Hō’ē fare i reira e pārahi ai te Vārua o te Fatu
E ’ite ’outou i te tahi o tō ’outou mau ’oa’oara’a rahi i roto i tā ’outou mau tauto’ora’a ’ia fa’ariro i tō ’outou fare ’ei vāhi nō te fa’aro’o i te Fatu ia Iesu Mesia ’e ’ei vāhi tei ’ī i te here.
E au mau taea’e ’e au mau tuahine here, tē māuruuru nei au i tō’u ani-manihini-ra’a-hia mai ’ia paraparau ia ’outou i roto i teie 189ra’a o te ’āmuira’a rahi a Te ’Ēkālesia a Iesu Mesia i te Feiā Mo’a i te Mau Mahana Hope’a Nei. I teie tai’o mahana nō te matahiti 1830, ’ua fa’ati’a Iosepha Semita i te ’Ēkālesia i raro a’e i te arata’ira’a a te Fatu. ’Ua tupu te reira i roto i te fare o te ’utuāfare Whitmer i Fayette New York. E ono melo i reira ’e e 50 mau ta’ata ’ē atu tei ’ana’anatae ato’a i taua mahana ra.
Noa atu ē, ’aita vau i ’ite e aha tā te peropheta Iosepha i parau ’aore rā, e aha tōna huru i tōna ti’ara’a i mua i taua pupu iti na’ina’i ra, ’ua ’ite au e aha tei tupu i roto i te reira mau ta’ata fa’aro’o ia Iesu Mesia. ’Ua fāri’i rātou i te Vārua Maita’i, ’e ’ua ’ite rātou ē, tei roto rātou i te hō’ē vāhi mo’a. E mea pāpū maita’i ē, ’ua ’ite rātou, ’ua hō’ē rātou.
Tē hina’aro ato’a nei tātou i taua huru mana’o temeio ra i roto i tō tātou fare. E mana’o te reira ’o te tae mai, mai tā Paulo i fa’ata’a, nā roto i te ha’apa’ora’a « i tā te Vārua ».1
Tā’u fā i teie mahana o te ha’api’ira’a ïa i te mea tā’u i ’ite nō ni’a i te rāve’a e nehenehe ai tātou ’ia fāri’i pinepine atu i taua mana’o ra, ’e ’ia ani manihini i te reira ’ia vai maoro a’e i roto i tō tātou ’utuāfare. Mai tā ’outou i ’ite, ’e ’ere i te mea ’ōhie ’ia rave. ’Eiaha e vaiiho i te tāhitohito, te te’ote’o, ’e te hara ’ia upo’oti’a. E mea ti’a i te here mau o te Mesia ’ia tae mai i roto i te ’ā’au o te mau ta’ata i roto i tō tātou ’utuāfare.
’Ua ’itehia ia Adamu ’e ia Eva, ia Lehi ’e ia Saria, ’e te tahi atu mau metua tā tātou i ’ite i roto i te mau pāpa’ira’a mo’a ē, e tītaura’a pa’ari mau te reira. Terā rā tē vai ra te mau hi’ora’a maita’i nō te ’oa’oara’a tāmau i roto i te mau ’utuāfare ’e te mau fare nō te tāmarū ia tātou. ’E te fa’a’ite mai nei te reira mau hi’ora’a ia tātou i te huru e tupu ai te reira nō tātou ’e nō tō tātou mau ’utuāfare. Tē ha’amana’o ra ’outou i te ’ā’amu i roto i te 4 Nephi :
« ’E nō te aroha o te Atua tei roto i te ’ā’au o te mau ta’ata, ’aore atura e mārōra’a i te fenua ra.
« ’E ’aita ato’a atura te fe’i’i, te mārō, te ti’arepu, te fa’aturi, te ha’avare, te taparahi ta’ata, ’e te mau huru ’ino ato’a ra ; ’e ’aita ho’i e feiā i roto i te mau ta’ata i hāmanihia e te rima o te Atua ra tei hau ia rātou i te ’oa’oa ».
« ’Aita atu e ta’ata haru, ’e te ta’ata taparahi ta’ata, ’aita atu e āti Lamana, ’aita atu ïa e pupu ’ino ; ’ua riro rā rātou ’ei hō’ē, o te tamari’i ana’e a te Mesia ; ’e te feiā ’āi’a i te bāsileia o te Atua.
