Bar Juon Raan
Em̧ōj letok n̄an kōj “rainin” n̄an mour, im jekjek eo aorōk ilo kōm̧m̧an bwe raan eo ad en wejepedik ej n̄an m̧ōņōņō in kaarmejete.
Jet iiō remootļo̧k, ro m̧ōtta eaar wōr juon nejin ajri eaiboojoj kar etan Brigham. Ālkin an ļotak, Brigham kar lo juon jekjek ejeja kar ņa etan nan̄inmej in Hunter, eo ekar kabūrom̧ōjm̧ōj bwe Brigham enaaj kar kadu an mour. Juon raan ke Brigham im baam̧le eo an raar loļo̧k meļan ko an tampeļ eo, Brigham eaar ba naan in; ruo alen an ba, “Bar juon raan.” Lukkuun raan eo tok juon, Brigham eaar jako.
Iaar loļo̧k lōb eo an Brigham jet alen, im aolep iien ij etal, ij kejōkļo̧kjeņ kōn naan eo “bar juon raan n̄an mour.” Iaar ļōmņak ta kar meļeļe in, ta ļanootot eo enaaj kar wōr an ilo mour eo aō n̄an jeļā bwe ewōr juon bar raan n̄an mour. Ekōjkan aō naaj kar kōm̧m̧an n̄an lio pāleō, ajri ro nejū, im ro jet? Ewi jon̄an kijenmej eo im jouj eo inaaj kar erom? Ekōjkan aō naaj kar kōjparok ānbwinū? Ewi emakijkij in aō naaj kar jar im etali jeje ko rekwojarjar? Ij ļōmņak bwe, ilo juon wāween ak bar juon, jej aolep ilo juon iien ilo mour ko ad naaj wōr “bar juon raan” meļeļe— kōjerbal iien eo ewōr ippād ilo loļātāt.
Ilo Kallim̧ur M̧okta jej riit kōn bwebwenato eo an Hezekiah, kiin̄ in Juda eo. Rikanaan Aiseia eaar kōnanik Hezekiah bwe mour eo an Hezekiah epaak an jem̧ļo̧k. Ke eaar ron̄ naan ko an rikanaan eo, Hezekiah eaar jino jar, akweļap, im jan̄ kōn eļap en̄jake. Ilo juon iien, Anij eaar kobaik bar 15 iiō ko n̄an mour eo an Hezekiah. (Lale Aiseia 38:1–5.)
Eļan̄n̄e kar jiron̄ kōj ewōr juon iien ekadu in ad mour, kōj barāinwōt kar maron̄ akweļāp kōn elōn̄ļo̧k raan ko in ad mour n̄an kōm̧m̧ane men ko jej aikuj kar kadedeļo̧k ak oktak ad kōm̧m̧ani.
Jekdo̧o̧n ewi jon̄an iien eo an Irooj, ilo An māletlet, ļōmņak n̄an letok n̄an kajjojo iaad, jemaron̄ aolep jeļā kake juon men: em̧ōj letok n̄an kōj rainin n̄an mour im jekjek aorōk ilo kōm̧m̧an bwe raan eo ad en wejepedik ej n̄an m̧ōņōņō in kaarmejete.
Irooj eaar ba, “Lo, kiiō ej etan in rainin m̧ae itok eo an eo Nejin Armej, im em̧ool ej juon raan in katok” (K&B 64:23; eoon eo eaorōk kar kobaiktok).
Naan eo kaarmejete ej itok jān naan in Latin ko sacer, meļeļe in “kwojarjar,” im facere, meļeļe in “n̄an kōm̧m̧an”—ilo bar jet naan, n̄an kōm̧m̧an men ko rekwojarjar, n̄an bōktok uteij n̄an er.
“Sacrifice brings forth the blessings of heaven” (“Praise to the Man,” Hymns, no. 27).
