Jutak Lōn̄tak Itulowa im Wujlepļo̧k
Kōm̧m̧an bwe jān bar etale iaļ eo ad eļan̄n̄e emenin aikuj im reim̧aanļo̧k kōn kōjatdikdik eļap im tōmak. Kōm̧m̧an bwe jān “jutak itulowa” kōn peran im “wujlepļo̧k aolep.”
Jet iiō remootļo̧k leddik eo edik jibūm̧ ekar ettōr tok n̄an n̄a im ilo m̧ōņōņō ba, “Jim̧m̧a, iaar kadeļo̧n̄ aolep jikoor ko jilu ilo ikkure in jōkad eo aō rainin!”
Ilo laudin̄din̄ iaar ba, “Ekanooj em̧m̧an, Sarah!”
Innām jinen eaar reitok n̄an n̄a kōn nukij mejān im ba, “Jikoor eo eaar ruo n̄an juon.”
Iaar jab kajjitōk wōn eaar wiin!
Kweilo̧k in ej juon iien n̄an kejōkļo̧kjeņ, revelesōn, im jet iien bar iien ba kajien.
Ewōr juon kobani in rent wa ewōr juon GPS system ie ņa etan Never Lost. Eļan̄n̄e ebōd am̧ kōjeer wa eo waam̧ ālkin am̧ likūt ia eo kwoj kōņaan jibadōkļo̧k, ainikien eo ej ba kajien ejjab ba, “Kwojakpeel!” Ijello̧kin, ilo juon ainkien ekanooj em̧m̧an, ej ba, “Bar kappok iaļ—n̄e emaron̄, bar kōjeer wa eo waam̧.”
Ilo Ezekiel jej riiti kallim̧ur in eaiboojoj:
“Eļan̄n̄e ri nana eo ej oktak jān aolep jero̧wiwi ko an me ear kōm̧m̧ani, im ej pokake aolep kiein ko aō, im ej kōm̧m̧ane jim̧we im im wānōk, e m̧ool enaaj mour, e an mej.
“Re ban keememej ņae aolep nana ko an ko ear kōm̧m̧āni.”1
Juon kallim̧ur eo eaiboojoj, bōtaab ej aikuji ruo jerbal ko rōdiipio n̄an bōk kallim̧ur eo kein kajilu. Oktak jān aolep; kōjparok aolep; innān aolep ej jeorļo̧k bōd. Menin ej aikuji “wujlepļo̧k aolep”!
Jejjab aikuj āinwōt em̧m̧an eo me, āinwōt an Wall Street Journal eo kwaļo̧k, kar jilkinļo̧k juon kilin leta eobrak kōn jāān ippān juon leta kar jab jaini n̄an Internal Revenue Service eo eaar ba, “Iakwe IRS, Ilowaan jouj im pukōt jāān ko im̧uri ilo eowōj ko jem̧aanļo̧k. P.S. Eļan̄n̄e ālkin menin aō bōklōkōt ej kōļon̄take wōt eō, inaaj jilkinwaj aolepān.”2
Ejjab wāween dein aō kōm̧m̧an! Jejjab dāpij jidik n̄an lale ta jon̄an dettan eo jemaron̄ bōk kake. Irooj ej aikuj bōro eo im ļōmņak eo em̧ōņōņō.3 Aolepān būruwōd! N̄e jej peptaij, jej lukkuun tulo̧k āinwōt juon kōkaļļe in ad kallim̧ur n̄an kanooj ļoor Rilo̧mo̧o̧r eo, jab jimettan in būruwōd. N̄e jej kanooj kallim̧ur im “kōmaatļo̧k,” jeraam̧m̧an ko an lan̄ n̄an em̧m̧an eo ad.4 N̄e jej m̧ōļo ļo̧k ak kallim̧ur wōt jidik, jej jerwane jet iaan kōjeraam̧m̧an ko kāleti.5
Elōn̄ iiō ko ļo̧k, iaar bōk Riscout ro n̄an juon kāām ilo āne jem̧aden. Ļaddik ro raar kiki turin juon kijeek ekilep raar kōjo̧e, im āinwōt aolep ritōl an Scout em̧m̧an, iaar kiki ilo tuļo̧kan tūrak eo waō. Ilo jibbon̄ ke iaar jutak lōn̄tak im kar lale jikin kāām eo, iaar lo juon Riscout, eo inaaj ņa etan Paul, eo kōjellin eaar jab em̧m̧an pāltokin. Iaar kajjitōk ejiet an kar kiki, im eaar uwaak, “Ejjab kanooj em̧m̧an.”