« ’Auē ho’i te ao tō rātou ra ! ’Ua ha’amaita’i ho’i te Fatu i tā rātou mau mea ato’a i rave ra ; ’e e ao tō rātou ’e te maita’i ’e ’ia ma’iri a’era nā matahiti e hō’ē hānere ’e hō’ē ’ahuru ’aore ; ’e ’ua ma’iri te u’i mātāmua i muri a’e i te Mesia ra, e ’aita e mārō i te fenua e hope roa a’e ».2
Mai tā ’outou i ’ite, ’aita taua taime ’oa’oa ra i vai tāmau noa e a muri noa atu. Tē fa’ata’a nei te ’ā’amu i roto i te 4 Nephi i te mau tāpa’o o te topara’a pae vārua i roto i te hō’ē pupu ta’ata maita’i. Te hō’ē te reira hōho’a tei ’itehia i te roara’a o te tau, i roto i te mau nūna’a tā’āto’a, i roto i te mau ’āmuira’a, ’e, te mea ’oto roa atu, i roto i te mau ’utuāfare. Nā roto i te tuatāpapara’a i taua hōho’a ra, e nehenehe tā tātou e ’ite nāhea e ti’a ai ia tātou ’ia pāruru, ’e ’ia fa’arahi ato’a i te mau mana’o here i roto i tō tātou ’utuāfare.
Teie te hōho’a nō te topara’a tei ’itehia i muri a’e e 200 matahiti i te orara’a i roto i te hau pāpū tā te ’evanelia e hōro’a mai :
’Ua ha’amata te te’ote’o.
’Ua fa’aea te ta’ata i te hōro’a i tā rātou nā vetahi ’ē.
’Ua ha’amata rātou i te hi’o ia rātou iho i roto i te mau tuha’a teitei ’aore rā, ha’eha’a te tahi ’e te tahi.
’Ua ha’amata rātou i te iti te fa’aro’o ia Iesu Mesia.
’Ua ha’amata rātou i te riri.
’Ua ha’amata rātou i te rave i te mau huru hara ato’a.
E vai ara noa te mau metua pa’ari nō te ’ite i taua mau tāpa’o ra ’ia fā mai i roto i te mau melo o tō rātou ’utuāfare. ’Oia mau, e māna’ona’o rātou i te reira. E ’ite rā rātou ē, te tumu nō te reira, ’o te fa’aurura’a ïa a Sātane i te tāmatara’a i te arata’i i te mau ta’ata maita’i i ni’a i te ’ē’a o te hara, ’e ’a ’ere atu ai i te fa’aurura’a a te Vārua Maita’i. Nō reira, te hō’ē metua pa’ari e ’ite ’oia ē, te rāve’a ’o te arata’ira’a ïa i te tamari’i tāta’itahi, ’e o rātou ato’a iho, ’ia fāri’i hope atu i te anira’a manihini a te Fatu ’ia haere mai iāna ra.
E riro ’outou i te ’ore e manuia rahi mai te mea ē, ’ei hi’ora’a, e pi’i ’outou i te hō’ē tamari’i ’ia tātarahapa i te te’ote’o. E nehenehe ’outou e tāmata i te tāparu i te mau tamari’i ’ia hōro’a ma te ’ā’au maita’i. E nehenehe ’outou e ani ia rātou ’ia fa’aea i te feruri ē, e mea maita’i a’e rātou i te tahi atu i roto i te ’utuāfare. I reira ïa ’outou e tae mai ai i ni’a i te tāpa’o i fa’ata’ahia mai « ’ua ha’amata rātou i te iti te fa’aro’o ia Iesu Mesia ».
