“Aō Aenōm̧m̧an Ij Lewōj n̄an Kom̧”
Irooj ekar kallim̧ur aenōm̧m̧an n̄an rikaļoor ro An ilo An kar itōn em̧m̧akūt jān er. Ekar kōm̧m̧ane ejja kallim̧ur in n̄an kōj.
Ro jeiū im jatū, jekar jeraam̧m̧an kōn Jetōb eo an Anij joteen in. Ennaan in ekajoor jān ritōl rein an kōrā rekajoor im al ko im ennaan ko rekar kōkajoorļo̧k tōmak eo ad im kōļapļo̧k ad ikdeelel n̄an kōjparok bujen ko rekwojarjar jekar kōm̧m̧ani ippān Jemedwōj Ilan̄. Jekar en̄jake juon ļapļo̧k ilo ad iakwe Irooj Jisōs Kraist im juon kautiej n̄an mennin letok eo ekabwilōn̄lōn̄ jān pinmuur eo An.
Ennaan eo aō joteen in ej juon eo epidodo. Jekar aolep en̄jake aenōm̧m̧an joteen in. Kōj aolep naaj kōņaan emakijkij in kain en̄jake aenōm̧m̧an in ippād make, ilo baam̧le ko ad, im ippān armej ro rej jokwe ipeļaakid. Irooj ekar kallim̧ur kōn aenōm̧m̧an n̄an rikaļoor ro An ilo An kar itōn em̧m̧akūt jān er. Ekar kōm̧m̧ane ejja kallim̧ur in n̄an kōj. Ak Ekar ba bwe Enaaj letok aenōm̧m̧an ilo wāween eo An, jab āinwōt an laļ in letok. Ekar kōmeļeļeiki wāween eo An ilo jilkintok aenōm̧m̧an:
“A Ri Kaaenōm̧m̧an, E Jetōb Kwojarjar, Eo Jema enaaj jilkintok ilo Eta, Enaaj katakin kom̧ men otemjej, im kakememej men otemjej n̄an kom̧, men ko Iar ba n̄an kom̧.
“Āenōm̧m̧an Ij likūt ņa ippemi, Aō aenōm̧m̧an Ij lewōj n̄an kom̧. N̄a Ij lewōj n̄an kom̧, jab āinwōt an laļ lewōj. En jab pok būruemi, im en jab lōļn̄o̧n̄” (Jon 14:26–27).
Ļaddik ro nejin Mosaia rekar aikuji mennin letok eo an aenōm̧m̧an ke rej jino mijen eo aer n̄an RiLeman ro. Kōn inepata ilo būruweer ke rekar ian̄ak to aer kōn jon̄an ļap in jerbal eo aer, rekar jar kōn kam̧ool. Im “Irooj eaar loļo̧k er kōn Jetōb eo An, im ba n̄an er: Kom̧in aenōm̧m̧an. Im Eaar kaenōm̧m̧an er”(Alma 17:10; lale Alma 26:27).
Jān iien n̄an iien, komaron̄ jan̄nuwaade aenōm̧m̧an ilo am̧ jelm̧ae wāween ko rejjab alikkar im ta ko n̄an kwe rej men ko reppen kwonej jelm̧ai. Ļaddik ro nejin Mosaia rekar ekkatak katak eo bwe Irooj ekar katakin Moronai. Ej juon unin tōl n̄an kōj aolep: “Eļan̄n̄e armej rej tok n̄an Eō Inaaj kwaļo̧k n̄an er aer m̧ōjņo̧. Ij leļo̧k n̄an armej m̧ōjņo̧ bwe ren maron̄ ettā bōro; im Aō jouj ebwe n̄an aolep armej ro rej kōttāik er Im̧aō; bwe eļan̄n̄e rej kōttāik er Im̧aō, im wōr aer tōmak ilo N̄a, innām Inaaj kōm̧m̧an mennin m̧ōjņo̧ ko ren erom kajoor n̄an er” (Ether 12:27).
Moronai ekar ba ke ekar “ron̄ naan kein,” ekar “aenōm̧m̧an” (Ether 12:29). Ren maron̄ erom juon kaenōm̧m̧an n̄an kōj aolep. Ro rejjab lo m̧ōjņo̧ ko aer rejjab eddōkļo̧k. Ami kile m̧ōjņo̧ eo ami ej juon kōjeraam̧m̧an, kōnke ej jipan̄ kom̧ pād wōt ilo ettā im dāpij wōt ami kōjaalļo̧k wōt kom̧ n̄an Rilo̧mo̧o̧r eo, eo ewōr kajoor ippān n̄an kōkajoorļo̧k kom̧. Jetōb eo ejjab wōt kaenōm̧m̧an eok, ak E ej barāinwōt rijerbal eo bwe Pinmuur eo en jerbale juon oktak ilo aolepān mour eo am̧. M̧ōjņo̧ ko Rej Erom Kajoor
Kom̧ naaj ilo elōn̄ iien lo bwe tōmak eo ami ej jelm̧ae apan̄ ko jān Setan; ej waļo̧k n̄an aolep rikaļoor ro an Jisōs Kraist. Ami naaj jojomar i nitbwil kein enej jān ami kōjparok Jetōb Kwojarjar āinwōt ami kampānien. Jetōb eo enaaj kōnono aenōm̧m̧an n̄an jetōb eo ami. Enaaj rojan̄ kom̧ n̄an ami wōnm̧aanļo̧k wōt ilo tōmak. Im Enaaj kakeememej kom̧ kōn iien ko kom̧ ar en̄jake meram im iakwe eo an Jisōs Kraist.
