![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F8b%2Fae%2F8bae754be9f50abf51f2fea47297d73640a20223%2F8bae754be9f50abf51f2fea47297d73640a20223.jpeg/full/!250,/0/default)
Kaperenpen Mahsen en Koht
Kaperenpen mahsen en Koht me kitail ehukipene rahnwet kasalehieng kitail anahnepen koluhla ansou koaros nan atail mour pwe kitail en kak kolokol kaweidpen Ngehn Sarawi.
Me tohto kitail me kohpene nan kapokon lap wet pwaredohr “pwehn rong kaperenpen mahsen en Koht, ei, mahsen me kin kamwahuihala weirek en ngehno” (Jacob 2:8). Mahseno kak dierek nan pwuhk sarawi kan oh nan mahsen kan sang atail kaun kan, kihkiheng kitail koapwoaroapwoar oh kaloalamwahu nan ansou en kahpwal kan.
Sang dahme kitail kin lelehng nan mour, kitail kin esehla me peren en sampah sohte unsek, ahpw rehn Sises Krais atail peren kin unsek (tehk D&C 101:36). E pahn ketkiheng kitail kakehlail pwe kitail en sohte lokolongki kahpwal ehute ihte en direkihla Sapwelime popohl (tehk Alma 31:38).
Kitail kakete pehm weirek ni atail kilang emen kempoakepatail ah lokolongki weirek en soumwahu laud.
Sipallahn emen me kitail poakohng kak kahrehieng atail ahneki pepehm en insensuwed laud.
Ansou me ekei neitail seri kan kin sapeikiehngala padahk en rongamwahu wet, kitail kin kakete koluhkihla oh peikasalki arail mour soutik.
Koapwoaroapwoarpen pwopwoud soutik oh wiahda ehu peneinei nan mour wet kakete tepida tikitikla ni ansou kan.
Kemwekid suwed sang irail me konehng poakehng kitail kak kaluwetehla palingenitail.
Soupwoson en me pwopwoud men kak kawehla minimum ehu me kitail kasik pahn poatoapoat.
Mepwukat oh ekei kahpwal tohtohkei me patehngete met dokehte atail mour nan mour wet nan sampah me ekei pak kin kahreieng atail kin idek rehtail soangen peidekohte me Soukohp Joseph Smith ideko: “Oh maing Koht, ia komwi? (D&C 121:1).
Nan ansou apwal pwukat nan atail mour kan, kaperenpen mahsen en Koht me kin kamwahuiala weirek en ngehn wahdo iren mahsen me sansalehr en kaloalamwahuieng atail mohngiong oh madamadau:
Meleilei en ketket rehmwi; omwi kasongosong oh apwal kan pahn lel ahpw erein ansou mwotomwot ehu;
Oh mwuri, ma komw nantihlahte mwahu, Koht pahn kasapwil komwihda (D&C 121:7–8).
Kaperenpen mahsen en Koht audehkin kitailda koapwoaroapwoar, mwahmwahngih me irail me kin loaloapwoat nan kahpwal kan pahn alehdi ketingpe nan wein nanleng oh me mwurin kahpwal laud kapai kan kin alahldi (tehk D&C 58:3–4).
Kaperenpen mahsen en Koht, me soukohp kan poahngok kiehr, kiheng kitail kamehlel me atail katengtengpene soutik, doulahte sang atail loaloapwoat ohng inou sarawi kan me kitail alehdier pwehn pelian sahpis en kahrepen mehlelo, pahn kapai kitailda oh atail keinek (tehk Orson F. Whitney, nanrepwoht en Kapokon Lap, Epr. 1929, 110).
Irail pil kin kiheng kitail silepe me, mwurin atail momourki mour loaloapwoat ehu, kitail sohte pahn katiasang ehute kapai pwehki sang ni sohte kaimwsakala soahng koasoangdih kan ma kitail sohte mweidehng atail ansou. Ma kitail pahn loaloapwoat lau kitail mehla, kitail “pahn ale kapai koaros, lapalapala, oh pereperen duwehtehte ohl de lih [emen me ahnekiher ansou pwoato] pahn ahneki. (Tehk The Teachings of Lorenzo Snow, ed. Clyde J. Williams [1984], 138.)
