Ej Kōn Aolep Armej
Kabun̄ in ej kōn kom̧ aolep, rikaļoor ro an Irooj—ro rej iakwe im ļoor E im ro raar bōk ioer Etan.
Kōppopo eo n̄an kalōk Paris France Tempel, eaar wōr juon aō en̄jake ijamin meļo̧kļo̧k. Ilo 2010, ke ekar alikkar jikin eo n̄an kaļōk tampeļ eo, mayor eo an jikin eo eaar kōņaan ioon kōm n̄an jeļā eļapļo̧k kōn Kabun̄ in ad. Kweilo̧k in eaar juon ijino eo eļap n̄an bōk mālim in ekkal. Kōm kar kōpooj juon pija in tampeļ ko ilo Raan-kein Āliktata. Kōjatdikdik eo aō eļap bwe aiboojoj ko aer enaaj em̧m̧an n̄an kareel mayor eo n̄an rie būrojāāk eo amim.
Kōn lo̧kjeņ eo aō, mayor eo eaar ba ijeļo̧kin an lale presentation eo amim, e im tiim eo an raar kōņaan make etale ekkatak eo aer make n̄an lukkuun pukote kabun̄ rot kōj. Allōn̄ eo tok juon, kar bar kūr ļo̧k kōm n̄an ron̄jake juon riboot kar letok jen juon rikweilo̧k an jikin eo eo eaar barāinwōt juon eo etijem̧ļo̧k kōn bwebwenatoon in kabun̄. Eaar ba, “Ilōn̄in men otemjej, eaar kōnaan, kōm kōnaan jeļā wōn membōr in kabun̄ eo ami. Juon, kōm eaar pād ilo kweilo̧k in kwojkwoj ko ami. Kōm eaar jijet lik ilo m̧ōnjar eo im lukkuun lale an armej ro ilo m̧ōnjar eo im ta eo rej kōm̧m̧ane. Innām kōm eaar ioon ro ipeļaakumi—ro rej jokwe iturin stake center eo ami—im kōm eaar kajjitōk ippāer kain rot armej in Mormon kom̧.”
“Im ta jemļo̧k eo ami?” Iaar kajjitōk, ilo aō kar ikkūmkūm jidik. Eaar uwaak, “Kōm eaar lo bwe Kabun̄ eo an Jisōs Kraist im Armej ro Rekwojarjar ilo Raan-ko Āliktata ej Kabun̄ eo epaaktata an Jisōs Kraist m̧okta ijeļo̧kin jabdewōt kabun̄ kōm kar jeļā kake.” Mōttan wōt jidik iba, “Ejjab m̧ool! Ejjab kabun̄ eo epaaktata; ej Kabun̄ eo an Jisōs Kraist—ejja Kabun̄ eo wōt, Kabun̄ eo em̧ool!” Ak iaar ikūn̄ im wūjļepļo̧k juon jar in kam̧m̧oolol ilo būruwō. Innām mayor eo eaar jiron̄ kōm bwe, pedped ioon ta ko raar loi, e im tiim eo an ejjeļo̧k aer n̄ūrbōktak n̄an ekkal eo an juon tampeļ ilo jikin eo aer.
Rainin, n̄e ij kōļmenļo̧kjeņ kōn en̄jake in ekabwilōn̄lōn̄, ij en̄jake kam̧m̧oolol kōn jeļāļo̧kjeņ im jetōbin kile eo an mayor eo. Eaar jeļā bwe kii eo n̄an meļeļe kōn Kabun̄ in ejjab n̄an loe kōn jekjekin im̧ōnjar ko ak juon doulul ak kōn milien membōr retiljek, ro rej kajieon̄ kajjojo raan n̄an ļoor waanjon̄ok eo an Jisōs Kraist.
Meļeļe eo an Kabun̄ in emaron̄ eļļo̧k jān ennaan eo ilo Bok in Mormon me ej kwaļo̧k “Im raar [meļeļein rijilōk ro an Irooj] ro raar peptaij ilo etan Jisōs raar ņaetan kabun̄ eo an Kraist.”1
Ilo naan ko jet, Kabun̄ in ej kōn aolep armej. Ej kōn kom̧ aolep, rikaļoor ro an Irooj—ro rej iakwe im ļoor E im ro raar bōk ioer Etan kōn bujen.
Būreejtōn Russell M. Nelson juon iien eaar keidi Kabun̄ in n̄an juon waan ettōr. Em̧m̧an ippād n̄e wa eo waad erreeo im ejatōltōl. Ak jerbal eo an wa eo ejjjab bwe en pād ijeņ āinwōt juon mijiin; ej n̄an leto-letak armej ro ilo wa eo.2 Ilo ejja jekjek in, kōj, membōr ro an Kabun̄ in, jen kam̧m̧oolol kōn jikin kabun̄jar kein reaiboojoj me rerreeo im rem̧m̧an, im jen barāinwōt m̧ōņōņō kōn būrookram̧ ko rem̧m̧an. Ak men kein rej wōt kein jipan̄. Jerbal eo ad ej n̄an kūr tok kajjojo ļaddik im leddik ro nejin Anij n̄an itok n̄an Kraist im n̄an tōl e ilo iaļen bujen in. Ejjeļo̧k men eaorōkļo̧k. Jerbal eo ad ej kōn aolep armej im bujen ko.
