Ewe Sai a Soposopono!
Ewe sai ne niwin ngeni Semach Won Nang ina ewe sai mi auchea non manauach.
Ipuku fiik ier a no, Brigham Young a nengeni ewe fonuen Salt Lake Valley ren aewin fansoun o a apasa, “Iei ewe neni mi pung!” I a sinei ewe neni pun ewe Samon a pwarata ngeni i.
Non 1869, nap seni 70,000 sounang ra pwan fori ew sai usun chok. Ika mo sokkofesinin ar kapas, orenier, me fonuer, mi nonno ar kapasen pwarata usun ewe Sam, ewe Nau, me ewe Ngun mi Fel, ewe Niwinsefaniton ewe kapas annimen Jises Kraist me ar mochen auta Zion—eu nenien kinamwe, pwapwa me ning ren ar ammonata ren Oruan Niwinsefaniton ewe Chon Amanau.
Nein ekkewe akkaewin Sounang ne tori Utah emon itan Jane Manning James—I noun emon mi fotek nengin, me emon chon siwin ngeni ewe Mwichifen, me emon chon nuku mi kuna watte weiresin. Fefinach James I emon memper mi pochokkun tori an mano non 1908 .
A makkei: “Ua mochen apasa ikei, pwe ai nuku non ewe kapas annimen Jises Kraist usun mi afanafan non ewe Mwichefenin Jises Kraist ren Aramas mi pin non Fansoun Soponon, mi pochokkun ikenai me meni mi pochokkun seni atun ua keran papatais. Ua moni nei eu ne engon me assor, manaueni ewe kapasen emirit, ua mour nekunion me nenokai nesesor, ua achocho non ai napanap mi mosonoson pwe upwe emon nenien appiru ngeni aramas.”
Fefinach James, usun chommong ekkewe Aramas mi Pin, rese chok kauta Zion ren chaa, pwichipwich me chonun meser nge ra pwan kutta an ewe Samon feioch ren manaueni nongonongen ewe kapas annim aukukkun mi tongeni me kapach ngeni an nuku non Jises Kraist—ewe chon echikar mi nap ren ekkewe ra ennetin kutta I.
Ekkewe sounang me noom rese unusoch, nge ra efisi eu nongonong ewe sia kauta ach famini me eu nonnom mi tongei me apwonueta ach pwon mi pin, mi pwa non och poraus me ekkis meinisin won fonufan pun am mochen tapweno Jises Kraist o pwan am anisi ekkoch mi kan ngeni ika towau seni kem.
Preseten Eyring, upwe apachata ai kinisou ngeni ekkewe engon ngeroun chon nang mi ufouf mi on ra angang non Texas, Mexico, me pwan ekkoch neni fan itom.
A wor ai nuku anonnon pwe ika sia nikiti ach fofo ngeni ach newo me noom, pachenong ren ekkewe memperin noom mwan me fefin, sipwe nikitano eu niffang mi fokkun auchea. Ua fen poraus usun “Nuku non ach Ipwetiw” me noom me upwe sopweno pun ua sinei pwe ekkewe tapin repwe feito repwe pwan sinei usun ewe nuku non ewe Samon Jises Kraist me an kapas annim a nom ren ekkewe aewin Sounang.
Ai kewe newo semanap me inenap ra nom ren ekkewe memperin non ra fiti war mi amara me ra pwan fetan ngeni Utah. Ir, usun chok Fefinach Jane Manning James, mi pwan wor ar nuku anonnon ren iteiten ipwen pecher non ar pwisin sai.
Nour puken uruo mi masoueni awewen ar weires, echik, semwen me pwan kapasen pwaratan ar nuku non Kot me ewe kapas annimen Jises Kraist mi niwinsefan.