Met, e inenen kesempwal en wehwehki me lokolok oh weirek kak pil mihla nan atail mour ma kitail sohte mehlelieng koluhkihla dipatail kan. Presiden Marion G Romney padahngki ni mahsen pwukat: “Pali laud en me kin lokolok oh weirek kin doulahte sang aramas kan en sampah wet iei kahrepen sohte koluhla oh sohte kopwungpwunglahn dihp. … Duwehtehte lokolok oh weirek ah kin kahrehda dihp, eri peren oh popohl kin kahrehda mahkpen dihp kan” (in Conference Report, Apr. 1959, 11).
Dahme kahreda sohte koluhla kin kahrehkiheng lokolok oh weirek?
Ehu pasapeng me sansal iei me “kalokolok ehu [me] wiawidahr, oh ehu kosonned mehlel wiawidahr, me wadohr [me pid] pepehm en koluhla” (Alma 42:18; tehk Alma 42:16, 18). Soukohp Joseph Smith padahngki me kitail me kin kawehla pein kitail oh ihme kalokepen atail madamadau me kin kahrehieng en kehlail rasehng kehl en kisiniei oh takai mwehl (tehk Teachings of Presidents of the Church: Joseph Smith [2007], 224).
Ma kitail song en kamwahuihala atail pepehm en koluhla sang atail song en “katiasang [pein kitail] nan mehkot sohte nohn katepe pwehki [atail] sapwung kan (Alma 42:30) de song en ekihla, ihte me kitail pahn pweida loale iei en kansensuwediala Ngehno (tehk D&C 121:37) oh kasaula atail ansoun koluhla. Soangen mehn kaloalamwahu wet, palahsang kisin ansou mwotomwot ehu, pahn udahn kiheng kitail weirek oh lokolok nan atail mour kan oh pahn kawehla ansou mwahu en ale mahkpen dipatail kan.
Soangen mwohmw en lokolok wet, kaperenpen mahsen en Koht pil kak wahdo kaloalamwahu oh koapwoaroapwoar; e mahsaniheng kitail me mie mehn kamwahuiala medek me kin kohsang dihp. Mehn kamwahula wet kohdo sang tomwen tohnmetei en Sises Krais oh ale epwelpe ma kitail kakehlailih pwoson sang Reh, koluhla, oh peikieng Sapwellime kosonned kan.
E kesempwal kitail en kasawihada me duwehtehte mahkpen dihp kan, koluhla mie dake kei oh kaidehn mehkot me kak wiawi ni ansou iou. E anahne duwepenehte nan ehuehu kahk kan.
Ni karasepe, ni ansou me kitail ale kamadipw sarawi, kitail kasalehieng Kauno me kitail pahn kataman Ih ansou koaros oh kapwaiada Sapwellime kosonned kan. Iei kasalepen atail inengieng ni mehlel.
Ni ansou me kitail tepida kataman Ih oh kapwaiada Sapwellime kosonned kan rahn koaros—oh kaidehnte rahn en Sapat—iei ansou me mahkpen dipatail kan tepidahr ekisekis doadoahk oh Sapwellime inou en kolokol Sapwellime Ngehno rehtail kin tep doadoahk.
Likin pwungen peik me udahn pahn patehng atail ineng, kemwekid en mahko kakete sohrala ansou kei oh kempoakepah sang Ngehno tepier sohrala. Kitail pahn mih pahn keperpen wauneki Ih ni kilin ouwatail kan erein atail kadohwansang atail mohngiong kan Reh (tehk 2 Nephi 27:25).
Pwehn kapatahieng mehn kaloalamwahu, kaperenpen mahsen en Koht keperkin kitail me koasoandi en alehda mahkpen dipatail kan kak uhdi ansou me kitail lohdieng “nan pohnmwahso en sampah,” oh e kak doudoula sang pwoson ma kitail inengieng koluhla oh karkarahkala. (tehk D&C 20:5–6).