Tē vai ra te tāviri nō te arata’i i tō ’outou ’utuāfare ’ia ti’a i ni’a i taua vāhi pae vārua ra tā ’outou e hina’aro nō rātou—’e nō ’outou ’ia tae i reira i pīha’i iho ia rātou. Mai te mea ē, e tauturu ’outou ia rātou ’ia tupu i te rahi i roto i te fa’aro’o ē, ’o Iesu Mesia tō rātou fa’aora here, e fāri’i ïa rātou i te hō’ē hina’aro ’ia tātarahapa. Mai te mea e nā reira rātou, e ha’amata ïa te ha’eha’a i te mono i te te’ote’o. ’Ia ha’amata ana’e rātou i te fāri’i i te mea tā te Fatu i hōro’a ia rātou, e hina’aro rātou i te fa’a’ite rahi atu i te ’ā’au hōro’a noa. E iti te titora’a i rotopū i te mana’o tu’iro’o ’e te mana’o māuruuru. E tura’i te here i te riri i rāpae. ’E i te hōpe’a, mai tei tupu nō te mau ta’ata tei fa’afāriuhia e te ari’i Bēniamina, e fa’aitoito te hina’aro ’ia rave i te maita’i ia rātou i mua i te fa’ahemara’a ’ia rave i te hara. ’Ua fa’a’ite pāpū te mau ta’ata o te ari’i Bēniamina ē, ’aita tō rātou e hina’aro fa’ahou ’ia rave i te ’ino.3
Nō reira, te patura’a i te fa’aro’o ia Iesu Mesia o te ha’amatara’a ïa o te topara’a o te hurira’a pae vārua i roto i tō ’outou ’utuāfare ’e i tō ’outou fare. E mea pāpū a’e te reira fa’aro’o nō te fa’atupu i te tātarahapa i tā ’outou ha’api’ira’a pāto’i i te mau tāpa’o tāta’itahi o te topara’a i te pae vārua.
E maita’i a’e tā ’outou arata’ira’a nā roto i te hi’ora’a. E mea ti’a i te mau melo o te ’utuāfare ’e vetahi ’ē, ’ia hi’o ia ’outou ’ia tupu i te rahi i roto i tō ’outou iho fa’aro’o ia Iesu Mesia ’e i tāna ’evanelia. ’Aita i maoro a’e nei ’ua fāri’i ’outou i te hō’ē tauturura’a rahi. ’Ua ha’amaita’ihia te mau metua i roto i te ’Ēkālesia nā roto i te hō’ē fa’anahora’a ha’api’ira’a fa’auruhia nō te mau ’utuāfare ’e nō te ta’ata hō’ē. Mai te mea ’e fa’a’ohipa ’outou i te reira, e patu ’outou i tō ’outou fa’aro’o ’e i te fa’aro’o o tā ’outou mau tamari’i i te Fatu ia Iesu Mesia.
Tupura’a rahi i roto i te fa’aro’o
’Ua tupu rahi tō ’outou fa’aro’o i te Fa’aora nā roto i tō ’outou pe’era’a i te mana’o o te peresideni Russell M. Nelson ’ia tai’o fa’ahou i te Buka a Moromona. ’Ua tāpa’opa’o ’outou i te mau tuha’a parau ’e te mau parau nō ni’a i te Fa’aora. ’Ua tupu rahi tō ’outou fa’aro’o ia Iesu Mesia. Terā rā, mai te hō’ē rā’au iti ’āpī, e ’ōriorio te reira fa’aro’o ia Iesu Mesia maori rā, e ’itehia ia ’outou te rāve’a tāmau ’ia feruri hōhonu ’e ’ia pure nō te fa’arahi i te reira.
E’ita paha tō ’outou hi’ora’a nō te tupura’a i te rahi i roto i te fa’aro’o e pe’ehia nā te mau melo ato’a o tō ’outou ’utuāfare i teienei. Terā rā, ’a ha’apa’o maita’i i te ’ohipa i tupu i ni’a ia Alama tamaiti. I roto i tōna hina’aro māuiui ’ia tātarahapa ’e te fa’a’orera’a hara, ’ua ha’amana’o ’oia i te fa’aro’o o tōna metua tāne ia Iesu Mesia. E nehenehe tā ’outou mau tamari’i e ha’amana’o i tō ’outou fa’aro’o i te Fa’aora i te hō’ē taime ’a hina’aro ’ū’ana ai rātou ’ia tātarahapa. ’Ua parau o Alama nō ni’a i taua taime ra:
« E ’ua nā-reira-hia ho’i au i te ha’amauiui-rahi-hia i te ’ati, ’e ’ua ahoaho-ato’a-hia vau i te ha’amana’ora’a i tā’u ra mau hara e rave rahi, inaha, ’ua ha’amana’o vau ē, i fa’aro’o nā vau i tō’u ra metua tāne i te tohura’a atu i te ta’ata i te taera’a mai o te hō’ē, Iesu Mesia, te Tamaiti a te Atua, ’ei tāra’ehara nō tō te ao nei.
« I teie nei, tē tāpe’a ra tō’u ’ā’au i taua mana’o ra, ’ua pi’i ihora vau i roto iā’u iho, E Iesu ē, te Tamaiti a te Atua ra, aroha mai ’oe iā’u nei i tei roto i te au ’ava’ava ra, ’e tei ’ati-roa-hia ho’i i te tāpe’a mure ’ore o hade ra.
