Imajine tèt ou nan tanp lan
Èldè Quentin L. Cook
Nan Kolèj Douz Apot yo
Mwen priye pou nou chak onore Sovè a epi fè tout chanjman ki nesesè pou nou ka wè nou nan tanp sakre L yo.
Dewoulman plan sali Senyè a pandan dispansasyon plenitid tan sa a prèske depase konpreyansyon.1 Nou wè sa nan anons Prezidan Thomas S. Monson nan pou kat nouvo tanp nan sesyon konferans sa a. Lè yo te aple Prezidan Monson kòm Apot an 1963, te gen 12 tanp ki te an fonksyon nan mond la.2 Avèk konsekrasyon Tanp City Center nan Provo a, gen 150 tanp k ap fonksyone kounyeya, epi ap gen 177 antou lè tout fin konsakre. Sa se yon bon rezon pou nou rejwi enbleman.
Sa fè sankatreventan, jodia menm, 3 Avril 1836, yon bèl vizyon te louvri devan Pwofèt Joseph Smith ak Oliver Cowdery nan Tanp Kirtland nan. Sa te rive jis yon semèn apre konsekrasyon tanp lan. Nan vizyon sa a, yo te wè Senyè a kanpe sou balistrad la sou lotèl tanp la. Pami lòt bagay, Sovè a te deklare:
“Se pou kè tout pèp mwen an rejwi, ki, avèk puisans yo te bati kay sa a pou non mwen.
“Paske gade, m aksepte kay sa a, epi non mwen ap la; epi m ap manifeste mwen devan pèp mwen an avèk mizèrikòd nan kay sa a.”3
Nan okazyon sakre sa a, ansyen pwofèt te parèt, espesyalman Eli, ki te konfere kle esansyèl pou òdonans tanp yo.
Nou ka santi ki kalite rejwisans ki genyen nan Quito nan Équateur; Harare nan Zimbabwe; Belèm nan Brésil; ak Lima nan Pérou, nan pami manm yo ak misyonè yo, baze sou sa k te rive nan Bangkok la, nan Tayilann nan, ennan desa lè yo te anonse tanp sa a. Sè Shelly Senior, madanm David Senior, ki te prezidan misyon Bangkok la lè sa a, te voye yon mesaj bay fanmi li ak zanmi l yo pou l te di yo ke, yon te fin tande Prezidan Monson anonse tanp sa a, mari l avèk li te pase “12 zèdtan san dòmi ak anpil dlo lajwa nan je yo.” Yo te rele asistan misyon yo a 11:30 nan aswè pou te enfòme yo. Asistan yo te rele tout misyonè yo. Yo te resevwa rapò ke “tout misyonè yo te reveye nan mitan lannuit la ap vole sou kabann yo.” Avèk imou, Sè Senior te mande fanmi l ak zanmi l yo: “Tanpri, pa di Depatman Misyon an sa!”4
Manm Tayilann yo te gen yon reyaksyon espirityèl ki te egalman fò tou. M sèten te gen yon preparasyon espirityèl nan kè yo ak nan fwaye yo ak manifestasyon divin pou te prepare Sen yo kote nouvo tanp ki anonse sa yo pral ye a.
Nan Tayilann, Sè Senior te mande yo pou yo te fè miwa espesyal alamen ke l te itilize pou enstriksyon pèsonèl, espesyalman avèk sè yo. Yo te grave yon tanp sou miwa a avèk pawòl sa yo: “Imajine tèt ou nan tanp la.” Lè yo t ap gade nan miwa a, moun yo te wè tèt yo nan tanp la. Senyò yo te anseye envestigatè yo ak manm Legliz yo ke yo dwe wè tèt yo nan tanp la epi fè chanjman ki nesesè nan lavi yo pou yo ka prepare espirityèlman pou atenn objektif sa a.
