Kom̧win Kāālōt Rainin
Jon̄an ļap in m̧ōņōņō eo ad ilo mour indeeo ej pedped wōt ilo ad kāālōt Anij eo emour im kobaļo̧k Ippān ilo jerbal eo An.
Mary Poppins ejjab m̧ool ilo bwebwenato eo me ej juon ripālle rilale ajri—eo me elōn̄ an kajoor.1 Ej keļak kōn kōto im jok n̄an jipan̄ baam̧le eo an Banks me elōn̄ aer apan̄ ilo Number 17, Cherry Tree Lane, ilo Edwardian London. Em̧ōj leļo̧k eddo n̄an e bwe en lale ajri rein, Jane im Michael. Ilo juon jekjek eban oktak im em̧m̧an, ej jino katakin er katak ko reaorōk kōn juon wāween emejaja.
Jane im Michael rej jino jeļāļo̧kjeņ im eddōkļo̧k, ak Mariy ej kāālōt bwe eiien n̄an an wōnm̧aanļo̧k wōt ilo mour eo an. Ilo bwebwenato in, rikarreo eo mōttan Maryi, Bert, ej kajeon̄ kabbweer e bwe en jab etal. Ej akwāāl, “Ak relukkun em̧m̧an ajri rein, Mary.”
Mari ej uwaak, “Inkar ke pād ippāer n̄e ren kar nana? Ak ijjab maron̄ jipan̄ er eļan̄n̄e rejjab kōtļo̧k bwe in jipan̄ er, im ejjeļo̧k juon epen katakini āinwōt juon ajri eo ejeļā aolep men.
Bert ej kajjitōk, “Innām?”
Mary ej uwaak, “Innām rej aikuj kōm̧m̧ani men ko jet ippāer make.”2
Ro jeiū im jatū, āinwōt Jane im Michael Banks, jej “ajri ro rem̧m̧an” ro me eļap tokjāer bwe jen kea kake er. Jemedwōj Ilan̄ ekōņaan jipan̄ im kōjeraam̧m̧an kōj, ak ejjab aolep iien jej kōtļo̧k bwe En jipan̄ im kōjeraam̧m̧an kōj. Jet iien, jej m̧akūtkūt āinwōt n̄e jejeļā aolep men. Im jej barāinwōt aikuj kōm̧m̧an “men ko jet” ippād make. En̄in ej unin ad itok n̄an laļ in jān kapijuknen eo m̧okta ilo lan̄. “Men ko jet” jej aikuj kōm̧m̧ani ekitbuuj kōm̧m̧ani kāālōt ko.
Kōttōpar eo an Jemedwōj Ilan̄ ilo kōkaajriri ejjab n̄an ajri ro Nejin bwe ren kōm̧m̧ane ta eo ejim̧we; ej n̄an ajri ro Nejin bwe ren kāālet n̄an kōm̧m̧ane ta eo ejim̧we im āliktata n̄an erom āinwōt E. Eļan̄n̄e En kar kōņaan bwe jen pokake, En kar kajju letok nōbar im kaje ko n̄an kōkm̧anm̧an m̧wil ko m̧wilid.
Ak Anij ejjab kōņaan bwe Ajri ro ren kaminene wōt im pokake āinwōt “menin mour ko” ko me reban kijkiji mweik ko ilo jikin ko rej pād ie.3 Ejjab, Anij ekōņaan bwe ajri ro Nejin ren rūttoļo̧k ilo mour in jetōb im kobaļo̧k Ippān ilo aolep makūtkūt ko an baam̧le.
Anij ekar ejaake juon karōk bwe jen maron̄ erom̧ rijolōt ilo aelōn̄ in kiin̄ eo An, juon iaļan bujen eo me ej tōl kōj n̄an erom̧ āinwōt E, bōk juon mour āinwōt E, im mour n̄an indeeo ippān baam̧le ko imaan Mejān.4 Kāālōt eo an juon make ekar—im ej—emenin eaikuj n̄an karōk in, eo me jekar ekkatak kake ilo mour eo ad m̧okta. Jekar errā kōn karōk eo im kar kāālōt n̄an itok n̄an laļ in.
N̄an kam̧ool ke jenaaj kōjerbal tōmak ko ad im ekkatak n̄an kōjerbal anemkwōj in kāālōt ko ad ilo jejjet, juon ran̄ōl n̄an kamļo̧kļo̧k kōj ekar penej kōļmenļo̧kjeņ ko ad bwe jen jab maron̄ keememej karōk eo an Anij. N̄e enkar jab ran̄ōl in, kōttōpar ko an Anij reban kar tōprak kōnke jeban kar eddōkļo̧k im erom rijolet ro me ej lōke er im Ekōņaan bwe ren erom.
