Te ’evanelia mau ’e te ateate ’e te ’ōhie a Iesu Mesia
’O te here i te Atua ’e te here i tō tātou ta’ata tupu te ha’api’ira’a tumu niu nō te aupurura’a ; te ha’api’ira’a fa’atumuhia i ni’a i te ’utuāfare, turuhia e te ’Ēkālesia ; te ha’amorira’a pae vārua i te mahana sābati ’e te ’ohipa fa’aorara’a.
Te mau taea’e ’e te mau tuahine, e mea fifi ’ia feruri ē, ’ua 71 matahiti i teienei, i te matahiti 1948 ra tō’u tāvinira’a ’ei misiōnare i Peretāne ’e ’a 44 matahiti māua tā’u vahine Barbara i te revara’a ’e tō māua ’utuāfare i Canada, ’a peresideni ai au i te misiōni nō Canada Toronto. ’A tāvini ai au i reira i te ’Ēperēra 1976, ’ua pi’ihia vau i te pupu mātāmua o te Hitu ’Ahuru, ’e, ’ohipa tīa’i-’ore-hia i te matahiti 1985, ’ua pi’ihia vau i te pupu nō te Tino ’Ahuru Ma Piti ’āpōsetolo. Te mea ta’a ’ē i tā’u mau pi’ira’a nā mua atu, tē vai ra te ha’amāuruurura’a i muri iho, te ha’amāuruurura’a rā i teie pi’ira’a i te Tino ’Ahuru Ma Piti, e ’ere ïa i te mā’itira’a nūmera hō’ē roa ; terā rā, tē pure nei au ’ia tae mai taua mahana, ’ua oti iā’u te mau mea ato’a ta te Fatu i pi’i iā’u ’ia rave.
’Ia feruri au i nā 43 matahiti tāvinira’a ’ei Hui mana fa’atere rahi ’e i te fāna’ora’a ’ia tāvini i te mau tamari’i a te Metua i te Ao ra, ’ua hope atu ā tō’u māramaramara’a ē, ’ua hina’aro ’oia i tāna mau tamari’i ato’a ’ia ’ite i te hau, te ’oa’oa ’e te poupou i roto i tō rātou orara’a.
’Ua ha’api’i te peropheta Lehi ē : « Tē vai nei te mau [tāne ’e te mau vahine] ’ia noa’a tō rātou ’oa’oa ».1 E rave rahi tumu e nehenehe tātou e ’ere i te hau ’e te ’oa’oa ’e te pōpou i roto i teie orara’a, mai te vevera’a, te tama’i, te mau ’ati nātura ’e te mau fifi mana’o-’ore-hia i te vāhi ’ohipa, i te pae nō te ea ’e i roto i te mau aura’a ’utuāfare ho’i.
Terā rā, noa atu ’aita tā tātou e nehenehe e ha’avī i teie mau pūai nā rāpae e tā’iri mai i ni’a i tō tātou orara’a i te fenua nei, ’ia tūtava tātou ana’e i te riro ’ei pipi ha’apa’o maita’i nā te Fatu Iesu Mesia, e ti’a ia tātou ’ia ’ite i te hau, te ’oa’oa ’e te pōpou noa atu te mau pe’ape’a o te ao e fa’a’ohu fa’a’ati nei ia tātou.
I te hō’ē taime ’ua nā ’ō mai hō’ē o tā’u mau tamari’i ē : « ’Ua ’ite ’oe e pāpā, ’aita vau i pāpū ē e haere ānei iā’u ». ’Ua pāhono atu vau ē : « Tā te Metua i te Ao ra noa e ani nei ia tātou, ’o te ravera’a ïa i te maita’i a’e e noa’a ia tātou. » Te mau taea’e ’e te mau tuahine, ’a rave i te maita’i a’e e roa’a ia ’outou i terā mahana ’e terā mahana, ’e nā mua a’e ’outou e ’ite roa ai, e ’apo mai ’outou ē, ’ua ’ite tō ’outou Metua i te Ao ra ia ’outou ’e ’ua here ’oia ia ’outou. ’E i te taime e ’ite ’outou i te reira—’ia ’ite mau ’outou i te reira—e noa’a mai ïa te fā pāpū ’e te aura’a nō te orara’a ’e e ’ī ’outou i te ’oa’oa ’e te hau.
