Samol, Kopwe Suki Mesei Epwe Neneno
Mi auchea sipwe nenengeni ekkoch usun an ach we Chon Amanau a nenengenir.
The Lion King ekan ew kachiton manga ren ewe Masiesin Africa. Nupwen ewe Naion King a mano nupwen a anisi noun we, ewe kukkun naion a katou seni fonuan nupwen emon chon nemenem mi ngaw a angawano kokkotun ewe masies. Pokiten noun we sense a anisi an epwe weweiti pwe meinisin mettoch mi manau a ngeni ekkoch manau, ewe kukkun naion a angei sefani mwun ewe. A kuna ewe auchean an epwe akokkota ochu nonnomun non ewe masies. Nupwen a kaeo an epwe winiti emon king, ewe kukun naion a tapweno mwirin ewe aurour ne “nenono mwen omw nengeni.”
Nupwen sia kaeo ach sipwe chon muuni mettoch meinisin an Semach we, ewe kapas allim a pwan tongeni anisikich ach sipwe kuna nukun ach nenengeni. Ren ach sipwe kuna nukun ach nengeni, mi namwot sipwe nenengeni ekkoch usun an ach we Chon Amanau a nenengenir. Ewe kapas allim a anisi chommong aramas, ren aramas me ar sokofesen. Sise tongeni weweiti finian me mwokutukutun aramas non ei fonufan, ach kewe nenien angang, mwicheichen souneng, me non ach famini pokiten sise kan weweiti ion ir. Sipwe nenengeni nukun ewe mecheresin aseser me efisata awatenon ach kukunun kaeo.
Mesei a fen neneno ne “kuna nukun met ua tongeni kuna” nupwen ua emon Presetenin misin. Emon anuon elter a nikinikin nuokus. Nupwen ai ua chufengen ren interfiu, a apasa non an netipengaw, “Ua mwochen niwinno neniei.” Ua ekiekino, “Iwe, upwe anisuk.” Ua fonou an epwe fokkun achocho ne angang me iotek non ew wiik iwe a kokoriei. Arapakan ew week, a koko. A mochen epwe niwin ngeni nenian. Ua pwan sopweno ne pesei epwe iotek sefan, achocho ne angang, me kokoriei sefan non ew wik. Non am we pwan ew interfiu, ese ekesiwin. A chiwen mochen niwinno nenian.
Use mochen ei epwe fis, iwe ua poputa ne aiti usun auchean wisan. Ua pesei an epwe “poutano an [ekiekin pwisin] i o epwe chok angang.” Nge ese nifinifin met ua auroura an epwe fori, ese tongeni ekesiwin an ekiek. Ua chok keran apareni pwe meni use sinei pwata a mochen niwin. Nge ua mefi ai upwe eisini ew kapas eis: “Elter, Met a weires ngonuk?” A kan nengeni mesei non an kechiw o met a apasa a ku netipei: “Preseten, use tongeni annea.”
Ewe miritin aurour ua ekieki pwe mi auchea ngeni an epwe rongorong nge ese karap ngeni met a namwot ngeni. Met a fokkun auchea an epwe kuna seni noun we presetenin misin pwe ngang upwe ausening ngeni ewe Ngun mi Fel pwe upwe tongeni weweiti met ewe elter a ekieki. A mochen ngang upwe nengeni i o ngeni i ew popun an epwe apinukunuk. Nge, use fori ena sokkun. Ei pochokunen elter a kaeo an epwe annea me a winiti emon noun Jises Kraist chon kuno. A anapano ai weweiti an ewe Samol Kapas: “Aramas ra chok nengeni nukun, nge ngang ua nengeni non” (1 Samuel 16:7).
A ew feioch nupwen Ngunun ewe Samon a awatteno ach kuna. Chechemeni ewe soufous Elisha, a neno an epwe kutta ewe soufiun Syria ra rokopweni ewe fonu ren nour kewe oris me chariots? Noun we chon angang a nuokus ne ereni o a eisini Elisha met repwe ne fori. Elisha a ereni pwe esap nuokus o a apasa ekkie kapas: “Kosap nuokus pwe chommong chon peni kich nap seni chon penir” (2 Kings 6:16).. Ewe chon angang ese weweiti met ewe soufos a kapas usun. Ese nengeni nukun an kuna. Nge, Elisha a kuna chommongun chon nang ra anisi noun ewe soufos kewe aramas. Iwe, Elisha a iotek ngeni ewe Samon pwe epwe anenoi mesen noun ewe chon angang, “o a kuna: me ewe chuk a urono ren oris me chariot mi ngetenget ren ekkei ra rokopwanieno Elisha” (2 Kings 6:17).
Fan ekkoch sia otowafeseni kich seni ekkoch pokiten ar sokkono seni kich. Sia mefi kinamwe unukun ekkewe ra ekiek, kapas, ufouf, me fori usun chok met sia fori nap seni ekkewe ra sokkoseni kich. Non wesewesan, esap kich seni sokopaten fonu o kapas non sokkopatten fos? Esap kich mi kuna ei fonufan non sokkopaten kokot me mosowosowan? Ren ekkoch ra kuna me kapas non ngunun ar nengeni, usun ewe soufos Elisha, me ekkoch ra tongeni kuna me kapas non nukun ar kuna usun chok met a fis ngeni ei ren ewe misineri.
Sia nomw won ei fonufan ian aramas ra sani okokuf,mwanin kuta, me esit. Sisap nenengeni aramas ren ach nenong non media,sipwe ne nengeni non ne kutta ekkewe napanapan nang sia mochen. Ekkei napanap sise tongeni kuna won Pinterest are pacheta won Instragram.