Keememej bōlen juon iaan mennin letok ko raiboojoj Jetōb eo emaron̄ lewaj n̄an eok. E enaaj “katakin kom̧ men otemjej, im kakeememej men otemjej n̄an kom̧ [Irooj ekar] ba n̄an kom̧” (Jon 14:26). Kakeememej in emaron̄ in juon uwaak n̄an jar eo, juon kain̄i an priesthood kar bōke, juon kam̧ool an naan in kam̧ool eo am̧, ak juon iien kwaar lo pein Anij ej tōl ilo mour eo am̧. Bōlen ilo juon raan ilju im jekļaj n̄e kom̧ naaj aikuji kajoor eo, Jetōb eo emaron̄ kakeememej ememļo̧kjeņ eo ami kōn en̄jake ko kom̧ij en̄jaki ilo kweilo̧k in. Ij jar bwe menin en āindein.
Juon kakeememej ekkā an Jetōb eo kakeememej kōļmenļo̧kjeņ eo aō ej kōn juon kweilo̧k in kwojkwoj ekar kōm̧m̧an ilo juon em̧ tiin ilo Innsbruck, Austria, elōn̄ iiō remootļo̧k. Ekar pād ium̧win juon iaļ in tūrein. Ekar wōr wōt jon̄oulruo ruo armej rekar kobatok, jijet ioon jea alal ko. Elōn̄ wōt iaer rekar kōrā ro, jet ajri im jet rūtto. Ikar lo dānin kōmjaļaaļ iturin mājer kōn kam̧m̧oolol ke kwojkwoj eo kar ajije ilubwilijin jarlepju jidikdik in. Ikar en̄jake iakwe eo an Rilo̧mo̧o̧r eo n̄an Armej rein Rekwojarjar, im barāinwōt er. Ak kabwilōn̄lōn̄ eo eļap aō kar keememeje ekar meram eo me āinwōt ekar kobrak em̧ tiin in, ej itok ippān juon en̄jake in aenōm̧m̧an. Ekar bon̄ im ekar ejjeļo̧k wintō ko, im ruum̧ eo ekar meram āinwōt n̄e ej meram in rālep.
Meram eo an Jetōb Kwojarjar eo ekar lukkuun meram joteen ņe. Im wintō ko rekar kadeļo̧n̄e meram eo rekar bōro ko rettā an Armej ro Rekwojarjar, ro rekar itok m̧okta n̄an Irooj kappukot jeorļo̧k bōd in jerawiwi ko aer im kallimur iien otemjej n̄an keememej E. Ekar jab pen n̄an keememej E tōre eo, im ememļo̧kjeņ eo aō kōn en̄jake in ekwojarjar ekar kapidodoik aō keememej E im Pinmuur eo An ilo iiō ko tokālik. Raan ņe kallim̧ur in ilo jar in kwojkwoj eo ej bwe Jetōb eo enaaj pād ippād ekar kūrm̧ool im ekar bōktok en̄jake ko an meram im aenōm̧m̧an.
Āinwōt kom̧, ikar kam̧m̧oolol kōn elōn̄ wāween ko Irooj ekar lotok eō kōn Rikaenōm̧m̧an eo ke iaar aikuj aenōm̧m̧an. Mekarta menin Jemed Ilan̄ ej inepata jab wōt kōn aenōm̧m̧an eo ad ak barāinwōt aaet eļapļo̧k kōn eddōkļo̧k eo ad m̧aanļo̧k. “Rikaenōm̧m̧an” ej juon iaan wāween ko em̧ōj kōmeļeļeik kōn Jetōb Kwojarjar ilo jeje ko rekwojarjar. En̄in ej bar juon wāween: “Im kiiō, em̧ool, em̧ool, Ij ba n̄an eok, likūt am lōke ilo Jetōb eo ej tōlļo̧k n̄an kōm̧m̧an em̧m̧an” (K&B 11:12). Ekkā an emakijkij, em̧m̧an Enaaj tōl ļo̧k eok n̄an kōm̧m̧an am̧ bōk koņaam̧ jipan̄ juon armej bōk aenōm̧m̧an eo jān Anij.
