Epepen in Armej ro Remaron̄ Anjo̧ jān Jerawiwi
Ilo am katakin, tōl, im iakwe ajri ro, komaron̄ bōk revelesōn eo am make me enaaj jipan̄ eok ejaake im kōpooj ajri ro reperan im remaron̄ anjo̧ jān jerawiwi.
Juon jimmaten iiō emootļo̧k, Būreejtōn Russell M. Nelson eaar kōnono kōn aikuj “n̄an katakin im jipan̄ kōkajiririk m̧aantak epepen in armej ro remaron̄ anjo̧ jān jerawiwi.”1 Naan in—“epepen in armej ro remaron̄ anjo̧ jān jerawiwi”—” ippa eļap meļeļein ilo jetōb.
Jej kautiej ro nejid ro rej kajjieon̄ n̄an mour erreo im pokake. Em̧ōj aō kam̧ool kōn kajoor eo an elōn̄ ajri ro ipeļaakin laļ in. Rej jutak kōn kajoor, “pen im dim”2 ilo aolep jekjek ko reppen im ilo peļaakier. Ajri rein remeļeļe kōn kadkadier rekwojarjar, rej en̄jake iakwe eo an Jemādwōj Ilan̄ n̄an er, im rej pukot n̄an pokake Ankilaan.
Ijoke, elōn̄ ajri ro rej kajjieon̄ wōt n̄an jutak “pen im dim” ro me kōļmenļo̧kjen ko aer remōjņo.3 Rej kakkure er ilo aolep kona ko jān “made kijeek ko an rijum̧ae eo”4 im rej pād ilo aikuj n̄an kakajoor im jipan̄ er. Jet kein kōketak ko me reļļap n̄an kōj bwe jen bōk koņaad im tariņae ņae jerawiwi kōn kijejeto ko ad n̄an bōktok ajri ro n̄an Kraist.
Ron̄jake naan ko an Elder Bruce R. McConkie epaakeļo̧k 43 iiō ko rem̧ootļo̧k:
“Āinwōt jet membōr ro ilo Kabun̄ in, jej bōk koņaad ilo juon tariņae ekajoor. Jej pād ilo tariņae. Jej kobaļo̧k ilo kōttōpar eo an Kraist n̄an tariņae ņae Lucifer. …
“Tariņae in eļap me ekajoor ilo aolep jait ko im kōjabwābweik elōn̄ armej, jet rej mej. …
“Kiiō ejjeļo̧k jabdewōt eo ej kālet em̧m̧an ak nana ilo tariņae in.”5
Rainin tariņae in ej wōnm̧aanļo̧k ilo an ļapļo̧k an kajoor. Tariņae in ejelōt kōj aolep, im ajri ro nejid rej pād ilo ļain eo imaantata n̄an jelm̧ae ro rijum̧ae. Kōn menin, eļapļo̧k ad aikuj kōkajoorļo̧k kōttōpar ko ad ilo jetōb.
Kōkajoorļo̧k ajri ro n̄an anjo̧ jān jerawiwi ej juon jerbal im juon kōjeraam̧m̧an n̄an pāreen ro, ro jibūer im jim̧m̧aer, ro uwaan baam̧le eo, rikaki ro, im ritōl ro. Kōj kajjojo ewōr ad eddo n̄an jipan̄. Ijoke, Irooj emōj an katakin ro jinen im jemān n̄an katakin ro nejier “n̄an meļeļe pedped in katak in ukeļo̧k, tōmak ilo Kraist eo Nejin Anij emour, im peptaij im bōk mennin letok eo an Jetōb Kwojarjar” im “n̄an jar, im n̄an etetal jim̧we im̧aan Irooj.”6
Wāween n̄an “kōkaajririk ro nejimi ilo meram im m̧ool”7 emaron̄ juon kajjitōk eo epen n̄an kajjojo n̄an baam̧le ko kajjojo im ajri ro kajjojo, ak Jemādwōj Ilan̄ em̧ōj an letok iaļan jipan̄ eo me enaaj jipan̄ kōj. Jetōb enaaj im̧we kōj ilo elōn̄ wāween ko rem̧m̧an jemaron̄ kōjparok ro nejid ilo jetōb.