’Ei māramarama nō teie nei ao, ’ua parau te Fa’aora : « [E] ’ore tei fa’aro’o mai iā’u ra [e] pārahi noa i te pōuri ».2
« ’O Iesu Mesia te iʼoa tei hōroʼahia mai e te Metua, ’e ’aita atu e iʼoa tei hōroʼahia mai e ora ai [tātou] nei ;
« Nō reira, ʼia rave te mau taʼata ato’a [ʼe te mau vahine atoʼa] i ni’a iho ia rātou te iʼoa ’o tei hōroʼahia mai e te Metua ».3
Tē ha’api’i mai nei te mau pāpa’ira’a mo’a ē, ’ua hina’aro Sātane ’ia arata’i ia tātou i roto i te pōiri. Tāna tauto’ora’a rahi, ’o te ha’apōirira’a ïa i te māramarama ’e te parau mau a Iesu Mesia ’e i tāna ’evanelia. Mai tā Lehi i ha’api’i i tāna mau tamari’i, « tē tītau nei [te diabolo] ’ia ro’ohia te ta’ata ato’a i te ’ati mai iāna ihora ».4 ’O te « ’ohipa [’e te] hanahana » ra a te Metua i te Ao ra te « [fa’atupura’a] i te tāhuti ’ore ’e te ora mure ’ore o te [mau tāne ’e te mau vahine] »,5 ’o tā Lucifero ïa « ’ohipa » te fa’atupura’a i te mamae rahi ’e te ’oto hope roa o te mau tamari’i a te Atua. E ha’amohimohi te hara ’e te ’ōfatira’a ture i te Māramarama o te Mesia i roto i tō tātou orara’a. Nō reira ’o te ’oa’oa-hope-atu-ā-ra’a i te Māramarama o te Mesia te tumu nō tō tātou tere, ’o tē fa’atae mai i te hau ’e te ’oa’oa ’e te pōpou.
I nā ’āva’e 18 i ma’iri, ’ua fa’auru te Fatu i tāna peropheta ’e tāna mau ’āpōsetolo ’ia rave i te tahi mau fa’atanora’a fa’ahiahia. Terā rā, tē ha’ape’ape’a nei au ’o tē riro te fā pae vārua o teie mau fa’atanora’a i te mo’ehia i roto i te ’ana’anataera’a nō ni’a i te mau tauira’a iho.
’Ua parau ’o Joseph F. Smith : « ’Ua fa’aho’ihia mai te ’evanelia mau ’e te ateate ’e te ’ōhie a Iesu Mesia. Tei ia tātou nei te hōpoi’a ’ia tāpe’a noa i te reira i ni’a i te fenua nei ».6 ’Ua parau fa’ahou ’oia ē, ’o te ’evanelia mau ’e te ateate ’e te ’ōhie « te mau ha’api’ira’a tumu fa’aora a te Mesia ».7
I roto i te mau Hīro’a fa’aro’o, ’ua ha’api’i te peropheta Iosepha Semita ē « nā roto i te tāra’ehara a te Mesia e ti’a ai i te ta’ata ato’a ’ia fa’aorahia, nā roto i te ha’apa’ora’a i te mau ture ’e te mau ’ōro’a o te ’Evanelia ».8
Te mau parau tumu mātāmua o te ’evanelia, ’o te fa’aro’o ïa i te Fatu Iesu Mesia, te tātarahapa, te bāpetizora’a, te hōro’ara’a i te Vārua Maita’i, ’e te tāpe’a-māite-ra’a ē tae noa atu i te hope’a. ’Ua ha’api’i tōna taea’e ’o Hyrum Smith ē : « ʼA poro i te reira, faʼahou ’e fa’ahou ā ; e ʼite ïa ʼoutou i terā mahana ’e terā mahana ē e heheuhia mai ia ’outou te mau manaʼo ʼāpī ʼe te tahi atu ā māramarama nō niʼa i te reira. E nehenehe tā ’outou e faʼarahi atu ā i te reira… [nō te] māramarama atu ā i te reira. E ti’a atura ïa ia ʼoutou ’ia haʼamāramarama i te reira i te mau taʼata tā ʼoutou e haʼapiʼi ».9
Te mau rāve’a maita’i a’e nō tātou nō te ’ite i te fā pae vārua o te ’Ēkālesia, ’o te orara’a ïa i te mau ha’api’ira’a mau ’e te ateate ’e te ’ōhie a te Mesia, ’e ’o te fa’a’ohipara’a i nā fa’auera’a rahi e piti a te Fa’aora : « Hina’aro ’oe i tō Atua ia Iehova ma tō ’ā’au ato’a… E aroha atu i tō ta’ata tupu mai tō aroha ia ’oe iho na ».10
Maoti te ha’apa’ora’a i teie nā fa’auera’a e piti e noa’a ai te hō’ē rāve’a nō te ’ite i te hau ’e te ’oa’oa. ’Ia here ’e ’ia tāvini ho’i tātou i te Fatu ’e ’ia here ’e ’ia tāvini tātou i tō tātou ta’ata tupu, e ’ite mai tātou ma te au i te poupou rahi a’e e tae mai ia tātou, ’aita e rāve’a maita’i a’e.
