Seperd n̄an Jetōb ko
Jej diwōjļo̧k ilo iakwe n̄an ro jet kōnke en̄in ej ta eo ad Rilo̧mo̧o̧r eaar kakien kōj n̄an kōm̧m̧ane.
Ilo juon ekōnono ippān juon eo m̧ōtta jidik iien emootļo̧k, eaar jiron̄ eō bwe ke eaar juon likao em̧m̧an ded, juon eo ejkab peptaij membōr an Kabun̄ in, eaar ilo jet wāween en̄jake an jab ekkar n̄an ward eo an. Mijenede ro raar katakin e raar em̧m̧akūt, im eaar en̄jake āinwōt n̄e eaar juōn rilikin. Ilo an ejjeļo̧k m̧ōttan ilo ward eo, eaar ioon ro kar m̧ōttan im kar iaio̧ ippāer ilo m̧akūtkūt ko me raar bōk e jān an bōk kuņaan ilo Kabun̄ in—kōn menin eaar jino eļļo̧k jān oror in. Kōn dānnin kōmjaaļaļ ilo mejān, eaar kōmeļeļeik elmen an lukkuun m̧ōņōņō ke juon iaan ro uwaan ward eo eaar leļo̧k jerbal in karejar n̄an e im kar bar, karuwaineneik tok e ilo juon wāween eo n̄an bar kakobaik tok. Ilowaan allōn̄ ko, eaar bar ro̧o̧ltok ilo jokne n̄an oror in, kar kōkajoorļo̧k ro jet barāinwōt e make. Jejjab ke m̧ōņōņō kōn kōjparok in eo ilo Brazil eo eaar pukote likao in, Elder Carlos A. Godoy, eo ej kiiō jijet luku āinwōt juon membōr in Būreejtōnji eo an Jiljilimjuonn̄oul eo?
Ejjab ke kabwilōn̄lōn̄ kōn kain kijejeto in maron̄ in kōm̧m̧an eļap oktak? Mool in epād ie kijejeto in jerbal in karejar ilo Kabun̄ in. Jemedwōj Ilan̄ emaron̄ bōk men eo elam waan, kijejeto ko kajjojo raan n̄an ukoti n̄an jet men rekabwilōn̄lōn̄. Em̧ōj an de mootļo̧k jiljino allōn̄ jān ke Būreejtōn Russell M. Nelson eaar kwaļo̧k bwe “Irooj em̧ōj an kōm̧m̧an oktak eļap ilo wāween eo jemaron̄ kea kōn doon,”1 kar kōmeļeļeiki, “Jenaaj kōjerbal juōn wāwein eo ekāāl, ekwojarjar ļo̧k n̄an jerbal in karejar n̄an ro jet. Jenaaj kōnono kōn kijejeto kein āinwōt ‘jerbal in karejar.’”2
Būreejtōn Nelson eaar ba: “Juon kadkad eo em̧ool an Irooj im Kabun̄ eo an emour enaaj aolep iien ejaak, tōl kijejeto n̄an karejar n̄an kajjojo ajri ro nejin Anij im baam̧le ko aer. Kōnke Kabun̄ eo An in, jej āinwōt rikarejar ro An renaaj karejar n̄an juon, āinwōt Ekar kōm̧m̧ane. Jenaaj karejar ilo Etan, kōn kajoor im maron̄ eo An, im kōn An iakwe im jouj.”3
Jen kar kōjjeļā in, uwaak eo am̧ eaar kabwilōn̄lōn̄! Jaar bōk riboot ko kōn eļap tōprak kōn oktak kein enan̄in aolep stake ko ilo laļ in āinwōt kar im̧we jen rikanaan eo ad emour. N̄an waanjon̄ok, karejar jeiū em̧m̧aan im jatū kōrā ro kar jitōn̄ er n̄an baam̧le ko, m̧ōttā ko—ekoba likao im jiron̄ ro—ko em̧ōj aer kar ejaak, im intōrpiu ko an jerbal in karejar ko rej bōk jikieer.
