Lo! Juon Jarin Tariņae an Irooj
Enaaj juon lan̄lōn̄ eļap n̄an aolep rikabwijer ro an Melkesidek Priesthood eo n̄an bōk kōjeraam̧m̧an eo an katakin, katak, im jerbal ippān doon.
M̧aan ro jeiū im jatū jitōn bōro an priesthood eo, ej kōn juon ettā eļap bwe in jutak im̧ami ilo iien in epād ilo bwebwenato, ium̧win ijjitōn̄ jān rikanaan eo ad ejitōnbōro im Būreejtōn, Russell M. Nelson. Ewōr juon aō iakwe eļap n̄an im rejtake em̧m̧aan in Anij in em̧m̧an im Būreejtōnji eo Kein Kajuon ad ekāāl. Ij kobaik kam̧ool eo aō kōn ta eo Elder D. Todd Christofferson im Ritōl ro jet an Doulul eo an Jon̄oulruo Rijilōk ro bwe oktak ko kar kwaļo̧k kiiō rej ankilaan Irooj.
Āinwōt kar ba jān Būreejtōn Nelson, menin ej juon jerbal me kar jar ilo ekōnono kake im ļōmņak kake jān Ritōl ro eto aer jerbal an Kabun̄ ilo juon iien aitok. Ikdeelel in eaar n̄an pukōt ankilan Irooj im kōkajoorļo̧k doulul ko an Melkesidek Priesthood eo. Im̧we kar bōke, im joteen in rikanaan eo ad eaar kwaļo̧ke kōņaan eo an Irooj. “Ilo m̧ool Irooj Jeova e jab kōm̧m̧an jabdewōt n̄e ab Ej kwaļo̧k pepe eo An n̄an ro ri karijeran, rikanaan ro”!1 Jekanooj in jeraam̧m̧an bwe wōr juon ad rikanaan emour rainin!
Ilo aolepān mour eo am, Sister Rasband im n̄a kar itok itak ilaļ in ilo elōn̄ ijjitōn̄ ko an Kabun̄ in im ilo jerbal. Em̧ōj aō lo enan̄in aolep jekjek in jon̄ak ilo Kabun̄ in: juon branch edik ilo Russia ijo me oran rikabwijer Melkesidek Priesthood eo emaron̄ kar bwini kōn juon pā, juon ward ej ļapļo̧k ilo Africa ijo jim̧o̧r pris ro routiej im elder ro kar kweilo̧k ippān doon juon kumi make kōnke aolepān oran rikbwijer Melkisedek Priesthood eo eaar dik, im ward ko reļļap ijo oran elder ro kar aikuj in kōjepeļļo̧k doulul eo aer n̄an ruo doulul ko!
Aolep jikin ko kōm kar pād ie, kōm kar kam̧ool pein Irooj ilo an ilo̧k im̧aan ro Rikarejeran, kōpooj armej ro im iaļ eo im̧aan bwe aolep ajri ro Nejin ren maron̄ kar jeraam̧m̧an ekkar n̄an aolep aikuj ko aer. Ekar ke kallim̧ur bwe “Enaaj etal im̧aanļo̧k in [mejād]” im “pād [ianbwijmaron̄id] im [ianmiin̄id]” im bwe An “Jetōb enaaj pād [ibūruōwōd], im enjeļ ro [An] [ipeļakiid]”?2
Ļōmņak kōn kom̧ aolep, ekakememej eō kōn al eo “Behold! A Royal Army.”
Lo! Juon jarin tariņae an Irooj,
Kōn kōkaļļe, jāje, im kattōrak,
Ej wōnm̧aanļo̧k n̄an anjo̧
Ilo jikin tariņae eļap an mour.
Jarin tarinae eo eobrak kōn ritariņae ro,
Ippān doon, peran, im kajoor.
Eo ej ļoor Ritōl eo aer
Im al ilo lan̄lōn̄ kōn al eo aer.3
Elder Christofferson eaar uwaak jet kajjitōk ko me em̧ool ren kar waļo̧k jān kōjeļļa eo me kumi ko an pris ro rōutiej im doulul eo an elder ro, ilo ward ļābōļ, em̧ōj aer koba n̄an juon wōt, jarin tariņae ekajoor an em̧m̧aan ro an Melkisedek Priesthood eo.
