Juon Ainikien Kakkōl
Men̄e rikanaan ro rej en̄jake ke ej aer eddo n̄an kakkōl, ej barāinwōt juon eddo ro jet rej ippān doon kake.
Rikanaan Ezekiel eaar ļotak enan̄in jibukwi iiō moktaļo̧k jān an Liai im baam̧le eo an kar em̧m̧akūt jān Jerusalem. Ilo 597 MK, ke ej 25 an iiō, Ezekiel ekar juon iaan ro rekar bōkļo̧k er n̄an Babylon iumin kamakoko eo an Nebuchadnezzar, im ilo ad jeļā, eaar pād ijen ilo aolepān mour eo an. 1 Ej itok jān bwijin ro raar kabwijer taitōļ in pris, āinwot Aaron, im ke ej 30 an iiō, eaar erom juon rikanaan. 2
Ilo ijjitōn̄ in an Ezekiel, Jisōs eaar kōjerbale āinwōt juon riwaj.
“Im [riwaj eo] ej lo an jāje eo itok ņae āne eo, im ej uuki jilel eo, im ej kakkōl armej ro;
“Innām eo ej ron̄jake ainikien jilel eo im e jab eo̧ron̄ naan in kakkōl eo, jāje eo enaaj m̧an e; an make bōd.” 3
Ilo bar juon wāween, “Ak eļan̄n̄e riwaj eo ej lo juon jāje itok, im e jab uuki jilel eo, im e jab kakkōl armej ro, im jāje eo ej itok im m̧an juon iaer, armej eo enaaj jako kōn jero̧wiwi ko an make, … ak Inaaj ņa ruōn riwaj eo.” 4
Innām eaar kajju kōnono n̄an Ezekiel, Jisōs eaar kwaļo̧k, “Im kwe nejin armej, Iar kōm̧m̧an eok juon riwaj n̄an m̧ōn Israel; im kwōnaaj ron̄ juon naan jān lo̧n̄iō, im kwōnaaj kakkōl er kōn N̄a.” 5 Kakkōl in ej n̄an kattoļo̧k kōj jān jerawiwi.
“N̄e Ij ba n̄an juon rinana, Orinana, ilo m̧ool kwōnaaj mej; im kwō jab kōnono n̄an kakkōl rinana eo jān iaļ eo an, enaaj mej ilo an nana; ak Inaaj ņa ruōm̧.
“Mekarta, eļan̄n̄e kwōj kakkōl rinana eo jān iaļ eo an bwe en oktak jān e, ak e jab oktak jān iaļ eo an, enaaj mej ilo an nana; ak kwōnaaj lo̧mo̧o̧ren jetōb eo am̧ …
“Im, n̄e Ij ba n̄an juon rinana, Ilo m̧ool kwōnaaj mej; im ej oktak jān jero̧wiwi ko an, im ej kōm̧m̧an jim̧we im wānōk; …
“Re ban keememej ņae e aolep jero̧wiwi ko an ko ear jero̧wiwi kaki: ej kōm̧m̧an jim̧we im wānōk, im enaaj mour.” 6
Men eo ekabwilōn̄lōn̄, kakkōl in ej barāinwōt iookļo̧k ro rekwojarjar. “N̄e ij ba n̄an juon rū wānōk bwe ilo m̧ool enaaj mour, innām ej lōke an wānōk im ej kōm̧m̧an nana, re ban keememej aolep [wānōk] ko an, ak enaaj mej ilo nana eo ear kōm̧m̧ane.” 7
Akweļap n̄an ro Nejin, Anij ej ba n̄an Ezekiel, “Kwōn ba n̄an er, Āinwōt Ij mour, Irooj Anij ej ba, I jab m̧ōņōņō kōn mej an ri nana; ak em̧m̧anļo̧k n̄e ri nana eo ej oktak jān iaļ eo an im mour: kom̧win oktak, kom̧win oktak jān iaļ ko ami, kom ri nana; bwe etke kom̧ naaj mej, mōn Israel?” 8
Ilo aer jab kōņaan bōk kaje, Jemedwōj Ilan̄ im Rilo̧mo̧o̧r eo ad rej kōņaan bwe jen m̧ōņōņō im akweļap n̄an kōj n̄an ukweļo̧k, ilo ad lukkuun jeļā bwe “jerawiwi ejjan̄in kar [im ejamin naaj] m̧ōņōņō.” 9 Kōn menin Ezekiel im aolep rikanaan ro mokta im ro tokālik, rej kōnono kōn naan ko an Anij kōn bōro em̧ool, emōj kar kakkōl aolep ro renaaj erļo̧k jān Setan, rikōjrat an jetōb ko ad, im “kāālet anemkwōj im mour indeeo, kōn Rijojomar eo an armej otemjeļo̧k.” 10