Ijjab jeļā eļan̄n̄e ekar jide bwe jiljino allōn̄ m̧okta kōn kōjjeļā in kar inne—“juon kōtaan eo ekāāl im ekkeijeļo̧k ippān katakkin gospel in ilo m̧weeo im ilo Kabun̄”4—kōjjeļā in kōn jerbal in karejar kar letok. Jino jen Jānode, ilo ad joļo̧k juon awa ilo ad kabun̄jar, aolep ta eo jaar ekkatak kōn jerbal in karejar enaaj jipan̄ kōj kajokkōn wōt juon ilo wāween eo em̧m̧an ļo̧k im ekwojarjar ļo̧k, en̄jake kōn raan in Jabōt ilo m̧weeo ippān baam̧le eo im ippān ro rejitenbōro.
Ilo an wāween doulul ej bōk jikin, jemaron̄ in ba, “elmen ad jeļā jej jerbal in karejar ilo wāween eo an Irooj? Jej ke jipan̄ Rikōjparok eo Em̧m̧an ilo wāween eo Ej kōņaan?”
Ilo juon ekōnono ippān, Būreejtōn Henry B. Eyring jidik iien emmo̧o̧tļo̧k, eaar nōbar Armej ro Rekwojarjar ilo kijone oktak kein ak eaar barāinwōt kwaļo̧k an kōjatdikdik bwe membōr renaaj kile bwe jerbal in karejar ekajoor ļo̧k “jen baj em̧m̧an.” Jeban baj ba em̧m̧an ke ejtokjen, ak ro remeļeļe m̧ool eo an jetōb in jerbal in karejar renaaj kile bwe ta eo ej tokje eļapļo̧k jān an em̧m̧an. Dedeļo̧k ilo wāween eo an Irooj, jerbal in karejar emaron̄ in im̧we eo ejjeļo̧k jem̧ļo̧kin n̄an aolep em̧m̧anļo̧k eo an indeeo, āinwōt kar n̄an Elder Godoy.
“Rilo̧mo̧o̧r eaar kwaļo̧k waanjon̄ok in tokjen jerbal in karejar āinwōt An kar kwaļo̧k iakwe. … Eaar … kwaļo̧k, jar kōn, kaenōm̧m̧an, im kōjeraam̧m̧an ro raar pād Ipeļaakin, kūr aolep n̄an ļoor E. … Āinwōt an membōr ro an Kabun̄ in jerbal in karejar [ilo wāween eo eļapļo̧k im ekwojajarļo̧k], rej jar n̄an kappukot jerbal in jipan̄ āinwōt An kar kōm̧m̧ane—n̄an … ‘emmejraake kabun̄ in iien otemjej, im pād ippāer im kōkajoor er,’ ‘loļo̧k m̧weo im̧ōn kajjojo membōr,’ im jipan̄ kajjojo n̄an erom̧ rikam̧ool eo em̧ool an Jisōs Kraist.”5
Jej meļeļe bwe juon seperd eo em̧ool ej iakwe sip ko an, ejeļā etaer kajjojo, im “ej itok limo” ippāer.6
Juon m̧ōtta eo elōn̄ iiō ko joļo̧k mour eo an āinwōt juon rilale mennin mour, kōm̧m̧ani jerbal ko reppen n̄an tāāp koot im sip ilo Rocky Mountains. Juon iien eaar kwaļo̧k n̄an eō kōn apan̄ ko im kauwōtata ko n̄an tāāp sip. Eaar kwaļo̧k bwe ilo jinoin in iien māneen, n̄e sno ioon to̧l ko rej ōnļo̧k, ej likūt doulul in baam̧le wōran 2,000 sip ko ilo to̧l ko n̄e ej jōm̧ar. Ijeņ, eaar emmejraake sip eo m̧ae iien m̧ōļo, n̄e rej em̧akūt jān iien māneen n̄an iien m̧ōļo ilo āne jem̧aden. Eaar kwaļo̧k kilen lolorjake juon jarlepju in sip ekar pen, ebōk raan im bon̄—ilo̧k ilokōnļo̧k m̧okta jen an aļ tak im an tak marok. Eban kōm̧m̧ane make ļo̧k iaan.