Envitasyon m pou nou chak maten an, kèlkeswa kote n ap viv, se pou imajine tèt nou nan tanp la. Prezidan Monson te deklare: “Tout tan w pa antre nan kay Senyè a epi resevwa benediksyon k ap tann ou ladan l yo, ou poko resevwa tout sa Legliz la gen pou l ofri. Benediksyon siprèm e pi enpòtan ki rezève pou manm yo nan Legliz la se benediksyon nou resevwa nan tanp Bondye yo.”5
Byenke pa gen jistis nan mond la jodia, n ap viv nan yon epòk sakre. Avèk kè yo plen amou ak atant, pwofèt yo te dekri epòk nou an depi dè syèk.6
Pwofèt Joseph Smith, ki t ap site Abdia7 nan Ansyen Testaman an ak 1 Pyè8 nan Nouvo Testaman an, te rekonèt gwo objektif Bondye nan ba nou batèm pou mò yo e pèmèt nou vin tounen sovè sou Mòn Siyon an.9
Senyè a fè pèp nou an pwospere epi li ba nou resous ak direksyon pwofèt yo pou nou ka vanyan nan ranpli responsablite tanp nou yo pou vivan yo ak mò yo.
Gras ak levanjil retabli Jezikri a, nou konprann bi lavi a, plan sali Papa a pou pitit Li yo, sakrifis redanmtè Sovè a, ak wòl esansyèl fanmi nan òganizasyon syèl la.10
Konbinezon kantite tanp k ap ogmante yo ak pwogrè teknoloji pou ranpli responsablite sakre nou nan zafè istwa familyal pou zansèt nou yo fè epòk sa a vin epòk ki pi beni nan tout listwa. Mwen rejwi nan fidelite ekstraòdinè jèn nou yo nan endeksing ak nan jwenn zansèt yo epi fè batèm ak konfimasyon pou yo nan tanp. Nou literalman fè pati sovè sou Mòn Siyon sa yo yo te pwofetize a.
Kijan nou ka prepare pou tanp?
Nou konnen ladwati ak sanntifikasyon se eleman esansyèl nan prepare pou ale nan tanp.
Nan 97 Doktrin ak Alyans 97, nou li: “Epi toutotan pèp mwen an bati yon kay pou mwen nan non Senyè a, epi yo pa kite okenn bagay ki papwòp vini ladan l, pou l pa sal, laglwa mwen ap repoze sou li.”11
Jiska 1891, Prezidan Legliz la te konn siyen chak rekòmandasyon tanp pou pwoteje sentete tanp lan. Apresa yo te delege responsablite sa a bay evèk yo ak prezidan pieu yo.
Gwo dezi nou se pou manm Legliz yo viv diy pou yo ka gen yon rekòmandasyon tanp. Tanpri, pa wè tanp la kòm yon bi lwenten ki petèt pa alapòte nou. Avèk èd evèk yo, pifò manm yo ka ranpli tout kondisyon jis yo mande yo nan yon peryòd tan relativman kout si yo gen detèminasyon pou kalifye yo e totalman repanti pou peche yo. Sa vledi dispoze pou padone tèt nou e pa konsantre sou enpèfeksyon nou oswa peche nou yo kòm bagay k ap diskalifye nou pou fè nou pa janm ka antre nan yon tanp sakre.
Ekspyasyon Sovè a te akonpli pou tout pitit Bondye yo. Sakrifis redanmtè L la satisfè demann lajistis pou tout moun ki vrèman repanti. Ekriti yo dekri sa nan yon fason ki pi bèl:
“Menmsi peche nou wouj tankou san, y ap vin blan tankou lanèj.”12
“Epi mwen pap sonje [yo] ankò.”13
Nou asire nou ke si nou viv prensip jis yo, sa ap pote bonè, akonplisman, ak lapè pou nou menm ak fanmi nou.14 Manm yo, ni adilt ni jèn yo,15 sètifye ke yo diy lè yo reponn kesyon pou rekòmandasyon tanp yo. Kondisyon esansyèl la se pou ogmante temwayaj nou konsènan Bondye Papa a; Pitit Gason L lan, Jezikri; ak retablisman levanjil Li a e fè eksperyans ministè Sentespri a.
Benediksyon tanp yo anpil
Benediksyon prensipal tanp yo se òdonans egzaltasyon yo. Plan levanjil la konsène egzaltasyon epi sa enkli fè ak kenbe alyans sakre avèk Bondye. Eksepte batèm ak konfimasyon, òdonans ak alyans sa yo akonpli nan tanp e nou resevwa yo nan tanp pou vivan yo. Pou mò yo, tout òdonans ak alyans sali yo, nou resevwa yo nan tanp lan.
