![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F51%2Fdc%2F51dc273cb99f8c408ec2c9c9a2b4b6bbfbb42b64%2F51dc273cb99f8c408ec2c9c9a2b4b6bbfbb42b64.jpeg/full/!250,/0/default)
Ousap Nuokus ne Fori Mi Och
Ewe Samon a urenikich pwe nupwen sia uta ren nuku won won An achaw, tipemwaramwar me nuokus repwe kukkununo; ewe mochenin fori mi och a watteno.
Pwi me fefinei achengicheng, ua iotek pwe Ngunun ewe Samon epwe nonnom rech nupwen ua kapas ikenai. Netipei a uren kinisou ngeni ewe Samon, ewe an ei Mwichefen, ren ewe memef sia mefi non ennetin iotek, afanafan, me kon mi amwarar non ei mwichenap.
Non ewe April, Preseten Thomas S. Monson a ngenikich ew porous minne a ku netipen aramas non ewe fonuan, pwan netipei. A kapas usun manamanen ewe Puken Mormon. A pesei kich sipwe kaeo, ekieki, me aea afanafanan. A pwonei pwe ika sia awora fansoun iteiten ran ne kaeo me ekieki me fori annukun ewe Puken Mormon, epwe wor ach auchean kapasen pwarata usun ennetin, me ewe kapasen pwarata usun ewe Kraist mi manau epwe tumunu kich non fansoun osukosuk. (Nengeni “The Power of the Book of Mormon,” Liahona, May 2017, 86–87.)
Usun chommong ami, ua rongorong an ewe soufos kewe kapas pwe mongungun ewe Samon ngeniei. Me pwan usun chommong ami, ua finata upwe aneasochisi ekkewe kapas. Iwe, nupwen ai we emon chok kukkun at, ua mefi pwe ewe Puken Mormon pwe kapasen Kot, pwe we Sam me ewe Nau ra pwato me kapas ngeni Joseph Smith, pwe ekkewe Aposel nom ra feito ren ewe Soufos Joseph me aniwini ekkewe kiien pristut ngeni an ewe Samon Mwichefen.
Ren ena kapasen pwarata, Ua fen aneani ewe Puken Mormon iteiten ran a nap seni 50 ier. Iwe eni ua tongeni fen ekieki pwe an Preseten Monson kewe kapas pwe fan iten emon. Nge, usun chommong ami, ua mefi an ewe soufos pesepes me an pwon a fori ai upwe achocho. Chommong neimi oua fen fori met ua fori: ennetin iotek, ekiekochu pukefel, me achocho ne angang ngeni ewe Samon me ekkoch fan Itan.
Pungun mi apwapwa ngeniei, me ngeni chommong ami, usun met ewe soufos a pwonei. Kich ekkewe sia apwonueta an ourour sia rongorongoch ngeni ewe Ngun. Sia kuna ew watten pochokun ne ungeni sossot me sia mefi watten nuku non ewe Jises Kraist mi manausefan, non An kapas allim, me non An Mwichefen mi manau.
Non ew fansoun osukosuk mi watteno non fonufan, ekkewe mi napeno non kapasen pwarata ra asueno tipemwaramwarme nuokus me wato memefin kinamwe. Ai aneasochisi an Preseten Monson aurour a awora ru mettoch mi amwarar ngeniei: Aewin, ewe Ngun a pwonei a ngeniei ai apinukunuku mettochun mwach, ina mwo ika osukosuken ewe fonufan usun a napeno. Me aruwan, ewe Samon a ngeniei—me ngenikemi—ew watten mefin An tong fan iten ekkewe mi nom non osukosuk. A napeno ach mefi mochenin no angasa ekkoch. Ena mochen a fen ina aunapan an Preseten Monson angang me afanafan.
Ewe Samon a pwonei tong ngeni ekkoch me pwaracho ngeni ewe Soufos Joseph Smith me Oliver Cowdery nupwen ewe angang mwer a fokkun watte. Ewe Samon a apasa pwe pwaracho epwe fis seni ar nuku non I pwe ar achaw:
Ousap nuokus ne fori mi och, nei at, pun met chok oupwe fotuki, oupwe pwan kini; ina minne ika oupwe fotuki mi och iwe oupwe pwan kinikin mi och.
Ina minne, ousap nuokus, kukkun machang; fori mi och; mut ngeni fonufan me hell repwe ungonuk, pun ika ka kauuta won ai achaw, resap win.
Nengeni use apugnuk; feino won aanom me kosap chiwen tipis; fori om angang non fatafatoch minne ua fen annuku ngonuk.
Neneto rei non ekiek meinisin; kosap tipemwaramwar, kosap nuokus.
