![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fe4%2F44%2Fe44429ebcbff5d009427c69def0ea8345a1dd560%2Fe44429ebcbff5d009427c69def0ea8345a1dd560.jpeg/full/!250,/0/default)
Ngehn Sarawi en wia kompokepahmw
Kitail kak, ma kitail pahn warohng, kolokol kapai en ngehn sarawi o en mihmi rehtail, kaidente met ahpw ansou koaros.
I inenen pereniki ai kak patehng kumwail rahn sarawi wet nan kapokon lap en sapwelimen Kauno mwomwodiso. I kenehr, pil duwehte kumwail, duwen ngehn sarawio ah kadehdeiong kitail duwen mehlel en mahsen akan me kitail karongehier.
Kahrepen ai sawas en rahn wet pwe en kalaudehla amwail ineng oh men nantiong pwe kak iang aledi kisakis en inou me kohiong emen emen kitail ansou me kitail pepdaislahu. Nan atail kin kasarawiong en wiahla towe mehlel en mwomwodiso wet kitail kin rong kosoi pwukat: “Alehda Ngehn Sarawi.”1 Sang ansou o kohdo, atail mour kin wekila potopot.
Kitail kak, ma kitail pahn warohng, kitail kak kolokol kapai en ngehn sarawi o rehtail, kaidehnte met ahpw ansou koaros. Ke ese sang ni mahsen akan en kapakap en kamadipw sarawio ia mwomwen inou o ah pahn pweida: “ Maing Koht, Sahm Soutuk, se patoan peki rehmwi ni mwaren sapwelimomwi Iehros, Sises Krais, en ketin kapaiada oh kasarawiala pilawa wet ong war koaros me pahn patohan tungoale, pwe en wia mehn katamanpen war en sapwelimomwi Ieroso, oh kadehdeiong komw, Maing Koht, Sahm Soutuk, me pein irail men patoan ale mwaren sapwelimomwi Ieroso, oh patoan tamatamaniki ih ansou koaros oh kaparada sapwelime kosonned akan me e ketikiong irailehr.”
Oh e pil iangahkido inou ehu: “Pwe Sapwelime Ngehn en ketiket rehrail ansou koaros.” (D&C 20:77; mehkot kesempwal patehng).
Kitail anahne ngehno en mihmi rehtail pwe en kak kiong kitail kaweid oh sawas en ngehn sarawio nan atail momour en rahn koaros. Kitail kak, me duwehte, ngehno kak keperkin kitail en kalowehdi kasongosong kan en tepil.
Iei ih kahrepe wet kelehpw, me kin kahreiong atail kak kilang dahme karehda sapwelimen Kauno ladu kan kin song en kalaudehla arail ineng en kaudok iong Koht nan atail kamadipw sarawi kan. Ma kitail kin ale kamadipw sarawi o sang ni pwoson, Ngehn Sarawi o pahn kak dorei kitail oh koaros me kitail poakohng sang kasongosong kan me kin kohdo nan ansou kan koaros.
Ianganiki Ngehn Sarawio me kin wiahda mehkot mwahu ah nohn kaselel oh kasongosong kin tikitikla. Met kan kelehpw itar en sewese kitail en nantiong ngehno en kin mihmi rehtail nan ansou kan koaros.
Ni ansou me ngehno kin sewese kitail sang tepil, E pil kiong kitail manaman en pilada dahme pwung oh dahme kin sapwung. Mehlel me kin keieu kesempwal kin kamelel sang kaudiahl sang rehn Koht. Kahrepen atail wie aramas oh atail mehn pepehm kan sohte kak itar. Kitail koukouson nan ansou ehu me irail me lolokong kan pahn pil inenen apwaliki diarada me mehlel o sang ni arail lolokong.
Kauno padahkiong Sapwelime Wahnparon Thomas, me anahne mehn kadehde pen paliwar sang ni ah pahn dohke Sapwelime ohla kan, kaudiahl o wia mehn kadehde mwahu: “ Sises ahpw mahsaniong, “ Ia duwe, ke kamelele pwehki omw kilang ie? Meid pai irail kan me sohte kin kilang ahpw kamelele.”(John 20:29).
Mehlel kan me pahn kaluwaikital wohng rehn Koht kin sansalada sang rehn Ngehn Sarawi o. Kitail sohte kak kohla nan tuhke ko oh kilang Sahm oh Nah kosokosoiong pwutak pwulopwul Joseph Smith. Sohte men kadehde ehu de songen mehn akamai ehu pahn kak kosoiahda me Elijah kohdo nin duwen nan inouo oh kiong kitail kih kan me rahnwet mihmi pohn atail Soukohp me Ieias nan mour wet, Thomas S. Monson.