Ilo wāween ta kaarmejet enaaj kōm̧m̧an bwe en ļap meļeļe in im jeraam̧m̧an in raan ko ad?
M̧oktata, kaarmejet an juon make ej kōkajoorļo̧k kōj im letok aorōk n̄an men ko jej kaarmejete n̄ani.
Elōn̄ iiō ko remootļo̧k ilo Jabōt in jitlo̧k, juon leļļap ekar itok n̄an lokatok eo n̄an kwaļo̧k naan in kam̧ool eo an. Liin eaar jokwe ilo jikin kweilo̧k eo ņae etan Iquitos, eo ej pād ilo Peruvian Amazon. Liin eaar jiron̄ kōm bwe jān iien kar peptaij eo an, eaar iien otemjej wōr an kōttōbar n̄an bōk kain̄i ko an tampeļ ilo Lima, Peru. Liin eaar tiljek ilo kōļļāik juon m̧ōttan jon̄oul im ekar kōjparok men eo kar wōņāān edik ium̧win iiō ko.
An lan̄lōn̄ ilo an etal n̄an tampeļ im bōk kain̄i ko rekwojarjar ilowaan kar kwaļo̧k ilo naan kein: “Rainin imaron̄ ba bwe āliktata ij en̄jake aō pojak n̄an kijoon rōn̄ōl eo o. N̄a ij kōrā eo em̧ōņōņō tata ilo laļ in; iaar kōjparok jāān, kom̧ij jab jeļā ewi to in, n̄an loļo̧k tampeļ eo, im ālkin jijlimjuon raan ko ilo reba eo im 18 awa kōn baj, iaar āliktata pād ilo m̧weo im̧ōn Irooj. Ke kar ilo̧k jān jikin eo ekwojarjar, iaar ba n̄an eō make, ālkin aolep kaarmejete me eaar menin aikuj n̄an n̄a n̄an itok n̄an tampeļ, ijjamin naaj kōtļo̧k jabdewōt men bwe in jab kōjparok aolep bujen ko iaar kōm̧m̧ani; enaaj kar ejjeļo̧k tokjān aō kar itok. Menin ej lukkuun juon kallim̧ur em̧ool!”
Iaar katak jān kōrā in ejitōn bōro bwe kaarmejete an juon make ej juon kajoor eļap me ej kōm̧akūt jokālet ko ad im kijejeto ko ad. Kaarmejete an juon make ej kōm̧akūt jerbal ko ad, kallim̧ur ko ad, im bujen ko ad im kōm̧m̧ani men ko rekwojarjar eļap meļeļeier.
Ruo, kaarmejete ko jej kōm̧m̧an n̄an ro jet, im bwe ro jet rej kōm̧m̧ani n̄an kōj, ej waļo̧k eo an kōjeraam̧m̧an ko n̄an aolep.
Ke iaar juon rijikuuļ ilo jikuuļ in kōm̧m̧an n̄i, eaar jab kanooj em̧m̧an jekjek in jāān ilju im jekļaj eo am ijo jokwe ie enaaj kar kanooj em̧m̧an. Ļapļo̧k in wōņāān eo eaar kanooj kadikļo̧k aorōk eo an jāān jān juon raan n̄an eo tok juon.
Ij keememej iiō eo iaar deļo̧n̄i kaminene in m̧wijm̧wij ko; eaar aikuj in wōr aolep kein m̧wijm̧wij ko iaar aikuji m̧okta jān aō deļo̧n̄ ilo jemijta eo. Ro jinō im jema raar kōjparok jāān ko kar aikuji. Bōtaab juon bon̄ juon men eaorōk eaar waļo̧k. Kōm kar etal n̄an wiaiki men ko, bōtaab kar lo bwe dettan jāān eo kōm kar wiaik aolepān men ko kiiō eaar bwe n̄an wiaik wōt juon pea in tweezer in m̧wijm̧wij—im ebar ejjeļo̧k. Kōm kar ro̧o̧l n̄an m̧weo ilo am kar jab wiaik jabdewōt, im en̄jake būrom̧ōj kōnke iban kar maron̄ deļo̧n̄ kaļōj. Ilo jidimkij, mekarta, jinō eaar ba, “Taylor, itok ippa tok, jān etal n̄an town.”
