Nándááh dóó Naaólyé.
God bibee haz’áanii beego baa nídiidááł dóó hool’áágóó nihik’ihojidlíi doo éí t’áá’íiyisíí bíká íit’į́į dooleeł.
Shik’is dóó shilah, naanish áshłéhígíí éí nihich’į’ haasdziih, ni naanish áníléhígíí íísínts’ą́ą’ doo. Shinaanish éí nilaą́ąjį’ ałtso ádeishłííł. Yá’át’éehgo á’deishłííł.
Nahdę́ę́’ t’óó ha’asíidgo, ha’át’ííshį́į́ ádeishłííł nízínígíí nizhónígo bił bééhózin dóó hait’éego ádeishłííł nízinígíí éí lą’ígo ła’ deile’. Jideeyáágóó dóó hait’éego áadi jidoogááł bééhózingo éí yá’át’éehgo bee iiná ázhdoolííł.
Ła’ éí ázhdoolííłígíí dóó hait’éego ázhdoolííłigi bee ał’ąą át’éhígíí doo bił béédahózin da jó jideeyágóó éí ázhdoolííł, hait’éego áádi jidoogááł éí binahoji’á. Jó kót’éego, doo ééhozingi áadi diidááł niidzin, sáanii éí bił béédahózin, diné niidlínigíí éí áadi diidááł niidzin-ádii’níi łeh, “Shił bééhózin-nínááházhahgi shą’shin.” Bił nhinishnáanii yidloh. Deedzáágóó t’áá bééhózíní ndi doo hazhó’ó binahast’ą́ą̨ da.
Ázhdoolííł hasht’ejilééh éí “hahóót’i’ dóó ałtsojį’ baa ntsíjíkees.” Nahat’á éí hait’éego áadi jidoogááł át’é. Ha’át’íí lá íiyisíí biniiyé ájít’į́ hoł bééhózingo éí baa hózhǫ́-áádóó éí binjilnish dóó nijiłkaahgo bééhózinígo áadi jidoogááł.
God, Yá’ąądę́ę́’ Nihizhé’é kót’éego nizhónígo nahat’á nihá áyiilaa. Bi nahat’a’ éí “doo aninéeda doo áádóó hoo’áágóó iiná nihee hodooleeł,”1 áádóó hait’éego íidoolíłígíí éí yisdá’iidééh binahat’a’.
NihiTaa’ binahat’a’ éí nihits’íís nooséełgo t’áá’áłtso yich’į’ ha’ólníi doo áádóó óhooł’aah doo áko t’áá Bígi’ániit’ée doo. Nihits’íís dóó nihiníłch’i ahiisiláago; Biye’ Jesus Christ bina’nitin dóó bibee haz’áanii bik’ehgo hinii’náago; hool’áágóó iiná biniiyé hasht’e’ádiilnée doo, Yisdá’iiníiłii Nihá Niná’ídláhę́ę bee, éí God ba’áłchíní doo aniné dóó iiná doo niit’éehii nihá yinahaz’ánée bi’doolnííłgo bił kééhwiit’į́į doo.
Hazhó’ó nahoji’áago éí ázhdoolíłigíí hazhó’ó bik’izh’diitį́įgo t’éiyá. Shił bééhózingo éí díí baa hózhǫ́ǫgo ádeishłííłígíí binahash’áa doo jinízingo éí NihiTaa’ hool’áágóó iiná bina’hat’a’ biłgo éiyá nizhóní doo. Hool’áágóó atiingóó díníit’į́į’go éí, t’áa’aaníí Bí baa nídiidááł.
Ázhdoolíłígíí binahoji’áago yá’át’éeh, naanish, ólta’ dóó nijinée ndi. Díí dó’ nahat’á bídadéét’i’; ałhé’éskééjí, ha’áłchíní, oodlą́ą́jí naanish; íiyisíí éí Diyin yá dahalne’í. Ákondi nitsxaago binaho’áhígíí éí Yá’ąąshdę́ę́’ NihiTaa’ binahat’a’ bił ahii’ síníłnil doo. Jesus ání, “Ndi God bił haz’ą́ągi áłtsé hadaat’į́, áádóó yee t’áá’ákogi át’éii; áádóó t’áá’ałtso nihá binéidoolyééł.”2
Da’aniihii ádaaní ádoolíłígíí áłts’íísígo dóó k’éhezdónígo éí bidziil daaní. Nahat’áhigíí ííshjánígo saad bidziilígíí biłgo éí nahat’áyę́ę bił łá’í diidleeł áádóó bee nahii’náa doo. Saad naakigo shił bééhózin, díí baa hane’ígíí, God yee nihá naha’áhígíí áádóó t’áá nihí binahwiit’áhígíí. Díí saad éí nándááh dóó naaólyé.
Bí hólóogi baa nídiidááł dóó hool’áágóó ak’ihojidlí nihaidoolééł bibeehaz’áanii yéego bik’eh honiil’į́įgo binahosiit’ą́ągo.