Nengeni ekkewe kinas nepeki, me rasen ekkewe chufon non pei me pechei; nukuchar, aneasochisi ai annuk, iwe oupwe muuni ewe muun nang (D&C 6:33–37).
Ewe Samon a ureni noun souemwin ewe Niwinsefanito, me a urenikich, pwe nupwen sipwe uta ren nuku won An achaw, tipemwaramar me nuokus ra kukkununo; ewe mochenin fori mi och a watteno. Nupwen sia etiwa an Preseten Monson we tingor ne fotuki non netipach ew kapasen pwarata usun Jises Kraist, sipwe angei ewe pochokun, ewe mochen, me ewe pwaracho ne angasa ekkoch nge sisap aureki ach mochen.
Ua fen kuna ena nuku me pwaracho fan chommong nupwen Souneng mi nuku ra weri anoninenin sossot. Ren ew awewe, Ua nom non Idaho nupwen ewe Teton Dam a ta non June 5, 1976. Ew tekian konik a turutiw. Ngerou ra suseni imwer. Ngerou imw me pisnis ra tano. Ew manaman, pun kukkun seni 15 aramas ra mano.
Met ua kuna ikewe, ua fen kuna ian chok Souneng ra uta pochokun won ewe achawen kapasen pwarata usun Jises Kraist. Pokiten rese tipemwaramwar pwe a tumunur, rese nuokus. Ra chok poutano ekiekin ar sossot ne feino angasa ekkoch. Me ra fori pokiten ar tongei ewe Samon, rese pwan tingor niwinin.
Ren awewe, atun ewe Teton Dam a tano, ew pea pupunu Souneng a sai, towaw seni imwer. Atun chok ar rong usun ewe porous won raitio, ra mwitir sefan ngeni Rexburg. Rese fen no ngeni imwer we ar repwe kuna ika mi tano, ra no kutta nour we pisop. A nom non ew imwen tumun. A anisi ne emweni chommong chon aninis ra wareto won ew sein sukun mi on.
Ewe pupunu ra fetan ngeni ewe pisop me apasa, “Aua keran chok niwin. Pisop, ian aupwe no aninis ia?” A ngenir iten ew famini. Ena pea pupunu ra nomwetiw ne nimetau pokak me konik seni ekkewe imw. Ra angang seni unungach ngeni pwin non chommong ran. Iwe ra asoso ne no katon usun imwer we. A puno ren ewe konik, ese wor me repwe nimeti. Iwe ra mwitir niwino sefan ngeni nour we pisop. Ra eis, “Pisop, mi wor emon aupwe anisi?”
Ewe manamanen pwaracho me tong ennet mi mosonoson—ewe tong ennet an Christ—a fen fis non ekkei ier me non unusen fonufan. Mi fis non ekkewe ranin riaffou me sossot non fansoun ewe Soufos Joseph Smith non Missouri. Mi fis nupwen Brigham Young a emweni ewe sai seni Nauvoo me mwirin kokori ekkewe Souneng neni mi pon non notoun Merika, ne aninis fengen ne forata Zion ngeni ewe Samon.
Ika oupwe aneani ekkewe puken manau noun ekkewe chon akkom mwach, oupwe kuna ekkewe manamanen nuku mi asueno tipemwaramwar me nuokus. Me oua aneani usun Souneng ra akouno ar mochen ne anisi emon fan iten ewe Samon, me mwen ar niwin sefan ngeni pwisin nour siip ika ngeni pwisin ar masies ese tuta.
Ua kuna ena sokun manaman ekkoch chok ran a no mwirin ewe Hurricane Irma non Puerto Rico, Saint Thomas, me Florida, ikewe Sounengin Aramas mi Pin non Fansoun soponon ra chiechi ngeni ekkoch mwichefen, mwichen non pwisin ewe neni, mwicheichen non unusenapen fonu ra poputa ne nimenim.
Usun chienei kewe non Rexburg, ew pea pupunu esap ir chon ewe Mwichefen non Florida ra anonga ar pochokun ne anisi ewe neni nap seni ar pwisin angang won fonuer kewe. Nupwen ekkoch Sonenging Aramas mi Pin non Fansoun Soponon ra aninis ne amwokutu ru watten ira ra epeti aaner we, ewe pea pupunu a awewei pw era pekus iwe ra kun ngeni ar repwe anisi ekkoch, ra nuku pwe ewe Samon epwe awora aninis ngenir me ren imwer we. Ewe mwan a apasa pwe me mwen chon ach we Mwichefen ra wareto ne awora aninis, ewe pea pupunu ra iotek. Ra angei ponuwan pwe aninis epwe feito. A feito non chok ekkewe awa pwe ponuwan iotek.