Ilo māletlet eo An, Irooj ekar bōktok kom̧ ippān doon ilo doulul ko im ilo kūlaaj ko ilo Kabun̄ in An. Ekar kōm̧m̧ane āindein n̄an kōļapļo̧k ami kajoor n̄an kōm̧m̧an em̧m̧an. Ilowaan doulul kein, ewōr ami kajjojo eddo ko n̄an jerbal n̄an ro jet kōn E. N̄an waanjon̄ak, eļan̄n̄e kwōj juon jiron̄, bisop eo am̧ ak ritōl ro an Doulul eo an Jiron̄ ro remaron̄ kajjitōk ippem̧ n̄an pukotļo̧k juon Laurel eo em̧ōj an erom ta eo jej ņae etan “janiknik.” Kom maron̄ jeļā kajjeen eļapļo̧k jān bisop eo ak ritōl eo an Doulul eo an Jiron̄ ro. Kom̧ maron̄ jeļā bwe emaron̄ jab em̧m̧an an en̄jake ilo m̧weo ak ilo jikuuļ ak bōlen jimor. Ritōl ro ami remaron̄ jab jeļā etke rekar en̄jake menin bwe ren kajjitōk ippemi n̄an pukotļo̧k e, ak Irooj ej, im E ej tōl jerbal in jān im̧we ko an Jetōb eo An.
Tōprak ilo kijejeto ko ami renaaj bōk juon kabwilōn̄lōn̄ in oktak jim̧or ilo būruom̧i im ilo būruwōn jiron̄ eo kar jilkinļo̧k eok bwe kwōn lo̧mo̧o̧ren—im ej aikuj jem̧jerā eo an Jetōb Kwojarjar eo. Jetōb eo emaron̄ kōtļo̧k am̧ lo Laurel eo ejaniknik āinwōt an Irooj loe e. Irooj ejeļā būruwōn im būruwōm̧, im Ejeļā tōllo̧k in an būruwōd maron̄ oktak. Emaron̄ lowaj kom̧ jim̧or kōn Jetōb eo An n̄an im̧we ettā bōro, jeorļo̧k bōd, im iakwe.
Jetōb in emaron̄ im̧we naan ko, kōm̧anm̧an ko, im kōm̧maanwa emenin aikuj n̄an am̧ bar karuwaineneiktok juon ļaam̧ n̄an wōrwōr eo. Im Emaron̄ un̄ūr būruwōn armej ro ilo kūlaaj in Laurel eo n̄an iakwe im karuwaineneiktok jiib eo ekar jōbābwe bwe n̄e ej rooltok, enaaj en̄jake ke em̧ōj an jepļaaktok n̄an kapijuknen eo an.
Kajoor eo ami n̄an kōm̧m̧ani men ko rem̧m̧an āinwōt juon kurub in leddik ro nejin Anij enej pedped ioon, juon jon̄ak eo eļap, in juon wōt bōro im iakwe ej waļo̧k ilubwilijimi. En̄in ej bar juon mennin letok an aenōm̧m̧an ej itok jān Jetōb Kwojarjar eo.
Alma ekar meļeļe menin. En̄in etke ekar akweļap ippān armej ro an “bwe en ejjeļo̧k aitwerōk juon ippān bar juon, a bwe ren reim̧aanļo̧k kōn juon wōt mej, ippāer juon tōmak im juon peptaij, im kōm̧m̧an bwe burueer ren kuk ippān doon ilo bōrokuk im ilo iakwe n̄an doon” (Mosaia 18:21).
Bōro kuk ippān doon ej menin aikuj bwe Jetōb eo en pād ippād ilo kūlaaj eo ad im baam̧le eo ad. Ak kwōjeļā āinwōt jān imminene āinwōt ijeļa, bwe kain iakwe in ippān doon in epen kwaļo̧ke. Ebōk an Jetōb Kwojarjar eo āinwōt juon ad kampānion n̄an kōppeļļo̧k mejād im kōmeraikļo̧k en̄jake ko ad.
Ij keememej juon iaan ļaddik ro nejūm̧ jiljilimjuon ak ralitōk an iiō ekar ekkāke ioon peet eo an jon̄an ikar ļōmņak emaron̄ kar bwilo̧k. Ikar en̄jake an ļap aō illu, im ikar kaiur in ko̧koņe m̧we im̧ōm̧. Ikar jibwetok aeran ļaddik eo nejū im kotaktok n̄an turin wōt meja.
Jetōb eo ekar likūt naan kein ilo kōļmenļo̧kjeņ eo aō. Āinwōt juon ainikien emera, ak ekar tuuwe būruwō: “Kwōj dāpij juon armej em̧m̧an.” Ikar bar lelaļļo̧k e n̄an ioon beet eo im joļo̧k aō bōd.
