Kain̄i in Lo̧mo̧o̧r ko Naaj Letok n̄an Kōj Meram Aeboojoj
Bōk koņaad ilo kain̄i ko im kautieji bujen ko rej ekkejel ippān naaj lewaj n̄an eok meram im kōjparok ilo laļ in emarok.
Ro jeiū im jatū, ij m̧ōņōņō ippāmi kōn gospel in ak ilo katak eo an Kraist.
Juon m̧ōtta ekar kajitikin Elder Neil L. Andersen, uwaan Jijlimjuonn̄oul ro, ewi en̄jaake eo n̄e jej kōnono im̧aan 21,000 armej ilo Im̧ōn Kweilo̧k in Eļap. Elder Andersen ekar uwaak, “Ejjab 21,000 armej ro rej kōm̧m̧an am̧ ikkūm̧kūm̧; ej 15 em̧m̧aan rein rej jijet itulikūm̧.” Ikar ettōn̄ dikdik, ijoke ij en̄jaake kiiō. Wāween aō iakwe im reejtake em̧m̧aan rein 15 āinwōt rikanaan, rillolo, im rikwaļo̧k revelesōn ro.
Irooj ekar jiron̄ļo̧k Ebream bwe jān ineen im jān priesthood eo, aolep baam̧le ko ioon laļ in naaj kōjeram̧m̧an er “kōn kōjeraam̧m̧an ko an Gospel eo, … em̧ool mour indeeo” (Ebream 2:11; lale barāinwōt eoon kein 2–10).
Kōjeraam̧m̧an kein kallim̧ur kaki an gospel eo im priesthood eo rōkar jepļaaktok n̄an laļ in, im innām, ilo 1842, Rikanaan Josep Smith ekar kōm̧m̧an bujen n̄an jejjo oran em̧m̧aan im kōrā ro. Mercy Fielding Thompson ekar juon iaer. Rikanaan eo ekar ba n̄ane, “Menin [bujen] enaaj bōktok eok jān nijōk n̄an meram aeboojoj.”1
Rainin ikōņaan kalimjōk kōjparok bujen ko, ko me renaaj bōktok n̄an kwe im n̄a meram aeboojoj.
Kain̄i ko im Bujen ko
Ilo Mool n̄an Tōmak eo jej riit: “Juon kain̄i ej juon m̧akūtkūt, epen kar kōm̧m̧an jān maron̄ eo an priesthood eo. Kain̄i [ko] [me] remenin aorōk n̄an mour indeeo … rej ņa etāer kain̄i in lo̧mo̧o̧r ko. Rekūtbuuj peptaij, kapen, kapit n̄an Melkisedek Priesthood (n̄an em̧m̧aan), bujen ko ilo tampeļ, im jiili m̧are.”2
Elder David A. Bednar ekar katakin, “Kain̄i ko an lo̧mo̧o̧r im mour indeeo kar kōm̧m̧an ilo jepļaak in Kabun̄ eo an Irooj … ejaake iaļ ko kōmālimi me rej kōjeram̧m̧an ko im kajoor an lan̄ emaron tōļon̄ kajjojo iaan mour kein ad.”3
Āinwōt juon jāān dōkā ruo kōjaan, aolep kain̄i ko rekwojarjar rej ekkejltok ippān bujen ko ippān Anij. Anij ekar kallim̧uri kōj kōjeraam̧m̧an ko eļan̄n̄e jenaaj kanooj tōmak kautiej bujen kein.
Rikanaan eo Amulek kōnnaan, “Menin … ej iien eo in … n̄an kōppopo n̄an iioon Anij” (Alma 34:32). Ewi wāween ad kōppopo? Ilo kanooj wānōk būki kain̄i ko. Jej aikuj barāinwōt, ilo naan ko an Būreejtōn Russell M. Nelson, “dāpdep wōt ilo ieļan bujen ko.” Būreejtōn Nelson ekar etal wōt, “Ami wujlepļo̧k n̄an ļoor Rilo̧mo̧o̧r ilo ami kōm̧m̧ani bujen ko Ippān, im innām kōjparoki wōt bujen kein naaj kōppeļļo̧k aor eo n̄an kajjojo jitbōn kōjeraam̧m̧an im utiej epeļļo̧k n̄an em̧m̧aan ro, kōrā ro, im ajri ro ijōko jabdewōt.”4
John im Bonnie Newman, āinwōt elōn̄ iaami, erro kar bōk jitbōn kōjeraam̧m̧an eo Būreejtōn Nelson ekar kōnono kake. Juon Jabōt, ālkin aer kar pād ilo jar ippān jilu iaan ajri ro nejier reddik, Bonnie ekar ba n̄an John, eo ekar jab juon membōr in Kabun̄ in, “Ijjab maron̄ make kōm̧m̧ane menin. Kwoj aikuj kālōt eļan̄n̄e kwōj itok n̄an m̧ōn jar eo aō ippām ke ak kwōn kālōt juon kabun̄ eo jenaaj jim̧or etal n̄ane, ijoke ajri rein rej aikuj jeļā bwe jemāer ej iakwe Anij barāinwōt.” Jabōt eo juon im aolep Jabōt ko tok, John ejjab wōt pād ilo jar; e barāinwōt ekar jerbal in jipan̄, kōjan̄jan̄ piano n̄an elōn ward ko, branch ko, im Būraimere ko ilowaan iiō ko. Ikar utiej in kweilo̧k ippān John ilo Eprōļ 2015, im ilo kweilo̧k eo, kōmro kar kōnono bwe wāween eo em̧m̧an emaron̄ kwaļo̧k iakwe eo an n̄an Bonnie ekar n̄an bōke n̄an tampeļ, ijoke menin eban tōprak eļan̄n̄e ejjab peptaij.