Oktak kein renaaj jipan̄ doulul ko an elder ro im Doulul ko an Kōrā jokkun wōt juon ilo jerbal eo aer. Renaaj barāinwōt kapidodoikļo̧k kōtōpalpal eo an doulul eo ippān bisoprik eo im ward ko̧o̧njeļ eo. Im rej kōtļo̧k bwe bisop en ajije elōn̄ļo̧k eddo ko n̄an būreejtōn ro an doulul eo an elder ro im Doulul eo an Kōrā bwe bisop eo im rikakpilōklōk ro an remaron̄ m̧ad wōt ilo eddo ko aer aorōk—eļap tata tōl jiron̄ ro im likao ro me rej ineek Priesthood eo an Aron.
Oktak ko ilo doulul ko im jerbal ko an Kabun̄ in rejjab kailbōkbōk. Ilo 1883 eo Irooj eaar jiron̄ Būreejtōn John Taylor: “[Ikkijien] kōtōpalpal im ejaak an Kabun̄ eo aō im Priesthood eo … Inaaj kwaļo̧k n̄an eok, jān iien n̄an iien, kōn m̧ōņakjān ko me iaar jitōn̄i, aolep men me naaj menin aikuj n̄an eddōkļo̧k eo ilju im jekļaj im weppān eo an Kabun̄ eo aō, n̄an okoktak eo im eddōkļo̧k eo an aelōn̄ in kiin̄ eo aō.”4
Kiiō, jet naan ko n̄an kom̧ em̧m̧aan ro me rej pris ro rōutiej—jeļā bwe kōmij iakwe kom̧! Jemedwōj ilo Lan̄ ej iakwe kom̧! Jemed wōj ilo Lan̄ ej iakwe kom̧! Kom̧ij juon m̧ōttan eo eļap an jarin tariņae eo an Irooj an priesthood eo, im kōmij jab maron̄ kōm̧akūt m̧aanļo̧k jerbal in kōn jab em̧m̧an eo ami, jerbal in jipan̄ eo, iminene eo, im jim̧we eo ami. Alma eaar katakin bwe em̧m̧aan ro rej kūr n̄an pris ro routiej kōn aer tōmak eļap im jerbal ko rem̧m̧an n̄an katakin im n̄an kwaļo̧k n̄an ro jet.5 Iminene in aikuji kiiō bōlen ļapļo̧k jān m̧okta.
Ilo elōn̄ ward ko, jemaron̄ kōm̧m̧an bwe pris ro rōutiej me enaaj wōr aer iien em̧m̧an n̄an tōl jān juon elder āinwōt būreejtōn an doulul eo aer. Ewōr juon jon̄ak an elder ro rej tōl pris ro routiej: elder ro rej jerbal kiiō āinwōt branch būreejtōn ro ilo jet eria ko ilo laļ in ijo pris ro routiej rej jokwe ilo branch eo, im ewōr branch ko me doulul eo an elder ro wōt ej ejaak im pris ro routiej rej pād.
Enaaj juon lan̄lōn̄ eļap n̄an aolep rikabwijer ro an Melkesidek Priesthood eo n̄an bōk kōjeraam̧m̧an eo an katakin, katak, im jerbal ippān doon ippān aolep membōr ro ilo ward eo. Jekdo̧o̧n ia eo kom̧ij pād ie im jekdo̧o̧n ta jekjek ko ami remaron̄ in, kōmij kūr kom̧ kōn jar, tiljek, im lan̄lōn̄ n̄an bōk wāween kein rekāāl n̄an tōl ak tōl jān im n̄an jerbal ippān doon āinwōt juon kumi in em̧m̧aan ro an priesthood.
Inaaj kiiō kōnono eļapļo̧k kōn jekjek ko ko remaron̄ aikuj in kalikkarļo̧k, ilo ad bun̄ m̧aanļo̧k n̄an kōjerbale ankilan Irooj ikkijien ejaak eo an doulul ko an priesthood eo An ekwojarjar.