Rikanaan Liai ekar ba: “ Kōn menin, Irooj Anij eaar leļo̧k n̄an armej bwe en aikuj kōm̧m̧an n̄an e make. Kōn menin, armej eaar jab maron̄ kōm̧m̧an n̄an e make n̄e ejjab po ippān juon ak eo juon.”5 Ilo juon ļābōļ eaorōk, kāālōt eo juon Jisōs Kraist ekar kwaļo̧k, Maanje eo nejin Jemed. Setan ekar kwaļo̧k Kāālōt eo juon, eo ekōņaan ko̧kkure anemkwoj in kāālōt im bōk ioon kajoor.6
Ilo Jisōs Kraist, “juon ad Ri Jojomar ippān Jemed.”7 Ālkin an kar kadedeikļo̧k katok in pinmuur eo An, Jisōs ej “wanlōn̄ļo̧k ilo lan̄ … n̄an bōk jān Jemān jim̧we ko an in tūriam̧okake eo kar An ioon ro nejin Armej raņ.” Im, ilo aer kar bōk maron̄ ko an tūriamo̧, “E ej errā ilo jibadbad eo kōn ro nejin armej raņ.”8
Jojomar an Kraist ippān Jemen ilo etad ejjab n̄an jum̧ae karōk eo an Anij. Jisōs Kraist, eo ekar kōtļo̧k bwe Ankilaan en jab anjo̧ ioon ankilaan Jemen,9 eban rie jabdewōt men ijjeļo̧kin wōt ta eo Jemen ekar kōņaan jān jinoin. Jemedwōj Ilan̄ ekar jab pere ilo an kar m̧ōņōņō im nōbar kōj kōn tōprak ko ad.
Jojomar an Kraist, ebwe ilo an, kakeememej kōj bwe Em̧ōj an kōļļā wōņeen jerawiwi ko ad im bwe ejjeļo̧k juon ej likjab jān tūriamo̧ an Anij.10 N̄an ro me rej tōmak ilo Jisōs Kraist, ukweļo̧k, im peptaij, im niknik n̄an jem̧ļo̧kin—juon bun̄tōn eo me ej tōl kōj n̄an erom juon wōt ippān11—Rilo̧mo̧o̧r ej jeorļo̧k bōd, kōmour, im jojomar. Ej ad rijipan̄, rikaeņōm̧m̧an, im rijojomar—kam̧ool im kallim̧ur bwe jenaaj juon wōt ippān Anij.12
Ilo oktan, Lucifer ej juon rijum̧ae im juon riko̧kkure. Jon Rikwaļo̧k revelesōn ekar kōmeļeļeik kōn an kar Lucifer anjo̧ eļap: “Im iar ron̄ juon ainikien eļap ilo lan̄ im ej ba, Kiiō ej itok lo̧mo̧o̧r, im maron̄, im aelōn̄ an am Anij, im kajoor an Kraist eo An.” Etke? Kōnke “ri kinaakļo̧k ro jeim im jatōm, eo ej kinaakļo̧k er im̧aan am Anij raan im bon̄. Im raar bōk anjo̧ ioon kōn bōtōktōkin Lamb, im kōn naan in aer kōnnaan.”13
Lucifer ej rijum̧ae eo. Ekar kōnono ņae kōj ilo mour eo m̧okta, im ej wōnm̧aanļo̧k wōt n̄an liaakļo̧k kōj ilo mour in. Ej pukōt n̄an kanōk laļļo̧k kōj. Ekōņaan bwe jen en̄jake būrom̧ōj eo me ejjeļo̧k jem̧ļo̧kin. E eo ej ba n̄an kōj bwe ejjeļo̧k tokjād, juon eo ej ba n̄an kōj bwe jejjab aorōk, eo ej ba n̄an kōj bwe ejjeļo̧k bar jeo̧rļo̧k bōd. E eļap an kamennin̄, eo ej juur kōj laļļo̧k n̄e jej inepata.
Eļan̄n̄e Lucifer ekar katakin juon ajri n̄an etetal im e tūppo̧k, enej kar lamōj n̄an ajri en, kaje, im ba n̄an e bwe en bōjrak an kajjieon̄. Wāween ko an Lucifer ej bōktōk inepata im buromōj—āliktata im aolep iien. Jemān aolep riab otemjeļo̧k ej moņe armej kōn riab14 im etao̧ ilo an jerbal n̄an m̧oņe im kaboik kōj, “bwe e ej pukot bwe aolep armej ren en̄taan āinwōt e.”15
Eļan̄n̄e Kraist ekar katakin juon ajri etetal im ajri eo ej tūppo̧k, enaaj jipan̄ ajri eo bar jerkak tok im kōperane n̄an bun̄tōn ko tok jet.16 Kraist ej rijipan̄ im rikaeņōm̧m̧an. Wāween ko An ej bōktok lan̄lōn̄ im kōjatdikdik—āliktata im aolep iien.
