![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F36%2F72%2F36723785c13dd9504988cbfd33c0221be79d763e%2F36723785c13dd9504988cbfd33c0221be79d763e.jpeg/full/!250,/0/default)
Kahrepen Mwomwohdisou
Kitail konehng uhdi oh medewe kahrepen en Sises Krais doadoahngki ehute mwomwohdiso, Sapwellime Mwomwohdiso, pwehn kapwaiahda Sapwellime oh Sapwellimen Semeo doadoahk.
Erein ai mour, kapokonlap en Mwomowohdiso wet kan kin inenen sair ie ni palingehn, oh Mwomwohdiso wet e wia wasa me aramas kak esehla Kauno. I diaradahr me mie aramas me kin pein wiahkin irail aramas sarawi de kehlail ni palingehn, ahpw kin kasohwe anahnperail nan mwomwodiso oh pil anahnepen pelien sawas akan. Ong arail mwekid sarawi kin pid pein irail te. Ahpw Mwomwohdiso wet wiawihdahsang rehn Ih me poahsoan en palingenatail, iei Sises Krais. E kesempwal ong kitail en medewe mahs dahme e ketin kupwurki en doadoahngki mwomwohdiso, Sapwellime Mwomwohdiso, iei Mwomowhdiso en Sises Krais en Souleng en Imwin Rahn Akan, pwehn kapwaiada doadoahk en Ih oh Seme “pwe aramas koaros en kak mour poatoapoat oh alehdi mour soutuk.”1
Sangete mwehin Adam, aramas kin padahki rongamwahu en Sises Krais, oh tiahk sarawi kesempwal kan en komour, duwehte pepdais, kin kasarawiala sang ni koasoandien priesthood.2 Ni ahnsou me aramas tohtohlahr oh solahr mih te nanpwungen peneinei, Koht ketin malipe soukohp teikan, meninkeder oh sounpadahk kei. Nan mwein Moses, kitail wadek duwen koasoandien elder kan, samworo oh sounkopwung kan. Nan poadopoad en Pwuken Mormon, Alma koasoanehdi mwomwohdiso ehu iangahki samworo kei oh sounpadahk kan.
Eri, nan Sapwellime mwehi, Sises ketin koasoanehdi Sapwellime doadoahk ni wiepe ehu pwe rongamwahu-o en kak koasoansoandi ansou tehkis nan wehi tohto nanpwungen soangsoangen aramas. Mwomwohdiso en Sises Krais, poahsoankihdahr “wahnpoaron oh soukohp ako me pein Sises Krais me wia takain pwukakeimw.”3 Pil mie pwukoa kei, duwehte isiakan, elder, pisop, samworo, sounpadahk oh dihken. Sises pil koasoanehdi soangen mwomwohdisohte ni Pali Kapi en sampah mwurin Sapwellime Iasadahu.
Mwurin Sapwellimen Krais mwomwohdiso ah pwupwula oh ohla, Kauno koasoanehdi sapahl Mwomwohdiso en Sises Krais keriapak sang rehn Soukohp Joseph Smith. Kahrepehu duduwehte sangete mahs pwehn kalohki rongamwahu en Sises Krais oh apwalih tiahk sarawi en komour kan—iei, pwehn wadohng Krais aramas akan.4 A met sang ni kapwurpwurdohn Mwomwohdiso wet, inou en doareikitailla karanih kitail oh pil ong ngehn en me melahr akan me sohte mwahn ese duwen Sapwellimen Sounkomouro mahk nan arail mour.
