Al ko Al Kaki im Jab Al Kaki
Ij akweļap ippāmi kajjojo n̄an pād ilo kuwaer in.
“Ewōr meram ilo būruwō rainin,” Eliza Hewitt eaar je, “eļapļo̧k aiboojoj im meram jān meram ko ilo jabdewōt ilo laļ in, kōnke Jisōs ej aō meram.”1 Kōn m̧ōņōņō ilo kajjojo noot, bwe al in etto in an Rikūrrijin epen al kake ilo ad jab ettōn̄. Ak rainin ikōņaan kōnono bar juon wāween ukōt juon eoon jān e me emaron̄ jipan̄ ilo raan ko n̄e jej lo an pen n̄an al ak ettōn̄ im “iien ko rem̧m̧an raenōm̧m̧an” āinwōt rejjab waļoktok.” Eļan̄n̄e ilo jidik iien kwe ak ro rejiten bōro rejjab maron̄ al ilo ainikien m̧ōņōņō kwoj ron̄ jen ro jet, in ba kwōn dāpdāp wōt ilo eoon eo ilo al in me ej kwaļo̧k, “Jisōs ej ron̄jake emaron̄ ron̄ al ko [kwōj] jab maron̄ al.”2
Ibwilijin men ko jej jelm̧ai āinwōt ro nejin Anij rej mour ilo juon laļ jerawiwi ej bwe jet raan reppen, n̄e tōmak eo ad im peran eo ad rej idajon̄jon̄ Idajon̄jon̄ kein remaron̄ itok jān kōnke ewōr juon men jej m̧ōjņo̧ ie ak m̧ōjņo̧ ilo ro jet, ak m̧ōjņo̧ ilo mour, ak jekdo̧o̧n ta un ko, jej lo remaron̄ bōbrae kōj jān ad kwaļo̧k ad lan̄lōn̄ ak kam̧oolol im kōm̧m̧an bwe jān tōmak jeban en̄jake “lem̧ōņōņō ilo jetōb [eo]”3 bwe Eliza Hewitt ekar kōmeļeļeik ilo juon iaan eoon kein an.
Kōn menin ta eo jej kōm̧m̧ane ilo kain iien rot kein? Ilo juon men, jej dāpij kapilōk eo an Rijilōk Paul n̄an “kōjatdikdik kōn ta [eo] jej jab loe … [im] jej kijenmej im kattar e.”4 Ilo iien ko n̄e ad lan̄lōn̄ ej makunļo̧k n̄an jon̄an eo me jejjab kile n̄an jidik, ekōm̧m̧an bwe jān aikuj in pād wōt ium̧win jidik iien im ron̄jake ro jet, bōk kajoor jān wōj eo an al ko ipeļaakid. Elōn̄ iaad ro me rej “kakkōt ejaak tōmak” epād ippāer ad lōke eaar kōketak im ad al ekanooj kōkōm̧anm̧anļo̧k kōn jerbal epaak juon eo kōn ainikien ekajoorļo̧k, em̧ool ļo̧k. Em̧ool ej ļoor ļo̧k al in nōbar ko indeeo, jej aikuj jutak epaak ļo̧k āinwōt ilo piktok in armej n̄an Rilo̧mo̧o̧r im Ripinmuur eo an laļ in—eo eweepān. Innām jej maron̄ bōk peran jān An kajoor n̄an ron̄jake aikuj ko ad im bōk kōjatdikdik ilo lo̧mo̧o̧r eo An kōn Jemen ilo etaad. Em̧ool bwe “n̄e Irooj ej epaak” ilo “būruwō ij en̄jake ineem̧m̧an [im] m̧ōņōņō rej waļo̧k.”5
Ilo raan ko n̄e jej en̄jake ad erļo̧k, edikļo̧k jān ta eo jej loe ak ron̄ jen ro jet, in mōk kajjitōk ippād, eļaptata jodikdik ro an Kabun̄ in, n̄an keememej bwe jen kōm̧am̧an eo ekwojarjar an Anij ejjab aolep ainikien ilo kuwaer in rej juon wōt. Ebōk elōn̄—soprano im alto, bariton im bass—bwe al eo en em̧m̧an. N̄an kōjerbal juon ļain jān leta kein rekaitoktok limo an kōrā rein ruo Rekwojarjar: “Aolep kōm̧anm̧an ko an anij ewōr juon jikier ilo kuwaer eo.”6 N̄e jej lo m̧ōjņo̧ ko ad make ak kajjieon̄ jelm̧ae ta eo—eaar im̧we kōj make ilo m̧antid im ilo social media—jej jerwane ainikien eo me Anij ej kōņaan ke Eaar kōm̧anm̧an juon laļ eokoktak.