Kōm kar etal n̄an town ijo ekar lōn̄ jikin ko me rej wia im wiak kake m̧arm̧ar. Ke kōm kar jikrōkļo̧k ilo juon m̧ōn wia, jinō ekar kwaļo̧k jān iiep eo an juon pāāk ebūļu emeoeo epād ie juon pān̄kōļ gold aiboojoj kōn juon jeje ie me ej ba, “N̄an leddik eo nejū ejitōn bōro jān jemam̧.” Eaar juon pān̄kōļ me jim̧m̧a eaar leļo̧k n̄an e ilo juon iaan iien kemem ko an. Innām, ke iaar lale, liin eaar wia kake.
Ke liin eaar bōk jāān eo, eaar jiron̄ eō, “Eļan̄n̄e ewōr juon men ijeļā kake, ej bwe kwonaaj erom juon taktō in n̄i. Ilo̧k im wiaiki aolep men ko kwoj aikuji.” Kiiō, komaron̄ ke ļōmņak kain rijikuuļ rōt eo iaar erom jān iien eo m̧aanļo̧k? Iaar kōņaan erom eo em̧m̧an tata im m̧ōkaj in kadedeļo̧k ekkatak ko aō kōnke iaar jeļā ewi ļap in jon̄an kaarmejete eo liin eaar kōm̧m̧ane.
Iaar katak bwe kaarmejete ko ro jitōn bōro rej kōm̧m̧ān n̄an kōj rej ļujur jetōb ko ad āinwōt idaak dān m̧ōļo n̄an ānbwin eo ad. Kain kaarmejete in ej bōktok kōjatdikdik im ellowetak.
Jilu, jabdewōt kaarmejete jej kōm̧m̧an edik keidi n̄an kaarmejete eo an Nejin Anij.
Ta aorōk eo an em̧ool juon pān̄kōļ gold aorōk keidi n̄an kaarmejete eo an eo lukkuun Nejin Anij? Ekōjkan ad maron̄ kautiej kaarmejete in ej n̄an indeeo? Kajjojo raan jemaron̄ keememej bwe ewōr wōt juon bar raan n̄an mour im tiljek. Amulek eaar katakin; “Aaet, ikōņaan bwe kom̧in wōnm̧aantak im jab kapene būruōmi ļo̧k wōt; bwe lo, kiiō ej iien eo im raan in lo̧mo̧o̧r eo ami; im kōn menin, eļan̄n̄e kom̧ naaj ukeļo̧k im jab kapene būruōmi, ejidimkij an naaj karōk in lo̧mo̧o̧r eļap itok n̄an kom̧” (Alma 34:31). Ilo bar juon wāween ba, eļan̄n̄e jenaaj leļo̧k n̄an Irooj kaarmejete eo an juon bōro erup im juon jetōb ettā, em̧ōkaj an kōjeraam̧m̧an ko an karōk in m̧ōņōņō eo eļap waļo̧k ilo mour ko ad.
Karōk in pinmuur eo epidodo kōnke kaarmejete eo an Jisōs Kraist. Āinwōt An Make kar kōmeļeļeik, kaarmejete eo “kōm̧m̧an bwe n̄a, em̧ool Anij, eo eļaptata jān aolep, n̄an wūdiddid kōnke metak eo, im n̄an bōtōktōk ilo aolepān Ānbwinnū, im n̄an en̄taan jim̧or ilo ānbwin im jetōb—im ikar kōņaan bwe in maron̄ kar jab idaak kap eo emeo̧, im jenlik” (K&B 19:18).