N̄an jinoe, en wōr juon visōn kōn aorōkin eddo in eaorōk. Jej aikuj meļeļe kadkad ko ad—im aer—rekwojarjar im kōttōpar mokta jān ad jipan̄ ajri ro nejid jeļā wōn er im etke rej pād ilo laļ in. Jej aikuj jipan̄ er jeļā ilo ejjeļo̧k kajjitōk bwe rej ajri ro nejin Jemādwōj Ilan̄ eo ej iakwe kōj im bwe elōn̄ An kōttōpar n̄an er.
Kein karuo, meļeļe pedped in katak in ukweļo̧k emenin aikuj n̄an anjo̧ jān jerawiwi. Rianjo̧ jān jerawiwi ejjab meļeļein eban jerawiwi, ak ej meļeļein ukweļo̧k ejjeļo̧k jem̧ļo̧kin, mejmejkaruo, im mour erreo. Ilo m̧ool erom rianjo̧ jān jerawiwi ej itok āinwōt juon kōjeraam̧m̧an ilo ad ukweļo̧k elōn̄ kōttan. Āinwōt Jemes eaar ba, “Kom̧win jum̧ae tepil, im enaaj ko jān kom̧.”8
Likao em̧m̧an ded ro “raar pen otem pen kōn peran … ; a lo, en̄in eaar jab aolep—raar armej ro raar … m̧ool iien otemjej ilo jabdewōt men kar door ilo aer kōjparok. Aaet, … kar katakin er n̄an kōjparok kien ko an Anij im etetal jim̧we im̧aan Mejān.”9 Likao rein em̧m̧an dettaer raar etal n̄an tariņae bōk ippāer m̧wil ko an Kraist bwe en aer kein tariņae ņae eo enana. Būreejtōn Thomas S. Monson eaar kakemeemej bwe “Aikuj eo bwe en wōr peran ej itok ñan kōj wōj kajjojo jen iien ñan iien.Kajjojo raan ilo mour ko ad peran ej aikuj bōk jikin―ejjab n̄an iien ko wōt raorōk, ak eļap ļo̧k ilo ad kōm̧m̧ani kālet ko ak bōk jekjek ko ipeļaakid.”10
Ajri ro nejid rej kanōk kein tariņae ko an jetōb ilo aer ejaake jon̄ak ko an juon rikaļoor aolep raan. Ilo m̧ool jej jab kaorōk maron̄ ko an ajri ro n̄an mour kōn katak ko an juon rikaļoor aolep raan. Būreejtōn Henry B. Eyring eaar kapilōk kōj n̄an “jino katakin ajri ro men ko rejim̧we ke rej dik wōt.”11 Innem kii eo kein kajilu n̄an jipan̄ ajri ro n̄an anjo̧ jān jerawiwi ej ijjino ilo iiō ko aer reddik n̄an katakin er katak ko an gospel—jān jeje ko rekwojarjar, Laajrak in Tōmak ko, bok eo N̄an kōkajoorļo̧k Jodikdik ro, al ko an Būraimāri, al ko, im naan in kam̧ool ko ad make—me enaaj tōl ajri ro nejid n̄an Rilo̧mo̧o̧r.