Ejjab ke em̧m̧an bwe āt eo kar letok kōn revelesōn n̄an jepļaaktok eo an Kabun̄ in ej kapen ruo men ko raorōk ippān doon ilo kajjojo bujen gospel? Moktata ej etan Jisōs Kraist. Kabun̄ in ej An, im Pinmuur eo An ekwojarjar im bujen ko rej make wōt iaļ n̄an lo̧mo̧o̧r im mour ippān Anij. Eo kein karuo ej kōj: ro Rekwojarjar, ilo naan ko jet, rikam̧ool ro An im rikaļoor ro An.
Iaar jeļā aorōk eo n̄an mije armej ro ke iaar jerbal āinwōt juon stake būreejtōn ilo France. Ilo jinoin jerbal eo aō, iaar jeke ilo kōļmenļo̧kjeņ kōn jet kōttōbar ko raorōk n̄an stake eo: ejaak eo an ward ko rekāāl, kalōk im̧ōnjar ko rekāāl, im aaet kalōk juon tampeļ ilo eria eo amim. Ke iaar kakkije ļo̧k jiljino iiō ko tokālik, ejjeļo̧k juon iaan jibadbad kein raar tōprak. Menin emaron̄ kar juon en̄jake eo elikjab, ilowaan jiljino iiō ko, jibadbad ko aō raar oktak jidik.
Ke iaar jijet m̧aan ilo raan eo ij tin jijetļo̧k, iaar obrak kōn kam̧m̧oolol kōn tōprak ko. Iaar reilo̧k n̄an mājen bukwi membōr ro rej pād. Ij keememej juon jetōbinippān doon ippāer kajjojo.
Ewōr ro jeid im jatid ro raar deļo̧n̄e dānin peptaij, ro iaar jaini peba in mālim ko n̄an deļo̧n̄e tampeļ aer jinointata bwe ren maron̄ būki kain̄i ko rekwojarjar ilo tampeļ eo, im armej rein im ripālele ro iaar kapit er ak kōtļo̧k jen jerbal in mijenede aolep raan. Eaar bar lōn̄ ro jet me iaar kwaļo̧k n̄an er ilo aer kar dipuk apan̄ ko im jorrāān ko ilo mour ko aer. Iaar en̄jake kajoor in iakwe n̄an er kajjojo. Iaar lo m̧ōņōņō em̧ool ilo aō kar jerbal n̄an er im kar m̧ōņōņō kōn ettā n̄an im tōmak eo aer eļap ilo Rilo̧mo̧o̧r.
Būreejtōn M. Russell Ballard eaar kwaļo̧k: “Ta eo eaorōktata ilo eddo ko ad ilo Kabun̄ ejjab kōn riboot ko kwaļo̧ki ak kweilo̧k ko kōm̧m̧ani ak n̄e ejjab kajjojo armej—kar kwaļo̧k n̄an er jidik kōn jidik āinwōt an kar Rilo̧mo̧o̧r kōm̧m̧ane—kar lōn̄aj im rōjan̄ im kar lukkuun oktak.”3
Ro jeiū im jatū rejitenbōro, jej ke niknik ilo gospel in, ak jej ke lukkuun boub ilo Kabun̄ in? Jibadbad eo ej n̄an ļoor waanjon̄ok eo an Rilo̧mo̧o̧r ilo aolep men otemjeļo̧k. Eļan̄n̄e jenaaj kōm̧m̧ane, jenaaj lukkuun mije lo̧mo̧o̧r eo an kajjojo ijeļo̧kin kōm̧m̧ani jerbal ko im būrookram̧ ko.
Kwonan̄in ke kajjitōkin eok make ta eo enaaj waļo̧k n̄e Rilo̧mo̧o̧r en kar lowaj ward ak branch eo am Jabōt in tok? Ta eo Enaaj kar kōm̧m̧ane? En kar ke inepata n̄an jeļā eļan̄n̄e visual aid ko rekar em̧m̧an ak eļan̄n̄e jia ko raar em̧m̧an karōki ilo kūlaaj ruum̧ eo? Ak En kar ke pukot juon bwe En iakwe, katakin, im kōjeram̧m̧an? Bōlen Emaron̄ kar pukot ļo̧k juon membōr eo ekāāl ak juon m̧ōttan n̄an karuwaineneiktok, juon jeid ak jatid enan̄inmej eo ej aikuj kaenōm̧m̧an, ak juon armej eo emijak eo ej aikuj lōn̄aj im rōjan̄.
kūlaaj Ta ko Jisōs enaaj kar loļo̧k? Iban karbwilōn̄eļan̄n̄e En kar loļo̧k m̧oktata ajri ro ilo Būraimere. En kar bōlen bukwelōlō im kenono ippāer. En kar kwaļo̧k An iakwe n̄an er, kwaļo̧k bwebwenato ko, kōjeram̧m̧an er kōn pija ko aer, im kam̧ool kōn Jemen Ilan̄. Paoktokin enaaj em̧m̧an, m̧oolin, ilo ejjeļo̧k kalijekļo̧k. Jemaron̄ ke kōm̧m̧an āindein?