Ta okoktak ko n̄an doulul eo an pris ro rōutiej an juon stake? Doulul ko an pris ro routiej an stake eo renaaj wōnm̧aanļo̧k wōt n̄an jerbal. Stake būreejtōnji ko renaaj wōnm̧aanļo̧k wōt n̄an jerbal āinwōt būreejtōnji an doulul eo an pris ro routiej. Ijowōt ke, āinwōt kar kōmeļeļeik jān Elder Christofferson, membōr ro an doulul eo an pris ro routiej an stake enaaj koba in pris ro routiej kiiō jerbal ilo stake būreejtōnji eo, āinwōt membōr ro an ward bisoprik eo, āinwōt membōr ro an stake ko̧o̧njeļ eo eutiej, im petriak eo ej jerbal. Ward im stake kūļōk ro im rijeje ro routjiej rejjab membōr in doulul eo an pris ro routiej. N̄e juon armej ej jerbal āinwōt pris eutiej, petriak, Jiljilimjuonn̄oul, ak Rijilōk ej loļo̧k juon ward ej kōņaan pād ilo kweilo̧k eo an priesthood, enaaj kweilo̧k ippān doulul eo an elder ro.
N̄e em̧m̧aan ro ilo kūr kein rej kōtļo̧k er ilo iien eo ejejjet, renaaj bar ro̧o̧l n̄an iunit ko aer ijoko rej jokwe ie āinwōt membōr in doulul eo an elder ro.
Ta eddo eo an doulul eo an pris ro routiej an stake eo? Stake būreejtōnji eo ej kweiļo̧k ippān membōr ro an doulul eo an pris ro routiej n̄an kapilōk ippān doon, n̄an kam̧ool, im n̄an leļo̧k kaminene. Stake eo ej kweilo̧k āinwōt an kōmeļeļeik ilo bok in tōl ko ad naaj wōnm̧aanļo̧k wōt kōn okoktak ko ruo:
Juon, ward ko im stake ko rejjamin naaj bar kōm̧m̧ani kweilo̧k ko an kamiti eo eutiej an priesthood. Eļan̄n̄e juon jekjek eaorōk ej waļo̧k, n̄an waanjon̄ak ņa mejļan jekjek an baam̧ļe ak juon apan̄ āinjuon an menin jerbal, emaron̄ in kōm̧m̧ane ilo kweilo̧k an bisoprik. Jekjek ko jet rejjab kanooj ļap maron̄ ekōnono kaki ilo ward ko̧o̧njeļ eo. Ta eo kar jeļā kake āinwōt kweilo̧k eo an kamiti eo eutiej an priesthood an stake naaj kiiō ņae etan “kweilo̧k an ko̧o̧njeļ eo eutiej.”
Ruo, kweilo̧k eo iiō otemjej an aolep pris ro routiej kar kapit er ilo stake eo ejjamin naaj bar kōm̧m̧an. Ijowōt ke, stake būreejtōnji eo enaaj wōnm̧aanļo̧k wōt n̄an kōm̧m̧ane kweilo̧k eo iiō otemjej an doulul eo an pris ro routiej an stake āinwōt kar kōjjeļļā kake rainin.
Juon ward emaron̄ ke lōn̄ļo̧k jān juon an doulul eo an elder ro? Uwaak eo ej aaet. Ļoor waanjon̄ak eo ilo Katak im Bujen ko jekjen 107, eoon 89, n̄e juon ward ewōr juon oran eo eļap an rikabwijer ro an Melkisedek Priesthood eo reniknik, ritōl ro emaron̄ ejake elōn̄ļo̧k jān juon doulul an elder ro. Ilo jekjek in, kajjojo doulul ewōr juon oran eo ejokkun wōt juon kōn rūtto in, tijem̧ļo̧k, im opiij an priesthood im kajoor.
Ij kam̧ool bwe ilo ad bun̄ m̧aanļo̧k kōn bar ejaak in eim̧we an doulul eo ilo ward ko ad im stake ko, jon̄an jenaaj lo elōn̄ kōjeraam̧m̧an ko. In kwaļo̧k jet waanjon̄ak ko.
Ium̧win tōl eo an bisop eo, elōn̄ļo̧k kein jipan̄ an priesthood eo remaron̄ jipan̄ kōn jebal in lo̧mo̧o̧r eo. Menin enaaj kobatok eo an Israel kōn jerbal an tampeļ im menmenbwij an baam̧le, jerbal ippān baam̧ļe ko im kajjojo rej pād ilo aikuj, im jipan̄ mijenede ro n̄an bōktok jetōb ko an armej n̄an Jisōs Kraist.
Ke ritōl ro im̧aanļo̧k kar tōl kar jepļaaktok n̄an kwaļo̧k en̄jake eo aer ippān doulul eo an elder ro, juon uwaan doulul eo ekajoorļo̧k enaaj waļo̧k.