Brigham Young te anseye: “Pa gen yon bagay Senyè a te ka fè pou sali fanmi imèn nan ke l neglije fè; … tout sa ki kapab akonpli pou sali yo, malgre yo menm, te akonpli nan Sovè a e atravè Li.”16
Dirijan Legliz yo òganize pieu, pawas, kowòm, oksilyè nan Legliz la, misyon, eksetera, nan chapèl nou yo ak lòt bilding yo. Senyè a òganize fanmi etènèl nan tanp sèlman.
Sa klè ke moun ki gen kè brize ak lespri kontri yo ki vrèman repanti pou peche yo totalman akseptab devan Senyè a nan kay sakre L la.17 Nou konnen “Bondye pa fè eksepsyon moun.”18 Youn nan bagay ki pi presye m renmen apwopo tanp sèke, pami moun ki al ladan yo, pa gen okenn distenksyon richès, ran sosyal, oswa pozisyon sou nenpòt ki fòm. Nou tout egal devan Bondye. Tout moun abiye an blan, sa k vledi nou se yon pèp ki pi ak dwat.19 Tout moun chita kòtakòt avèk dezi nan kè yo pou yo se pitit gason ak pitit fi diy yon Pè Selès eman.
Jis panse ke atravè tout mond la, fi ak gason kapab, pa mwayen “òdonans ak alyan sakre ki disponib nan tanp sakre yo … retounen nan prezans Bondye epi … ini pou letènite.”20 Yo fè sa nan yon bèl sal sèlman sakre ki disponib pou tout manm ki diy pou al nan tanp. Lè yo fin antre nan alyans sa yo, yo ka “wè tèt yo nan miwa tanp yo ki fasafas yo. “Ansanm, miwa tanp yo reflete imaj nan de sans ki sanble yo etann rive jis nan letènite.”21 Imaj sa yo ede nou kontanple paran nou, granparan nou, ak tout jenerasyon anvan yo. Yo ede nou pran konsyans alyans sakre ki konekte nou ak tout jenerasyon ki vin apre yo. Sa ekstrèmeman enpòtan, epi li kòmanse lè nou “wè tèt nou nan tanp lan.”
Prezidan Howard W. Hunter te konseye nou pou n “egzamine ansèyman majestye nan bèl priyè konsekrasyon Tanp Kirtland nan, yon priyè Pwofèt Joseph Smith di li te resevwa pa revelasyon. Se yon priyè ki kontinye pote benediksyon sou nou endividyèlman, antanke fanmi, e antanke pèp gras ak pouvwa prètriz la Senyè a ba nou pou n itilize nan tanp sakre L yo.”22 Li ta bon si nou ta etidye seksyon 109 Doktrin ak Alyans yo epi suiv egzòtasyon Prezidan Hunter a pou “etabli tanp Senyè a kòm gwo senbòl apatenans [nou] nan legliz la.”23
Tanp la se yon lye refij, remèsiman, enstriksyon, konpreyansyon tou, ki “ka pèfeksyone [nou] … nan tout bagay ki gen rapò avèk wayòm Bondye sou tè a.”24 Pandan tout lavi m, li te yon lye trankilite ak lapè pou mwen nan yon mond ki literalman an boulvès.25 Sa mèveye pou n kite sousi mond la dèyè nan ankadreman sakre sa a.
Souvan nan tanp lan, e pandan n ap angaje nou nan rechèch istwa familyal tou, nou resevwa enpresyon nan men Sentespri a.26 Pafwa, nan tanp la, vwal ki separe nou avèk moun ki sou lòtbò yo vin trè fen. Nou resevwa asistans adisyonèl nan efò nou pou n vin sovè sou Mòn Siyon an.
Sa gen kèk ane, nan yon tanp nan Amerik Santral la, madanm youn nan Otorite Jeneral nou yo ki emerit kounyea, te ede yon papa, yon manman ak pitit yo resevwa alyans etènèl yo nan sal sèlman kote miwa tanp yo te ye a. Lè yo te fini epi yo t al gade nan miwa sa yo, li te remake te gen yon figi nan miwa a ki pa t nan sal la. Li te mande manman an e l te aprann sete yon pitit fi yo ki te mouri e konsa, ki pa t fizikman prezan nan sal la. Yo te enkli pitit fi ki te mouri a pa pwokirasyon nan òdonans sakre yo.27 Pa janm souzestime asistans moun lòtbò vwal yo pote nan tanp yo.