Ālkin pād ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata ium̧win 39 iiō ko, John ekar peptaij ilo 2015. Juon iiō tokālik, John im Bonnie rōkar liāp ilo MemphisTennessee Tampeļ, 20 iiō ālkin an Bonnie make bōk bujen ko an. Ļaddik eo nejierro 47 an iiō, Robert, ekar ba kake jemān, “Jema ekar lukkuun, lukkuun ebbōl ālkin an bōk priesthood eo.” Bonnie ekar kakkobaba, “John ekar iien otemjej juon armej em̧ōņōņō im armej ettōn̄tōn̄, ijoke bōk kain̄i ko im kautiej bujen ko an ekar ļapļo̧k an kōjparok.”
Pinmuur eo an Kraist im An Waanjon̄o̧k
Elōn̄ iiō remootļo̧k, Būreejtōn Boyd K. Packer ekar kakkōl, “Mwil em̧m̧an ilo ejjeļo̧k kain̄i ko an gospel eo naaj jamin jim̧or lo̧mo̧o̧r ak ļōn̄aj lōn̄ļo̧k armej.”5 Ilo m̧ool, jejjab aikuji wōt kain̄i ko im bujen ko n̄an jepļaak n̄an ippān Jemād, ijoke jej barāinwōt aikuji eo Nejin, Jisōs Kraist, im Pinmuur eo An.
Kiin̄ Benjamin ekar katakin bwe ilo wōt im jān etan Karist lo̧mo̧o̧r emaron̄ itok n̄an ro nejin armej (lale Mosaia 3:17; bar lale Laajrak in Tōmak 1:3).
Jān Pinmuur eo An, Jisōs Kraist ekar lo̧mo̧o̧ren kōj jān jorrāān ko ilo wōtlo̧k eo an Adam im kar kōm̧m̧an bwe jen maron̄ ukeļo̧k im innām m̧ōņōņō indeeo. Jān mour eo An, E ekar kalikkar waanjon̄ok n̄an kōj n̄an bōk kain̄i in lo̧mo̧o̧r ko, eo me “kajoor in āinwōt anij ej waļo̧k” (K&B 84:20).
Ālkin an Rilo̧mo̧o̧r kar bōk kain̄i an peptaij n̄an “kam̧ool em̧m̧an otemjej” (lale 2 Nipai 31:5–6), Setan ekar kapo E. Barāinwōt, kapo ko ad rejjab jem̧ļo̧k ālkin peptaij ak liāp, ijoke bōk kain̄i ko rekwojarjar im kautieji bujen ko rej uwaan ļo̧k wōt rej kobrak kōj kōn meram aeboojoj im letok kajoor n̄an bōbrae im eļļā jān kapo ko.
Kakkōl
Aiseia ekar Kanaan bwe ilo raan kein āliktata, “em̧ōj kabwidejdej laļ ium̧win ro rej jokwe ie … kōnke rekar … ukōt kain̄i eo” (Aiseia 24:5; lale barāinwōt K&B 1:15).
Juon uwaan wōt kakkōl, kar waļo̧k n̄an Rikanaan Josep Smith, ekar bwe jet “rekar ruwaaktok n̄an [Irooj] kōn tieer, … [im] rej katakin kōn katak ko im kien ko an armej, im ewōr juon jekjekin anij, a rej kaarmejjete kajoor eo an” (Josep Smith—Bwebwenato 1:19).
Paul barāinwōt ekar kakkōl bwe elōn̄ enaaj kar “āinwōt re m̧wilin kwōjarjar, ak [kaarmejjete] kajoor eo an: jān rein kwōn ilo̧k” (2 Timote 3:5). Ij ālji, jān rein kwōn ilo̧k.
Elōn̄ menin kareel ko im kapo ko an mour in rej āinwōt “wolf ko re lāj” (Matu 7:15). Ej seperd eo em̧ool eo enaaj kōpooj, kōjparok, im kakkōl jiip eo im koon ko nejin n̄e ej epaaktok wōļip ko.(lale Jon 10:12). Āinwōt eieet seperd ko rej kapukot n̄an kotak mour eo ejejjet an Seperd eo Em̧m̧an, jejjab ke seperd ko an jetōb eo ad make im barāinwōt an ro jet ke? Kōn kapilōk eo an rikanaan ro, rillolo ro, im rikwaļo̧k revelesōn ro, ro ej kab m̧ōj ad rejtake er, im kōn kajoor im menin letok eo an Jetōb Kwojarjar, jemaron̄ lo an wōļip ko itok eļan̄n̄e jej jumemej im kar pojak. Ilo keidi, n̄e jej Seperd bajjōk n̄an jetōb eo ad make im an ro jet, kanooj jakkutkut enaaj waļo̧k. Niknik jakkutkut ej tōl n̄an kanooj jakkutkut. Ij karuwaineneik kōj kajjojo n̄an erom̧ rilale jiib ro retiljek.