Karōk an Anij ekoba tōl ko n̄an kōj, rej kōnono kake ilo jeje ko rekwojarjar āinwōt kien ko. Kien kein rejjab baj kōm̧m̧an kōjak in kakien ak kobain bajjōk kakien me jej aikuj ļoori n̄an kamineneik kōj bwe jen pokake. Rej ippān doon n̄an kōkōm̧anm̧anļo̧k m̧wil ko m̧wilid, bwe jen jepļaak n̄an ippān Jemedwōj Ilan̄, im bōk lan̄lōn̄ eo ejjeļo̧k jem̧ļo̧kin. Pokake kien ko An ejjab kōm̧m̧an ilo am̧ jeļā kake; jelukkuun jeļā ilo ad kāālōt Anij im iaļ eo An n̄an kapijuknen. Jon̄ak eo n̄an kōj ejja āinwōt kar n̄an Adam im Iv, ijo me “Anij eaar leļo̧k n̄an er kien ko, ālikin kwaļo̧k n̄an er karōk in lo̧mo̧o̧r.”17 Men̄e Anij ekōņaan bwe jen pād wōt ilo iaļan bujen ko, Ej letok n̄an kōj menin letok in n̄an kōm̧m̧an kāālōt.
Ilo m̧ool, Anij ej ikdeleel, kōtmene, im tōl kajjojo ajri ro Nejin bwe ren make kōm̧m̧ani kāālōt ko n̄an er make. Ejjab peke kōj. Kōn anemkwoj in kāālōt in, Anij ej kōtļo̧k ajri ro Nejin bwe ren “n̄an kōm̧m̧an n̄an er make im jab n̄an kipel er n̄an kōm̧m̧an.”18 Anemkwoj in kāālōt ej kōtļo̧k ad kāālōt n̄an bōk iaļ in, ak jab. Ej kōtļo̧k bwe jen etal jāne, ak jab. Ejja wāween in wōt ejjeļo̧k emaron̄ peke kōj n̄an pokake, ejjeļo̧k emaron̄ peke kōj bwe jen jab pokake. Ejjeļo̧k juon emaron̄, ilo ad jab kāālōt n̄an, bōk kōj jen iaļ in. (Kiiō, menin ejjab n̄an kapok kōj kōn ro me em̧ōj bōk anemkwōj in kālet ko aer. Rejjab jako jen ial in; rej armej rej pād ilo kamakoko. Rej bōk jeļāļo̧kjeņ an Anij, iakwe, im tūriam̧o.)
Ak n̄e jej etal jān iaļ in, Anij ej būrom̧ōj kōnke Ejeļā menin bwe enaaj bōk jikin, ak ejjeļo̧k kajjitōk, ke enaaj kadikļo̧k ad m̧ōņōņō im karūmōjļo̧k ad bōki kōjeraam̧m̧an ko. Ilo jeje ko rekwojarjar, etal jān iaļ eo meļeļein n̄e jej jerawiwi, im āliktata ej kadikļo̧k ad m̧ōņōņō im karūmōjļo̧k kōjeram̧m̧an ko me ej ņa etan kaje. Ilo meļeļe in, Anij ejjab kaje kōj; kaje ej tōprak in kāālōt ko ad make, ejjab An.
N̄e jej lo ke em̧ōj ad etal jān iaļ in, jemaron̄ jebwābwe wōt, ak kōn Pinmuur eo an Jisōs Kraist, jemaron̄ kāālōt n̄an bōk jet bun̄tōn likļo̧k im bar bōk iaļ eo ejim̧we. Ilo jeje ko rekwojarjar, jerbal in kāālōt im oktak im jepļaak n̄an iaļ in ej kōnono kōn ukweļo̧k. Likjab n̄an ukweļo̧k meļeļein bwe jej kāālōt n̄an joļo̧k kōj make jān kōjeraam̧m̧an ko Anij me ekōņaan letok. Eļan̄n̄e jejjab “m̧ōņōņō n̄an lan̄lōn̄ ilo men eo me remaron̄ kar bōke,” kōj jenaaj “ro̧o̧l … n̄an ijo [jikid] make, n̄an lan̄lōn̄ ilomen eo me [jej] m̧ōņōņō n̄an bōk e”19—ad kāālōt, ejjab an Anij.