Ke iaar kajjitōk ebajet, eaar ba, “Iaar piio̧; eaar kun kijeek eo.”
Iaar uwaak, “Ekwe, kijeek ko rej āindein. Pāāk in kiki eo am̧ ejjab bwe an meņeņe ke?”
Ejjeļo̧k uwaak.
Innām juon iaan Riscout ro raar koļap im ba, “Eaar jab kōjerbal pāāk in kiki eo an.”
Iaar kajjitōk ilo ļo̧kjen aō, “Ebajet, Paul?”
Kar ikōn̄—innām āliktata uwaak ilo ainikien jo̧o̧k: “Ekwe, iaar ļōmņak eļan̄n̄e iaar jab eļļo̧ke pāāk in kiki eo aō, ijjab aikuj in kar bar limi.”
M̧ool in bwebwenato: eaar piio̧ ium̧win awa ko kōnke eaar kajieon̄ in dāpij ļalem minit in jerbal. Jemaron̄ ļōmņak, “Ewi jon̄an an jōkapāāl! Wōn eo en kar kōņaan kōm̧m̧ane menin?” Ekwe, jej kōm̧m̧āne aolep iien ilo wāween ko eļapļo̧k aer kauwōtata. Jej, ilo tokje, m̧akoko in eļļo̧ke pāāk in kiki ko ad ilo jetōb n̄e jejjab bōk iien n̄an m̧ool in jar, ekkatak, im kijejeto ilo mour kōn gospel eo kajjojo raan; kijeek eo eban kun wōt, ak jejjamin ineem̧m̧an im jej jino piio̧ ilo jetōb.
N̄e jej bun̄ būruwōd make kōn bujen ko ad, jej eddo make kaki kaje ko. Irooj eaar kapilōk kōj “n̄an ekkōl kōn kom̧ make, n̄an tiljek eo̧ron̄e naan ko an mour indeeo.”6 Im Eaar wōnm̧aanļo̧k wōt im kean̄, “Bōtōktōkū ej jamin karreoik er eļan̄n̄e rej jab ron̄jake eō.”7
Ilo m̧ool, ekanooj pidodoļo̧k n̄an “wujlepļo̧k aolep” jān jidik in. N̄e jej leļo̧k wōt jidik ak jab leļo̧k n̄an jidik, ewōr, ilo jekjek in kōnono āinwōt Star Wars, “ewōr juon men ejjab jim̧we.” Jejjab jokkun wōt juon ippān an kilan Anij im kōn menin jejjab jokkun wōt juon ippān paotok eo an lem̧ōņōņō.8 Isaiah eaar ba:
“A ro ri nana rej āinwōt lo̧meto e limaajņoņo, bwe e ban kakkije, im dān ko an rej julōn̄ļo̧k pedkat im bwidej.