Hwe’oodlą’ ts’ídá bidziilgo Lord Jesus Christ joodlą́ągo, yee át’éhígíí ba’jólíigo, “Christ wołí bee bá joogáałgo, hoł chohoo’į́įgo, áádóó God dóó t’áá’ałtso diné dóó asdzání ayóó’ájó’níigo…, Christ bizaad bíká dichin jinízingo, dóó nihoníyáajį’ a’jííłdįįdgo” éí baa nídiidááł dóó nihaiidoolééł.3
Lucifer éí nihiTaa’ binahat’a’ t’áadoo néidiiláa da éí biniinaa doo nídoodáał da dóó ak’ihojidlí doo néiididooléełda. Bí éí God binahat’a’ doo yinízin da dóó łahgo át’éego ííléehgo yaanaayá, bee’adziilii shí dooleeł dóó bee shidi’nál’į́į doo nízingo. Éí biniinaa, bí dóó bikéé’ naakaaígíí God bił haz’ą́ągi nahgóó kólyaa dóó “ Satan silį́į́’, chį́įdii át’é, yooch’ííd bitaa’ nilį́, diné dóó sáanii yina’alo’, dóó yisná ádeile’, áko Diyin yáłti’go doo deiidiits’a’ da.4
Hahóóyáadi ájiidzaaígíí biniinaa, Satan éí doo nízhdoodáał da dóó doo haa doolyéeł da. Díí t’éí binaanish k’ad, God binahat’a’ bits’ą́ą́’ deishchxǫǫł nízin dóó ana’adlo’ bee nahwiishchxǫǫhgo shígi’ít’éego doo hoł dahózhǫ́ǫ da doo nízin.5 Satan binahat’a’ doo yá’át’éehii éí t’áá’áníitso nihídéét’i’, náá’oochííłgóó, dóó ał’ąą ániit’éii. Ayóó’íits’a’go yáłti’—Níłch’i Diyinii nihich’į’ yáłti’ígíí doo deididoots’į́įł da nízingo, éí hazhóó’ógo yáłti’go t’áá’áłtso nihił ííshjáán íidoolíiłgo baa nídiidááł dóó nihaidooleeł.6
Díí saad ayóó’ííts’a’ígíí éí Diyin bizaad doo deiidiits’a’ da dóó níłch’i yee ntsékeesí, níłch’i halne’é, niłch’i naalkidí da chodayooł’į́įgo doo ál’ínígíí, atí’élį́, saad doo aaníinii dóó baa’ihii yee dahalne’go biniinaa hool’áágóó iiná binahwiit’áhę́ę neiníłtł’ah.
T’áá yéego éédahósinii ndi niłch’i doo yá’át’éehii bee bi’didoodloh áádóó hwe’oodlą’ yąąh dahwiidooł’aałgo God baa nídeishdááł dóó t’áá’ałtso NihiTaa’ bihigíí sheidoolééł jinízinyę́ę doo áajį’go da dahodidoolóós.7
Ts’ídá nizhónígo baa nideishdááł dóó ak’ihojidlí sheidoolééł nisingo éí, áłtsé ánáhodiiszihgo ádideishniił, “Haaléiit’éego é’ésh’į́?”
T’óó t’áásáhí jizdáago na’ízhdílkid nahalin. Doo ákót’ée da nahalin ndi: háísh éí ts’ídá yéego nééhósingo nahosdzáán bikáa’gi? Ntsínikeesgi nił bééhózin; nił haz’ą́ągi; nínízinii, ádíílíiłii, dóóninahat’a’. Áádóó t’áá ni t’éiyá hait’éego baa nídíídááł dóó neidooléłígííbee atiinígíí nił bééhózin.
Díí éí t’áá shít’éí shił haz’ą́ągi bee na’ídíshkaah, Alma asdla’góne’ saad dashijaaígi yíníshta’go shił nizhóní, Alma na’ídíłkid: “Da’ niłch’i k’ehgoósh God bee nándizhjį? Da’ bini’ísh nich’į’ ííshjáán ályaa?8 Alma na’i’di’łkidígíí éí bee ééhózin dóó éidí bee baa nídiidááł dóó bee nihaadoolyééł.
Béédaałniih, Yisdá’iiníiłii ánhiłní “shaa hohkááh, dziil danhighánígíí dóó nihiyéél dandaazii áko háádaałhį́į do
“She’azéédéetání azéédadohtįįhgo, shídahooł’aah; a’ohgo ádííníszin dóó shijéí ayáhágo át’é: dóó éí bee háádaałyį́į́h doo.9
Jesus Christ yiniidlánígii nooséełgo bibee adziilii bee ná’iikąąhgo hááhiilyį́įh doo, níłch’i doo yá’át’éehii nda’níłtł’ahyę́ę nihá néiłdziih doo áádóó nihidziilgo Christ nahiniidlingo á’diilnéeh doo, éí bee Jesus Christ bits’íís yee nihá niná’ídláhą́ą yéego nihił nilíi dooleeł.10
K’ad hoolzhishdóó, iiná áníł’į́ hazhó’ó naniłkaah doo áádóó Yá’ąąshii NihiTaa’ ił hózhǫ́ nihá yinaha’áhígíí bił ahąąh nidíinił. Ádaa ná’ookąąh áníléehgo éí k’ad ádíílííł. Sodizin bee hazhó’ó baa ntsíníkeesgo hasht’e’ ádidíílnííł éí bee “God yee ayóó’át’éii bee bich’į’ díní’į́į dooleeł.”11
Jesus Christ bizaad éí nihinahat’a’ t’áá bił yiilt’ihgo t’éiyá. Bí doo biłgóó éí, hool’áágóó biniiyé nahat’á doo bíighah da, áádóó iiná doo ninít’i’ii binahwiit’áháa doo ádoonííł da.