Katengetengdi en mehlel o kohdo ong mwanakapw oh peinakapw men me inengiong en iang alehdi Ngehn Sarawio. Mendahte sohte mehlel kan oh likamw akan ah pahn kin lelohng kitail nan ansou kan, kitail anahne ngehn en mehlel o en sewesei kitail pwe kitail en dehr kin ahneki peikasal.
Nan pwihn en Wahnparon ehk riemen o, George Q. Cannon kongongehkin kiht en wiahda mehkot ieu me pahn kak kahluwado ngehno rehtail. E inoukiong kitail, oh ih pil iang inoukiong kitail, ma kitail pahn idawen ahl wet, kitail “pahn ahneki marain en padahk mehlel” oh “sohte pahn ahneki peikasal de mih nan rohtorot” oh atail pwoson pahn kehlail oh atail peren pahn …... unsekla.2
Kitail pil anahne sawas sang rehn Ngehn Sarawi ong pil ehu kahrepe. Melahn aramas men me kitail kin pokohng kak kohdo ni atail sohte kasik.Sang ni kadehde mehlel en Ngehn Sarawi kohsang rehn Samatail Nanleng oh Sounkomour o me iasadahr me kihong kitail kopworopwor oh insenamwahu ong kitail ni ansou me aramas me kitail kin pokohng kin mehla. Kadehde o anahne kin kapw ansou me mehla kin pwarada.
Eri, songen kahrepe tohto me kitail anahneki nehn sarawi en ketiket rehtail oh wia kompokepatail. Kitail kin inangih, ahpw kitail ese sang pein kitail me e sohte mengei en idawen ansou koaros. Kitail koros kin ahneki madamadau, kosoi, oh wiewia nan atail mour me kin sohte mwahu ong ngehn sarawi. Kauno padakiong kitail me ngehn sarawi pahn ketiket rehtail oh wia kompokepatail ansou koros ma atail mongiong kan diren limpok oh ahneki madamadau mwakelekel ansou koaros. Kilang D&C 121:45).
Ong kumwail me kin apwaliki momourki koasondi ile me pahn kiheng uhk kisakis en iangan ki Ngehno, I kaweidkin kumwail met. Miehier ansou me kumwail kehn pepehm en Ngehn Sarawi. E kak wiawi rahn wet.
Kumwail kak wiahki ansou pwukat ansou en kamarain duwehte weren tuhkehn pwoson me Alma kawehwehda (tehk Alma 32:28). Padokedi ehu ehu irail. Kumwail kak wia met ni amwail pahn mwekidiki pepehmo. Oh kehn pwain meirong en eisek kis ehu, pwain. Sohte lipilipil dahkot mwo, wia. Oh kin wiewia ansou kan koros. Ahnsou me kumwail pahn kasalehda amwail inangihn peikiong, Ngehno pahn kadaredohng kumwail pil ekei pepehm en dahme Koht men kumwail en wia.
Ni amwail pahn peikiong, pepehm sang Ngehno pahn kin kalapw kohdo. Amwail kehl en pilada me mwahu pahn keirda.
Kumwail pahn kak ese ansou me pepehm en peik pahn kohsang Ngehno kaidehn sang pein ahmw. Ansou me pepehm kan pahn kin pahrekiong dahme Soundoro oh Sapwellime soukohp ieias akan oh wahnpoaron akan kin mahsanih, kumwail kak pilada peik ni sohpeikasal. Kauno ahpw pahn kadaredo Sapwellime Ngehno en sewese kumwail.
Karasepe, ma kumwail alehdi pepehm en kesempwaliki Rahn Sarawi, ahpw mehlel ansou me e mwomwen apwal, Koht pahn kadaredo Sapwellime Ngehno en sawas.
Songen sawaso pil wiawiong ahi pahpa sounpar kei samwalahro ansou me e kohla doadoahk Australia. E kelekelehpw rahn sarawi ehu, oh e men ale kamadipw sarawi. E sohte kak diar wasa me souleng en imwin rahn akan kin tuhpene ie. Ih eri tepda alu. E kin kapakap ni alosop kan koaros pwe en ese iawasa me e pahn keidla ie. Mwurin alialuseli oh wetwetseli awa ehu, e uhdi oh pwurehng kapakap. E ahneki pepehm ehu en keidla nan ehu ahl. Mwurin ansou kis e rongada ngilen koul peipeidohsang nan ehu ihmwko. E kilenglong nan wenihmwtoko oh kilangada aramas ekei mwomwohd karanih tehpel ehu me pwepweikihdi likou pwetepwet iangahki dahl en kamadipw sarawi kan.