Mi chok fitu pisekir me won fonufan nge ir mi pwapwaiti chommong feioch seni ar pwipwi fengen ren chon ewe Mwichifenin Jises Kraist. Nupwen mi tufich, ra ekieta ekkewe me sorongau me efeiochu ekkewe mi semwen ren ar aninis fengeni nefiner me ren manamanen ewe pristuten Kot.
Ekkewe fefin non Cache Valley, Utah, ra anisi ekkewe souneng non ngunun ekkewe Fin Anisi ne “angang non eu chok fan iten ekkewe mi osupwang.” Inei chinnap itan Margaret McNeil Ballard a angang ren punuan, Henry, non an wisen pisop non ewe Oruan Ward non Logan ren 40 ier. Margaret I pwan presetentin Fin Anisi ren 30 ier. I a etiwa non imwan ekkewe mi woungau, semwen, mi mano punuer ika semer me iner, me pwan aufoufa ekkewe mi ma non ufer seni ewe tempel.
Mei pung me auchea sipwe chechemeni amwararen ewe saien ekkewe Mormon ra feito Utah, nge sipwe chechemeni ewe “sai non manuach mi sopwei!” ren kich menisin non ach aea “nuku non ach ipwetiw.”
Chon ei mwichefen mi fo rese ioi fengen ngeni nenien memper non ewe United States. Nge nengeni, ekkewe minafo ra feino ren mwichen ar wart ika pranch, ikewe Souneng ra pin ngeni Semach won Nang non itan Jises Kraist. Ren nap seni 30,000 pwina aramas fan ekis meinisin won fonfuan, meinisin ra chufengen non Zion. Usun mi mak non pukfel, Pun iei Zaion—ewe mi nimoch non netipan.”
Ren ach fetan won aanen manau, sia kuna sossot ne kuna ika sipwe “chechemeni o fori mettoch meinisin ewe Samon a annukukich.”
Chommong kich sia nom non sai mi atikich chommong—a emwen ngeni anapanon me saramen ngun. Nge, ekkoch neich sia sai ngeni netipengau, tipis, song me riaffou.
Ren ei napanap, oupwe eisinikemi: Met ewe neni oua mochen tori? Ia ami fetan a feino ia? Me ami sai a emwenikemi ngeni ekkewe “chommong sokkun feioch” mi pwon seni ewe Samon?
Ewe sai ngeni Semach won Nang ina ewe sai mi kan auchea non manauach, me a sopweno ran me ran, wiik me wiik, maram me maram, me iteten ier pwe sipwe anapano ach nuku non I me Noun we mi achengicheng, Jises Kraist.
Sipwe tumunufichi ia fetanin pechech a no ia non manuach. Sipwe nenengeni me auseningoch ngeni Jises me Noun kewe chon kuno ren an ponueni ekkei kapas eis: “Kopwe ereni kem inet ekkei mettoch meinisin repwe fis, are met epwe fis pwe esissinen ewe fansoun kopwe ne wareto me ewe fansoun soponon?
“Jises a ponueni, Oupwe tumunufichi, pwe ousap tupunu ren emon [ua pwan era fefin].”
Ikenai upwe anniwini ekkewe auour akkom seni sou emwenin Mwichefen.
-
Pwii me fefinei kana, oupwe tumunu ewe kapas annimen Kraist epwe unusoch me ousap tongeni nikotupotup ren ekkewe repwe urumwotei ewe kapas annim. Ewe kapas annimen ewe Sam me ewe Nau a niwinsefan me ren Joseph Smith, ewe soufosun ekkei ranin soponon.
-
Kesap ausening ngeni ekkewe rese seikita ika epinepin ren wiser ren ewe Mwichefen me resap etipeu seni ekkewe memperin ewe Mwichefen.
-
Oupwe tumunu ren ekkewe mwichen aramas ika aramas ir mi pwarata pwe ra angei ponuen kapas eis usun ewe kapas annim non monomon me ra era pwe ir sinei mettoch nouch kewe aposel me soufos rese weweiti.