Ren ach sipwe etiwa me tongei ekkoch esap wewen pwe sipwe tipew ngeni ar okkot. Nge, sipwe kanengeni ewe ennet, o esap epetikich ach sipwe kirekiroch. Ren ach ennetin tongei ekkoch mi namwot sipwe etiwa achocho an aramas sise mwo sinei nonnomur. Ren ach nengeni nukun met sia tongeni kuna a namwot sipwe anongonong won ewe Chon Amanau.
Non May 28, 2016, – Beau Richie 16 ierin me chienan we Austin ra nom won ew ranch an ar we famini non Colorado. Beau me Austin ra tota non war kewe non pwapwa pwe repwe kukunou. Rese kan niwen towawono nge ra kuna osukosuk o ra kouno. Ewe taraku Beau e uwei a nupwono, chounano Beau ukukun 400 paun ika 180 kg ren mecha. Nupwen chienen Beau we itan Austin a kuna ii, a kuna Beau pwe a fokkun achocho ngeni manauan. Ngeni ukukun an tongeni, a sotuni ne minano ewe taraku seni chienan we. Ese tongeni mwokut. A iotek fan iten Beau iwe a mwitir ne no tingor aninis. Ekkewe chon angangen Emergency ra war, nge fitu awa murin Beau a sopwono. A tou seni ei manauen fonufan.
Seman me inan ra fokun netipeta. Ar ra uta non ewe kukun pioing me chienen Beau we me an famini, emon police a war iwe a ngeni inan Beau noun we Phone. Nupwen a angei ewe phone, ewe alarm a tik. A onei nge a kuna noun Beau we iteitan alarm. A neuomong ne anneani ewe mak ren noun we at mi mochen kukunou fetan chok a mina pwe iteitan an epwe annea. A apasa “Chechemeni pwe Jises Kraist epwe akkom non manauom ikenai.”
An Beau ekiekin ewe Chon Angasano ese okukunano netipeta an ekkewe mi tongei i pokiten ese chiwen nomw. Nge a ngenir pochokunen epinukunuk me wewen manauen Beau me met a finata. A anisi an we famini me chienan kewe repwe neneno mwen an ewe weweiti an mano ngeni ewe pwapwan chusefan non ewe manau mwirin ei. Amwararen umoumoch ngeni inan me seman Beau ar repwe nengeni mwen mesen nour we met a kan auchea.
Kich chon ei Mwichefel, sia fen angei ewe ngunun amemef an epwe esinei ngeni kich nupwen sia chok nengeni ei manauen inis nap seni ewe manau ese much. Ewe Sakramen epwe achema ngeni kich iteiten wiik ach sipwe neneoch ngeni Jises Kraist pwe sipwe chechemeni I me ewe Ngun mi Fel epwe nom rech (nengeni D&C 20:77). Nge, fan ekkoch sise chiwen eteneki ekkei memefin achechem me amamef ika fan ekkoch sia ekkis atamano ach sipwe ponueni. Nupwen Jises Kraist mi akkom non manauach, I epwe suki mesach pwe sipwe kuna met sokkun tufich mi tongeni eto rech sise mo kuna.
Ua angei echo toropwe usun ew alarm noun emon fefin mi fokkun nukuchar non manauen an souneng. A ereniei pwe ren an achocho ngeni an epwe anisi punuan we an epwe weweiti usun met a mefi, A makketiw ew tettenin mak won non noun we fon usun met punuan we a fori ika apasa mi asonga. A apasa pwe nupwen ewe fansoun a fich, a ekieki pwe epwe wor an anetata a tongeni pwar ngeni punuan we pwe epwe siwini manauan. Nge, non ew Raninifel nupwen a angei ewe sakramen o a ekiekin ewe Achasefanin ewe Chon Amanau, a chemeni pwe epwe makketiw usun an kewe memef ese pung ren punuan we a otowawano ewe Ngun mi Fel seni o esap siwini manauan punuan.
Ew memef a tonong netipan o a ereni: “Nikitano; Nikitano meinisin. Tonano ekkewe mak. Rese tongeni anisi.” Iwe a pwan makkei, non pwisin kapas a era: “Use kan muttir ne atonuno ewe tettenin mak. Nge nupwen ua fori ena, meinisin ekkewe memef mi ngau ese chiwen wor. Netipei a uren tong—tongei punuwei we me tong ren ai we Samon.” Usun Saul won ewe aan ngeni Damascus, netipan ewe fefin a ekkesiwini. Ewe mettoch usun unen iik a turutiw seni mesan.
Ewe Chon Amanau a suki mesen ekkewe mi chun non pekin aion me ngun. Ach suki mesach ngeni ennet mi pin a awewen chok usun ach suki mesach ngeni ewe ennet, me ammonata kich pwe sipwe chikar seni ach mesechun non ei manaw. Nupwen sia ausening ngeni ekkewe “alarm non pekin ngun” ewe a esinei kich pwe sipwe apungano ach kewe fofor, sia angei ewe pwonen ewe sakramen pwe ewe Ngun mi Fel epwe nonomw rech. Ei a fis ngeni Joseph me Oliver Cowdery me non ewe Tempel non Kirtland nupwen Jises Kraist, ewe a pwon pwe “ewe pwonuponun” epet epwe “katuruno” seni [ekiekir] kewe, o pwan [ar] weweiti epwe anapano” (D&C 110:1).
Ua pwarata pwe seni ewe manamanen Jises Kraist, kich sia tongeni kuna nukun ach nenengeni me met sia tufichin kuna. Nupwen sipwe chechemeni I me Ngunun we epwe nonnom rech, mesen ach weweiti epwe suk. Iwe ewe watten ennetin napanap seni nang mi nom non kich epwe napeno non netipach. Fan itan Jises Kraist, amen.