Ro jet raar jipan̄ kōjparok sip ko, ekoba ro retijem̧ļo̧k raar jipan̄ jān rijipan̄ ro redikļo̧k im rej bōk katak jān ro m̧ōttaer remāletlet. Eaar bar pedped ioon jipan̄ ko an ruo kidia, ruo kidia kom̧aan ko rejkaminene, ruo sip kidu, im ruo ak jilu sip kidu jiddik. Ilo aolepen jōm̧ar eo, eo m̧ōtta im sip eo an raar ioon kōto im ļan̄, nan̄inmej, jorrāān, mōrā kōn dān, im aolep kaen̄tanaan ko maron̄ kōtmene. Jet iiō ko raar aikuj dān aolepān jōm̧ar n̄an kōmour wōt sip eo. Innām, kajjojo iiō ilo iien m̧ōļo, n̄e mejatoto in m̧ōļo ej tak im n̄e sip kar bukin̄an to̧l eo im kar bwine, ekar wōr tarrin in 200 ejebwābwe .
Aolep 2,000 menin mour ko kar likūti ilo to̧l ko m̧okta jān iien māneen karn dikļo̧k uwaan n̄an 1,800 kajjojo. Aolep sip ko raar jako raar jab jebwābwe kōn nan̄inmej ak mej ak kakkure jen piik in to̧l ko ak coyote ko. Kein kakkure kein ekkā aer loi lam ko me raar jebwābwe jen oror ko aer, rej make ko jen kōjparok eo an seperd eo aer. Komaron̄ ke antoone m̧ōk jidik ta eo iaar kwaļo̧ke ilo juon naan eo ekkwojarjar? Wōn eo ej seperd? Wōn eo ej oror? Wōn ro jet rijjipan̄ n̄an rilale sip eo?
Irooj Jisōs Kraist Make eaar ba, “N̄a seperd eo em̧m̧an, im I jeļā ro Aō, … Ij likūt Aō mour kōn sip ko.”7
Rikanaan Nipai eaar kwaļo̧k bwe Jisōs naaj “naajdik An sip, im ilo E renaaj lo mejaļ.”8 Ij lo aenōm̧m̧an in n̄an jeļā “bwe Jeova aō seperd.”9 im bwe kajjojo iaad rej jeļa kōn E im An kōjparok. N̄e jej ioon lan̄ ko an mour in, nan̄inmej, metak, ak maro, Irooj—ad Seperd—enaaj jerbal in karejar n̄an kōj. Enaaj kōrooltok ad jetōb.
Ilo ejja jekjek in me eo m̧ōtta eaar kōjparok an sip kōn jipan̄ an ro m̧ōttan im pā ko reddik im ko retijōm̧ļo̧k, kidia ko, im kidu in sip ko, Irooj ej bar aikuji jipan̄ eo ilo apan̄ in jerbal n̄an kea kōn sip ko An ilo oror eo.