Men̄e rikanaan ro rej en̄jake ke ej aer eddo n̄an kakkōl, ej barāinwōt juon eddo ro jet rej ippān doon kake. Ilo m̧ool, “im ej an kajjojo armej eo emōj kar kakkōl e n̄an kakkōl eo riturun.” 11 Kōj ro emōj ad bōk juon jeļāļo̧kjeņ kōn karōk in m̧ōņōņō eo eļap—im kien ko an karōk in m̧ōņōņō eo—jej aikuj en̄jake juon ikdeleel n̄an kajedeed jeļāļo̧kjeņ in kōnke em̧ōj an kōm̧m̧an eļap oktak ijin im ilo mour indeeo. Im eļan̄n̄e jej kajjitōk, “Wōn eo ritūrū me Ij aikuj kakkōl e?” aeet uwaake eo ej waļo̧k ilo būrabōļ eo me ej ijjino kōn, “Juon armej ej wanlaļ ļo̧k jān Jerusalem n̄an Jeriko, im e pooļ kōn ri rakimi ro,” 12 im ro jet.
Lōmņak kōn būrabōļ eo kōn RiSamaria eo em̧m̧an ilo jekjek in ekakemeemej kōj bwe kajjitōk in “Wōn eo ritūru?” ekar iookļo̧k kien ko ruo reļļap: Kwōn yokwe Irooj am̧ Anij kōn aolepān būruom̧, im kōn aolepen am̧, im kōn aolepān am̧ kajoor, im kōn am̧ lōmņak otemjej; im ri turum āinwōt kwe.” 13 Im̧we eo n̄an kotak ainikien kakkōl ej iakwe—iakwe Anij im iakwe ro jet. N̄an kakkōl meļeļein n̄an kea. Irooj ej katakin bwe menin ej aikuj kōm̧m̧an “ilo ineem̧m̧an im ilo ettā” 14 im “jān wōt jeļā ņae, jān meanwōd, jān meoeo … , im jān iakwe jab ankilaan riab.” 15 Emaron̄ juon menin kōkairir, āinwōt n̄e jej kakkōl juon ajri bwe en jab likūt pein ilo juon kijeek. Ej aikuj lukkuun alikkar im jet iien en dim. Jet iien, kakkōl emaron̄ itok ilo wāween ņa ruōn armej en “n̄e jej em̧m̧akūt kōn Jetōb Kwojarjar,” 16 ak aolep iien ej ejaak kōn iakwe. Kam̧ool, n̄an waanjon̄ak, iakwe ej kareel jerbal in jipan̄ im kaarmejete ko an mijenede ro.
Em̧ool iakwe emaron̄ kōm̧m̧an bwe ro jined im jemed ren kakkōl ro “rituruier”—repaakeer tata ej ro nejieer make. Meļeļein katakin im kam̧ool kōn m̧ool ko an gospel. Meļeļein katakin ajri ro katak ko an Kraist: tōmak, ukweļo̧k, peptaij, im menin letok eo an Jetōb Kwojarjar. 17 Irooj ej kakeemeemej, “A Iaar jiron̄ kom̧ n̄an kōkaajririk ro nejimi ilo meram im m̧ool.” 18
Mōttan eo eaorōk ilo eddo an ro jined im jemed n̄an kakkōl ejjab n̄an wōt kajakoikļo̧k nana ko wōt rej waļo̧k jān jerawiwi ak barāinwōt lan̄lōn̄ eo ej itok jān pokake kien ko. Reilikļo̧k n̄an naan ko an Inōs kōn ta eo ekar kōm̧m̧an bwe en pukot Anij, bōk jeorļo̧k in jerawiwi, im oktak:
“Lo, iaar ilo̧k n̄an kakidudu ilo bukun wōjke ko; im naan ko ekkutkut aō kar ron̄ an jema kōnono kōn mour indeeo, im kōn lan̄lōn̄ an ro doon, raar deļo̧n̄ ilo m̧wilaļ in buruō.
