O se Aiga e Afio ai le Agaga o le Alii
O le a e mauaina nisi o olioli silisili i au taumafaiga ia faia lou fale o se nofoaga o le faatuatua i le Alii o Iesu Keriso ma se nofoaga e faatumulia i le alofa.
Ou uso e ma tuafafine pele, ou te faafetai lava ua valaauliaina a’u e lauga atu ia te outou i lenei Konafesi Aoao Faaletausaga Lona 189 o Le Ekalesia a Iesu Keriso o le Au Paia o Aso e Gata Ai. I lenei aso i le 1830, sa faatulagaina ai e Iosefa Samita le Ekalesia i lalo o le taitaiga a le Alii. Sa faia i le fale o le aiga o Uitimera i Feiete, Niu Ioka. E toaono tagata o le ekalesia ma pe tusa e 50 isi tagata naunau sa i ai iina i lena aso.
E ui ou te le iloa po o a mea na saunoa i ai le Perofeta o Iosefa pe faape’i foi ona fofoga a o tu i luma o lena vaega toalaiti, ae ou te iloa mea sa lagonaina e na tagata faatuatua ia Iesu Keriso. Sa latou lagonaina le Agaga Paia, ma sa latou lagonaina sa latou i ai i se nofoaga paia. Sa latou lagonaina moni lava sa autasi i latou i le loto e tasi.
O lena lagona faavavega o le mea lea tatou te manaomia uma i totonu o o tatou aiga. O se lagona e oo mai, e pei ona faamatalaina e Paulo, o le “loto i la le Agaga.”
O lo’u faamoemoega i le asō o le aoao atu lea o mea ua ou iloa i auala e mafai ai ona tatou agavaa mo lena lagona ia maua soo ma valaaulia ia tumau i totonu o o tatou aiga. E pei ona outou silafia mai aafiaga, e lē faigofie ona faia lena mea. O finauga, faamaualuga, ma le agasala e ao ona taofia. O le alofa mama o Keriso e tatau ona oo mai i totonu o loto o tagata i totonu o lo tatou aiga.
O Atamu ma Eva, Liae ma Sarai, ma isi matua ua tatou iloa mai tusitusiga paia na iloaina o se luitau faigata lena mea. Ae o loo i ai ni faataitaiga faamalosiau o le fiafia faifai pea i totonu o auaiga ma aiga e toe faamautinoa ai ia i tatou. Ma o na faataitaiga tatou te iloa ai le auala e mafai ai ona tupu mo i tatou ma o tatou aiga. Tou te manatua le tala mai le 4 Nifae:
“Ma sa oo ina leai se finauga i le laueleele, ona o le alofa o le Atua sa mau i loto o tagata.
“Ma sa leai se mataua, po o ni feeseeseaiga, po o ni faanunununu, po o ni faitaaga, po o ni pepelo, po o ni fasiotiga tagata, po o soo se mea faamataaitu; ma e moni e le mafai ona i ai o ni tagata e sili atu ona fiafia i totonu o tagata uma na foafoa e le aao o le Atua.
“Sa leai ni faomea, po o ni fasioti tagata, sa leai ni sa Lamanā, po o soo se ituaiga o tagata; ae sa tasi i latou, o le fanau a Keriso, ma o suli i le malo o le Atua.
“Ma sa faamanuiaina tele lava i latou! Aua sa faamanuiaina i latou e le Alii ia latou mea uma na fai; ioe, sa faamanuiaina lava ma faauluolaina i latou seia oo ina mavae atu le selau ma le sefulu o tausaga; ma sa oo ina mavae atu le tupulaga muamua mai ia Keriso, ma sa leai se finauga i le laueleele atoa.”
E pei ona outou silafia, o lena taimi fiafia sa le’i tumau e faavavau. O le tala i le 4 Nifae o loo faamatalaina ai faailoga mulimuli ane o le vaivaiga faaleagaga i se vaega o tagata lelei. O se mamanu lea o loo tupu i le aluga o tausaga i tagata uma, i faalapotopotoga, ma, sili ona faanoanoa, i aiga. E ala i le suesueina o lena mamanu, e mafai ai ona tatou iloa auala tatou te ono puipuia ai ma faateleina lagona o le alofa i totonu o o tatou aiga.
O le mamanu lenei o le vaivaiga na tupu i le mavae o le 200 tausaga o le ola ai i le filemu atoatoa e aumaia e le talalelei:
E tolotolo mai i totonu le faamaualuga.
Sa lē toe fetufaai e tagata a latou mea i le tasi ma le isi.
Sa amata ona latou vaai ia i latou lava i vaega i luga atu po o lalo ifo o le tasi ma le isi.
Sa amata ona latou faaitiitia lo latou faatuatua ia Iesu Keriso.