“Ejjeļo̧k aenōm̧m̧an, aō Anij ej ba, n̄an ro ri nana.”9
Ejerata, jekdo̧o̧n ia eo jej pād ie ak ia eo jaar pād ie, jejjab ettoļo̧k jān kilan Rilo̧mo̧o̧r eo, eo eaar ba: “Kōn menin, jabdewōt eo ej ukeļo̧k im itok n̄an eō āinwōt juon ajri edik, e Inaaj bōk e, bwe kōn in ej an aelōn̄ in Anij. Lo, n̄an in Iaar likūt mour eo aō, im kar bar bōk e.”10
Ilo ad wōnm̧aanļo̧k wōt in ukeļo̧k im pedped ioon Irooj, jej bōk kajoor ilo ad bar rool im bōk ettā im tōmak an juon ajri edik,11 em̧wie kōn māletlet ej itok jān mour in iminene. Job eaar kean̄, “eo rū wānōk enaaj etal wōt ilo iaļ eo an, im eo erreo pein enaaj kajoorļo̧k im kajoorļo̧k.”12 Eaar Tennyson eo eaar je, “Aō kajoor ej āinwōt kajoor an ro jon̄oul, kōnke būruwō erreo.”13 Irooj eaar kapilōk, “jutak ilo jikin ko rekwōjarjar, im jab em̧m̧akūt.”14
Ļaddik eo nejim Justin eaar mej ke eaar 19 ālkin an tariņaik nan̄inmej eo ilo aolepān an mour. Ilo kōnono eo eaar kwaļo̧k ilo kweilo̧k in kwojkwoj eo m̧okta jān an kar ilo̧k jān kōm, eaar kwaļo̧k juon bwebwenato me eaar aorōk ippān kōn juon jemen im ļaddik eo edik nejin me eaar etal n̄an juon mōn wia kein ikkure ijo eaar wōr juon pāāk in bōbait ejeļā ebooļ āinwōt annan̄ in juon armej. Ļaddik eo eaar baiti men eo āinwōt annan̄ in armej, eo eaar okjakļo̧k im ebar m̧ōkaj an jerkak tok ālkin aolep ebbait ko. Eo jemān eaar kajjitōk ippān ļaddik eo nejin etke armej eo ekar bar jerkak lōn̄tak. Ļaddik eo eaar ļōmņak ium̧win juon minit innām ba, “Ijjab jeļā. Ij ļōmņak kōnke armej ej jutak itulowa.” N̄an erom “wujlepļo̧k,” jej aikuj “jej aikuj jutak ilowa,” “jekdo̧o̧n ta.”15
Jej jutak lōn̄tak itulowa n̄e jej kōttar ilo kijenmej ilo Irooj n̄an kōm̧akūt ak letok ad kajoor n̄an niknik ilo kālōklōk ko ad ilo kanniōk.16 Kain kalōklōk ko remaron̄ in nan̄nmej, jipūkpūk, nan̄inmej in kōmālij, mej an juon eo ejitōnbōro, im ebar lōn̄ apan̄ ko.
Jej jutak lōn̄tak itulowa n̄e jej dāpij lōn̄ļo̧k pā ko rej ettoto. Jej jutak lōn̄tak itulowa n̄e jej kōjparok m̧ool eo ņae nana im laļ eo ettoon me ej ļapļo̧k an abūņōņō kōn meram, ņae etan nana em̧m̧an im em̧m̧an nana17 im “liaakeļo̧k ro rejim̧we kōn aer jim̧we.”18
Jutak lōn̄tak itulowa jekdo̧o̧n apan̄ ko ej kōnke kōn kōkajoorļo̧k im kaenōm̧m̧an eo ej itok jān Jetōb Kwojarjar im juon erreim̧aanļo̧k indeeo me ej em̧m̧anļo̧k jān meļeļe eo an mour in.19 Ilo mour eo ad m̧okta jaar lam̧ōj kōn lan̄lōn̄ kōn iien eo em̧m̧an n̄an dibuk mour wabanban.20 Jaar “wujlepļo̧k” ke jaar laudin̄din̄ ilo kōm̧m̧ane jokālet eo n̄an rikōjparok ro reperan an karōk eo an Jemedwōj Ilan̄. Ej iien n̄an kōm̧m̧ane jokāet eo im bōbrake karōk eo An juon alen!
Ļōļļap eo jema 97 an iiō ej kab jako. Jabdewōt iien juon eaar kajjitōk ippān ejiet an kar pād, uwaak eo an ejjab oktak eaar, “ilo jon̄an eo me 1-nana-10-em̧m̧an, inan̄in 25!” Men̄e em̧m̧aan in ejitōnbōro ejako an jutak ak jijet, im ekanooj pen an ekōnono, uwaak eo an eaar ejja wōt eo. Eaar iien otemjej jutak lōn̄tak itulowa.