Ij kallim̧uri kom̧ bwe ilo ami kajieon̄ in pād ilo ajenta eo an Irooj, ejjeļo̧k juon men eaorōk ļo̧k jen pukot tok armej ro me kwomaron̄ jipan̄ im kōjeram̧m̧an er. Ilo m̧ōnjar eo kwonaaj mije wōt katakin doon n̄an im̧we būruweer. N̄ūrbōktak eo am enaaj juon jetōbin en̄jake ijeļo̧kin ejaake juon m̧akūtkūt eo epolemen, n̄an kwaļo̧k n̄an membōr ro mōttam ijeļo̧kin kōkkaļļiki bo̧o̧k eo kōn oraņ ro kwar loļo̧k. Eban kōn kwe ak er ro jej ņaetaer ro jeid im jatid.
Jet iien jej ba etal n̄an jar. Ak Kabun̄ eļapļo̧k jen juon em̧ ak juon jikin. Ej lukkuun pād im mour ilo jikin ko jet ilo laļin āinwōt ra eo eutiej an Kabun̄ in ijin ilo Salt Lake City. Irooj eaar ba, “Bwe ijo ruo ak jilu rej kweilo̧kļo̧k ilo Eta, Ij pād eoļōpāer.”4
Jej bōk Kabun̄ ippād ijoko jej etal ie: n̄an jikin jerbal, n̄an jikuuļ, ak pekejeņ, im eļaptata m̧oko im̧ōd. Ad ito-itak im waanjon̄ok emaron̄ in bwe n̄an kōm̧m̧an bwe jabdewōt jikin jej lo kōj make ilo jikin ekwojarjar.
Ij keememej juon bwebwenato ippān juon m̧ōtta eo ejjab membōr in tōmak in ad. Eaar lo̧kjeņ an n̄an jeļā bwe jabdewōt em̧m̧aan ro rerreeo ilo Kabun̄ in ad remaron̄ bōk priesthood eo. Eaar ba, “Ak ewōr jete ro rej kabwijer priesthood ilo ward eo am ?”
Iaar uwaak, “emaron̄ 30 im 40.”
Ilo m̧ool, eaar ba, “Ilo kabun̄ eo aō, ewōr wōt juon pris. Etke kwoj aikuji elōn̄ ļo̧k pris ro ilo Jabōt?”
Ilbōk kōn kajjitōk eo an, Iaar im̧we im uwaak, “Ij errā ippam̧. Ij ļōmņak kōmij jab aikuj elōn̄ rikabwijer priesthood ilo m̧ōnjar eo kajjojo Jabōt.Ak jej aikuji juon rikabwijer priesthood ilo kajjojo m̧oko. Im n̄e ejjeļo̧k priesthood ilo m̧weeo, rikabwijer priesthood ro jet rej etal im lale im jipan̄ baam̧le en.”
Ad jar ejjab baj wōt ilo Jabōt. Ad kabun̄jar ej wōnm̧aanļo̧k kajjojo raan ilo juon wiik, jekdo̧o̧n ia eo jej pād ie im jekdo̧o̧n ta eo jej kōm̧m̧an. Moko im̧ōd rej lukkuun “kapen tōmak in ad.”5 Ekkā ad jar ilo m̧oko im̧ōd, jej kōjeram̧m̧an, jej ekkatak, jej ekkatak naan in Anij, im jej jerbal kōn iakwe eo erreeo. Ij kam̧ool jen aō make en̄jake bwe m̧oko im̧ōd rej jikin ko rekwojarjar ijo Jetōb emaron̄ pād—jon̄on wōt, im jet iien emaron̄ in ļapļo̧k, ilo jikin ad kabun̄jar.
Ij kwaļo̧k kam̧ool bwe Kabun̄ in ej Kabun̄ eo an Jisōs Kraist. Ej kajoor im mour itok jen kajjojo m̧akūtkūt ko an milien rijilōk ro An ro rej kajieon̄ kajjojo raan n̄an ļoor waanjon̄ok eo An n̄an kea kōn doon. Kraist emour im Ej tōl Kabun̄ in. Būreejtōn Russell M. Nelson ej rikanaan eo me Eaar kālete n̄an tōl kōj ilo raan kein ad. Kōn men kein Ij kam̧ool ilo etan Jisōs Kraist, amen.