“Im aō eaar ean̄den; im iaar bukwelōlō im̧aan aō Rikōm̧anm̧an, im iaar kūr n̄ān e ilo jar ekajoor im akweļap.” 19
Kōn iakwe eo An ban maron̄ keidi im an ļōmņak kōn ro jet im n̄an aer m̧ōņōņō, Jisōs eaar jab aliklik n̄an kakkōl. Ilo jinoin iien kwaļo̧k eo An, “Jisōs ej jino An kwaļo̧k im ba, Kom̧win Ukeļo̧k ippemi, bwe aelōn̄ in lan̄ epaak.” 20 Kōnke Ejeļā bwe ejjeļo̧k bar juon iaļ n̄an lan̄, Eaar kakien:
“Kom̧win deļo̧n̄ ilowaan kōjām e aidik; bwe e depakpak kōjām, im eļap iaļ eo ej tōl ļo̧k n̄an mej, im elōn̄ ro rej deļo̧n̄ ie:
“Bwe e rānin̄ kōjām, im e aidik iaļ eo ej tōl ļo̧k n̄an mour, im e iiet ro rej loe.” 21
Eaar joļo̧k iien ko an ippān rijerawiwi, im ba, “I ar jab itok bwe In kūr ro re wānōk, a ro ri jero̧wiwi n̄an ukeļo̧k ippāer.” 22
Āinwōt skraib ro im Parisi im Saddusi, Jisōs eaar jab mijak jabdewōt men ke ej kwaļo̧k n̄an er kōn aer m̧oņ. An kakkōl im kien raar kajju: “Wo n̄an kom̧, skraib im Parisi ro, ri jeļā m̧oņ! Bwe kom̧ij owōj kōn kein ka jon̄oul an mint, im anis, im kōmmin, im kom̧ ar joļo̧k men ko reļap an kien, ekajet im tūriam̧o, im tōmak. Em̧m̧an bwe kom̧win kar kōm̧m̧an men kein im jab joļo̧k kaņ jet.” 23 Em̧ool ejjeļo̧k juon en kar ņa ruōn Rilo̧mo̧o̧r kōn an jab iakwe RiSkraib im Parisi ro—ālkin men otemjej, Ekar en̄taan im mej bwe en lo̧mo̧o̧ren er barāinwōt. Ak iakwe er, Ekar jab maron̄ kōrōļo̧k er ilo jerawiwi ijjelo̧kin aikuj kar kajim̧wi. Juon rietale eaar je menin, “Jisōs eaar katakin rikaļoor ro an n̄an kōm̧m̧ane ta ko eaar kōm̧m̧ani: n̄an karuwaineneik aolep ak barāinwōt n̄an katakin kōn jerawiwi, kōnke iakwe ej aikuj kakkōl armej kōn ta ko emaron̄ kakkure er.” 24
Jet iien ro me rej kotak ainikien kakkōl rej dike er āinwōt jet ro renana. Epok ilo aer meļeļe, ijoke, ro rej ba bwe m̧ool im jon̄ak ko rem̧m̧an rej aer wōt kālet ejja rein wōt em̧ōkaj aer lo ruōn armej rōt en me ejjab ļoor kien ko me elōn̄ armej rej ļōmņak rejim̧we.” Juon rijeje ej watōk menin āinwōt juon “imenene ekajokook”:
“Ilo juon imenene ekainepata komaron̄ jeļā kom̧m̧an ak nana itok jān elmākot eo am. Ilo juon imenene ekajokook komaron̄ jeļā em̧m̧an ak nana itok jān ta ko ro ipeļaakim rej ba kōn kwe, emaron̄ em̧m̧an ak remaron̄ jab errā ippam. … [Ilo juon imenene ekajokook,] mour em̧m̧an ejjab pedped ioon jim̧we im bōd, ej pedped ioon wōn ak ta eo rej aikuj n̄an errā kake ak rejjab aikuj errā kake. …