Naaltsoos ła “The Living Christ: The Tesimony of the Apostles,”12 wolyé, Yasniłt’ees 1, 2000 yę́ędą́ą́’ nihich’į’ kólyaa. Hoot’į́įgi si’ą́ągo ádíílííł, áádóó Christ bikéé’ naakaiyę́ę hadahaasdzíí’ éí yíníłta’ dooleeł.
“The Family: A Proclamation to the World” wolyéhígíí bił choinił’į́į dooleeł. Ałahjį’ nihighan dóó áłchíní baa yádeilti’, ndi Christ hináanii yisdá’iiníłígíí bibee adziilígíí baa íídííłtah. Christ hináanii t’áágéedgo éí niidzinyę́ę doo ádooníił da. Ha’áłchíní bá ha’oodzíí’ binaaltsoos ání, “Hool’áágóó ił hózhǫ́ binahat’á éí aniné bilááhgóó ahool’á. Diyin bighan haz’ą́ą́góne’ hodiyingo Diyin bił ałghazhdeet’ánígíí bee T’áá’áníiltso God baa nídiidááł dóó hool’áágóó hooghan haz’ą́ą́dóó ahił nááhódlǫ́ǫ doo.”13
Díí éí Christ hináanii be’iina’ nihá ninéidiní’ą́ áko nahasdzáán t’áá’át’é Yisdáiiníiłii yá nilį́.
Díigi’ít’éego éí, Diyin bizaad t’áá’aaníinii hanítáa doo díí “The Living Christ” yíníłta’go.
Sozdilzingo “The Living Christ” jółta’go éí Matthew, Mark, Luke, John, dóó Gáamalii Binaaltsoos yii’ hadahaasdzíí’yę́ę jółta’ nahalin. Yisdá’iiníiłii yéego yinídlą́ągo ándoolííł dóó hool’áágóó iiná bíká’ánít’ínée nizhónígo bich’į’ yínáał doo.
Azhą́ ni’ayiilzííh, a’oh néidleeh, dóó bąąhági’íit’į́į ndi, Jesus Christ nihá niná’ídlá beego ádaa ná’iikąąh áko baa nídiidááł dóó God bee ak’ihojidlí nihaidoolééł—ts’ídá ayóó’áhonóolnindi NihiTaa’ dóó Biye’ bił kééhwiit’į́į doo.14
T’áá’ánółtso nihił bééhózin, aniné doo bik’ee ąą hadiidáał da; éí biniinaa NihiTaa’ éí baa nídiidááł éí binahwiit’áa dooleeł, áko Bí nihá yinahaz’ánée nihaidoolééł.15
T’áá’aaníigo ádíshní hool’áágóó Diyin dóó Yisdá’iiníiłii Lord Jesus Christ bił kééhwiit’į́į dooleeł éí nahat’á yá’át’éehii át’é. Ákondi doo nihít’éí nihinahat’a’ át’ée da—Bí ałdó’ binahat’a’. Bí éí t’áá’aaníigo ayóó’ánhó’ní, doo bik’izh’dootáá’ át’éego bidziil. Bí éí nizhónígo bił ałhii’ sii’nil. Nihí éí binaanish niidlį́. Bee ániit’éii éí yee ádaat’é. Íiyisíí biniiyé éí, Bí nihaa nídoohkah daaní—nídíídááł dóó nihinááł hool’áágóóił hózhǫ́ naadoolyééł danihiłní.
Shik’is dóó shilah ayóó’óshníinii, náá damóogo Palm Sunday bá hoo’aah—éí Christ Jerusalemdi yah’ííyá bee bééhániih. Naakidi damóogo éí, Easter Sunday bá hoo’aah—éí Yisdá’iiníiłii aniné yik’eh deesdlį́į́’ bééhániih.
Díí naakigo hoo’aahígíí éí Yisdá’iiníiłii bich’į’ díníit’į́į’ doo, bénéilniihgo Bi bee haz’áanii baa nídi’diit’ááł. Hazhó’ó ádíníil’įįł, binahwiit’áhígíí dóó God binahat’á bił ahiih sinilgo éí beego baa nídiidááł dóó nihaidoolééł—kót’éego sodiszin Jesus Christ bízhi’ bee, amen.