Ua fen rong usun ew repot pwe ekkoch ra fen poputa ne eita ekkewe Sounengin Aramas mi Pin non Fansoun Soponon ekkewe ir mi ufouf mi on mi mak ren Helping Hands “Ekkewe Chon Nang mi On.” Emon Sounengin Aramas mi Pin non Fansoun Soponon a uwei wan taraku epwe for, me ewe mwan a anisi a anapanapa ewe “angangen ngun” I a mefi nupwen aramas mi ufouf mi on ra amwokutu ira seni nukun imwan we iwe miwrin, a apasa, ra “konu ekkoch kon ngeniei pwe ngang emon noun Kot.”
Emon pwan chon Florida—esap pwan chon ach we manaman—a aporousa pwe Soungengin Aramas mi Pin non Fansoun Soponon ra feito ren imwan we nupwen a angang nukun imwan we mi tatakis me a mefi pekus, pwichikar, me arapakan epwene kechiw. Ekkewe chon aninis ra fori, non an kapas, “ew ennetin manaman.” Rese chok angang non ar achocho nge ra pwan angang ren takirikir me emeniemen, rese etiwa mettoch pwe niwinin ar angang.
Ua kuna ena achocho me rongorong ena takirikir nupwen, nekunionun ew Ammon, ua churi ew mwichen Sounengin Aramas mi Pin non Fansoun Soponon non Florida. Ekkewe chon aninis ra ekis chok kouno ar nimenim ar repwe kapong ngeniei. Ra apasa pwe 90 memperun ar we steik non Georgia ra fori ew kokkot ar repwe fiti ekkewe chon angasa non Florida non ewe pwin akkom.
Ra no seni Georgia kunok 4 nesosor, drive fite awa, angang unusen ewe ran me non ewe pwin, me kokkot repwe pwan angang sefan non ewe ran mwirin.
Ra anapanapa ngeniei meinisin ren emenimen me pwapwa. Ewe chok pekus ua mefi ina pwe ra mochen aupwe kouno ne kinisou ngenir pwe repwe niwino angang. Ewe presetenin steik a minasefani noun ewe ngerenger me a angang won efoch ira mi turuno me emon pisop a amara ekkewe panen ira nupwen aua tota won wam we ngeni ewe pwan ew mwichen angasa.
Akkomwan non ena ran, nupwen aua sa seni pwan ew neni, emon mwan a fen fetanto ngeni ewe taraku, pwiniti akkawan, me kinisou ngeni kem ren ekkewe chon aninis. A apasa, “Ngang esap chon ami mwichefen. Use nuku met oua fori fan item. Kot epwe efiochu kemi.” Emon chon aninis I LDS a uta unukun mi ufouf sech mi on a emeniemen me uchiki afaran usun ita ese och ngeni ew mwar.
Nupwen ekkewe chon aninis seni Georgia ra feito ne anisi ei mwan ese nuku, chommong Sounengin LDS seni ena kinikin non Florida mi tano ra fen no fite puku mwain eor ngeni pwan ew neni non Florida ikewe ra rong pwe mi kon tangaw.
Ena ran ua chemeni me weweochuti ekkewe kapasen osini an ewe Soufos Joseph Smith: “Emon mwan mi ur ren ewe tongen Kot, ese menemenoch ne afeiochu an chok famini, nge non unusen ewe fonufan, an mochen afeiochu unusen aramas” ( Teachings of Presidents of the Church: Joseph Smith [2007], 426).
Sia kuna ena sokkun tong non manauen Sounengin Fansoun Soponon ekis meinisin. Iteiten fansoun mi wor feiengaw a fis ekis meinisin non ewe fonufan. Sounengin Fansoun Soponon ra fang me aninis ngei ewe aninisin Mwichefen. Ew tingor sise kon akkaea. Ennetin, fan ekkoch, sia fen tingor ekkewe chon aninis ne witiwit ne sai ngeni ewe neni tori ekkewe chok emwenin angang ra mwoneta ne etiwer.
Ena mochenin afeiochu ina uwan an aramas angei ew kapasen pwarata usun Jises Kraist, An kapas allim, An Mwichefen mi niwinsefan, me Noun soufos. Ina pwata noun ewe Samon aramas rese tipemwaramwar me nuokus. Ina pwata misineri ra angang ekis meinisin non fonufan. Ina pwata sam me in ra me nour ra iotek fan iten ekkoch. Ina pwata sou emwen ra pesei nour serafo repwe etiwa an Preseten Monson tingor ne anea ewe Puken Mormon ren netiper. Uwan ese feito ren an souemwen pesei nge ren an serafo me chon mwichefen foffor won nuku. Ena nuku a fis non foffor minne fangeo mi auchea ren a wato siwinin netip ewe a mut ngenir ne mefi ewe tongen Kot.