« E teienei, inaha, tē feruri noa ra vau i te reira ra, ’aore i ti’a iā’u ’ia ha’amana’o ā i tō’u ’ati ; ’oia ïa, ’e ’aore ho’i au i ’āehuehuhia ā i te ha’amana’ora’a i tā’u ra mau hara ».4
Pure ma te here
Ta’a ’ē atu tō ’outou hi’ora’a nō te tupura’a i te rahi i roto i te fa’aro’o, e nehenehe tā ’outou purera’a ’ei ’utuāfare e riro ’ei tuha’a faufa’a rahi i roto i te fa’arirora’a i te fare ’ei vāhi mo’a. Mai tei mātarohia, e mā’itihia hō’ē ta’ata nō te hōro’a i te pure nō te ’utuāfare. ’Ia fa’ataehia te pure ma te māramarama i te Atua ra ’ei maita’i nō te mau ta’ata ato’a e tūturi ra ’e e fa’aro’o ra, e tupu te fa’aro’o i te rahi i roto ia rātou pā’āto’a. E nehenehe rātou e ’ite i te mau fa’a’itera’a o te here nō te Metua i te Ao ra ’e nō te Fa’aora. ’E ’ia fa’ahiti ana’e te ta’ata pure i te i’oa o te feiā e tūturi ra i roto i taua ha’amenemenera’a ’utuāfare ra ’e tei roto i te hina’aro, e nehenehe te tā’āto’ara’a e fāri’i i te here nō ’e mai roto mai i te melo tāta’itahi o te ’utuāfare.
Noa atu ē, ’aita te mau melo o te ’utuāfare e ora ra i roto i te fare, e patu te pure i te mau tā’amura’a o te here. E nehenehe te pure i roto i te ’utuāfare e tae nā te ao ato’a nei. ’Ua hau i te hō’ē taime tō’u ’itera’a ē, tē pure ato’a nei te hō’ē melo o te ’utuāfare i te ātea ’ē i te hō’ē ā taime nō te hō’ē ā ’ohipa tā’u e pure nei. Nō’u nei, te parau tahito ra ē, « Te ’utuāfare e pure ’āmui, e vai ’āmui noa ïa » e nehenehe e fa’a’a’anohia atu mai teie, « Te ’utuāfare e pure ’āmui, e vai ’āmui ïa, noa atu ē, ’ua ta’a ’ē haere rātou ».
Te ha’api’i-’oi’oi-ra’a i te tātarahapa
Nō te mea ho’i ē, ’aore hō’ē o tātou i maita’i hope roa, ’e e mea ’ōhie ho’i te mau mana’o i te pēpē, e nehenehe te ’utuāfare e riro mai ’ei vāhi mo’a mai te mea noa ē, e tātarahapa ’oi’oi tātou ’e ma te ’ā’au tae. E nehenehe te mau metua e ha’amau i te hō’ē hi’ora’a. E nehenehe e tātarahapa vitiviti ’e ma te ’ā’au tae mau i te mau parau teimaha ’e te mau mana’o ’ino. Hō’ē noa parau ’ōhie « ’eiaha e ’ino’ino mai », e fa’aora ïa i te mau puta ’e e ani manihini i te fa’a’orera’a hara ’e te here.
’Ua riro te peropheta Iosepha Semita ’ei hi’ora’a nō tātou, nō te mea ’ua fa’aruru ’oia i te mau arora’a ’ino, i te mau ha’avarera’a, ’e ’oia ato’a i te mau mana’o ’āfaro ’ore o tōna ’utuafare. ’Ua fa’a’ore ’oi’oi ’oia i te hapa noa atu ē, ’ua ’ite ’oia ē, e aro fa’ahou mai te ta’ata. ’Ua ani ’oia ’ia fa’a’orehia mai tāna hapa, ’e ’ua hōro’a noa ato’a ’oia i te reira.5
’Ātu’atura’a i te Vārua misiōnare
E hina’aro tu’utu’u ’ore tō te mau tamaiti a Mosia ’ia pūpū i te ’evanelia i te mau ta’ata ato’a. ’Ua tupu mai teie hina’aro nā roto mai i te ’ohipa tei tupu i ni’a ia rātou iho nō ni’a i te tātarahapa. ’Aita e mara’a ia rātou ’ia feruri i te hō’ē ta’ata e māuiui ra i te mau hōpe’ara’a o te hara mai tā rātou i fāri’i. Nō reira, ’ua fa’aruru rātou e rave rahi matahiti i te pāto’ira’a, te hāmani-’ino-ra’a, ’e te ’ati nō te pūpū i te ’evanelia a Iesu Mesia i tō rātou mau ’enemi. I roto i taua ’ohipa ra, ’ua ’itehia ia rātou te ’oa’oa i roto i te rahira’a ta’ata tei tātarahapa ’e tei fāri’i i te ’oa’oa o te fa’a’orera’a hara nā roto i te Tāra’ehara a Iesu Mesia.