’O te here i te Atua ’e te here i tō tātou ta’ata tupu te ha’api’ira’a tumu niu nō te aupurura’a ; te ha’api’ira’a fa’atumuhia i ni’a i te ’utuāfare, turuhia e te ’Ēkālesia ; te ha’amorira’a pae vārua i te mahana sābati ’e te ’ohipa fa’aorara’a i nā pae e piti o te pāruru tei turuhia ’e te mau Sōtaiete Tauturu ’e te mau pupu peresibutero. ’Ua niuhia teie mau mea ato’a i ni’a i nā fa’auera’a hanahana e here i te Atua ’e e here i tō ta’ata tupu. Tē vai ra ānei te ha’api’ira’a tumu mātāmua a’e ’e te niu a’e ’e te ’ōhie a’e ?
Maoti te orara’a i te ’evanelia mau ’e te ateate ’e te ’ōhie e noa’a ai ia tātou te taime rahi a’e nō te hāhaere i te mau vahine ’ivi ’e te mau tāne ’ivi, te mau ’ōtare, te ’ōtahi, tei ma’ihia ’e tei veve. E ’ite mai tātou i te hau ’e te ’oa’oa ’e te pōpou i roto i tō tātou orara’a i te tāvinira’a i te Fatu e i tō tātou ta’ata tupu.
’Ua riro te mau fa’atanora’a nō te mahana sābati tei tūra’i i te ha’api’ira’a ’e te tuatāpapara’a ’evanelia e fa’atumuhia i ni’a i te ’utuāfare, turuhia e te ’Ēkālesia, ’ei rāve’a nō te fa’a’āpī i tō tātou vārua ’e tā tātou pūpūra’a ia tātou i te Atua i roto i tō tātou mau fare. E aha pa’i te tahi atu mea ’ōhie a’e ’e te mea tumu a’e ’e te hōhonu a’e ? Te mau taea’e ’e te mau tuahine, tē ’ite ra ānei ’outou ē, ’ua riro te ’apora’a ’e te hōro’ara’a i te ha’api’ira’a ’evanelia i roto i tō tātou mau ’utuāfare ’ei rāve’a faufa’a rahi nō te ’ite mai i te ’oa’oa ’e te pōpou i roto i tō tātou orara’a ?
Nō ni’a i te Sābati, ’ua parau te Fa’aora : « Nō te mea ʼoia mau ïa e mahana teie i faʼataʼahia nā ʼoe ’ia faʼaea i tā ʼoe mau ʼohipa, ʼe ’ia haʼamori atu i tei Teitei Roa ra ».11 ’Ua parau fa’ahou ’oia : « ’Ia ’ī roa tō ’oe ’oa’oara’a… [nā roto i] te ’oa’oara’a ’e te pure ho’i… e rave ’outou i teie mau mea nei nā roto i te mana’o ha’amaita’i, mai te ’ā’au ’e te mata ’oa’oa ho’i… [’e] nā roto i te ’ā’au ’ana’anatae ’e te mata ’oa’oa ho’i ».12
’A hi’o maita’i na i te mau parau rahi o teie heheura’a : te ’oa’oa, te ’oa’oara’a, te mana’o ha’amaita’i, te ’ā’au ’oa’oa, te ’ā’au ’ana’anatae ’e te mata ’oa’oa. ’Ia fa’aro’o vau i te reira, e tae mai te mata ’ata’ata i te fa’aturara’a i te mahana sābati.