Āinwōt ro nejin Jemedwōj Ilan̄ eo ej iakwe im āinwōt sip ilo oror in An, jej m̧ōņōņō kōn kōjeraam̧m̧an kajjojon̄an jerbal in karejar n̄an kajjojo jān Jisōs Kraist. Ilo m̧ool, ewōr ad juon jerbal n̄an leļo̧k jerbal in karejar ilo jipan̄ n̄an ro ipeļaakid āinwōt seperd ro. Jej eo̧ron̄ naan ko an Irooj n̄an “jerbal n̄an eō im etal ilo eta, im … aiin ippān doon aō sip.”10
Wōn eo ej seperd? Aolep em̧m̧aan, kōrā, im ajri ilo aelōn̄ in kiin̄ in an Anij rej juon seperd. Ejjab aikuj wōr kūr. Jān tōre eo jaar waļo̧ktok jān dānnin peptaij, jej karbab n̄an jerbal in. Jej diwōjļo̧k ilo iakwe n̄an ro jet kōnke en̄in ej ta eo ad Rilo̧mo̧o̧r eaar kakien kōj n̄an kōm̧m̧ane. Alma eaar kwaļo̧k: “Bwe seperd ta eo ilubwiljimi elōn̄ an sip ej jab lale er… bwe kidu oļip ko ren jab deļo̧n̄ im kan̄ kobban wōrwōr eo An? … Eaar jab ke kadiwōjļo̧ e?”11 N̄e ro rituruur rej pād ilo būrom̧ōj in kanniōk ak jetōb, jen m̧ōkaj n̄an aikuj ko aer. Jej ineek eddo ko an doon bwe ren maron̄ mera. Jej jan̄ ippān ro rej jan̄. Jej kaenōm̧m̧an ro rej pād ilo aikuj aenōm̧m̧an.12 Irooj ej aikuji menin jān kōj. Im n̄e raan eo enaaj itok Enaaj ņa ruwōd kōn kea eo jej kōm̧m̧ane n̄an jerbal in karejar n̄an ro Doon.13
Seperd eo m̧ōtta eaar kwaļo̧k bar juon m̧ōttan eaorōk n̄an kōjparok sip jikin mennin mour eo. Eaar kwaļo̧k bwe sip eo ejebwābwe eaar lukkuun pād ilo kauwōtata jān rikakkure ro. Ilo m̧ool, 15 bōjjāān in iien eo an im an rijipan̄ ro an n̄an pukot sip eo ejebwābwe. Raar jeļā bwe n̄e em̧ōkaj aer loe sip eo ejebwābwe, m̧okta jān an sip eo lukkuun ettoļo̧k jen oror eo, bwe sip eo ejjab jorrāān. N̄an pukot sip eo ebōk kijenmej im jerbal.
Jet iiō remootļo̧k, iaar lo juon ennaan ilo nuujpeba eo me em̧m̧an bwe in kakoņe. Peij eo jinoin ej riit, “Determined Dog Won’t Abandon Lost Sheep.”14 Ennaan eo ej kwaļo̧k kōn jet oraņ sip nejin bar juon riteep ejjab ettoļo̧k jān eo jikin eo an eo m̧ōtta me raar etal jikin teep eo aer. Ruo ak jilu allōn̄ tokālik, raar jino pād im m̧ōļoļo̧k ioon to̧l ko. Ke sip ko raar pād wōt, kidu inlale sip eo eaar pād wōt ippāer, bwe eaar an jerbal n̄an mije n̄an kōjparok sip eo. Eban m̧ad jān er! Eaar pād wōt—jepooļ sip eo ejebwābwe ium̧win allōn̄ ko ilo m̧ōļo im mejatoto in sno, jerbal āinwōt juon rikōjparok ņae coyot ko, piik in to̧l ko, ak jabdewōt menin kakkure me emaron̄ kakkure sip eo. Eaar pād wōt m̧ae eaar maron̄ in tōl ak kōjparok sip eo ļo̧k n̄an kōjparok eo an seperd eo n̄an oror eo. Pija eo ilo peij eo m̧aan ilo nuuj eo eaar kwaļo̧k kōn mej ko im jekjek in kidu sip eo.
Ilo Kallim̧ur Ekāāl, jej lo juon būrabōļ im katak jān Rilo̧mo̧o̧r me ej kwaļo̧k juon en̄jake in jerbal eo ad āinwōt serperd ro, jerbal in karejar an jeiū kōrā im jeiū em̧m̧aan, kōn sip eo ejebwābwe:
‟Armej rōt iaami jibuki sip ippān, eļan̄n̄e juon iaer ejako, e jab likūt ruwatimjuonn̄oul im ruwatimjuon ilo āne jem̧aden, im ilo̧k ilokōnļo̧k eo e jako, n̄an tōre eo enaaj lo e?