E rahi atu te hina’aro o te mau melo o tō tātou ’utuāfare ’ia fa’a’ite i te ’evanelia ’a fāri’i ai rātou i te ’oa’oa o te fa’a’orera’a hara. E nehenehe te reira e tupu mai i te taime ’a fa’a’āpī ato’a ai rātou i te mau fafaura’a ’a rave ai rātou i te ’ōro’a mo’a. E tupu rahi te vārua misiōnare i roto i tō tātou mau fare ’a fāri’i ai te mau tamari’i ’e te mau metua i te ’oa’oa o te fa’a’orera’a hara i roto i te fa’aterera’a o te ’ōro’a mo’a. Nā roto i tō rātou hi’ora’a maita’i nō te fa’atura, e nehenehe te mau metua ’e te mau tamari’i e tauturu i te tahi ’e te tahi ’ia fāri’i i taua ’oa’oa ra. E nehenehe te reira ’oa’oa e haere ātea nā roto i te fa’arirora’a i tō tātou mau fare ’ei mau pū ha’api’ipi’ira’a misiōnare. E’ita paha te tā’āto’ara’a e tāvini i te hō’ē misiōni, e fāri’i rā te tā’āto’ara’a i te hina’aro ’ia fa’a’ite i te ’evanelia, nā te reira e tauturu ia rātou ’ia fāri’i i te fa’a’orera’a hara ’e te hau. ’E te tāvini-tāmau-ra’a ānei i teie taime ’aore rā, ’aita, e nehenehe te tā’āto’ara’a e fāri’i i te ’oa’oa nō te pūpūra’a i te ’evanelia ia vetahi ’ē.
Haerera’a e māta’ita’i i te hiero
Nō te mau metua ’e nō te mau tamari’i, ’ua riro te hiero ’ei rāve’a maita’i a’e nō te fāri’i i te hō’ē mana’o ’e te hō’ē here nō te mau vāhi nō te ra’i. E parau mau roa te reira i te taime te ’āpī noa ra ā te tamari’i. ’Ua fānauhia te mau tamari’i ma te māramarama o te Mesia. E nehenehe te ’aiū iho e ’ite ē, e mea mo’a te hō’ē hiero. Nō te here o te mau metua i tā rātou mau tamari’i na’ina’i, ’ua riro ïa te hiero nō rātou ’ei ti’aturira’a ē, e nehenehe rātou e here i tā rātou mau tamari’i i roto i tō rātou ’utuāfare mure ’ore—e a muri noa atu.
Te tahi pae o ’outou tē vai ra tā ’outou mau hōho’a nō te mau hiero i roto i tō ’outou fare. ’A rahi noa ai te mau hiero ’āti a’e te fenua nei, e ti’a i te mau metua e rave rahi ’ia māta’ita’i i te mau ’āua hiero ’e tō rātou ’utuāfare. E nehenehe ato’a te tahi pae e haere atu i te mau ’ōpani ’īriti ’ia oti ana’e te mau hiero i te patuhia. E nehenehe te mau metua e ui i te mau tamari’i ē, e aha tō rātou mana’o ’ia fātata atu ’aore rā, ’ia tomo atu rātou i roto i te hiero.
E nehenehe te mau metua ato’a e fa’a’ite pāpū i te aura’a o te hō’ē hiero nōna. ’Ua paraparau pinepine te peresideni Ezra Taft Benson, tei here i te mau hiero, nō ni’a i te māta’ita’ira’a i tōna metua vahine ’ia auri maita’i i tōna mau ’ahu hiero.6 ’Ua parau ’oia i tōna ha’amana’ora’a ’ei tamaiti iti, i te hi’ora’a i tōna ’utuāfare ’ia fa’aru’e rātou i te fare nō te haere i te hiero.