’A tāvini ai tātou ma te rāve’a teitei a’e ’e te mo’a a’e, e feruri na tātou i te faufa’a rahi ’ia aroha tātou i te mau ta’ata ato’a e haere mai i tā tātou mau rurura’a a te ’Ēkālesia, te mau melo ’āpī iho ā rā ’e te mau manihini. ’Ia ’oa’oa pā’āto’a tātou i te hīmenera’a ’e i te fa’aro’o-māite-ra’a i te mau parau o te pure ’ōro’a ma te ’ā’au mahora ’e te mana’o tae e ti’a ai.
Nā te hō’ē melo nō te ’episekōpora’a e ’ōmua i te mau ’itera’a pāpū fa’aro’o i roto i tā tātou mau rurura’a ha’apaera’a mā’a ’e te ’itera’a pāpū, e fa’a’ite ’oia i te hō’ē ’itera’a pāpū poto nō ni’a i te fa’anahora’a ’oa’oa ’e te ’evanelia mau ’e te ateate ’e te ’ōhie a te Mesia. ’Ia pe’e te tahi atu mau ta’ata i te reira hi’ora’a e ti’a ai. Tītauhia ’ia ha’amana’o tātou ē, e mau vāhi ’ē atu tē tano nō te fa’ati’a i te mau ’ā’amu ’aore rā te mau tere ori-haere-ra’a. ’Ia parau ’ōhie noa tātou i tō tātou mau ’itera’a pāpū ma te fa’atumu i ni’a i te ’evanelia a te Mesia, nāna e hōro’a mai i te fa’a’āpīra’a pae vārua ’a fa’a’ite ai tātou i tō tātou ’itera’a pāpū i te tahi ’e te tahi.
E ’ite-maita’i-roa-hia te aupurura’a manuia nā roto i te hi’o fa’atumuhia i ni’a i te herera’a i te Atua ’e i tō tātou ta’ata tupu. Nō te fa’a’ōhie i te parau, e aupuru tātou i te ta’ata nō tō tātou here i tō tātou Metua i te Ao ra ’e i tāna mau tamari’i. E manuia rahi tātou i tā tātou mau tauto’ora’a aupurura’a mai te mea e vai ’ōhie noa tā tātou aupurura’a. E tae mai te ’oa’oa rahi roa a’e nā roto i te mau mea ’ōhie o te orara’a, nō reira tītauhia ’ia hi’o maita’i tātou ē ’eiaha tātou ’ia feruri ē, tītauhia e fa’ananea atu ā i te mau fa’atanora’a tā tātou i fāri’i nō te patu i te fa’aro’o ’e te mau ’itera’a pāpū pūai i roto i te ’ā’au o te mau tamari’i a te Atua.
’Eiaha tātou e fa’a’ohipa rahi atu ā nā roto i te tahi atu ā mau rurura’a, mau hina’aro ’e mau tītaura’a. ’Ia vai ’ōhie noa te reira. I roto i terā vai-ōhie-ra’a ’outou e ’ite ai i te hau ’e te ’oa’oa ’e te pōpou tā’u i paraparau.
E rave rahi matahiti te fā a te feiā fa’atere o te ’Ēkālesia i vai ateate noa ’e te ’ōhie, mai tei fa’ahitihia i roto i te Buka arata’i 2 ’ō tā’u ïa e fa’ahiti.
« E fa’aitoito te feiā fa’atere i te mau melo ato’a ’ia fāri’i i te tā’āto’ara’a o te mau ’ōro’a faufa’a o te autahu’ara’a, ’e ’ia ha’apa’o i te mau fafaura’a nō te reira, ’e ’ia ha’apa’o i te mau tītaura’a nō te fa’ateiteira’a ’e te ora mure ’ore…
« Te feiā pa’ari : Fa’aitoito i te ta’ata pa’ari tāta’itahi ’ia vai ti’amā nō te fāri’i i te mau ’ōro’a o te hiero. Ha’api’i i te mau feiā pa’ari ato’a ’ia ’imi i tō rātou mau tupuna ’e ’ia rave i te mau ’ōro’a mono i te hiero nō rātou.