Sa amata ona latou feitagai
Sa amata ona latou solia ituaiga uma o agasala.
O matua atamamai o le a nofouta lelei e matau na faailoga pe a aliae mai i tagata o o latou aiga. Ioe, o le a latou popole. Ae o le a latou iloa o le pogai autu lava, o faatosinaga a Satani o loo taumafai e taitai i lalo tagata lelei i se ala i le agasala ma o lea latou te lē maua ai le faatosinaga a le Agaga Paia. O lea la, o le a vaai atu le matua poto i lena avanoa o taoto i le taitaiina o tamaiti taitasi, ma i latou lava, ia talia atoatoa atili le valaaulia a le Alii ia o mai ia te Ia.
Atonu e tapulaa sou tulaga manuia, mo se faataitaiga, i le valaau atu i se tamaitiiti ia salamo mai le faamaualuga. Atonu e te taumafai e faatauanau le fanau ia foai atu ma le lotoalofa atili mea ua latou maua. E mafai ona e fai atu ia i latou e tuu le manatu e sili atu i latou nai lo isi i le aiga. Ona e sau lea i le faailoga sa ou faamatalaina muamua “Sa amata ona latou faaitiitia lo latou faatuatua ia Iesu Keriso.”
O le ki lena i le taitaiina o lou aiga ia tutulai a’e i lena nofoaga paia e te manao ai mo i latou—ma mo oe ina ia i ai iina faatasi ma i latou. A o e fesoasoani ia i latou ia tuputupu a’e i le faatuatua, o Iesu Keriso o lo latou Togiola alofa, o le a latou lagonaina se manao e salamo. A latou faia, o le a amata ona suitulaga e le lotomaualalo le faamaualuga. A o amata ona latou lagonaina mea ua foai atu e le Alii ia i latou, o le a latou mananao e foai atu ma le lotoalofa atili. O le faatautavā mo tulaga lauiloa po o le fia iloa o le a faaitiitia. O le a tuliesea e le alofa le inoino. Ma le mea mulimuli, e pei ona faia mo le nuu na faaliliuina e le Tupu o Peniamina, o le manao e faia mea lelei o le a faamalosia ai i latou e tetee i faaosoosoga ia agasala. Sa molimau mai le nuu o le Tupu o Peniamina sa lē toe i ai so latou manao e fai le leaga.
O lea, o le fausiaina o le faatuaua ia Iesu Keriso o le amataga lea o le toeaveesea o vaivaiga faaleagaga i lou aiga ma i lou fale. O lena faatuatua o le a aumaia le salamo nai lo le tala’i atu e tetee i faailoga taitasi o vaivaiga faaleagaga.
O le a e taitai i le auala silisili e ala i faataitaiga. E tatau ona vaai tagata o le aiga ma isi ia te oe o loo e tuputupu a’e i lou lava faatuatua ia Iesu Keriso ma i Lana talalelei. Talu ai nei na tuuina atu ai ia te oe se fesoasoaniga tele. Ua faamanuiaina lava matua i le Ekalesia i se mataupu aoaoina musuia mo aiga ma tagata taitoatasi. Pe a e faaaogaina, o le a e fausiaina ai lou faatuatua ma le faatuatua o lau fanau i le Alii o Iesu Keriso.
Tuputupu a’e i le Faatuatua
Ua faatupulaia lou faatuatua i le Faaola ina ua e mulimuli i le fautuaga a Peresitene Russell M. Nelson ia toefaitauina le Tusi a Mamona. Sa e makaina fuaitau ma upu e faasino i le Faaola. Sa tuputupu a’e lou faatuatua ia Iesu Keriso. Ae, e pei lava o se laau toto fou, o se faatuatua faapena ia Iesu Keriso o le a mamae vagana ua e maua se naunautaiga faifai pea e mafaufau loloto ma tatalo ia faateleina.
O lau faataitaiga o le tuputupu a’e i le faatuatua atonu e lē mulimulitaia e tagata uma o lou aiga i le taimi nei. Ae e te maua le mafanafana mai le aafiaga o Alema le Itiiti. I lona manaoga tiga mo le salamo ma le faamagaloga, sa ia manatua ai le faatuatua o lona tama ia Iesu Keriso. Atonu e manatua e lau fanau lou faatuatua i le Faaola i se taimi pe a latou matua manaomia ai le salamo. Sa fai mai Alema i se taimi faapena:
“Ma sa oo ina aʼo faapea ona falo tigaina o au i le mafatia, aʼo lagā au i le atuatuvale i le manatuaina o au agasala e tele, faauta, sa ou manatuaina foi loʼu faalogo i loʼu tamā o vavalo atu i tagata e uiga i le afio mai o se tasi o Iesu Keriso, o se Atalii o le Atua, e togiola mo agasala a le lalolagi.