Tanpri, nou vle nou konnen konbyen nou anvi pou chak moun fè tout chanjman ki nesesè pou kalifye yo pou y al nan tanp. Avèk èd lapriyè, egzamine ki kote w ye nan lavi ou, chèche gidans Lespri a, epi pale avèk evèk ou sou prepare tèt ou pou al nan tanp. Prezidan Thomas S. Monson di: “Pa gen okenn objektif ki pi enpòtan pou nou pase travay pou nou ka diy pou ale nan tanp.”28
Sovè a “se Wòch Fondasyon Inebranlab lafwa nou ak legliz Li a”
M te gen privilèj pou m te patisipe avèk Prezidan Henry B. Eyring nan rekonsekrasyon Tanp Suva a nan Fiji sa gen de mwa. Sete yon evenman espesyal e sakre. Kouraj Prezidan Eyring ak enpresyon espirityèl solid li te pèmèt rekonsekrasyon an fèt malgre siklòn ki pi terib ki te janm tonbe sou emisfè sid la. Jèn yo, misyonè yo, ak manm yo te resevwa pwoteksyon fizik ak espirityèl.29 Men Senyè a te klèman evidan. Rekonsekrasyon Tanp Suva nan Fiji a sete yon refij kont tanpèt la. Souvan, lè n ap travèse tanpèt nan lavi a, nou wè men Senyè a ki ba nou pwoteksyon etènèl.
Premye konsekrasyon Tanp Suva nan Figi a jou 18 Jen 2000 la te remakab tou. Lè tanp la te prèske fini, yon gwoup rebèl te pran manm Palman yo an otaj. Yo te piye e boule anba lavil Suva a, nan Fiji. Militè yo te deklare lwa masyal.
Antanke Prezidan Entèrejyon, mwen te ale ansanm avèk kat prezidan pieu nan Fiji, pou n te rankontre dirijan militè yo nan kazèn Qeen Elizabeth la. Apre nou te fin eksplike yo konsekrasyon ki te prevwa a, yo te ba nou soutyen yo men yo te enkyè pou sekirite Prezidan Gordon B. Hinckley. Yo te rekòmande pou n te fè yon ti konsekrasyon tou kout san okenn aktivite deyò tanp la, tankou seremoni sèlman wòch la. Yo te redi nou ke nenpòt moun ki t al deyò tanp lan te ka yon sib potansyèl pou vyolans.
Prezidan Hinckley te aksepte pou l te fè yon ti sesyon konsekrasyon tou kout avèk sèlman prezidans nouvo tanp la ak kèk grenn dirijan lokal; yo pa t envite okenn lòt moun akoz danje a. Men, li te deklare byen fèm: “Si pou nou konsakre tanp la, n ap oblije fè seremoni sèlman wòch fondasyon an paske Jezikri se wòch fondasyon an, e sa a se Legliz Li.”
Lè nou te ale deyò a pou seremoni sèlman wòch la, pa t gen okenn manm legliz, ni timoun, ni jounalis, ni okenn lòt moun ki te prezan. Men, yon pwofèt fidèl te demontre angajman kouraje ak inebranlab li nan Sovè a.
Nan apre, an palan de Sovè a, Prezidan Hinckley te di: “Pèsonn pa ka egale Li. Pèsonn pap janm ka egale Li. Louwanj pou Bondye pou don Pitit Gason Byeneme L la, ki te bay lavi li pou nou ka viv e ki se gwo wòch fondasyon inebranlab lafwa nou ak Legliz Li a.”30
Frè m ak sè m yo, mwen priye pou nou chak onore Sovè a e fè chanjman ki nesesè pou nou wè tèt nou nan tanp sakre L yo. Si nou fè sa, nou ka akonpli objektif sakre Li epi prepare tèt nou ak fanmi nou pou resevwa tout benediksyon Senyè a ak Legliz Li a ka devèse nan lavi sa a ak nan letènite. Mwen rann temwayaj ke Sovè a vivan. Nan non Jezikri, amèn.