-
Ousap ausening ngeni ekkewe a wor ar kokkutun muttir kuna watte moni. Nouch memper ra fen nusuno watte moni, oupwe tumunukemi.
Non ekkoch neni, chommong nouch memper ra neno seni met mi pung me kutta tipachem ekkoch rese sinei nge mi momong me mi ekis ngau nge ra achocho ne echikara me echipa.
Non eu taropwe mi katou seni ewe Mwichifen, eu ier a no, a mak: “Sia pesei memperin Mwichifen repwe tumunu ar fiti och mwich mi pwonei—nge mi kamo—echikar mi amwarar ika mi wor ar napanapen echikara aramas nge a nom nukun manamanen chon pristut.”
EwePuken Nemenemnon Mwichifen a mak: “Memper resap kutta aninisin chon doctor nge mi ekis ngau ar napanap. Souemwen repwe pesei memper mi samau repwe kutta aninis seni ekkewe wesewesen doktor me a wor ar mumwutan angang non ewe fonu ra nom non.”
Pwi me fefinei, oupwe tipachem me weweiti pwe ekkei sokkun ra tongeni awora pwapwa ren ar pwon aninis nge meni repwe pwan eriaffou mwirin ren pekin ngun me pekin inis.
Ren ach kewe newo me noom, nonnomoch me anongonong won pwisin ir mi fakkun auchea, nge ar mefi tipeu non fonuer mi pwan auchea. Ra angang fengen me aninisfengen ne pworacho osukosuk non pekin inis me memmef. Ngeni ami kana mwan, a wor ar mwichen pristut, o fan itan ekkewe fefin a wor ar mwichen Fin Anisi. Ekkei rese siwin non ach kei ran ikenai.
Ekkewe Fin Anisi me mwichen pristut ra tumunu nouch kewe memper ren pekin ngun me inis.
Anomukemi won aanen ewe kapas annim ren ami “nuku non ipwetiw” pwe oupwe tongeni niwin fan mesen Semach won Nang me Ewe Samon Jises Kraist. Ewe Samon I nouch Chon Amanau mi achengicheng. I ewe chon Ngasenon fonufan. Sipwe sufoniti itan mi pin me sisap tumunungauei itan, anneasochisi an kewe annuk. Ika si fori, I epwe efeiochukich me emweniochu kich ngeni imwach non Nang.
Ua pesei meinisin ra rongorong ai mongungu pwe oupwe etiwa me afarapachei ion a sai akanaemon chok, ika ia ra nonnom ia won ar sai.
Ouse mochen oupwe chechemeni pwe ese wor eu feioch emon a tongeni aea fengen ren emon nukun porausun ewe Niwinsefanito, ika sia angei me manaueni, a pwonei pwapwa ese much me kinamwe—ewer manau ese much. Sipwe aea ach pochokkun me kapasen pwarata ne anisi nouch misineri repwe kuna, aiti, me papataisi noun Kot kewe semirit pwe epwe wor manamanan ewe kapas annim non manauer.
Mi namwot sipwe afarapachei noun Kot kewe non umoumoch me sisap apungu, ika mo fonuer, mwan ika fefin ika chon ia. Amo repwe apasa pwe sia ennetin nuku pwe ekkewe feiochun ewe kapas allim mi niwin sefan an Jises Kraist ra fis fan iten meinisin noun Kot kewe.
Ua pwarata “ewe sai a sopweno,” me ua pesei kemi oupwe nom won aanen ewe kapas annim non ami nikiitu me etiau poumi ngeni noun Kot kewe meinisin ren tong me umoumoch, pwe sipwe eu chok fengen non netipach pwe pouch kewe repwe nimoch me angei ekkewe “chommong sokkun feioch” mi witi ekkewe ra ennetin tongei Semach won Nang me Noun ewe mi Achengicheng, ren minne uwa ennetin iotek non iten Jises Kraist mi pin, amen.