Ia mwomwen Sapwellime Mwomwohdiso ah kapwaiada kupwur en Kauno? E kesemwpwal en kasawih mwahu me kahrepen koasoandi en Kauno me iei pwe kitail en wie kekeirda. E kupwurki kitail en doulahte “sang ni mahk sapan lao kitail alehdi mehkoaros”5 me E kak ketkihda. E iangahkiong kadek laudsang uwen ahmw kadek de pepehm en ngehn sarawi. E kin iangahkiong pwoson Krais, koluhla, pepdaiski pihl oh ngehn sarawi oh doudoulahte nan pwoson lel ni imwi.6 Eri sohte me kak pein alehdi kapai pwukat ihme kahrehda Kauno sapwellimankihda mwomwohdiso ieu pwe en kawada pwihn en Souleng me pahn utuhtpene nan “ahl inen oh tehtiko me kin lellahng mour soutuk.”7
Ekei e ketin pilada en wahnpoaron, ekei soukohp, ekei soun kalohk, ekei silepe oh sounpadahk;
“…ong ni doadoahk en papah, pwe souleng kan en wehwehkihla mour en Krais:
“ Kitail koaros lao miniminpene ni pwoson oh ni marainkihla mehlel Sapwellimen Koht Iehros; kitail koaros pahn wiahla aramas dei mehlel kei, lel ni idin deilahn Krais unsek.”8
Sises Krais me “tepin atail pwoson oh kaunsekalahn atail pwoson.”9 Atail miniminiong paliwar en Krais—iei Mwomwohdiso—me kesempwal nan atail pahn alehdi Mware.10 Kitail rongehr me Mwomwohdiso en kawahu, kin kalap tuhpene, pwehn kaisihsol oh kapakap, oh pwehn koasoakoasoiapene duwen iren ngenirail kan,”11 “oh pwehn rong mahsen en Kauno.”12 Ih mwomwen nan Mwomwohdiso rahnwet. Ni atail kin ehupene, kitail kin padahk oh kakehlailih nanpwungatail oh nantieng wiahla tohnpadahk mehlel, iei “wiahla aramas dei mehlel kei, lel ni idin deilahn Krais unsek.” Kitail kin nantiong sewese emen emen kital en kak esehla Ieros en Koht,”13 lao lel rahn me irail solahr pahn kasukuhl, emen te ong mehn mpe. … nda, Ese Kauno: pwe irail koaros pahn ese ie, sang me keieu tikitik lel me keieu lapalap, Kauno mahsani.”14
Nan Mwomwohdiso wet kitail kin esehla padahk mehlel en Koht kan; oh kitail kin mourki. Nin duwen paliwar en Krais, tohn Mwomwohdiso wet kin utuhtpene nan mwekid en mour kan. Sohte emen nanpwungatail me unsek, kitail kin kansensuwedih aramas oh aramas kin kansensuwedih kitail. Kitail kin kalap song emen emen kitail ki mwomwatail kan. Ni kahlap en Krais, e sohte itar en esehte lamalam kan oh lepin mahsen sarawi kan ahpw kitail anahne momourki ni atail pahn esehla “miniminpene ni limpoak.”15
Mwomwohdiso wet sohte pid pein kitail te; ahpw kitail koaros iang malipilipdahng en papah. Kitail me wia pwoaren mas, peh, moahng, patehn neh, oh kisehn paliwar teikan en Krais, oh pil “kiseh ko… me mwomwen luwet, me pil kesempwal.”16 Kitail anahne malipilip pwukat, oh kitail anahne papah.
Mie ohl emen nan ai ward me keirda nan sohte utuhtpe sang rehn ah nohno pahpa oh re kin uhwong eh kin ieiang Mwomwohdiso wet. E koasoia met nan ehu mihting en kamadipw sarawi, dene: “Ahi pahpahu sohte kak wehwehki dahme karehda aramas pahn kohla sarawi ni ar kak kohla mwomweit pohn nahna, ahpw I kin pereniki douluhl kohdo sarawi. Nan Mwomwohdiso wet, kitail koaros kin iang seiloak tehiu, oh nan seiloak wet I kin kehlkihda me pwulopwol kehlail kan, seri mwakelekel, oh dahme I kin kilang oh esehla sang rehn aramas laud teikan. Irail kin kakehlailihehda oh I kin perenkihda momourki rongamwahu wet.”