Kiiō ekar erom juon em̧m̧aan eo em̧m̧an me Jetōb Kwojarjar eo ekar kwaļo̧k n̄an eō 40 iiō remootļo̧k. Inej aolep iien kam̧m̧oolol bwe Irooj ekar lo̧mo̧o̧ren eō jān kain en̄jake rot kein aō rejjab em̧m̧an ilo an kar jilkintok Jetōb Kwojarjar eo bwe in lo juon ajri nejin Anij āinwōt An loe.
Juon wōt bōro eo jej pukot e ilo baam̧le ko ad im ilo Kabun̄ in enaaj itok ilo ad kōtļo̧k bwe Jetōb Kwojarjar en jelet e ta eo jej loe n̄e jej kalimjek bar juon—aaet men̄e jej kōļmenļo̧kjeņ kōn doon. Jetōb eo ej loe ippān iakwe eo erreo an Kraist. Ron̄jake an Mormon kar kōjerbale naan kein n̄an kōmeļeļe iakwe em̧ool. Kōļmenļo̧kjeņ kōn tōre ko kwaar en̄jake menin:
“Im iakwe-em̧ool ej meanwōd im e jouj, im ej jab juunm̧aade, ej jab kappukot men ko an, ej jab illulu, ej jab ļōmņak nana, im jab lan̄lōn̄ ilo nana ak lan̄lōn̄ ilo m̧ool eo, ej kijenmej ilo men otemjej, ej tōmak ilo men otemjej, ej kōjatdikdik ilo men otemjej, ej niknik ilo men otemjej.
“Kōn menin, ro jeiū im jatū rejitōnbōro [innām ij kobaik kōrā ro jeiū im jatū], eļan̄n̄e ejjeļo̧k ami iakwe-em̧ool, kom̧ jekdo̧o̧n, bwe iakwe-em̧ool ej jamin jako. Kōn menin, kom̧in eddāp n̄an iakwe-em̧ool, eo ej ļaptata jān men otemjej, bwe men otemjej renaaj jem̧ļo̧k—
“A iakwe-em̧ool ej iakwe eo erreo an Kraist, im e kijejeto indeeo, im jabdewōt eo lo e ippān ilo raan eo āliktata, enaaj em̧m̧an ippān.
“Kōn menin, [kōrā ro jeiū im jatū] rejitōnbōro, kom̧in jar n̄an Jemād kōn aolep kajoor in bōro, bwe kom̧in maron̄ obrak kōn iakwe eo An, eo Eaar leļo̧k ioon aolep ro rej rikaļoor ro an rem̧ool an Nejin, Jisōs Kraist; bwe kom̧in maron̄ erom m̧aan ro nejin Anij; bwe n̄e Enaaj waļo̧k jenaaj āinwōt E, bwe jenaaj lo E ilo lukkuun nememen; bwe jen maron̄ bōk kōjatdikdik in; bwe jān maron̄ karreo em̧ool āinwōt E erreo” (Moronai 7:45–48).
En̄in ej kōttōbar eo bwe Jemed Ilan̄ ekar lewaj n̄an kom̧, leddik ro Nejin raiboojoj. N̄an kom̧ emaron̄ āinwōt juon kōttōbar eļap kōtaan, ak jān An kalimjeke, kwōj jab ettoļo̧k jān e. Kōn menin, Ej lowaj n̄an kom̧ kōn Jetōb eo An n̄an kaenōm̧m̧an kom̧, rojan̄ kom̧, im im̧we kom̧ n̄an wōnm̧aanļo̧k wōt.
Ij likūt aō kam̧ool em̧ool bwe Jemed ejeļā kajjeemi—Ej iakwe kom̧, im Ej ron̄jake jar ko ami. Nejin Jitōn Bōro ej karuwaineneiktok kom̧ n̄an E. Im Rej jilkintok Jetōb Kwojarjar eo bwe en pād ilo kijejeto ko ami n̄an jerbal n̄an ro jet kōn Er.
Kōnke Pinmuur eo an Jisōs Kraist, kampānion eo an Jetōb Kwojarjar eo enaaj wōr kilaan n̄an ko̧kwojarjar im karreoik Jetōb eo ami. Kom̧ naaj en̄jake aenōm̧m̧an eo Rilo̧mo̧o̧r eo ekar kallim̧ur kake n̄an likūt ippān rikaļoor ro An. Ippān aenōm̧m̧an in enaaj itok juon kōjatdikdik emeram im juon en̄jake kōn meram im iakwe jān Jemed im Nejin Ejitōn Bōro, eo ej tōl aelōn̄ in kiin̄ in An ioon laļ in kōn revelesōn n̄an rikanaan eo An emour. Ij kam̧ool ilo etan ekwojarjar Jisōs Kraist, amen.