Pein Tōl eo An Kajjojo Raan
Jemedwōj Ilan̄ eļap an jeļā ta eo kwe im n̄a jej aikuji jān jabdewōt.
Juon iaan kein jerbal ko an Jemedwōj Ilan̄ eaorōk ilo tōl ro Nejin ej ro jibūd im jim̧m̧aad rejim̧we. Jinen jema eaar juon kōrā em̧m̧an. Ilo juon tōre juon men eaar waļo̧k ke iaar dik n̄an keememeje, jema eaar kauweik eō. Lo kauwe in, jibu eaar ba, “Monte, ij tōmak ebaj tarjeņ jon̄an am kauweiki.”
Jema eaar uwaak, “M̧am̧a, Ij kauweik ro neju n̄e ikōņaan.”
Im jibu eaar ba, “Im āindein inaaj kauweik ro neju n̄e ikōņaan.”
Ij lukkuun jeļā bwe jema eaar ron̄ naan in tōl eo em̧m̧an jān jinen raan eo.
N̄e ļōmņak kōn tōl, jemaron̄ ļōmņak kōn al eo jej aolep jeļā im iakwe—“Na Nejin Anij.” Ilo korōj eo jej lo naan kein “Tel iō, lor iō, etetal ibba jiban̄ iō aolep iien.”1
Mae jet iien remootļo̧k, iaar meļeļe bwe ko̧rōj eo ej letok tōl kwojarjar eo n̄an ro jinen im jemen. Ke kar kejōkļo̧kjeņ kōn naan kein, iaar kile bwe ippāer ewōr tōl jab eo, aer pād eļapļo̧k an ļap meļeļeier. Kōj kajjojo, jej akweļap bwe Jemedwōj Ilan̄ enaaj tōl kōj, an̄in kōj, im etetal ippād.
Būreejtōn Dieter F. Uchtdorf eaar ba: “Jemedwōj Ilan̄ ejeļā aikuj ko an ro Nejin eļapļo̧k jen ro jet. Ej jerbal eo An in im aiboojoj eo n̄an jipan̄ kōj ilo aolep iaļ, letok n̄an kōj jipan̄ ko rekabwilōn̄lōn̄ ilo ānbwin im jetōb n̄an jipan̄ kōj ilo iaļ in ad n̄an ro̧o̧lļo̧k n̄an E.”2
Ron̄jaki naan ko: Jemedwōj Ilan̄ elap an jeļā ta eo kwe im n̄a rej aikuji jān jabdewōt. Āinwōt juon tōprak, Eaar kōpooj juon menin letok in kōjparok n̄an kōj kajjojo. Ilo ie elōn̄ jerbal ko. Ekitbuuj Nejin im Pinmuur eo, Jetōb Kwojarjar, kien ko, jeje ko rekwojarjar, jar, rikanaan ro, rijilōk ro, m̧am̧a im baba ro, bubu im jim̧m̧a, ritōl ro ijo jokwe ie, im ro jet—aolep n̄an jipan̄ kōj jepļaak im mour Ippān juon raan.
In kwaļo̧k rainin jet iaan jerbal ko ilo menin letok in kōjparok in me ekōm̧m̧an bwe in kile bwe Jemed Ilan̄ ej tōl, jineete, im etetal ippa im baam̧le eo aō? Aō jar bwe kom̧ kajjojo ren maron̄ kile ilo en̄jake ko ami make bwe Jemedwōj Ilan̄ ej tōl, ān̄in, im etetal ippam̧ im, kōn jeļā in, kwonaaj bōk leke, jeļā bwe kwojjab make iaam̧.
