Kadkadin im Tukaduin Ennaan eo
Jaar kōjjeļļāiki juon bar ejaak ekabwilōn̄lōn̄ an doulul ko an Melkisedek Priesthood eo n̄an kōm̧anm̧anļo̧k im kōttōbrak jerbal in an Irooj.
Kom̧m̧ool, Brother Holmes, kōn ennaan eo am̧ eaorōk.
Em̧m̧aan ro jitōnbōro, jej lukkuun būrom̧ōje Būreejtōn Thomas S. Monson im Elder Robert D. Hales. Aaet jej “aolep bun̄ m̧aanļo̧k ilo jerbal in an Irooj.”1
Ij lukkuun kam̧m̧oolol kajjojo em̧m̧aan ro rej kabwijer priesthood eo ekwojarjar. Kom̧ij kōjatdikdik eo an ad Rilo̧mo̧o̧r, ro rej ikdeelel “a bwe aolep armej otemjej en maron̄ ekōnono ilo etan Anij Irooj, em̧ool Rilo̧mo̧o̧r eo an laļ.”2 Ekōņaan aolep ro Nejin raar ekkapit n̄an pinej Jenkwan, n̄an kōnono kōn E, n̄an jerbal n̄an E, n̄an kōjeraam̧m̧an mour ko an ro nejin Anij peļaakin laļ in, n̄an jem̧ļo̧kin “bwe tōmak en maron̄ ļapļo̧k ilo [aolepen] laļin.”3
Jet iami rej jerbal ijo Kabun̄ in eaar ejaak ie ium̧win elōn̄ epepen ko. Jet rej jerbal ijo Kabun̄ in ej kab jino ekkal ie. N̄an jet, ward ko ami rekilep. N̄an jet, branch ko ami reddik im ebwe aer ettoļo̧k. Mekarta jekjek ko ami, kajjojo iami ej juon uwaan juon doulul in priesthood kōn juon jibadbad ekwojarjar n̄an ekkatak im n̄an katakin, n̄an iakwe im n̄an jerbal n̄an doon.
Joteen in jaar kōjjeļļāiki juon bar ejaak ekabwilōn̄lōn̄ an doulul ko an Melkisedek Priesthood eo n̄an kōm̧anm̧anļo̧k im kōttōbrak jerbal in an Irooj. Ilo ward ko kajjojo, pris ro eutiej im elder ro renaaj koba ilo juon doulul an elder ro. Oktak in enaaj ļap an kōkm̧anm̧anļo̧k jon̄an im maron̄ eo an em̧m̧aan ro ro rej kabwijer priesthood eo n̄an jerbal n̄an doon. Em̧m̧aan ro rejjan̄in bōk Melkesidek Priesthood eo renaaj ruwainene tok im naaj jem̧jerā jān doulul in. Ilo kajjojo stake, stake būreejtōnji eo renaaj wōnm̧aanļo̧k wōt in tōl ilo doulul eo an pris ro routiej ilo stake eo. Ak jerbal eo ilo doulul in enaaj pedped wōt ilo kūr ilo priesthood kiiō, āinwōt naaj kōmeļeļeiki tokālik.
Elder D. Todd Christofferson im Elder Ronald A. Rasband jān Doulul eo an Jon̄oulruo Rijilōk ro renaaj kiiō katakin kōj eļapļo̧k kōn oktak kein raorōk.
Em̧m̧akūt in kar ekkatak kake elōn̄ allōn̄ ko. Jaar en̄jake juon aikuj eo n̄an kōkm̧anm̧anļo̧k wāween ad kea kōn membōr ro ad im ribo̧o̧t ad iaio̧ ippāer. N̄an kōm̧m̧an bwen en em̧m̧anļo̧k, jej aikuj in kōkajoorļo̧k doulul ko an priesthood ko n̄an leļo̧k eļapļo̧k tōl n̄an jerbal in karejar kōn iakwe im jipan̄ ta eo Irooj ekōņaan n̄an aolep Rikwojarjar ro An.
Oktak kein rej im̧we jān Irooj. Ilo ad kōjerbali, jenaaj wājabdikļo̧k jān kar m̧okta.
Jej bōk kuņaad ilo jerbal in an Anij Ekajoor Pōtata. Jisōs ej RiKraist eo! Jej rikarejeran ro rettā! Anij en kōjeraam̧m̧an kom̧, em̧m̧aan ro, ilo ad ekkatak kake im kōm̧m̧ane eddo eo ad, ij jar ilo etan Jisōs Kraist, amen.