Nan ward oh branch kan en Mwomwohdiso wet wihk koaros aramas kin kohpene pwehn kommoal oh weliakapw sapahl, oh ahniki ahnsou mwahu en pwilikihdi kapwunod en sampah—iei ih rahn en Sapad. Ih rahn en “diar peren oh nsenamwahu me kin kohsang ni doadoahk en papah Kauno,”17 oh pwehn kehn kamwahulahn pali ngehn me kin kohsang kamadipw sarawi, oh alehdi inou sapahl en Sapwellime Ngehno pwe en ieiang kitail.18
Ehu kapai laud en wia kisehn paliwar en Krais, mendahnte e sohte sansal me e wia kapai ehu ni ahnsou me e wiewiawi, me ahnsouhn kopwungla dipomw kan oh ahmw sapwung kan. Kitail kin kalap kihda kahrepe kei en atail sapwung kan, oh ekei pak kitail kin sehse ia wasa de ia mwomwen atail pahn mwahula. Ma sohte me pahn kopwungkinkitailla “ni lokaia inen, pahn kaweidpen Ngehn Sarawi,”19 mwein kitail sohte pahn ahniki koapwoaroapwoar me kitail kak wekla oh idawehn Kauno. Emenemen pahn pein kohlukihla dipe, ahpw sawaspatail nan ahlen koluhlahu kin kohsang nan Mwomwohdiso wet.20
Ni atail kosoia duwen Mwomwohdiso e wia paliwar en Krais, kitail anahne tamataman soang riau. Keieu, kitail sohte pahn nantieng wiliakapwalahng Mwomwohdiso wet ahpw kitail pahn wiliakapwalahng Krais oh Sapwellime rongamwahu, oh Mwomwohdiso wet me pahn seweseikitail.21 Pwuhk en Mormon padahki me aramas wiliakapwalahng Kauno, oh miniminiong mwomwohdiso en Krais. ”22 Keriau, kitail anahne tamataman me ni tapio, Mwomwohdiso iei peneinei, oh mendahte rahnwet Mwomwohdiso oh peneinei kin tohrohrpeseng, re kin sawaspene. Ehu sohte kin wiliandi meteio, oh mehlel Mwomwohdiso wet, sohte mwahn kak wiliandi nohno pahpa. Padahk en rongamwahu kan oh tiahk sarawi en priesthood kan kin wiawi nan Mwomwohdiso wet pwe peneinei kan en kak warohng mour soutuk.
Mie kahrepe kesempwal keriau me Sounkomouro kin doadoahngki sang mwomwohdiso, Sapwellime Mwomwohdiso, iei pwehn kapwaiada soang kan me anahnepe me sohte kak pweida sang rehn emenemen aramas de pwihn tikitik kan. Ehu karasepe, iei epwelpen me semwehmwe. Mehlel me emenemen kitail oh atail peneinei kan kak apwalih en aramas ar anahn kan, “kihkihla rehn emenemen nin duwen arail anahn kan ong ni palingehn oh paliwar.23 Ahpw nan Mwomwohdiso uwen me kitail koaros kak sawaspene me inenen uwe ieu pwehn apwalih anahn laud kan oh tohto me kamehlele me re kak pein uhda toahr.24 Oh pil, nan Mwomwohdiso wet, Pwihn en Sawas en Lih kan, oh pwihn en priesthood kan ahneki koahiek en kihda sawas ong aramas tohto nan wasa tohto me kin lellahng nan soangsoangen kahpwal.
Ma Sapwellime Mwomwohdiso sohte mie, Sapwellimen Sounkomouro pahngoak en kalohki rongamwahu wasa koaros nin sampah sohte kak pweida.25 Kih en wahnpoaron kan sohte pahn mie, sohte koasoandi, sohte wahn technology, sohte sent, oh tohnmetei me kiden misineri poadidi kan pahn sohte mie pwehn kapwaiahda dohdaohko. Tamataman, “Rongamwahu en Wehin Koht anahne lohkseli wasa koaros nin sampah, pwehn wia mehn kadehde nan wehi koaros, oh ih ah pahn leledo imwin ahnsou.”26
Mwomwohdiso wet kak kawada oh katanga tehnpas sarawi, iei tehnpas en Kauno kan, wasa me tiahk sarawi oh inou sarawi kan kin kasarawiala ie. Joseph Smith mahsanih me nan mwehi koaros me Koht kin ketin kihpene Sapwellime aramas, E kin wia met pwehn “kawada tehnpas en Kauno, pwehn kak ketin kasalehiong Sapwellime aramas akan tiahk sarawi kan en tehnpese oh lingan en Sapwellime wehi, oh padahkiong aramas elen komour; pwe mie tiahk sarawi kei oh padahng kei me kak wiawi te wasa kis de nan tehnpas ehu me kokouda ong ni kahrepehu te.”27
Ma aramas kamehlele me ahl koaros pahn kolahng nanleng de me sohte anahnepen wia mehkot pwehn iang komourla, e sohte pahn kamehlele me mie anahnepen kalohki rongamwahu de tiahk sarawi oh inou sarawi kan pwehn doarehla aramas de me melahr akan. Ahpw kitail sohte kin kosoiah te mour poatoapoat ahpw pil mour soutuk, oh pwehki met uhdahn pahn mie anahnepen elen rongamwahu oh inou sarawi kan. Oh Sounkomouro anahne mwomwohdiso pwe soahng pwuko en kak kohieng sapwellimen Koht seri koaros—me momour oh me melahr akan.