Kiiō, menin ejjab ba bwe aolep ro ilo kumi in al eo remaron̄ lam̧ōj kōn kōņaan eo an make! Okoktak eo ejjab ilo ainikien ko reļļaaj ak kuwaer ebōk ekkatak—bwe ad jibarbar rainin, Elder Hales, in ba ekkatak—ak ilo iien eo jej bōk naan ko rekwojarjar kar kwaļo̧ki im al eo karōke m̧okta jen laļ, Jemedwōj Ilan̄ eaar kōņaan bwe jen al kake kōn ainikieed make, im jab ro jet. Leke eok make, im tōmak ilo E. Jab itweļo̧ke aorōk eo am ak jerwaan am ijo koņaam̧. Ilōn̄in aolep men otemjeļo̧k, jab kowaane eddo eo am ilo ko̧rōj. Ebaj et? Kōnke kweinjuon; im jejuwaan. N̄e ejako juon ainikien ekkam̧ōjņo̧ik aolep rial ro jet ilo kumi in al in ad, ekoba jako eo an ro raar bar kōņaan ro̧o̧l tok n̄an Kabun̄ in.
Ak men̄e ij rōjan̄ kom̧ aolep n̄an bōk tōmak ilo al ko me remaron̄ pen n̄an al, ij lukkuun kile bwe unin oktak ko Ij apeļtak kōn al ko jet me—rejjan̄in—al kaki.
N̄e ij lo jeraam̧m̧an ko rejjab jejjet an laļin, Ij limō jidik im al ippān Mrs. Hewitt kōn “kōjeram̧m̧an ko [Anij] ej litok kiiō [im] bwe lan̄lōn̄ ‘repād’ im̧aan.”7 Kuwaer in eban lukkuun, tiljek al n̄e jeban kea kōn ro rejeram̧ōl. Jeram̧m̧an ej juon kaje me ej wōnm̧aanļo̧k, jen iiō n̄an iiō im epepen n̄an epepen. Ej kakkure ānbwiniid, kakkure ad jetōb, kowaan baam̧le ko, im kakkure kōttōbar ko. Eļan̄n̄e jenaaj lukkuun kōm̧m̧an bwe en dikļo̧k jeram̧ōļ, āinwōt an Jisōs kar kakien kōj n̄an kōm̧m̧ane, bōlen jet iaan anjiwiwi ko an laļ maron̄ kar kili “Ewōr Meram ilo Būruwō Rainin,” bōlen ej kab kein kajuon ilo mour ko aer.
Ij barāinwōt lo ke epen n̄an al al in m̧ōņōņō, kōnke elōn̄ ro ipeļaakid rej en̄taan kōn nan̄inmej in kōmālij im nan̄inmej ko ilo ānbwiin. Ejerata, edodo kein me jet iien ebōk jerbal in kijejeto an rikōjparok, ekoba ro uwaan baam̧le eo. Ij jar bwe jeban kōtļo̧k bwe rein nejin Anij ren en̄taan wōt im jenaaj pelpel kōn kajoor eo An n̄an ron̄ al ko reban al kaki kiiō.
Im juon raan ij kōjatdikdik bwe aolep armej ro ilal in remaron̄ jerbal ippān doon jekdo̧o̧n ta kōļar in kilier ak m̧antier, kwaļo̧k bwe buu ko, naan ko renana, naan lāj ko rejjab wāweeen ņa mejļan pok an armej. Ilo aolep bwebwenato otemjeļo̧k, naan in kean̄ in lan̄ eaar waļo̧k n̄an kōj bwe wāween eo dee in n̄an ņamejļan jukjukinpād ej ilo iakwe Anij im kōjparok kien ko An, aaet ekōpeļļo̧k kōjem eo ejjjeļo̧k jem̧ļo̧kin, n̄an iakwe doon āinwōt ro rituriid. Rikanaan Ether eaar kwaļo̧k bwe jej aikuj “kōjatdikdik kōn juon laļ eo em̧m̧anļo̧k.” Riiti menin im taujin iiō tok ālik, tariņae jorrāān Moronai eaar kwaļo̧k bwe “wāween eo em̧m̧antata” bwe laļ in en aolep iien gospel eo an Jisōs Kraist.8
Ewi jon̄an ad m̧ōņōņō bwe ilubwilijin kain apan̄ kein rej itok, jān iien n̄an iien, juon oktak eļap ej kain al rot eo jej kile ad make jab maron̄ al kake, ak kōn juon un eoktak. En̄jake kein rem̧wilaļ im ko ad make, men̄e rekwojarjar, rejjab maron̄ ak rejjab aikuj kwaļo̧k—āinwōt iakwe eo an Cordelia n̄an jemān, jān menin ekar ba: “Aō iakwe … em̧weie ļo̧k jān lo̧eō. … Ijjab maron̄ ilo naan kwaļo̧k aolep en̄jake ko an būruwō.”9 Ej itok n̄an kōj āinwōt juon men em̧m̧an, juon men ekwojarjar, en̄jake kein rejjab kōnono kaki—reļļap ilo jetōb—āinwōt jar eo Jisōs eaar kōm̧m̧ane n̄an ro nejin RiNnipai ro. Ro im raar kam̧ool kake raar ļo̧o̧ke:
“Māj ejjan̄in kar lo, im barāinwōt lo̧jiln̄i rejjan̄in kar ron̄… āindein eļap im kabwilōn̄lōn̄ men kein āinwōt kōm ar lo im ron̄ Jisōs eaar kōnono n̄an Jemān;
“… Ejjeļo̧k lo maron̄ kōnono, im jab maron̄ kar jeje jān jabdewōt armej, im ejjeļo̧k bōro ko an armej ļōmņak kōn jon̄an im kabwilōn̄lōn̄ in men ko āinwōt kōm ar jim̧or lo im ron̄ an Jisōs kōnono.”10
Kain kwojarjar rot kein raar ennojak wōt kōn en̄jake, men̄e emaron̄ kar jerbal, emaron̄ ainwōt ne ejej tokjen.