Kien ko an Jemedwōj Ilan̄ rej jerbal ko ilo kein kōjparok eo. Alma eaar kwaļo̧k, “Jerawiwi ejjan̄in m̧ōņōņō.”3 Bōk m̧wil jab jejjet ilo jab iakwe jim̧we ej meanwōd ebōd im kapenļo̧k ļōmņak eo jeļā kake bwe m̧ōjņo̧ emaron̄ ilo m̧ool m̧ōņōņō. Samuel Rileman eo eaar kalikar menin: “kom̧ ar kappukot aolep raan ko in mour ko ami kōn men eo kom̧ij jab maron̄ bōk e; im kom̧ ar kappukot m̧ōņōņō ilo kōm̧m̧an nana, men eo āinjuon jān jekjek in weeppān eo ej ilo Jeban Indeeo eo eļap ad.”4
Kōn rikanaan ro, Jemedwōj Ilan̄ eaar kakeememej kōj bwe jim̧we ej m̧ōņōņō. Kiin̄ Benjamin, n̄an waanjon̄ok, kar kwaļo̧k bwe Jemedwōj Ilan̄ “E ej kajjitōk bwe kom̧in kōm̧m̧an āinwōt Eaar jiron̄ kom̧; bwe eļan̄n̄e kom̧ naaj kōm̧m̧an, E ej kōjeraam̧m̧an kom̧ m̧ōkaj.”5 Jān bar juon al ej itok ejja kakeememej in wōt:
Kōjparok kien ko; kōjparok kien ko!
Ilo menin ewōr ineem̧m̧an; ilo menin ewōr aenōm̧m̧an.
Enaaj jilkintok kōjeraam̧m̧an ko.6
Ke ekar iien keemem eo aō kein 14th, iaar katak kōn jet iaan kōjeraam̧m̧an kein. Iaar jeļā m̧wil eo eoktak ippān ro jinō im jema. Ļōmņak ta eo iaar loe, iaar ba, “Jej ke etal n̄an juon mijen” Reitok in turin mejān jinō ekar kabūrom̧ōj eō. Tokālik, ilo juon koonjeļ an baam̧le, ro jeiū im jatū kar jeļā bwe ro jinōm̧ im jem̧ōm̧ raar kūr n̄an tōl juon mijen.
Kōm kar jokwe ilo juon ranch eaiboojoj ilo Wyoming. Jān baj aō jeļā, mour eaar em̧m̧an. Ikōn ro̧o̧l n̄an m̧weo jān jikuuļ, kadedeļo̧k jerbal ko aō, im ilo̧k im kakidudu, eon̄ad ak alooj ippān kidu eo nejū.
Ejjab to ālkin kar jeļā kōn kūr eo aō, iaar kile bwe iaar iakuj in aje kidu eo nejū būļu. Iaar kepaak jema, kajjitōk ta eo in kōm̧m̧an n̄an Būļu. Iaar kōņaan kalikkar jab jejjet eo kōn ta eo Anij eaar kajjitōk kake. Ijjamin naaj meļo̧kļo̧k uwaak in. Ekar ba, “Ijjab lukkuun jeļā. Emaron̄ bōlen jab maron̄ itok ippād, kōn menin kwōj aikuj kajjitōk ippān Jemedwōj Ilan̄.” Ekkar jab uwaak eo iaar kōtmene.
Iaar jino riiti Bok in Mormon. Iaar lukkuun jar n̄an jeļā eļan̄n̄e in aje kidu eo neju. Uwaak eo aō eaar jab itok ilo iien eo wōt; ak, juon kōļmenļo̧kjeņ eaar juktok ilo kōļmenļo̧kjeņ eo aō: “Kwon jab kapan̄ ro jinōm̧ im jem̧ōm̧. Kwōn jab juon kapan̄pan̄. Em̧ōj aō kūr jinōm̧ im jem̧ōm̧.”
Iaar jeļā ta eo Jemedwōj Ilan̄ eaar aikuji. Jeļā jab in eaar jab kadikļo̧k metak eo aō ilo aje kidu eo nejū. Mekarta, kōn kaarmejete in edik, būruwō eaar pidodoļo̧k im iaar lo aenōm̧m̧an ilo kappukōt ankilan Jemedwōj Ilan̄.
Ij kam̧m̧oolol Jemedwōj Ilan̄ kōn kōjeraam̧m̧an ko im m̧ōņōņō eo ij loe ilo jeje ko rekwojarjar, jar, Jetōb Kwojarjar, im juon jemān ilo mour erreo me ej kōjparok jerbal eo an āinwōt rūkaki in pedped an gospel eo an ro nejin. Raar tōl eō, ļoor eō, im aaet etetal ippa n̄an jipan̄ eō aolep raan—eļaptata n̄e ij ioon men ko reppen.