“O lenei, ina ua tau ane lou mafaufau i lenei manatu, sa ou tagi ifo i totonu o loʼu loto: E, Iesu e, oe le Alo o le Atua, ia e alofa mutimutivale mai ia te au, o se ua i ai i le au oona, ma ua siomia faataamilo e filifili tumau-faavavau o le oti.
“Ma o lenei, faauta, ina ua ou mafaufauina lenei mea, sa ou le toe manatuaina oʼu tiga; ioe, sa ou le toe lagā atuatuvaleina au i le manatuaina o au agasala.”
Tatalo ma le Alofa
E faaopoopo atu i au faataitaiga o le tuputupu a’e i le faatuatua, o a outou tatalo o se aiga e mafai ona faia ai se vaega taua i le faia o le aiga o se nofoaga paia. E masani lava ona filifilia se tagata se toatasi e fai ma leo e tatalo atu mo le aiga. A manino le tatalo i le Atua mo tagata o loo tootutuli ma faalogologo, e tuputupu a’e le faatuatua i totonu o i latou uma. E mafai ona latou lagonaina faailoaga o le alofa mo le Tama Faalelagi ma mo le Faaola. Ma a ta’ua e le tagata o loo tatalo i latou o loo tootutuli i lena li’o o le aiga o ē o loo mafatia, e lagona uma e tagata le alofa mo, ma mai tagata taitoatasi o le aiga.
E tusa foi pe le o nonofo tagata o le aiga i le fale, e mafai lava e tatalo ona fausia sootaga o le alofa. O tatalo i totonu o le aiga e mafai ona oo atu i le lalolagi atoa. E sili atu ma le faatasi na ou iloa o se tagata o le aiga e mamao ese sa tatalo i se taimi lava e tasi mo se mea lava e tasi na ou tatalo ai. Mo a’u, o le muagagana anamua “O le aiga e tatalo faatasi e tumau faatasi” e mafai ona faalauteleina i le “O le aiga e tatalo faatasi e mau faatasi, e tusa lava pe vāvā mamao i latou.”
Aoao Atu ia Vave Ona Salamo
Ona e leai ma se tasi o i tatou e atoatoa ma e faigofie ona faamanualia lagona, e faatoa mafai ona avea aiga ma ni malutaga paia pe afai e vave ona tatou salamo faamaoni. E mafai ona seti e matua se faataitaiga. O upu malolosi po o mafaufauga agaleaga e mafai ona vave salamoina ma le faamaoni. O se “Ou te faamalie atu” faigofie e mafai ona faamaloloina ai loto manu’a ma valaau ai uma le faamagaloga ma le alofa.
O le perofeta o Iosefa Samita o se faataitaiga mo i tatou a o ia taulimaina ni osofaiga matuia faapea ai ma tagata taufaalata. Na vave ona ia faamagalo atu e ui sa ia iloa e ono toe osofai mai foi le fili. Sa ia talosagaina le faamagaloga, ma sa ia foai fua atu.
Faafaileleina o le Agaga Faafaifeautalai
Sa naunau atalii o Mosaea e ofo atu le talalelei i tagata uma. Sa oo mai lenei manao mai i o latou aafiaga patino i le salamo. Sa le mafai ona latou tatalia le mafaufau atu i soo se tasi o mafatia i aafiaga o le agasala e pei o i latou. O lea sa latou feagai ai ma tausaga o le teenaina, faigata, ma le lamatiaina a o ofo atu le talalelei a Iesu Keriso i o latou fili. I le faagasologa, sa latou maua ai le olioli i le toatele sa salamo ma lagonaina le olioli o le faamagaloga e ala i le Togiola a Iesu Keriso.
O le a tuputupu a’e tagata o o tatou aiga i o latou manaoga e faasoa atu le talalelei a o latou lagonaina le olioli o le faamagaloga. E mafai ona latou o mai a o latou faafouina feagaiga pe a latou taumamafa i le faamanatuga. O le a tuputupu a’e le agaga faafaifeautalai i o tatou aiga a o lagonaina e fanau ma matua le olioli o le faamagaloga i le sauniga faamanatuga. E ala i a latou faataitaiga o le migao, e mafai uma e matua ma le fanau ona fesoasoani i le tasi ma le isi ia lagonaina lena olioli. E mafai ona saofagā tele lena olioli i le liuaina o tatou fale e avea ma nofoaga autu e aoao ai faifeautalai. Atonu e lē auauna atu uma i ni misiona, ae o le a lagona uma le manao e faasoa atu le talalelei, lea sa aumaia i latou ia lagonaina le faamagaloga ma le filemu. Ma pe o auauna atu i le taimi nei i se misiona faamamaluina pe leai, e mafai e tagata uma ona lagonaina le olioli i le ofoina atu o le talalelei isi.