Ro jeiū im jatū, jej pād ilo juon laļ ewabanban kōn elōn̄ al ko jejjab maron̄, ak jeban aaet al kaki. Ak ij akweļap ippāmi kajjojo n̄an pād ilo kuwaer in im kaaorōk ainikien eo me ej make wōt em̧m̧an an aolep al—“al in iakwe em̧ool in pinmuur.”11 Ejeram̧m̧an, bwe ejjeļo̧k jon̄an oraņ kōtmene. Ewōr ruum̧ n̄an ro oktak kajin ko aer, eoktak m̧anit ko aer, n̄an kuk ippān doon jān jikin ko rellōn̄. Ewōr ruum̧ n̄an ro rejjan̄in m̧are, rim̧are, baam̧le ko, im ro ejjeļo̧k nejier. Ewōr ruum̧ n̄an ro ewōr aer kajjitōk kōn aer tōmak im ruum̧ n̄an ro rej tōmak wōt. Ewōr ruum̧ n̄an ro rej sexual attraction. Ilo tukaduin, ewōr juon jikin n̄an aolep ro rej iakwe Anij im kōjparok kien ko An ilo ejjeļo̧k kalijekļo̧k ilo mwil, bwe n̄e iakwe an Anij ej unin al eo ad, em̧ool jenaaj kōnaan pokake E ilo jabdewōt jekjek. Kōn iakwe im tōmak eo ekwojarjar, ukweļo̧k im tiriam̧o̧kake, m̧ool im jeo̧rļo̧kin bōd, ewōr ruum̧ ilo kuwaer in n̄an aolep ro rej kōņaan pād ijen.12 “Itok,” Jemed ej ba n̄an kōj kajjojo, ak Ekar bar ba, “Jab lōmņak in pād wōt.” Jej ettōn̄dikdik im kile bwe Anij ej ļōmņak kake kōj eļapļo̧k jen ad ļōmņake.
Ilo al in eļap me ej karōk eo An n̄an mour āinwōt Anij eo ad, jemaron̄ ettā ļoor An tōl eļap im jerbale wōt al ko jejjab maron̄ ak jan̄in de al kaki, m̧ae iien eo jemaron̄ al al kein“aiboojoj[ko] n̄an [ad] Kiin̄.”13 Bwe juon raan, āinwōt an al eo em̧m̧an ippād ba:
Jen al im lamij iben dri tarinae ro in lon,
Hosanna, hosanna non Anij im Lam! …
… Āinwōt Jisōs enaj wōnlaļtak ilo an jariot kijeek!”14
Ij kam̧ool bwe awa eo enaaj itok, bwe Anij Jemed Indeeo enaaj bar juon alen jilkintok Nejin Jiten bōro Emake Wōt, iien in n̄an tōl im irooj āinwōt Kiin̄ an Kiin̄ raņ. Ij kam̧ool bwe en̄in ej Kabun̄ eo An kar jepļaaktok im ej waan bōktok kain̄i in lo̧mo̧o̧r in gospel eo An n̄an aolep armej. N̄e naan eo An “enaaj pedjake aolep laļ [im] loļo̧k aolep jikin,”15 em̧ool Jisōs enaaj “[kwalōk] an ettōn̄dikdik.”16 Enaaj kanooj lōn̄ jetōb ko raiboojoj indeeo ilo raan en. Kōn awa eo kar kallim̧ur bwe enaaj itok, ij jar ilo etan Jisōs Kraist, amen.