Met, mwein kak wia mehkot tikitik ong kumwail, ahpw ong ih e wia mehkot kaselel ehu. E ese me inou en nan kapakap en kamadipw sarawio pweida: “Tamatamanki ih ansou koaros oh kapwaiada sapwellime kosonned akan me e ketkiong irailehr; pwe sapwellime Ngehn en ketiket rehrail ansou koaros.”(D&C 20:77).
E wia ehu karasaras en ansou ieu ansou me e kapakap oh kapwaiada dahme Ngehno padahkihong me Koht kupwuriki en wia. E kin peikiong nan pahr koaros, duwehte kumwail oh ngei atail pahn wia. E sohte kin kalapw kosokosoia palingeni. E kin wiewiahte mehkot tikitik kei ong Kauno.
Ansou koaros me pwihn en Mwomwohdiso kin peki en padahkong irail, e kin wia. E sohte katapaniki aramas ehk de limehk de ia woahn ah pil pwang. E kin kadehdehki Sahmo, Sapwellimeo, Ngehn Sarawio, oh soukohp akan ansou koaros me Ngehno kin kaweidki en wia.
Ah pwukoah keieu laudla me e alehdi nan Mwomwohdiso iei emen high council nan Boneville Stake, e kin mwatih nan mwetuel en stake, oh kaskulih nan Sunday School class. Sounpar tohto, ansou kan me e kin anahne, Ngehn Sarawio kin mihmi reh.
I kesihnen limwahn ahi pahpa nan perehn imwenwini. Ahi nohno, me wia ah pwoud sounpar 41 [pahisek ehu], wonohn pohn peht. Awah kei se kilekilangkier ai nohno. Se kilang pohn mese tepda sohla sansal weirek. Sendinpeh me e roakepene, inenen meleilei. Pehkan kosonsondi mihmi ni pengpengehu.
Weirek en soumwahu kanser me e ahnekier sounpar kei wie sosohla.I kilang pohn mese popohl. Ah esingek kin malmalaupeseng ansou koros.Se kesihnen wasau kilikilang ma e pahn kin pwurehng esingekda.
Mwuri, Pahpa ahpw nda ni ngihl tikitik, “Kisin serepein kis samwalahr ni imwehu.”
E sohte kakerehdi pilen mese. Met pwehki Ngehn Sarawi kasalehiongehr ih mwowe duwen ah pwoudo, iawasa e kohsang ie, dahme e wiahla, oh iawasa e kokohlahng ie. Ngehno kadehdehieng ih pak tohto duwen limpoak en Sahm Nanleng, oh Soundor o me powehdi mehla, oh mehlel en katengetengpenehn me e wiaiong ah pwoud oh ah peineinei.
Ngehno kiongehr koapwoaroapwoar me sang ni wiewia mwahu en ah pwoudo oh ah pwoson e pahn pwurala ah wasa nanleng wasa me e pahn tamanda me e wia seri en inou emen oh irail pahn kasamwo ih ni wahu.
Ong ahi pahpa, ah koapwoaroapwoar udahn laud. Ngehn Sarawi kasalehiong ie me mehlel.
Met ekei mwein pahn nda me ah lokaia kan oh madamadau en wasahn kouson nanleng wia ouraman kei, de madamadau en ohl men nan ansou me ah pwoud mehla. Ahpw e ese me padahk mehlel poatoapoat kan iei te ahl en kehn kak wehwekila.
E wia scientist men me kin rapahki duwen mehlel ong dahme kitai kin kilang nan sampah nan ah momour en arams laud men.E doadoahngki mwahu dipsou en science kan pwe ienge kan en kak waunekihla nan sampah. Dahme e wiahda nan chemistry kohsang ni ah kilang mwokmwokid en molecule kan oh song rapahki ma e pwung ni ah kin wia ah kosou kan nan laboratory.
Ahpw e idawehn ehu ahl pwe en esehda duwen me mehlel me keieu kesempwalohng ih oh ong emen emen kitail. Sang Ngehn Sarawi me kitail kak kilangki aramas oh sohng teikan duwehte Koht ah ketin irong irail.