Ejaake juon iminene kōn jar, katak jeje ko rekwojarjar, nokon in jota an baam̧le, im jar ilo Jabōt eo ej tōl kōj n̄an ippān doon, niknik, im kajoor kōn jon̄ak ko rem̧m̧an—ilo bar juon wāween, kajoor ilo jetōb. Ilo laļ in rainin, ijo ekar ļap m̧ool ie ak ejako, ajri ro nejid rej aikuj meļeļe ta lukkuun meļeļein m̧ool in im etke elukkuun aorōk—eļaptata ilo ad kōpooj er n̄an kōm̧m̧ani im kōjparok bujen ko rekwojarjar ilo iien peptaij im ilo tampeļ. Āinwōt an Preach My Gospel katakin, “Dāpij kalim̧ur ko ej kōpooj armej [ekoba rem̧m̧an ded ro] n̄an kōm̧m̧an im kōjparok bujen ko rekwojarjar.”12
Elder Jeffrey R. Holland eaar katakin, “N̄e jej kōnono kōn kōjparok bujen, jej kōnono kōn bōro im jetōb kōn kōttōpar ko ad ilo mour in.”13 Ewōr juon kajoor ejeja ilo kōm̧m̧an im kōjparok bujen ko ippān Jemādwōj Ilan̄. Rikapo eo ejeļā kōn men in, im ej kapenjakļo̧k katak ko kōn kōm̧m̧an bujen.14 Jipan̄ ajri ro meļeļe, kōm̧m̧an, im kōjparok bujen ko rekwojarjar ej bar juon kii n̄an ejaake epepen in armej ro remaron̄ anjo̧ jān jerawiwi.
Ewi wāween ad kōpooj ajri ro nejid n̄an kōm̧m̧an im kōjparok bujen ko rekwojarjar ilo aer delo̧n̄e im eddōkļo̧k ilo iaļ in bujen in? Katakin ajri ro bwe kōjparok kalim̧m̧ur ko n̄e rej dik wōt enaaj kōmālim er n̄an kōjparok bujen ko rekwojarjar tokālik ilo mour ko aer.
Ikōņaan kwaļo̧k juon waanjon̄ak em̧m̧an: Ilo juon nokon in jota an baam̧le, juon baba ej kajjitōk, “Ewi wāween bwe jen jeļā lale doon āinwōt juon baam̧le?” Lizzie eo ļalem an iiō eaar kinaak ļaddik eo jein errūto, Kevin, kōn an kakūtōtōiki im kōmetake en̄jake ko an. Kevin eaar jab kōņaan kwaļo̧k ke Lizzi eo ejim̧we. Jinen Kevin eaar kajitōkin e ta eo emaron̄ kōm̧m̧ane bwen em̧m̧an an lale leddik eo jatin. Kevin eaar ļōmņak im kar kālet bwen kalim̧m̧uri Lizzie bwe juon raan likio eban kakūtōtōiki.
Ilo jem̧ļo̧kin raan eo juon ke aolep rej ippān doon n̄an jar an baam̧le, jemān Kevin eaar kajjitōkin Kevin ewi wāween an kar kōm̧m̧ane. Uwaak eo an Kevin eaar ba “Baba, ij kōjparok kalim̧m̧ur eo aō!” Lizzie eaar m̧ōņōņō ilo an errā, im baam̧le eo eaar kōjeram̧m̧an Kevin.
Jinen Kevin eaar leļo̧k ļōmņak in bwe eļan̄n̄e ekar maron̄ kōjparok kalim̧m̧ur eo an ilo juon raan, etke ejjab maron̄ kōm̧m̧ane ruo raan? Kevin eaar errā im eaar bar kajjieon̄ kōm̧m̧ane. Ruo raan tokālik, Kevin eaar lukkuun tōprak ilo an kōjparok kalim̧m̧ur eo an, im Lizzie eaar ļapļo̧k an kam̧m̧oolol. Ke jemān eaar kajjitōk etke eaar lukkuun em̧m̧an an kōjparok kalim̧m̧ur ko an, Kevin eaar ba, “Iaar kōjparok kalim̧m̧ur eo aō kōn iaar ba inaaj kar kōm̧m̧ane.”
Juon tōprak men̄e edik, tōprak ilo kōjparok kalim̧m̧ur ko ej tōl kōj n̄an m̧ool. Niknik ilo kōjparok kalim̧m̧ur ko ej kōpopo ilo jetōb n̄an ajri ro bwe ren bōk bujen eo an peptaij im mennin letok eo an Jetōb Kwojarjar, ijo rej bujen n̄an jerbal n̄an Anij im kōjparok kien ko An.15 Kalim̧m̧ur im bujen rej ippān doon.