“… Aolep armej ejjeļo̧k aer lōke iien ilo juon mour eo em̧m̧an eo ej pedped ioon errā ak jab errā. Ejjeļo̧k jon̄ak ko rejejjet im em̧ōj kapeni, rej ukoktak ekkar n̄an kōņaan ko an jarlepju in armej. Ej juon imenene eo ekōļapļap, etarjānjon̄ak im emakijkij aer mijak n̄an kōm̧m̧ani men ko renana, n̄e aolep armej kar kiel er n̄an ļoor jarlepju eo. …
“Imenene eo ekainepata emaron̄ lej, ijoke kodike jerawiwi im iakwe ro rijerawiwi. Imenene eo ekajokook raan kein rekaorōk errā im jab errā, ak emaron̄ ejjeļo̧k an turiam̧o n̄an ro rejjab errā im n̄an ro reiet eoktak aer kālet jān ro rellon ļo̧k uwaaer.” 25
N̄an keidi menin ej “ejm̧aan in ad Ripinmuur,” 26 juon pedped in ekajet im m̧ool eo edim im pen. Eļapļo̧k an em̧m̧an n̄an n̄e ewōr ippād kien ko an Anij me repan ukoktak jān er jemaron̄ m̧akūtkūt n̄an kālet mejān kajjik eo ad ijjelo̧kin pād ium̧win kakien ko rej ukoktak im nana ko an jān jarlepju in armej ilo iaļan bōk meļeļe imejatoto. Eļapļo̧k an em̧m̧an n̄e jej jeļā kōn m̧ool eo ijjeļo̧kin ad “jeplōklōk āinwōt ņo ko, im makūtkūt kōn jabdewōt kōto in katak.” 27 Eļapļo̧k an em̧m̧an n̄an ukweļo̧k im mour kōn jon̄ak ko an gospel ijjeļo̧kin ad etan wōt n̄e ejjeļo̧k jim̧we im bōd im jerata kōn jerawiwi im ajļo̧k tokālik.
Irooj eaar kwaļo̧k, “Im Ainikien kakkōl naaj n̄ān armej otemjej, jān lo̧n̄iin ro rikaļoora, ro Iaar kāālet ilo raan kein āliktata.” 28 Āinwōt jet riwaj im rikaļoor ro, jejjab maron̄ ikōn̄ kōn men in “iaļ eo em̧m̧anļo̧k.” 29 Āinwōt Ezekiel, jejjab maron̄ lo an jāje eo itok ilo āne eo im “jab uuki jilel eo.” 31 Jab n̄an ba bwe jej aikuj kōļļaļļal ilo kōjem̧ ko an ro riturir ak jutak im̧aan mejān armej lam̧ōj im ba, “Ukweļo̧k!” Em̧ool, n̄e kwōj ļōmņak kōn menin, epād ippem ilo jepļaaktok eo an gospel ta eo armej, ilo er make, relukkuun aikuji. Kōn menin ainikien kakkōl eo ejjab em̧m̧an wōt, ak ilo naan ko an Sam Ko, ej juon “lam̧ōj ilo lan̄lōn̄.” 31
Deseret News rijeje nuuj eo Hal Boyd eaar je juon waanjon̄ak kōn wāween ad ikkōn̄ kōn juon menin kōnono eo ej kōmetak ro jet Eaar je bwe kōn lōmņak ko kōn m̧are ej juon menin “arto artak” ilubwiljin ro reperan im rem̧m̧an ilo jukjukinpād ilo Amedka, m̧are make ejjab juon menin arto artak n̄an ro rej pedjake wāween in. “‘Ro reperan im rekkar ro em̧ōj aer ro rej dāpij wōt m̧are ko aer ren lale bwe ajri ro nejier ren jeram̧m̧an itok jān erreo in m̧are eo aer.’ … Jorāān eo, ijoko, ej bwe [rej] kajjieon̄ jab kwaļo̧k kōn ta ko rej mour kaki.”Rejjab kōņaan bwe ren “jelōt” ro me remaron̄ relukkuun aikuj tōl ko aer rem̧m̧an, ak “ej bōlen iien n̄an ro eļap jeļāļo̧kjeņ ko aer im baam̧ļe ko rekajoor n̄an kōbōjrak aer āinwōt n̄e ejjejet mour ko aer im jino kajedeek ta iminene ko aer ikkijeen m̧are im kōkaajjiriri … [im] Riamedka ro jet m̧ōttāer errā kake.” 32