N̄an kakobaba n̄an bōk kein jipan̄ eo iaar ba kake, kōj kajjojo jej jeram̧m̧an kōn ritōl ro an priesthood eo n̄an tōl im ān̄in kōj.
Būreejtōn Boyd K. Packer eaar ba: “Bisop ro rej bōk im̧we! Kajjojo iaad ewōr anemkwoj n̄an bōk ak kowaan kapilōk jān ritōl ro ad, ak kwon jab kowaan kapilōk an bisop eo am, men̄e lewaj ilo lo̧katok eo ak ijoko jet.”7
Em̧m̧aan rein rej kajjieon̄ jutak ilo etan Irooj. Men̄e jerūtto ak jedik, n̄e Satan ej kōņaan bwe jān ļōmņak aolep men rejako, bisop ro rej pād ijeņ n̄an tōl kōj. N̄e ij kōnono ippān bisop ro, ij lo juon unin kōnono ejjab oktak ikkijien kwaļo̧k likjab ko kōn jab pokake ak en̄taan eo jān bōd ko renana. Bisop ro rekōņaan kwaļo̧k iakwe eo an Jemedwōj Ilan̄ n̄an kajjojo im juon ikdeelel n̄an etetal aolep raan ippān ilo ami pukot kapijuknen eo ami.
Bōlen kein jerbal in kōjparok eo an Jemedwōj Ilan̄ eļaptata ej waļo̧k ilo naan kein: “Bwe kōn an Anij yokwe laļ, E ar letok Nejin emake wōt.”8
N̄an katakin kōj aolep bwe jej aikuj kōm̧m̧ane, Jisōs Kraist eaar bōk m̧aan kōn letok waanjon̄ak eo eweppān me jej aikuj kajjieon̄ anōke. Ej akweļap ippād kōn pā ko reppeļļo̧k n̄an itok, ļoor E.9 Im n̄e jej likjab, eo aolep iien jej, Ej kakeememej kōj, “Bwe lo, N̄a, Anij, Iaar en̄taan kōn men kein n̄an aolep, bwe ren maron̄ jab en̄taan eļan̄n̄e renaaj ukeļo̧k.”10
Ej juon menin letok eaiboojoj! Ukweļo̧k ejjab juon kaje; ej juon jeraam̧m̧an. Ej juon jeraam̧m̧an me ej tōl im ān̄in kōj. Unin an jeje ko rekwojarjar ba bwe jen aikuj katakin ejjeļo̧k ijeļļokin ukweļo̧k.11
Jemedwōj Ilan̄ elōn̄ an aolep kein jipan̄ ko, ak ekkā an kōjerbal bar jet armej n̄an jipan̄ E. Kajjojo raan Ej letok iien em̧m̧an n̄an tōl kōj, jineete kōj, im etetal ippān eo aikuji. Jej aikuj ļoor waanjon̄ok eo an Rilo̧mo̧o̧r. Jej aikuj bar kōm̧m̧ane jerbal in an Jemedwōj Ilan̄.
Āinwōt juon Būreejtōnji eo Eutiej an Doulul eo an Likao ro, Kōm jeļā bwe jodikdik ro rejeraam̧m̧an n̄e ewōr ippāer ro jinen im jemen im ritōl rej jerbal n̄an Jemedwōj Ilan̄ ilo tōl, jineete, im etetal ippāer. Jilu pedped in katak ko12 me enaaj jipan̄ kōj erom m̧ōttan kein jerbal in kōjparok eo an Jemedwōj Ilan̄ n̄an ro jet rej:
M̧oktata, pād ippān jodikdik ro. Būreejtōn Henry B. Eyring eaar kwaļo̧k jibadbad in: “Ewōr jet men ko jej aikuj kōm̧m̧ani me eļap aer aorōk. Aaet rekajoorļo̧k jān kōjerbali naan in katakin ko ad, katak ko renaaj ad waanjon̄ak ko ilo mour kōn katak ko.”13 N̄an tōl jodikdik ro ekitbuuj pād ippāer. Kōmaatļo̧k ami iien ej juon wujlepļo̧k in iakwe me ekōm̧m̧an bwe en waļo̧k ilo naan im waanjon̄ok.
