oh, dolohda pwelo wiahda pwehlmatak, kihong ni mesen ohl me maskun o oh masanih ong ih, “Kohla, duhdu nan pihl en Siloam” oh ohlo peikiong, “oh kamwakeldahr, oh kilangadahr wasa.”2
-
Ni ahnsou me E kamwawiala lih me ahneki soumwahu en inta oh doahke imwin sapwellime likou, kamehlele me e pahn mwahula sang ah soumwahu sang ni a pahn doahke sapwellime likou o.3
-
Ahnsou me E pwarehng sapwellime wahnpoaron oko, ni ah alialu pohn sehd.4
-
Ahnsou me E iang sapwellime wahnparon oko pohn ahlen Emmaus oh kahreiong arail esehda mahsen ko.5
-
Ni ahnsou me e pwarehng aramas en America kan oh padakiong irail en kohdo reh ohkihlong pehrail kan ni pengepenge oh kehn lipwen mete kan ni peh kan oh neh kan, pwe irail en ese me Ih me Koht en Isreal, oh Koht en sampah, oh [me] kamakamla pwehki sang ni dipen tohn sampah.”6
I inenen pereniki ni ai ese me mie pahpa oh nohno me kin indaiong kosoiepen Krais ong neirail seri. I kasawi met ni ai kin kilang seri en nan mwomwodiso et, nan prokram en primary kan oh soahng kemwekid teikan.
I inenen kapingkiong ai nohno oh pahpa pwehki ara kasukulikin ie duwen Krais. I kin pepeusehweiete ni ei kin kilkilang karasaras en Sounkomour eh kin sewese ngehi oh ai pwoud ni aht kin padahki pein nait seri kan.
I kin inenen perenkihda ahnsou me I kilang nei seri kan arail kin kosoia kosoiepen Krais ong neirail seri kan. E kin katamadohngie ehu ire me I kin pereniki me mih nan 3 Sohn, iralaud 1, iretikitik 4, me masanih, “ I perenikihda kowahlap ei diarada me ekei noumw seri kan kin momourki me mehlelo.” Oh dahme neitail seri kan sohte kak ki?
I inenen kapingkiong atail kaun kan me kin nantiong padakiong kitail duwen Krais, oh wauneki rahn sarawi, oh ni atail kin ale kamadipw sarawi nan Rahn Sarawi kan pwe kitail en wauneki atail Sounkomour.
Rahn en Sapad oh kamadipw sarawi kin kapkaperenla ansou koaros ni atail kin onohnopki soik kan duen Krais. Ni atail pahn wia met, kitail kawada tiahk ehu me pahn kalaudehla atail pwoson oh kadehde oh pahn pil doare atail peneinei.
Nan wihk kei samwalahro, a ni ei wie ononopiki kapahrek ehu sang rehn Presiden Russell M. Nelson nan kapokon lap me samwalahro, oh ni ai medemedewe rahn en Sapad, I ahnekida pepehm kaselel ehu ni ai kin ahniki kapai oh ansou mwau en iang ale kamadipw sarawi. Ong ie, mwekid wo inenen kaselel, sarawi, oh ahnsou en pepehm en ngehno. I kin inenen pereniki ahnsou en mihting en kamadipw sarawi.
Ni ansou me I wie medemedewe, I nantieng tehk mwau kapai en pilawau oh pihl o. I wadek oh medemdewe mwau duwen kapakapakan oh tiahk en kamadipw sarawi. I tapiahda sang nan ai madamadau oh nan ai mongiong duwen doadoahkan ahr pwilisang kamadipw sarawio.
Ni ai medemedehwe, I medewehda nan rahn o, rahn keieu en kamadipw en pilawa me sohte dol, ahnsou me E, sapeng sapwellime wahnparon ko ong ni peidek en iawasa me re pahn kounopada pahsopa, e sapeng irail, masanih, “kohla nan kanihmwo, rehn ohl emen oh padakiong, Aht kaun masanih, ai ahnsou keren; I pahn wia ai kamadipw en pasohpa ni omw tungoal ihmw iangahki nei wahnpoaron akan.”7
I kin song medewe duwen wahnpoaron oko arail pwapwain mwenge oh ni keneinei kounopada tehpelo mwahu pwe irail en iang ih rahn kesempwalo: tehpel en aramas ehk silimen, Ih iangahki sapwellime wahnpoaron ehk riemen, me e kin inenen poakohng.
I kin sengiseng ni ahnsou me I kin kilang Krais ah iang irail mwengemwenge, ahnsou me e masanih, “ahpw met I indaiong kumwail, me emen kumwail pahn pangiehla.”8
I kin medewe duwen wahnpoaron ko ahr pahtoula oh kin peidek, “ maing ai kaun ngehi?9
Oh ahnsou me Sudas idek reh soangen peidek ohte, E sapengki ni meleilei, “Kowe me kosoia.”10
I kak medewe peh kan me kin kamwahuiala, kansenamwahui, kakehlaka, oh kin kapaiada, oh pelitikihpeseng pilawao, ni Sises ah masanih, “Ale, tungoale; iei ih met me paliwerei.”11
Ih eri ketikihda kep ehu me audaudki wain oh kaping kalahnganki oh ketikiong irail, masanih, “Nimala pwe met iei ih intahi en nan kadehde kapw, me kapwilipwilkidier pwe en komour kumwaila.”12
Nan ei madamadau, I kilanglahng wahnpoaron ko emen emen oh kilang nan meserail, arail poakehlahr arail Kaun, me irail kin poakohng. Duwehte ai pil iang wie mwomwohd limwarail, audaudkihda toutou oh medek pwehki sang ni dahme e kereniongehr lelohng pwehki ngehi.