Kisakis wet doadoahk nan imwen wini mwurin ah pwoud ah mehla. Se kihpene ahn nohno dipwsou koaros pwe sen wahla nimwat. Pahpa kin uhdi oh kalahngan ong nurse oh toahkte koaros me se tuhwong ni ah alialu kohieila ni sdohsa. I tamataman ahi kehn me se anahne kelehpwla oh pein medewe aht pahtou.
I esehier met me e kilang mehkot me ihte Ngehn Sarawi kelehpw me kasalehieng. E kilang aramas ko ni arail wia tohnleng kei sang rehn Koht me kohdon apwalih ah pwoudo. Irail mwein medewe me irail tohn doadoahk en imwen winihte, ahpw Pahpa weliandi Soundoro kalahngan ong irail.
Pepehm en Ngehn Sarawio pil ieiang ih lau se lella imwen ahi nohno oh pahpa. Se koasoiki wen minit kei nan pere laud en ihmwo. Pahpa eri pekihda me e pahn kohla nan ehu pere.
Mwurin minit kei, e pwurodo nan perehu. E maskomwokomw. E aluhdo reht oh nda ni ngihl tikitik, “I ekis pwunodki ma Mildred pahn lella nan sahpw en Ngehn kelehpw. I wiahki me e pahn salongala nan pwungen pokono.”
Ih eri nda ni ah peren, “I apwtehn kapakap. I ese me soang koaros mwahu rehn Mildred. Ahi nohno mihmi mwo pwehn kasamwo ih.”
Ih tamataman ai sinsirei ansou me e kosoia mwo, pwe ih medewehla ai nohno kahlap, ah mwotomwot, pahn sikesiken aramas ko pwe en mih wasao oh kasamwo nah serepein me pwoudiki nah pwutako ah pahn peidio.
Ehu kahrepen ahi pahpa ah kapakap oh alehdi popohlo pwehki e kin kalapw kapakap ni pwoson sangete ni ah tikitik. E kin kalapw alehdi pasapeng en popohl oh kaweid me kin kohdo nan ah mongiong. Pil kapatahiong e ese audepen pwuhk sarawi kan oh mahsan en soukohp ieias akan. Eri e kin ese kehn ngihl en Ngehno.
Mie pil ehu kapai me laudsang popohl en ianganikihte Ngehno. Met iei kaweliakapwih sang ni Tomw en Sises Krais. Ansou me kitail kin alehda Ngehno en ieiang kitail ansou koaros, Soundoro kak ketkiheng kitail mwakelekel me kitail anahne ong mour soutuk, me wia kisakis keieu ile nan kisakis koaros en Koht (tehk D&C 14:7).
Ke tamataman sapwelimen Soundor o maseno: “Met iei kosonnedo: Koluhla, kumwail koaros me mihmi nan sampah pwon, oh kodohng ie, oh kohdo rehi oh pepdaisla ni edei, pwe kumwail en kak mwakelekelda ong ni amwail pahn alehda Ngehn Sarawi, pwe kumwail en mwakelekel nin amwail en kesihnen mwohi ni imwin rahno. (3 Nephi 27:20).
Kosonned kan kohdo iangahki inou sang Kauno:
Kauno mahsanih kitail en koapwoaroapwoarki Ngehno me kin kahlua kitail lahng en wia me mwahu, pwung, akitikitik, tenekih ni pwungih.
Ih ahpw pahn ketkihdo Sapwellime Ngehno, me pahn kamarainih atail madamadau oh audehkin kitail peren” (D&C 11:12–13).
I kadehdeh ong kumwail me Koht Sahm Ieias, me Sises Krais me iasadahu me kaukauweid Sapwellime Mwomwohdiso, Thomas S. Monson kolokol kih en priesthood koaros, oh e ahneki kaudiahl sang Ngehn Sarawi me kin kahlua oh utungada Mwomwohdiso en Sises Krais en Souleng en Imwin rahn akan oh towe impahi kan.
I kadedeh iong kumwail me ohl kesempwal pwukat me padahk ohng kitail rahn wet irail wia sounkadedehpen sises krais, irail wia Pwhin en Wahnparon Ehk Riemeno pilipilda sang rehn Koht. I ese me Ngehn Sarawi me kaweid Presiden Monson pwe en pil irailda. Oh ansou me kumwail rongorong arail kadedeh kan, Ngehn Sarawio kasalehiong kumwail dahme I ahpwtehn ndaiong kumwailet. Irail pilipil dahsang rehn Koht. I utung irail oh poakpoakeirail oh ese me Kauno poakohng irail oh pahn utung irail nan arail doadoahk en papah. Oh I wia mepwukat ni mwaren Kaun Sises Krais, amen.