Dahme kak wia ekei mwohmw en pohnmwahso me kak kedirapwahla wiepen alehdi mahkepen dipatail oh me iangahki wauneki Rahnen Sapat?
Ekei karasaras doke pwandehla mihting en kamadipw sarawi ni sohte kahrepe pwung; lella, sohte kasawih pein kitail, pwehn tungoale pilawahu oh pihl ni sohte warehng (tehk 1 Corinthians 11:28); oh lella mwohn wehkada dipatail akan oh peki rehn Koht Sapwellime mahk.
Ekei karasaras: kediropwki kadkadarpene sin likou nan neitail elektroanik dipais kan, kohkohlahsang mihting mwurin kamadipw sarawi, oh patpatehng kemwekid kan nan imwatail kan me sohte konehng rahn sarawio.
Dahme pahn mwein ehu kahrepe me kahrehieng atail, esehier soahng pwukat koaros, pak tohto sohte kin wauneki Rahnen Sapat?
Nan pwuhken Aiseia, kitail kak diar ehu pasapeng me, dokehte Sapat, pil doke ekei kosonned kan me kitail anahne kapwaiada: “Ma kumwail pahn sohpeisang rahnen Sapat, sang rapahki mehkot pein kamwahupamwail ni ahi rahn sarawio” (Aiseia 58:13).
Lepin lokaia kesemwpal akan iei “mihmi ni pein kamwahupamwail,” de ni ehu mahsen, wiewia Kupwuren Koht. Pak tohtokei, atail wihwia—kohsang ni lohdiehng kan, ineng kan, oh men wia tiahk en mouren aramas—kin pelianda kupwuren Koht. Soukohp Brigham Young padahngki me “ni ansou me ineng, kemwekid kan, oh pepehm kan en aramas men ahr kin udahn peikieng Koht oh Sapwellime koasoandi kan, me aramaso kin sarawihla. Iei met, pwe kupwurei en keirda nan kupwuren Koht, me pahn kaweidielahng ni dahme mwahu koaros, oh kahluwaielahng ni imwio wasa sarawi oh mour soutik kan” (Deseret News, Sept. 7, 1854, 1).
Kaparenpen mahsen en Koht lukehieng kitail en doadoahki manaman en Tomwo pwehn doadoahk ohng pein kitail oh alehieng kitail Ih—kaidehn inengen tepel oh war—eri kitail, sang Sapwellime kalahngan, kak komourla (tehk 2 Nephi 10:24–25).
Kaperenpen mahsen en Koht me kitail ehuki rahnet kasalehieng kitail anahnepen nantihlahte koluhla nan atail mour kan pwe kitail en kak kolokol kaweidpen Ngehn Sarawi wen werei me e kak lelie.
Kin kempoakepahnki Ngehno pahn kahrehieng kitail en mwamwahula. E “pahn mwenginingin ni meleilei oh popohl ohng ngenitail kan, … e pahn kihsang lemei, kailok, luwakahk, akamai, oh mwekid en tepel koaros nan [atail] mohngiong kan; oh [atail] ineng koaros pahn men wiahte dahme mwahu, wiahte dahme pwung, oh kawada wein Koht (tehk Teachings: Joseph Smith, 98).
Sang kemwekid en Ngehn Sarawi, kitail sohte kak insensuedla, kitail sohte pahn kansensuedihla mehteikan; kitail pahn pehm popohl, oh atail madamadau kan pahn mwakelekella. Atail limpoak ong mehteikan pahn laudla. Kitail pahn inengieng en mahk oh kalaudehla peren ohng koaros.
Kitail pahn pehm kaping sang en mehteikan ahr kin kekeirda, oh kitail pahn rapahki kamwahupen mehteikan.
I kapakapki me kitail pahn pehm popohl me kin kohdo sang nanantiheng en mour ni pwung oh me kitail en kolokol Ngehn Sarawi nan atail mour kan sang ni mehlel oh koluhla poatoapoat. Kitail pahn wiahla aramas mwahu kei, oh atail peneinei pahn kapaida. I kadehdehki padahk pwukat ni mwahr sarawi en Sises Krais, amen.