Pali ngeniet audaukihda pepehm kaselel ehu iehn wiahla aramas mwahu men. Nan ai koluhla oh pahtoula, Ih mentehno iehn kak kauhdi oh doarehla ekis dingiding en Sapwellime inta me keredi nan Kedsemeni.
Ngehi eri kin medewe duwen kamadipw sarawi me kitail kin ale wihk koaros, wiahki atail men katamanpen ih. Ni atail wia mwo, I kin medewe lepin mahsen kan koaros me kin mih nan kapakap en pilawa oh pihlo. I kin inenen medewe laud duwen lepin mahsen ko “oh kin tamataman ih” nan kasarawialahn pilawa o, oh “Ren kin tamatamankin ih ahnsou koaros” ni kasarwialahn pihlo.13
I doandoaropwe ia wehwen tamataman ih ahnsou koaros.
Ong ie, e wewehki:
-
Kitail en tamataman ih nan momouren, mwohn mour wet, ni ahnsou me e ketin kapikada sampah kaselel wet.14
-
En tamataman sapwellime ipwidio nan dewen kamwenge mahn o, nan Pedleem nan Sudia;15
-
Oh mendahte ah sounpar eisek riau, e padahk ong irail lapalap en mwomwodiso kei nan tehnpas sarawio.16
-
En tamatamanda ahnsou me e ketila nan sahpwtehn pwe en kounopada sapwellime doadoahk nan mour wet.17
-
Oh ahnsou me e linganla mwohn sapwellime wahnpoaron ko.18
-
En tamataman ahnsou me e wiahda kamadipw sarawi nan kamadipw en kamwurumwur ong irail.19
-
Oh ketila nan Mwetuwel en Kedsemeni oh alehdi kalokolok laud pwehki dipatail kan, medek laud, peikasal kan, soumwahu kan me e medengkihla wasa koaros.20
-
En tamataman ahnsou, mwurin lokolok laud oh medek laud me e aleier, pil nan Kedsemeni, E pangala sang ni metik ehu sang rehn emen sapwellime tohnpadahngko me e kin eker ki kempoakepah.21
-
Oh ahnsou me e wesikla mwohn Pailet oh rehn Herod pwe en kapwung.22
-
Oh ahnsou me irail kasowawihala, pohrseli, kandipihseli, poakihseli oh poakiekih mehn pok me kateipeseng kili kan.23
-
Oh ahnsou me mwaramwar elintek ehu utoitdiong pohn tapwi.24
-
En tamataman me E anahne wa sapwellime lohpwu kohla lel Kalkohda oh e posdiong ni lohpwuo wasao, alehda lokolok en paliwar iangahki lokolok en palingehn.25
-
Oh ahnsou me e ket pohn lohpwuo, nan kupwure ah audaudki kalahngan, E mahsenlahng irail akan me kolupwuehla ih ko oh saradalahng nanleng, pekipeki, “Semei, mahkong irail; pwe irail sohte ese dahme re wiewia.”26
-
En tamataman ahnsou Me, eseier me E kanekelahr sapwellime doadoahk en kapitala aramas koaros, e kadarala ngeni ong nan limen Seme, Samatail.27
-
En tamataman sapwellime Iasada, me wiaiong kitail en kamehlele me kitail pahn iang iasada oh kousoan la reh kohkolahte, sang ni atail mehn pilipil.28
Pil patehng, medemedewe duwen kapakap en kamadipw sarawi, oh lepin lokaia kesempwal en kapakapko, ia wen kaperen ni atail pahn alehdi inouo, nan ahnsoun kapakap en kamadipw sarawi, me kitail pahn ahnsou koaros tamataman ih, pali ngehni pahn ieiang kitail ahnsou koaros.29
I kamehlele me Kauno me mwahngih ahnsou me kitail pahn kin alehdi kaudial. I wewehkila me mehlel sang ni ai onopiki Eklesiasdes 3:1,6, me masanih:
“Soahng kan koaros me kin wiawi nin sampah wet kin wiawi ni ahnsou kan me Koht ketin koasoanedi: …
“Ahnsoun diarada, oh ahnsoun salongala; ahnsoun nahkpene, oh ahnsoun kesepeseng.”
Kamadipw sarawi ehu ahnsou me Samatail Nanleng kin padakiong kitail duwen Tomwpen sapwellime Iehros—atail Soundoar, Sises Krais—oh kitail en alehdi kaudiahl duwen ih. E lelehr ahnsou en “letelet, ah pahn ritidahng uhk,”30 peki ah kitail pahn alehdi lolokong. Met ahnsou en peki rehn Kauno ni karakarahk duwen lolokong wet. Oh ma kitail pahn wia, I sohte ahneki peikasal me kitail pahn alehdi lolokong wet, me pahn kapai kitailda laudsang me kitail kin ese.
Ih pereniki Rahn en Sarawi, Kamadipw sarawi, oh wehwepeo. Ih poakohng Sounkomouro sang nan loalei unsek. Ni mwaren Sises Krais, ahmen.