I te tau ’a riro ai ’oia ’ei peresideni nō te ’Ēkālesia, e haere ’oia i te hiero i taua ā mahana i te hepetoma tāta’itahi. ’Ua rave ’oia i te mau taime ato’a i te ’ohipa hiero nō te hō’ē tupuna. Nō roto mai te reira huru i te hi’ora’a o tōna nā metua.
Tō’u ’itera’a pāpū
E ’ite mai ’outou i te tahi o tō ’outou mau ’oa’oara’a rahi i roto i tā ’outou mau tauto’ora’a ’ia fa’ariro i tō ’outou fare ’ei vāhi nō te fa’aro’o i te Fatu ia Iesu Mesia ’e ’ei vāhi tei ’ī i te here, i te here mau o te Mesia. ’Ua ha’amata te fa’aho’i-fa’ahou-ra’a mai o te ’evanelia nā roto i te hō’ē uira’a ha’eha’a tei feruri-hōhonu-hia i roto i te hō’ē fare ha’eha’a, ’e e nehenehe te reira e tāmau noa i roto i tō tātou mau fare ’a tāmau noa ai tātou i te ha’amau ’e i te fa’a’ohipa i te mau parau tumu o te ’evanelia i reira. ’Ua riro teie ’ei tīa’ira’a ’e ’ei hina’aro hōhonu rahi nō’u mai tō’u tamari’ira’a mai ā. ’Ua ’ite a’ena ’outou pā’āto’a i teie mau huru fare. E rave rahi o ’outou tei hāmani i te reira, nā roto i te tauturu a te Fatu.
’Ua tāmata te tahi pae ma te ’ā’au ato’a nō taua ha’amaita’ira’a ra, ’aita rā i hōro’ahia mai. Tā’u fafaura’a ia ’outou ’o te hō’ē fafaura’a ïa tā te hō’ē melo nō te Tino ’Ahuru Ma Piti ’āpōsetolo i hōro’a mai iā’u i te hō’ē taime. ’Ua parau atu vau iāna ē, nō te mau mā’itira’a i ravehia e te tahi mau melo o tō mātou ’utuāfare, ’aita i pāpū iā’u ē, e ’āmui fa’ahou ānei mātou i roto i te ao a muri a’e. Tē ha’amana’o maita’i ra vau i tāna mau parau, « tē ha’ape’ape’a nei ’oe nō te hō’ē fifi tano ’ore. ’A ora noa ’oe ma te ti’amā nō te bāsileia tiretiera, i reira te mau tā’atira’a ’utuāfare e riro ai ’ei mea nehenehe, hau atu i te ti’a ia ’oe ’ia feruri ».
Tē ti’aturi nei au ē, e fa’atae mai ’oia i taua tīa’ira’a ’oa’oa ia tātou ato’a i te tāhuti nei, ’o tei rave i te mau mea ato’a e ti’a ia tātou ’ia rave nō te fāri’i tātou iho ’e te mau melo o tō tātou ’utuāfare, i te ora mure ’ore. ’Ua ’ite au ē, te ’ōpuara’a a te Metua i te ao ra, e ’ōpuara’a ïa nō te ’oa’oa. Tē fa’a’ite pāpū nei au ē, e fa’ati’a tāna fa’anahora’a ia tātou tāta’itahi tei ’imi i te mau rāve’a ato’a ’ia tā’atihia i roto i te hō’ē ’utuāfare ’e a muri noa atu.
’Ua ’ite au ē, te mau tāviri o te autahu’ara’a tei fa’aho’ihia mai ia Iosepha Semita ra, ’ua tae mai te reira, nā roto i te hō’ē rēni mutu ’ore i te peresideni Russell M. Nelson. Nā te reira mau tāviri e fa’ati’a ’ia tā’atihia te mau ’utuāfare i teie mahana. ’Ua ’ite au ē, tē here nei te Metua i te ao ra ia tātou, tāna mau tamari’i vārua, ma te hō’ē here maita’i hope. ’Ua ’ite au ē, nō te tāra’ehara a Iesu Mesia, e nehenehe tātou e tātarahapa, e tāmāhia, ’e e ti’amā nō te ora i roto i te mau ’utuāfare here e a muri noa atu, i pīha’i iho i tō tātou Metua i te ao ra ’e i tāna Tamaiti here, o Iesu Mesia. Tē fa’a’ite pāpū nei au i te reira nā roto i te i’oa o Iesu Mesia, ’āmene.