Enaaj wōr juon okoktak eļapļo̧k a menin letok ko im maron̄ ko ippān doulul eo.
Enaaj wōr eļapļo̧k in pidodo im wōr iiien n̄an tōpar aikuj ko kiiō im menin aikuj ko ilo ward eo im doulul eo im ilo kakūrm̧ool jerbal in karejar ko ad rellōn̄.
Enaaj wōr juon ļapļo̧k in lale im juon wōt bōro āinwōt juon elder kāāl im juon pris euteij eminene kwaļo̧k en̄jake ko aer, ippān doon, ilo kweilo̧k ko im ijjitōn̄ ko ilo kweilo̧k ko an doulul eo.
Bisop ro im branch būreejtōn ro rej kōjatdikdik renaaj joor n̄an kōļapļo̧k kūr ko aer n̄an tōl armej ro aer im n̄an kwaļo̧k n̄an ro rej pād ilo aikuj.
Jej meļeļe bwe kajjojo ward im stake roktak. Kōn meļeļe oktak kein, jej kōjatdikdik bwe kom̧ naaj ļoor oktak kein ālkin wōt kweilo̧k in eļap. Kar letok n̄an kōm tōl jān juon rikanaan an Anij! Juon jeraam̧m̧an im eddo ļapļap. Jān kakūrm̧oole kōn aolep jim̧we im niknik!
Ij kakememej kom̧: mālim an priesthood eo ej kōm̧m̧an jān kōjeno̧lo̧k im kapit, bōtaab lukkuun kajoor an priesthood eo, kajoor eo n̄an jerbal ilo etan Irooj Jisōs Kraist, emaron̄ in itok wōt kōn mour jim̧we.
Irooj eaar kean̄ n̄an Rikanaan Josep Smith, rikanaan eo an Jepļaaktok eo:
“Lo, im lo, Inaaj oņaake bwijin in sip ko ami, im naaj kajutak elder ro im jilkinļo̧k n̄an er.
“Lo, Inaaj kōm̧ōkaj jerbal eo Aō ilo iien eo an.”6
Ilo m̧ool, en̄in ej iien eo me Irooj ej kōm̧ōkajļo̧k jerbal eo An.
Kōj kajjojo jen kōjerbal iien in em̧m̧an n̄an kejōkļo̧kjeņ im kōkōm̧anm̧anļo̧k mour ko ad n̄an kajokkun wōt juon ippān Ankilan bwe jān maron̄ bōk elōn̄ kōjeraam̧m̧an ko Eaar kallim̧ur kaki n̄an ro rem̧ool im tiljek.
Em̧m̧aan ro, kom̧ em̧ool kōn aolep men ko kom̧ij kōm̧m̧ani n̄an erom m̧ōttan jerbal in ekabwilōn̄lōn̄. Ij kōjatdikdik bwe kajjojo iaad naaj wōnm̧aanļo̧k ilo jerbal in eļap im utiej.
O, n̄e tariņae eo ej jem̧ļo̧k,
N̄e ire im aitwerōk ko rej bōjrak,
N̄e aolep rej ineem̧m̧an ippān doon
Ilowaan aenōm̧m̧an eo eļap,
Im̧aan Kiin̄ eo indeeo,
Bwe jarlepju eo eļap im kajoor
Naaj nōbar etan indeeo,
Im en̄in enaaj al eo renaaj al kake:
Anjo̧, ajno̧,
Kōn E me ekar lo̧mo̧o̧ren kōj!
Anjo̧, anjo̧,
Kōn Jisōs Kraist, ad Irooj!
Anjo̧, anjo̧, anjo̧,
Kōn Jisōs Kraist, ad Iroo!7
Ranin jej aolep jutak āinwōt rikam̧ool an Irooj kwaļo̧k Ankilan kōn rikanaan eo An, Būreejtōn Russell M. Nelson. Ij kam̧ool bwe e ej rikanaan an Anij ijin ioon laļ in. Ij kwaļok aō kam̧ool kōn Irooj Jisōs Kraist, eo ej ad Ripinmuur im Rilo̧mo̧o̧r eļap. En̄in ej jerbal eo An, im en̄in ej Ankilan, eo ij kwaļo̧k naan in kam̧ool ekwojarjar ilo etan Jisōs Kraist, amen.