Ke jema eaar 90, kōm kar pād lo juon airport im iaar kajjitōk ippān eļan̄n̄e imaron̄ kar bōk juon an wheelchair. Eaar ba, “Jaab, Gary—bōlen n̄e irūttoļo̧k.” Innām eaar bar kakobaba, “Ijello̧kin, eļan̄n̄e im̧ōk in etetal, imaron̄ iien otemjej ettōr.” Eļan̄n̄e jejjab maron̄ in “wujlepļo̧k” ilo jekjek in ad etetal kiiō, innām bōlen jej aikuj ettōr; bōlen jej aikuj bar pukōt ial eo ad. Jemaron̄ em̧ool aikuj in Bar kajjeer wa eo waad. Jemaron̄ aikuj in kijin̄en̄eļo̧k ilo ekkatak, kajoorļo̧k ilo jar, ak kōtļo̧k bwe jet men ren ilo̧k bwe jān maron̄ kōdāpdep ilo men ko me relukkuun aorōk. Jemaron̄ aikuj in men ko an laļ in bwe jān maron̄ dāpdep ilo men ko an indeeo. Jema eaar meļeļe menin.
Ke eaar pād ilo navy ilo Pata Eo An Lal in II, eaar wōr ro ilo m̧weo eļap im aiboojoj21 me raar kajierer kōn pedped ko an; ruo iaan ro m̧ōttan ilo wa eo, Dale Maddox im Don Davidson, raar kile im kajirere. Raar kajjitōk, “Sabin, etke ekanooj ļap am̧ oktak jān aolep? Ekanooj em̧m̧an m̧wūlūm̧ im kwojjab kadōk, kōbaatat, ak kanejnej, ak kwoj ineem̧m̧an im m̧ōņōņō.”
Bwilōn̄ eo aer em̧m̧an kōn jema eaar jab jon̄an wōt ta eo raar katakin kōn Mormon ro, im jema eaar maron̄ katakin im peptaiji ro m̧ōttan jim̧or ilo wa eo. Ro jinen im jemen Dale raar lukkuun illu im kakkōl e bwe eļan̄n̄e ekoba tok ilo Kabun̄ in enaaj luuji eo aorōk ippān, Maryolive, bōtaab eaar ioon mijinede ro ilo kajjitōk eo an im kar barāinwōt peptaij.
Ilo jem̧ļo̧k in ļo̧k pata eo, Būreejtōn Heber J. Grant eaar kajjitōk kōn mijenede ro, ekoba jet em̧m̧aan ro raar m̧are. Ilo 1946, Dale im lio pāļeen, Mary Olive, kar kālet bwe Dale kar aikuj jerbal men̄e raar kōtmene ajri eo nejier im̧aan tata. Āliktata eaar wōr ratimjuon nejier ajri—jilu ļaddik im jiljino leddik. Aolep ro ratimjuon raar jerbali mijen ko, kar ļoor Dale im Mary Olive ro raar jerbal jilu mijen ko aer make. Elōn̄ jibwier ajri raar barāinwōt jerbal. Ruo iaan ļaddik ro nejierro, John im Matthew Maddox, rej kiiō membōr in Tabernacle Choir eo, barāinwōt son-in-law eo nejin Matthew, Ryan. Maddox baam̧le eo ewōr kiiō 144 oran im rej waanjon̄ak ko rem̧m̧an kōn “wujlepļo̧k aolep.”
Ilo etal peba ko an baba, iaar lo juon leta jān Jennifer Richards, juon iaan leddik ro ļalem nejin eo juon m̧ōttan lo wa eo, Don Davidson. Liin eaar je: “Am̧ jim̧we eaar ukōt mour ko am. Epen n̄an keidi ta eo en kar waļo̧k n̄an mour ko ad eļan̄n̄e ejjeļo̧k Kabun̄ in. Jema eaar mej iakwe gospel in im kajjieon̄ mour kake n̄an jem̧ļo̧kin.”22
Epen n̄an jon̄e leen eo n̄an em̧m̧an an kajjojo armej remaron̄ bōke jān jutak lōn̄tak itulowa. Jema im ļōm̧aro ruo m̧ōtta lo wa eo raar m̧akoko in ron̄jake ilo m̧weo eļap im aiboojoj me raar jitōn̄ er kōn pein kajirere.23 Raar jeļā bwe eļapļo̧k an em̧m̧an n̄an ļoor Rikōm̧anm̧an eo jān jarlepju eo.