Kaimwseklahn kahrepen Kauno eh koasoanehdi Sapwellime Mwomwohdiso me I pahn koasoia me keieu sansal—Mwomwohdiso wet, me wia wehin Koht pohn sampah.
Ni en Mwomwodiso en Sises Krais en Souleng en Imwin Rahn Akan eh wie koukoudahr nan 1830, Kauno mahsaniong Soukohp Joseph Smith, “Kakehlada mohngiongomw oh perenda, pwe ong uhk wehi et, de ni ehu wehwepe, kih kan en mwomwohdiso mweimweidahr.”28 Nan manaman en kihn priesthood kan, Mwomwohdiso wet kin kolokol unseklahn padahk mehlel en Sounkomouro oh pwung en tiahk sarawi kan.29 Re kin sewese kaunopada ihr akan me men alehdi, kasawiada ma irail warohng, oh ahpw wiahda tiahk sarawi kan.
Ni arail kolokol kih kan en wehio, Sapwellimen Kauno sounpapah kan kak kasawiada me pwung oh me sapwung, oh ni manaman re kak nda, “Kauno me mahsanih.” Ahpw, ekei aramas kin uhwong Mwomwohdiso wet pwehki re mwahuki pein kawehwehda dahme pwung ong irail, ahpw ni mehlel lapalahn kapahi en “wehwehki duwen mehn met, oh mehn mwoweo, oh me pahn kohdo mwuhr kan”30 nin duwen me Kauno ketin kupwurki en kasalehda.
Ahnsou me Daniel kawewehda ouraman en Nanmwarki Nebuchadnezzar en Babylon, e kasalehieng nanmwarkio, “dahme pahn mih nan imwin rahn akan,”31 e kawehwehda me, “Koht en nanleng pahn kawada ehu wehi, me sohte kak ohla: oh wehio sohte pahn kohdiong ekei aramas, ahpw e pahn kohpeseng oh koledi wehi teikan, oh e pahn uh tengeteng kokolahte.”32 Mwomwodiso wet me e kohpadahro, wehin imwen rahn akan me sohte kokouda sang aramas, apw wiawihda sang Koht en nanleng oh dadaur kohwei duwehte takai me pwalasang ni nahna ni eh sohte me sair pwehn kadirehla sampah.33
Imwilahn Mwomwohdiso wet iei en koasoanehdi Saion pwehn kaunopadahng sapahldohn Sises Krais oh Sapwellime mwehio. Mwohn rahno, e sohte pahn duwehte wehi en sampah kan—duwen Sounkomouro mahsanih, “Ei wehi, kaidehn kisehn sampah wet.”34 Ahpw, ih me utuhn Sapwellime manaman nin sampah, soun kohwahki Sapwellime inou sarawi kan, soun apwalih Sapwellime tehnpas sarawi kan, soun silasil oh soun kair en Sapwellime mehlel kan, ih wasa me mehn Israel ko pahn kohpene ie, oh ih me doarepatail … oh atail wasahn ruksang melimelo, oh sang engieng en Koht ni eh pahn kipehdi sampah pwon.”35
I pahn kaimwisengkihla sapwellimen Soukohpo pekipek oh kapakap:
Peki rehn Kauno, me sapwellime wehio pahn wenlahte nin sampah, pwe towe kan en alehdi, oh onopadahng rahn kokohdo kan, me Nein Aramaso pahn ketidihdo sang nanlehng, likilikawih marain en sapwellime lingaling, pwehn tuhwong wehin Koht me koasoandier pohn sampah.
Iei, wehin Koht en wenlahte mwowe, pwe wehin nanleng en kohdo, pwe komwi maing Koht, en kalinganahla nanleng oh pil sampah, pwe sapwellimomwi imwintihtihkan en lohdi; pwe komwi me wahu, roson oh lingan, erein kohkohlahte.”36
Ni mwaren Sises Krais, amen.