En̄jaake im Naan in Kam̧ool
Kwojkwoj eo ej juon kain̄i me ej jipan̄ kōj pād wōt ilo iaļ eo, im erreo n̄an bōk m̧ōttan ej kam̧ool bwe jej dāpij wōt bujen ko ekkejel ippān aolep kain̄i ko jet. Jet iiō remootļo̧k, ke kōrā eo ippa, Anita im n̄a kōmro kar mijen ilo Arkansas Little Rock Mission, ikar dieojļo̧k im katakin ippān ruo mijenede. Ioļepān katak eo, brother eo em̧m̧an kōm kar katakini ekar ba, “em̧ōj aō pād ilo kabun̄ ņe ami, etke kom̧ jaam̧ m̧ōn̄ā pilawā im idaak dān aolep Jabōt? Ilo Kabun̄ eo am, kōmij kōm̧m̧ane ruo alen ilo juon iiō, ilo Ijtō im Kūrijm̧ōj, im menin ekanooj ļap meļeļein.”
Kōm kar kwaļo̧k jidik n̄ane bwe em̧ōj kiene kōm n̄an “kweilo̧k ippān doon n̄an bōk m̧ōttan pilawā im dān” (Moronai 6:6; lale barāinwōt K&B 20:75). Kōm kar koļab am riiti Matu 26 im 3 Nipai 18. Ekar uwaak bwe ejjan̄in lo aikuj eo.
Kōm kar kwaļo̧k n̄ane laajrak in keid kein: “ļōmņak m̧ōk n̄e kwaar pād ilo juon lukkuun itaak im wa. Eļap am̧ jorrāān im kwaar ļotļo̧k. Juon ej ettōr tok, lo bwe kwoļotļo̧k, im kūr ļo̧k nōm̧ba in idin̄ in, 911. Kar kōm̧adm̧ōde eok im kwoj jino mour tak.”
Kōm kar kajjitōk ippān em̧m̧aan in, “Ke kwaar jino maron̄ kūle peļaakūm̧, kain kajjitōk rot ko kwonaaj kar kajjito̧k?”
Ekar ba, Inaaj kar kōņaan jeļā ewi wāween aō kar tōpar ijo im wōn ekar lo eō. Inaaj kar kōņaan kam̧m̧oolole kajjojo raan kōnke ekar lo̧mo̧o̧ren mour e aō.”
Kōm kar kwaļo̧k ippān em̧m̧aan em̧m̧anm̧ōn in ewi wāween an Rilo̧mo̧o̧r lo̧mo̧o̧ren mour ko im wāween ad aikuj in kam̧m̧oolol E kajjojo raan, kajjojo raan, kajjojo raan!
Innām kōm kar kajitikini, “Jejeļā bwe E ekar wujlepļo̧k mour eo An kōn kwe im kōm, ewi ikkutkut in am̧ m̧ōn̄ā pilawā eo im idaak dān eo āinwōt kakōļļe in Ānbwinnin im bōtōktōk in?”
Ekar ba, “Ijeļā, ijeļā, ijeļā!”. Ak bar juon men. Kabun̄ eo am̧ ejjab mour āinwōt eo am.”
Kōn menin, kōm kar etal wōt im uwaak, “Ta eo kwon kar kōm̧m̧an eļan̄n̄e Rilo̧mo̧o̧r Jisōs Kraist ejādetok ilo kōjām in m̧weo im̧ōm̧?”
Ekar ba, “Iien eo wōt, inaaj kar bukwelōlō ilo bukiō.”
Kōm kar kajjitōk, “Ejjab ke ta eo kwoj en̄jaake n̄e kwōj deļo̧n̄e im̧ōn jar ko an Armej ro Rekwojarjar ilo Raan-ko Āliktata—kautiej n̄an Rilo̧mo̧o̧r?”
Ekar ba, “Ijeļā, ijeļā, ijeļā!”
Ekar itok im jar ilo Jabōt in Ijtō eo im ļakkar ro̧o̧ltok.
Ij kūr n̄an kajjojo iaad bwe jen kajjitōk ippād make, “Ta kain̄i ko, ekoba kwojkwoj eo, ij aikuj in bōke, im ta bujen ko ij aikuj kōm̧m̧ani, kōjparoki, im kautieji?” Ij kallim̧ur bwe bōk koņaad ilo kain̄i ko im kautieji bujen ko rej ekkejel ippān naaj lewaj n̄an eok meram aeboojoj. Ilo etan Jisōs Kraist, amen.