Rijilōk Paul eaar kōmeļeļeik tōre in ad ke eaar jiron̄ Timothe bwe “a jet raar ilo̧k jān men kein im jeorļo̧k n̄an kōnono pata.”24 Ekanooj lōn̄ “kōnono pata” rej waļo̧k ilo laļ in rainin. Ej bwebwenato eo an ro ilo m̧weo eļap im aiboojoj.25 Emakijkij an waļo̧k āinwōt jekjek in kōmeļeļe n̄an kapolel nana ak kwaļo̧k e make n̄e armej rej jōbwābwe im kaiiūm̧. Jet iien ej itok jān ro me raar jab kōm̧m̧an ta eo eaorōk n̄an “wujlepļo̧k” im kālet n̄an ļoor armej ilo lukkuun piktokin āinwōt jum̧ae rikanaan eo.
Ilo kam̧oolol, jejeļā ekōjkan jem̧ļo̧k eo n̄an ro retiljek. N̄e jej “wujlepļo̧k” epād ippād aolepān kallim̧ur eo bwe “men otemjej rej jim̧or jerbale em̧m̧an n̄an ro rej yokwe Anij.”26 Elder Neal A. Maxwell ekar ba, “Jab mijak, baj mour jim̧we wōt.”27
Jemān kōrā eo pāleeō ekar katakin ilo BYU im iakwe BYU football bōtaab eaar jab maron̄ in make etal n̄an alooje game ko aer kōnke eaar kanooj ikūm̧kūm̧ kōn jem̧ļo̧k eo. Innām juon men eaiboojoj eaar waļo̧k—VCR eaar kōm̧m̧an, eo ej kapidodoik n̄an e n̄an rekoote game ko. Eļan̄n̄e BYU ebōk tūb eo, ekōn alooje rekoot eo kōn lōke eo em̧m̧an, aaet jeļā kōn jem̧ļo̧k eo! Eļan̄n̄e raar kaje ilo ejjab jejjet, jorrāān, ak ļe lik ilo kuwōta emān, eaar jab inepata kōnke eaar jeļā renaaj kar wiin! Komaron̄ in ba eaar “juon kōjatdikdik emeram”!28
Em̧ool ej āindein ippād. Ilo ad tiljek, emaron̄ wōr ippād jeļā eo bwe men ko renaaj jerbal n̄an em̧m̧an eo ad ilo jem̧ļo̧kin. Kallim̧ur ko an Irooj ralikkar. Menin ejjab meļeļe in enaaj pidodo ak eban ejjeļo̧k kōmejaaļaļ ko, ak āinwōt an Paul kar je, “Men ko mej ear jab loi, im lo̧jilin̄ ear jab ron̄jake, im re jan̄in deļo̧n̄ ilo būruon armej, men ko jabdewōt Anij e ar kapojak n̄an ro rej yokwe e.”29
Ro jeiū im jatū, ejjeļo̧k juon eaar jerawiwi ilju. Kōm̧m̧an bwe jān bar etale iaļ eo ad eļan̄n̄e emenin aikuj im reim̧aanļo̧k kōn kōjatdikdik eļap im tōmak. Kōm̧m̧an bwe jān “jutak itulowa” kōn peran im “wujlepļo̧k aolep.” Kōm̧m̧an bwe jān erreo im peran ilo bōbrake karōk eo an Jemed wōj Ilan̄ im mijen eo An Nejin, ad Rilo̧mo̧o̧r. Ij kwaļo̧k n̄an kom̧ aō kam̧ool bwe Jemed wōj emour, bwe Jisōs ej RiKraist eo, im kōn m̧ool eo an karōk in m̧ōņōņō eo eļap. Ij jar kōn kōjeram̧m̧an ko rem̧m̧an tata an Irooj n̄an pād ippāmi, im ij kōm̧m̧ane menin ilo etan Jisōs Kraist, amen.