Nge netipach, epwe chok siwin ika chok pwe sia sopweno ne tapweno mwirin an ewe soufos aurour. Ika sia kouno ne achocho mwirin ew chok sossot, ewe siwin epwe morono.
A napeno an Sounengin Fansoun Soponon nuku non ewe Samon Jises Kraist, non ewe Puken Mormon pwe ewe kapasen Kot, me non niwinsefaniton ekkewe kien pristut non An Mwichefen mi ennet. Ena wattenon kapasen pwarata a ngeni kich watte pwaracho me aureki ekkoch noun Kot semirit. Nge mi pwan auchea ekkoch ren ekkewe osukosuk me ekkewe tufich mwach.
Sise tongeni kuna tichikin, nge sia sinei unusenapan. Sia sinei pwe non ekkewe ranin soponon, ewe fonufan epwe nom non osukosuk. Sia sinei pwe nukanapan osukosuk epwe fis, ewe Samon epwe emweni Sounengin Fansoun Soponon ne uwei ewe kapas allimen Jises Kraist ngeni muu meinisin, einang, kapas, me aramas. Me sia sinei pwe noun ewe Samon chon kuno mi ennet repwe nimenimoch me monneta ne etiwa I nupwen epwe niwin sefan. Sisap nuokus.
Iwe, ren ach sia fen aueta nuku me pwaracho non netipach, a watta an ewe Samon mochen seni kich—me seni ewe tappin aramas mwirich. Mi auchea repwe pochokun me pwaracho pokiten repwe fori mettoch mi nap me weires nap seni sia fen fori. Me repwe weri napenon ungeni seni ewe chon koum ngeni ngunuch.
Ewe aanen apinukoch nupwen sipwe feino usun mi kawor me ren ewe Samon: “Neneto rei non ekiek meinisin; kosap tipemwaramwar, kosap nuokus.” (D&C 6:36). Preseten Monson a urenikich ifa usun sipwe fori. Sipwe ekipwichi me nounou ewe Puken Mormon me an ekkewe soufos kapas. Ioteki iteitan. Nuku. Angang ngeni ewe Samon ren netipach, ach nap, ekiek, me pochokun. Sipwe ioteki ren unusen ach tongeni ren netipach fan iten ewe niffangen tong ennet, ewe nimenimochun tong ennet an Kraist. (nengeni Moronai 7:7:47–48) Iwe napan, sipwe chok foffori me achocho ne fori aurouren soufos.
Nupwen ewe aan epwe weires, sipwe anongonong won an ewe Samon pwon—ewe pwon Preseten Monson a achema ngenikich usun nupwen a kan soun apasa sefani ekkei kapasen ewe Chon Amanau: Ion epwe etiwa kemi, upwe pwan nom ie, pun upwe feino me mwen mesom. Upwe nom won peniemwanum me won peniefefinum, me Nguni epwe nom non netipemi, me nei chon nang repwe pwenikemino, me chunakemita (D&C 84:88).
Ua pwarata pwe ewe Samon a no me mwen mesom ian ka nom ia won an angang. Fan ekkoch en ewe chon nang ewe Samon a tinano ne chunata ekkoch. Fan chon nang repwe pwennukeno. Nge iteitan epwe nom reom Ngunun we non netipom, usun mi pwon ngonuk non fansoun sacrament. Kopwe chok aneasochisi An annuk.
Ekkewe ran mi murino ra nom mwach ren ewe muun Kot won fonufan. Ungeni epwe apochokuna ach nuku non Jises Kraist, usun chok ewe fansoun ewe Soufos Joseph Smith. Nuku epwe chok akkufu nuokus. Ach uta fengen epwe awora tipew. Iwe ami iotek fan iten ekkewe mi osupwang mi ponu me ren emon Kot mi tong. I ese momour.
Ua pwarataq pwe Kot ewe Sam mi manau me a mochen oupwe feito non imwemi Ren. Iei ewe ennetin Mwichefenin ewe Samon Jises Kraist. I mi sinei kemi; Mi tongeni kemi; ma a tutumunu kemi. A achasfeani ami kewe tipis me ai tipisi me tipisin noun Semach won Nang kewe meinisin. Ach tapweno mwirin non manauemi me non ami angang ngeni ekkoch ina ewe aanen manau esemuch.
Ua pwarata me ngenikemi ai feioch me ai tong. Non it mi pin Jises Kraist, amen.