“Im n̄e ej lo e, ej likūt e ioon aerān, im lan̄lōn̄.
Im ke ej itok n̄an m̧weo im̧ōn, ej kūrtok ro jeran im ro ri turin im ba n̄an er, ‘Kom̧win lan̄lōn̄ ippa; bwe I ar lo sip eo aō ekar jako.”15
Ilo ad kōmeļeļeik katak in ilo būrabōļ in, jej loe kapilōk in eaorōk:
-
Jej kwaļo̧k kajjeen sip eo ejebwābwe.
-
Jej ilo̧k ilokōnļo̧k n̄an tōre eo naaj loe.
-
N̄e ej lo e, jej likūt er ioon aerad im bōktok er.
-
Jej jepooļ er kōn ro m̧ōttaer ilo aer jepļaaktok.
Ro jeiū im jatū, apan̄ eo ad eļap im nōbar eo ad eļap enaaj itok ilo ad jerbal in karejar n̄an sip eo ejebwābwe. Membōr ro ilo Kabun̄ in ilo Bok in Mormon raar “[kar]lale armej ro aer, im kar naajdik er kōn men ko rej dien reweeppān.”16 Jemaron̄ ļoor waanjon̄ok eo aer ilo ad keememej bwe jerbal in karejar ej n̄an “tōl ilo Jetōb, … iien, n̄an … tōpar aikuj ko an kajjojo membōr.” Ebar menin aikuj bwe jen “lale n̄an jipan̄ kajjojo im baam̧le ko pojak n̄an kain̄i ko aer, n̄an kōjparok bujen ko [aer] … , n̄an jino un̄are peieer make.”17
Kajjojo jetōb raorōk ippān Jemedwōj Ilan̄. An make kūr n̄an jerbal in karejar ej make wōt aorōk im wōrtokjān n̄an E, bwe en̄in ej jerbal im aiboojoj eo An. En̄in ej jerbal eo an indeeo. Kajjojo ro Nejin rej aorōktata im̧aan Mejen. Ej iakwe eok kōn iakwe eo koban meļeļe. Āinwōt kidu inlale sip eo, Enaaj pād wōt ioon to̧l eo n̄an kōjparok eok ilo iien lan̄, kōto, sno, im elōn̄.
Būreejtōņ Russell M. Nelson ekar katakin kōj ilo kweilo̧k eo lo̧k: “Ennaan eo ad n̄an laļ in [in maron̄ kobaiki, ‘n̄an jerbal in karejar’] epidodo im em̧ool: jej kūr aolep ro nejin Anij jim̧or ilo ron̄ōl n̄an itok n̄an aer Rilo̧mo̧o̧r, n̄an bōk kōjeraam̧m̧an ko an tampeļ eo ekwojarjar, niknik ilo m̧ōņōņō, im karbab n̄an mour indeeo.18
Jen kotak mej ko mejād n̄an kanaan in bwe jen maron̄ seperd n̄an jetōb ko ļo̧k n̄an tampeļ im n̄an ad Rilo̧mo̧o̧r, Jisōs Kraist. Ejjab kōtmāne bwe jen kōm̧m̧ani kabwilōn̄lōn̄ ko. Ej kajjitōk wōt bwe jen bōktok ro jeid im jatid n̄an E, bwe Ewōr an kajoor n̄an pinmuur kōn jetōb ko. Ilo ad kōm̧m̧an āindein, jej maron̄ im naaj kōjpārok kallim̧ur in: “Im n̄e Seperd Eļap enaaj waļo̧ktok, kom̧naaj bōk pāllin aiboojoj e jāmin mājkun.”19 Kōņ menin ij kam̧ool—bwe Jisōs Kraist ej ad Rilo̧mo̧o̧r im Ripinmuur—ilo etan Jisōs Kraist, amen.