Jej lōke bwe eļaptata diktak in epepen in, jodikdik kab rem̧m̧an ded ro ro me Irooj eļap an pedped ioer n̄an kowōnm̧aanļo̧k jerbal in An ilju im jekļaj, renaaj mour kōn katak ko an gospel im jon̄ak ko an Kabun̄ in imaan mejān armej im ijoko jet rettino. Jab kajojoļāāre ro renaaj karuwaineneiktok m̧ool n̄an ro rej kakkōt im likjab ilo jajeļo̧kjeņ. Jab kōtļo̧k am pād ilo men ko reriab ak n̄an mijak—mijak kōn jab aenōm̧m̧an, kaje, ak emaron̄ en̄taan. Keememej Kalim̧ur eo an Rilo̧mo̧o̧r:
“E m̧ōņōņō kom̧ n̄e armej re naaj kajjirere kake kom̧, im matōrtōr kom̧, im naaj ba naan ko re nana otemjej ņae kom̧, riab wōt, kōn N̄a.
“Kom̧win lan̄lōn̄ im kanooj bun̄būruemi, bwe eļap jinōkjeej n̄an kom̧ I lan̄; bwe āindein aer matōrtōr ri kanaan ro m̧okta jān kom̧.” 33
Eļaptata, jej bōk eddo n̄an Anij kōn kālet ko ad im mour ko jekar mour i. Rilo̧mo̧o̧r eaar kwaļo̧k, “Im Jema eaar jilkintok Eō bwe In maron̄ toto ion debwāāl; im ālikin kar kotak Eō ion debwāāl, bwe In maron̄ kan̄ōltok armej otemjej n̄an Eō, bwe āinwōt kar kotak Eō jān armej em̧ool āindein Jema enaaj kotak armej, n̄an jutak imaō, n̄an ekajet kōn jerbal ko aer, eļān̄n̄e rem̧m̧an ak eļan̄n̄e renana.” 34
Kile menin, naan eo em̧m̧antata an Irooj, ij akweļap ilo naan ko an Alma:
“Im kiiō, em̧m̧aan ro [im kōrā ro] jeiū im jatū, ij kōtmāne jān ijo em̧wilaļ tata ilo buruō, aeet, kōn eļap kijooror eo emetak, bwe kom̧in … juļo̧k jero̧wiwi ko ami, im jab aepedped kōn raan in ami ukeļo̧k;
“A bwe kom̧ naaj kōttaik kom̧ im̧aan Irooj, im kūr ioon Etan ekwōjarjar, im ekkōl im jar im jab bōjrak, bwe kom̧in jab maron̄ ioon kapo ko reļļapļo̧k jān ami maron̄ inene, im āindein bōk tōl jān Jetōb Kwojarjar … ;
“En wōr ami lōke ioon Irooj; en wōr juon kōjatdikdik bwe kom̧ naaj bōk mour indeeo; en wōr iakwe an Anij iien otemjej ilo būruōmi, bwe kom̧ in maron̄ jerkak ilo raan eo āliktata im deļo̧n̄ļo̧k ilo kakkijeeo An.” 35
Kōm̧m̧an bwe kōj kajjojo jen maron̄ jiron̄ļo̧k Irooj āinwōt Devid: “Iar jab ņooj Am̧ wānōk ilo būruō; iar kwaļo̧k Am̧ tiljek im Am̧ lo̧mo̧o̧r: iaar jab ņooj Am̧ jouj im Am̧ m̧ool jān jar eo eļap. Kwōn jab dāpij Am̧ tūriam̧okake ko jān n̄a, O Irooj.” 36 Ilo etan Jisōs Kraist, amen.