Kein karuo, n̄an m̧ool n̄an tōl jodikdik ro, jej aikuj kōkkejel er ippān lan̄. Iien ekkā an itok n̄e rej make iaer. Jemedwōj Ilan̄ wōt emaron̄ pād ijeņ n̄an tōl ilo aolep men otemjeļo̧k im ilo aolep jikin. Jodikdik ro nejid reaikuj jeļā kilen pukot tōl an Jemedwōj Ilan̄.
Kein kajilu, jej aikuj kōtļo̧k bwe jodikdik ro ren tōl. Āinwōt jinen ak jemen eo em̧m̧an ej jibwe pein nin̄nin̄ eo ej katak etetal, jej aikuj kōtļo̧k n̄an an jodikdik ro eddōkļo̧k. Kōtļo̧k bwe jodikdik ro ren tōl ilo kijenmej im iakwe. Epen im ebōk iien n̄an ad make kōm̧m̧ane. Rej aikuj in itaak ekkatak, ak jen etetal ippāer.
Ro jeiū im jatū, enaaj wōr iien ko ilo mour ko ad n̄e kōjeraam̧m̧an ko an tōl renaaj tinaad ak jako. Ilo kain iien ļo̧n̄tak kein, Elder D. Todd Christofferson eaar kallim̧ur: “N̄e bujen ko am rej wōr tokjāer im kwōn pokake. Innām kwōn kajjitōk ilo tōmak, jab eno̧k kake, ekkar n̄an aikuj eo am, im Anij enaaj uwaak. Enaaj rejtake eok ilo am jerbal im mije eok. Ilo iien im An kilaan make Enaaj erļo̧ke Pein n̄an eok, im ba, ‘N̄a e.’”14
llo juon kain tōre jab in, iaar kappukōt kapilōk an Jemedwōj Ilan̄ kōn jokkuun wōt juon im jar an bōro ium̧win eļapļo̧k jān juon iiō n̄an pukōt uwaak eo n̄an jekjek eo epen. Iaar lukkuun jeļā bwe Jemedwōj Ilan̄ ej uwaaki aolep jar ko rem̧ool. Aaet iaar ioon juon en̄jake juon raan me iaar etal n̄an tampeļ kōn juon kajjitōk: “Jemedwōj Ilan̄, Kwoj ke lukkuun kea?”
Iaar jijet epaakeļo̧k lik tata ilo ruum̧ in kōttar eo ilo Logan-Utah-Tampeļ, ikar ilbōk, deļo̧n̄ tok ilo ruum̧ eo raan jab eo eaar tampeļ būreejtōn eo Vaughn J. Featherstone, juon m̧ōttan baam̧le eo epaak. Eaar jutak im̧aan in jarlepju eo im kar karuwaineneik kōm̧ wōj. Ke eaar kile eō ilubwiljin ro ilo tampeļ eo, eaar bōjrak an kōnono, kar reitok n̄an eō ilo mej ko mejān, im kar ba, “Brother Brough, em̧m̧an bwe jelo eok ilo tampeļ in rainin.”
Ijamin naaj meļoklo̧k iien eo. Eaar eļan̄n̄e—ilo karuwainene—an Jemedwōj Ilan̄ kar erļo̧k tok Pein im ba, “N̄a e.”
Jemedwōj Ilan̄ elukkuun kea im ej ron̄jake im uwaake jar an aolep ajri.15 Āinwōt juon iaan ro Nejin, ijeļā bwe uwaak eo n̄an jar ko aō raar itok ilo iien eo an Irooj. Im jen en̄jake in, eaar ļapļo̧k aō meļeļe jen jinoin bwe jej ajri ro nejin Anij im bwe Eaar jilkintok kōj n̄an ijin bwe jen maron̄ en̄jake An pād kiiō im jepļaak im mour Ippān juon raan.
Ij kam̧ool bwe Jemedwōj Ilan̄ enaaj tōl kōj, an̄in kōj, im etetal ippād. Ilo ad ļoor Nejin im ron̄jake ro Karejeraņ, rijilōk im rikanaan ro, jenaaj lo iaļ eo n̄an mour indeeo. Ilo etan Jisōs Kraist, amen.