« Te feiā ’āpī : Tauturu i te fa’aineinera’a i te feiā ’āpī tamāroa tāta’itahi ’ia fāri’i i te Autahu’ara’a a Melehizedeka, ’ia fāri’i i te mau ’ōro’a o te hiero ’e ’ia vai ti’amā nō te tāvini i te hō’ē misiōni rave tāmau. Tauturu i te fa’aineinera’a i te feiā ’āpī tamāhine tāta’itahi ’ia vai ti’amā nō te rave ’e nō te ha’apa’o i te mau fafaura’a ’e nō te fāri’i i te mau ’ōro’a o te hiero. Ha’apūai i te feiā ’āpī nā roto i te fa’atupura’a i te mau fa’a’oa’oara’a manuia mau.
« Te tā’āto’ara’a o te mau melo : Tauturu i te mau feiā fa’atere o te autahu’ara’a ’e te mau pupu tauturu, te mau ’āpo’ora’a pāroita, te mau misiōnare pāroita ’e te mau misiōnare rave tāmau ’e te mau melo ’ia rave tāhō’ē ma te tauto’ora’a ’aifāito nō te fa’aora i te mau ta’ata, ha’apūai i te mau ’utuāfare ’e te mau ’āmuira’a a te ’Ēkālesia, nō te ha’amara’a i te ’ohipa a te autahu’ara’a ’e nō te ha’aputuputu ia ’Īserā’ela nā roto i te fa’afāriura’a, te tāpe’ara’a ’e te fa’aitoitora’a. Ha’api’i i te mau melo ’ia fa’arava’i ia rātou iho ’e i tō rātou ’utuāfare, ’e ’ia tauturu i te feia veve ’e tei ro’ohia i te fifi mai tā te Fatu e rave ».13
’Ua ha’amaita’i tā’u tāvinira’a i roto i te ’Ēkālesia iā’u nei nā roto i te mau ’ohipa pae vārua fa’ahiahia ’e te ta’a ’ē. E ’ite au nō te fa’aterera’a te Fatu i tāna ’Ēkālesia nō te fa’atupu i tāna mau ’ōpuara’a. ’Ua fāri’i noa na vau i te arata’ira’a a te Atua i ni’a atu i tō’u ’aravihi. Nō’u nei, ’ua fa’atumuhia te ’oa’oa o te ’evanelia i ni’a i te ha’api’ira’a tumu mau ’e te ateate ’e te ’ōhie, ’e te ’evanelia a Iesu Mesia.
’Ua tāvini au i raro a’e i te mau tāviri ’e te fa’aterera’a o e ono peropheta ’e peresideni o te ’Ēkālesia, mai te tau o Spencer W. Kimball ē tae mai ia Russell M. Nelson. Tē fa’a’ite pāpū nei au ē, ’ua riro ’e tē riro nei rātou tāta’itahi ’ei peropheta mā’itihia e te Atua. ’Ua ha’api’i mai rātou ia tātou i te mau parau tumu faufa’a rahi nō ni’a i te ’Ēkālesia ’e te ’evanelia ’e te ha’api’ira’a tumu a te Mesia. Tē fa’ahaere nei te peresideni Nelson i te ’ohipa a te Fatu i mua ma te vitiviti e hāhā te ta’ata. Tē parau nei au « hāhā » nō te mea ’o ’oia ana’e te ’āpōsetolo pa’ari a’e iā’u, ’e ’o vau terā e fifi ra nō te tāpapa atu iāna ! E ’ite au nō te vaira’a te mau tāviri o te autahu’ara’a ’e te pereue o te peropheta nā te Atua i ni’a iāna. Tē ha’api’i nei te peresideni Nelson i te ’evanelia mau ’e te ateate ’e te ’ōhie a Iesu Mesia. Tē hōro’a nei au i tō’u ’itera’a pāpū ē, ’o Iesu te Mesia, ’e ’o teie tāna ’Ēkālesia—’o tā’u ïa e fa’a’ite pāpū nei ma te ha’eha’a i te i’oa o Iesu Mesia, ’āmene.