Ilo bok in Daniel, jej ekkatak kōn Shadrak, Meshak, im Abednego ro raar makoko n̄an kabun̄ n̄an ekjab eo an Kiin̄ Nebukadnezar.16 Kiin̄ eo eaar kakkōl er bwe renaaj kar joļo̧k er ilo upaaj in kijeek e bwil eļan̄n̄e rejjab pokake. Raar makoko im raar ba:
“Eļan̄n̄e enaaj āindein, am Anij Eo kōmij karijer n̄an E, E maron̄ in lo̧mo̧o̧ren kōm jān upaaj in kijeek e bwil. …
“Ak eļan̄n̄e jab, kwōn jeļā, O kiin̄ bwe kōm ban karijer n̄an anij ro am̧.”17
“Ak eļan̄n̄e jab.” Ļōmņak kōn meļeļein naan kein jilu im wāween an ekkeijel ippān kōjparok bujen ko. Likao rein jilu raar jab likūt aer pokake kōn aer tin joļo̧k er. Jekdoon n̄e reban kar joļo̧k er, renaaj kar kōjparok wōt kalim̧m̧ur ko aer n̄an Irooj kōnke raar ba renaaj kar. Kōjparok bujen ko ad aolep iien eban oktak pedped wōt ioon jekjek ko jepād ie. Likao rein jilu, āinwōt likao ro em̧m̧an dettaer, rej waanjon̄ak ko reaibojooj kōn ajri ro nejin ro remaron̄ anjo̧ jān jerawiwi.
Ewi wāween an waanjon̄ak kein iookļo̧k mōko imōd im baam̧le ko ad? “Lain im bar lain, naan in kain̄i im bar naan in kain̄i,”18 jej jipan̄ ajri en̄jake tōprak ilo men ko reddik. Ilo aer kōjparok kalim̧m̧ur ko aer, rej en̄jake Jetōb ilo mour ko aer. Elder Joseph B. Wirthlin eaar katakin bwe “nōbar eo em̧m̧an tata kōn m̧ool ej jem̧jerā eo an Jetōb Kwojarjar.”19 Innem ajri ro nejid renaaj “peran enaaj kanooj kajoor ilo im̧aan mejān Anij.”20 Kōn m̧ool ej itok juon kajoor, epepen in armej ro remaron̄ anjo̧ jān jerawiwi.
Ro jeiū im jatū, dāpij ro nejimi reddik—kōkepaaktok er bwe ren lo m̧wil ko an kabun̄ aolep raan im ļoor am kōjparok kalim̧m̧ur im bujen ko am. “Ajri relukkuun jeļā anōknōk, kōn menin kwaļo̧k jet men ko rem̧m̧an bwe ren anōke.”21 Ilo m̧ool jej lukkuun jipan̄ katakin im kōkajiririik epepen in armej ro remaron̄ anjo̧ jān jerawiwi n̄an kalim̧m̧ur im bujen ko an Irooj.
Ij kam̧ool bwe Jisōs Kraist ej tōl Kabun̄ in. Ilo am katakin, tōl, im iakwe ajri ro ilo wāween eo an Rilo̧mo̧o̧r, komaron̄ bōk revelesōn eo am make me enaaj jipan̄ eok ejaake im kōpooj ajri ro reperan im remaron̄ anjo̧ jān jerawiwi. Jar eo aō in ej bwe ajri ro nejid renaaj barāinwōt en̄jake naan ko an Nipai: “Kwōn kōm̧m̧an ke bwe in wūdiddid kōn nemāmeen jero̧wiwi?”22 Ij kam̧ool bwe ad Rilo̧mo̧o̧r eaar mej kōn jerawiwi ko an laļ in23kōnke E eaar ba Enaaj kar, im bwe Ej iakwe kōj eļapļo̧k jān jon̄an ļōmņake24kōnke E eaar ba Enaaj kar. Ilo etan Jisōs Kraist, amen.