Im ej kōnke kaarmejete in, ālkin ļoor jekjek eo em̧ool an ukweļo̧k, bwe jān maron̄ en̄jake eddo eo an bōd ko ad im an jerawiwi ko ļōn̄jak. Ilo m̧ool, bōd, jo̧o̧k, metak, im būrom̧ōj, im ļōmņak jerata kōn kōj make rej bōk jikier kōn juon bōklōkōt ealikkar, m̧ōņōņō, lan̄lōn̄, im kōjatdikdik.
Ilo ejja iien eo wōt, ilo ad kauteij im kam̧m̧oolol kōn kaarmejete eo An, jemaron̄ bōk ilo juon jon̄an eļap ikdeelel ekajoor n̄an erom ajri ro nejin Anij rem̧m̧anļo̧k, n̄an ettoļo̧k jān jerawiwi, im n̄an kōjparok bujen ko ejjab āinwōt m̧okta.
Innām, āinwōt Enos ālkin bōk jeorļo̧k bōd in jerawiwi ko an, jenaaj en̄jake ikdeleel eo ad make n̄an kaarmejete kōj make im pukōt em̧m̧anļo̧k eo an ro jeid im jatid (lale Enos 1:9). Im enaaj ļapļo̧k ad kōņaan aolep “bar juon raan” n̄an ļoor kūr eo me Būreejtōn Howard W. Hunter eaar letok n̄an kōj ke eaar ba: “Ņa mejļan tarpok. Pukōtļo̧k eo m̧ōttad em̧ōj meļeļo̧ke. Joļo̧k ekkōljake im bōk jikin kōn lōke. … Uwaak kōn kōnono mera. Rōjan̄ jodikdik ro. Kwaļo̧k ettā eo am̧ ilo naan in jerbal. Kōjparok kallim̧ur. Joļo̧k illu. Jeorļo̧k bōd an rikōjdāt. Joļo̧k bōd. Kajjieon̄ in meļeļe. Etale kōņaan ko am̧ n̄an ro jet. Ļōmņak m̧okta kōn juon m̧okta. Jouj. Meanwōd. Ettōn̄ eļapļo̧k. Kwaļo̧k am̧ kam̧m̧oolol. Karuwaineneik riuwaimejet. Kam̧ōņōņōik būruwōn juon ajri. … Kōnono kōn am̧ iakwe innām bar kōnono kake” (Teachings of Presidents of the Church: Howard W. Hunter [2015], 32; kar kakobaba tok jān “What We Think Christmas Is,” McCall’s, Dec. 1959, 82–83).
Kōm̧m̧an bwe jān kobrak raan ko ad kōn kain jerbal rōt kein im kōkajoorļo̧k kaarmejete eo an juon make im kaarmejete eo me jej kōm̧m̧ane n̄an ak bōk jān ro jet rej itok n̄an kōj. Im ilo juon wāween ejeno̧lo̧k, kōm̧m̧an bwe jān lemōņōņō kōn aenōm̧m̧an eo im lem̧ōņōņō bwe kaarmejete eo an Eo Nejin Emake Wōt ej tok n̄an kōj; aaet, aenōm̧m̧an eo me kōnono kake n̄e jej riiti bwe Adam eaar wōtlo̧k bwe armej ren kar āinwōt, bwe ren maron̄ āinwōt—bwe ren maron̄ m̧ōņōņō. (lale 2 Nipai 2:25). Lan̄lōn̄ eo ej juon lan̄lōn̄ em̧ool me kaarmejete eo wōt im Pinmuur eo an Rilo̧mo̧o̧r Jisōs Kraist emaron̄ letok.
Ej aō jar bwe jān ļoor E, bwe jen tōmak E, bwe jen iakwe E, im bwe jen en̄jake iakwe eo Ekar kwaļo̧k jān kaarmejete eo An aolep iien ewōr ad iien em̧m̧an n̄an mour bar juon raan. Ilo etan Jisōs Kraist, Amen.