Asiasi atu i le Malumalu
O matua uma ma fanau, o le malumalu o le avanoa silisili lea e maua ai se lagona mo, ma se fiafia i nofoaga faalelagi. E faapitoa le moni o lena mea i le taimi o laiti le fanau. E fananau mai fanau ma le Malamalama o Keriso. E oo lava i se pepe e mafai ona lagonaina e paia se malumalu. Ona e alolofa matua i a latou fanau, e fai le malumalu ma faatusa ia i latou o le faamoemoe e mafai ona latou maua fanau e alolofa i ai i o latou aiga e faavavau—faavavau lava.
O nisi o outou o loo i ai ata o malumalu i totonu o o outou fale. A o faaopoopo atu pea malumalu i le lalolagi atoa, e mafai e le toatele o matua ona asiasi atu i lotoa o malumalu ma o latou aiga. E mafai foi e nisi ona auai i fale tatala pe a fausia malumalu. E mafai e matua ona fesili i fanau pe faape’i o latou lagona i le latalata ai i se malumalu.
E mafai e matua uma ona molimau atu i le uiga o se malumalu ia te i la’ua. Sa saunoa soo Peresitene Ezra Taft Benson, o lē fiafia i malumalu, e uiga i le vaai pea i lona tina o auli ma le faaeteete ona lavalava o le malumalu. Sa ia saunoa i mea na ia manatuaina o se tamaitiiti o vaai i lona aiga a o latou tuua le aiga ia auai i le malumalu.
Ina ua avea o ia ma Peresitene o le Ekalesia, sa ia auai i le malumalu i le aso e tasi o vaiaso taitasi. Na te faia i taimi uma galuega faalemalumalu mo se tuaa. Sa oo mai i se tulaga lautele mai le faataitaiga a ona matua.
O La’u Molimau
O le a e mauaina nisi o olioli silisili i au taumafaiga ia faia lou fale o se nofoaga o le faatuatua i le Alii o Iesu Keriso ma se nofoaga e faatumulia i le alofa, le alofa mama o Keriso. O le Toefuataiga o le talalelei na amata i se fesili faatauvaa na mafaufauina loloto i totonu o se fale faatauvaa, ma e mafai ona faaauau pea i totonu o o tatou fale taitasi a o tatou faaauau pea ona faamautuina ma faatino mataupu faavae o le talalelei iina. O lo’u faamoemoe lava lea ma lo’u manaoga sili ona loloto talu mai lo’u tamaitiiti. Ua tofu uma outou ma sina vaaiga o ni aiga faapea. E toatele outou ua fatuina ni aiga faapena faatasi ma le fesoasoaniga a le Alii.
O nisi na taumafaia i le loto atoa mo lena faamanuiaga, ae e le’i maua lava. O la’u folafolaga ia te outou o se tasi o folafolaga na faia e se uso o le Korama a Aposetolo e Toasefululua ia te a’u i se tasi taimi. Sa ou fai atu ia te ia, ona o filifiliga ua faia e nisi o le matou aiga lautele, ou te lē talitonu ai e mafai ona toe faatasia matou i le lalolagi a sau. Sa ia fai mai, e pei ona ou manatuaina lelei ai, “O loo e popole i se faafitauli sese. Tau lava o lou ola agavaa mo le malo selesitila, ma o le a sili atu le matagofie o faatulagaga o le aiga nai lo le mea e mafai ona e mafaufauina.”
Ou te talitonu o le a ia faalautele mai lena faamoemoe fiafia i soo se tasi o i tatou i le olaga faaletino o ē ua faia mea uma e agavaa ai i tatou lava ma tagata o o tatou aiga mo le ola e faavavau. Ou te iloa o le fuafuaga a le Tama Faalelagi o se fuafuaga o le fiafia. Ou te molimau atu o lana fuafuaga ua mafai ai mo i tatou taitoatasi o ē ua faia le mea sili tatou te mafaia ina ia faamauina ai se aiga e faavavau.
Ou te iloa o ki o le perisitua na toefuatai mai ia Iosefa Samita na tuufaasolo mai i se laina lēmamotusiaina e tau mai ia Peresitene Russell M. Nelson. O na ki ua mafai ai ona faamauina aiga i aso nei. Ou te iloa e alofa le Tama Faalelagi ia te i tatou, o Ana fanau agaga, i se alofa atoatoa. Ou te iloa lena mea ona o le Togiola a Iesu Keriso, e mafai ona tatou salamo, ma faamamaina, ma agavaa e ola i ni aiga alolofa e faavavau faatasi ma lo tatou Tama Faalelagi ma faatasi ma Lona Alo Pele, o Iesu Keriso. Ou te molimau atu ai i le suafa o Iesu Keriso, amene.