Jekdoon ewi toon ad etal jān iaļ in ak ewi toon ad jebwābwe, iien eo wōt jej kāālōt n̄an oktak, Anij ej jipan̄ kōj jepļaak.20 Jān kōjatdikdik an Anij, kōn ukweļo̧k eo em̧ool im bun̄ m̧aanļo̧k kōn dim ilo Kraist, n̄e kwoj bar jepļaak n̄an iaļ in, enaaj āinwōt n̄e kwo kar jab jebwābwe.21 Rilo̧mo̧o̧r ej kōļļā woņāān jerawiwi ko ad bwe jen anemkwoj jān ad kadikļo̧k m̧ōņōņō im kōjeraam̧m̧an ko. Menin ej kōnono kōn jeo̧rļo̧k bōd ilo jeje ko rekwojarjar. Ālkin peptaij, aolep membōr rej jebwābwe jān iaļ eo—jet iaad jej barāinwōt wōtļo̧k. Kōn menin, kōjerbal tōmak ilo Jisōs Kraist, ukweļo̧k, bōk jipan̄ jān E, im bōk jeorļo̧k bōd ejjab juon wōt kōttan ak ej bun̄tōn ko toon wōt am̧ mour, bun̄tōn ko jej āliji im emakijkij. En̄in ej wāween ad “niknik n̄an jem̧ļo̧kin.”22
Jej aikuj kāālōt wōn eo jenaaj jerbal n̄an e.23 Jon̄an ļap in m̧ōņōņō eo ad ilo mour indeeo ej pedped wōt ilo ad kāālōt Anij eo emour im kobaļo̧k Ippān ilo jerbal eo An. Ilo ad kajeon̄ n̄an “kōm̧m̧ani men ko jet” ippād make, jej kaminene ilo ad kōjerbal anemkwōj ko ad ilo jim̧we. Āinwōt Būreejtōn ro ruo m̧oktaļo̧k an Doulul eo an Kōrā ro rekar ba, jejjab aikuj bwe jen āinwōt “nin̄nin̄ ro me rej eo̧eo̧iki er im kajim̧we er aolep iien.”24 Jaab, Anij ekōņaan bwe jen erom̧ rūtto ro remalōtlōt im tōl kōj make.
Kāālōt n̄an ļoor karōk eo an Jemed ej wāween eo wōt jemaron̄ erom rijolōt ilo aelōn̄ in kiin̄ eo An; innem Emaron̄ lōke kōj bwe jen jab kajjitōk bwe eo ej jum̧ae Ankilaan.25 Ak jej aikuj keememej bwe “ejjeļo̧k juon epen katakini āinwōt juon ajri eo ejeļā aolep men.” Kōn menin jej aikuj ikdeleel n̄an ekkatak ilo wāween eo an Irooj im ro Karejaran. Jemaron̄ lōke ke kōj ro rejitenbōro Nejin Jemed im Jined Ilan̄26 im eļap tokjen bwe ren “kea kake” im lukkuun meļeļe bwe “ippād make” ejjab meļeļein “make iaad.”
Ilo an kar rikanaan eo an Bok in Mormon etan Jekab ba, Ij bar ba ippān:
“Kōn menin, en m̧ōņōņō būruōmi, im keememej bwe kom̧ij anemkwōj n̄an kōm̧m̧an n̄an kom̧ make—n̄an kāālet iaļ n̄an mej indeeo ak iaļ n̄an mour indeeo.
“Kōn menin, m̧aan [im kōrā] ro jeiū im jatū rejitōnbōro, kom̧in kōllaajrak kom̧ n̄an ankilaan Anij, im jab n̄an ankilaan devil … ; im keememej, ālikin ami kar kōllaajrak kom̧ n̄an Anij, bwe ej ilo im kōn wōt jouj an Anij kom̧ij bōk lo̧mo̧o̧r.”27
Kōn menin, kāālōt tōmak ilo Kraist; kāālōt ukweļo̧k; kāālōt bwe kwon peptaij im bōk menin letok eo an Jetōb Kwojarjar; kāālōt n̄an lukkuun kōpopo im erreo n̄an bōk kwojkwoj; kāālōt n̄an kōm̧m̧an bujen ilo tampeļ; im kāālōt n̄an jerbal n̄an Anij eo emour im ro Nejin. Kāālōt ko ad rej ļōme wōn kōj im wōn eo jenaaj erom āinwōt.
Ij kōjemļo̧ke kōn aolepān kōjeram̧m̧an ko an Jekab: “Kōn menin, Anij en kōjerkak kom̧ jān … mej indeeo kōn kajoor in pinmuur eo, bwe kom̧in maron̄ deļo̧n̄ļo̧k ilo aelōn̄ in Anij eo ejjeļo̧k jem̧ļo̧kin.”28 Ilo etan Jisōs Kraist, amen.