ඵලය
ඔබගේ ඇස් සහ හදවත් ගැලවුම්කරුවාණන් වන යේසුස් ක්‍රිස්තුස්වහන්සේ හා උන්වහන්සේ තුළින් පමණක් ලැබෙන සදාකාලික ප්‍රීතියේ කේන්ද්‍රගත කර තබන්න.
මම දන්නවා ඔයා හිතන්නේ මොකක්ද කියලා! තවත් එක් කථිකයෙක් පමණයි සභාපති නෙල්සන්ගෙන් අපට අසන්නට ලැබෙයි. අපගේ ආදරණීය අනාගතවක්තෘවරයාගේ කථාව එනතුරු අපි විනාඩි කිහිපයක් ඔබව විමසිල්ලෙන් තබාගැනීමට බලාපොරොත්තුවෙන්, මම ඉතා සිත්ගන්නා මාතෘකාවක් තෝරාගෙන තියෙනවා: මගේ මාතෘකාව තමයි ඵලය.
බෙරි, කෙසෙල්, කොමඩු සහ අඹ වල වර්ණය, ස්වභාවය සහ වඩා පැණි රස හෝ කිවානෝ හෝ දෙළුම් වැනි විදේශීය පලතුරු බොහෝ කලක් තිස්සේ ඉතා වටිනා ප්‍රණීත ආහාරයි.
ගැලවුම්කරුවාණන් උන්වහන්සේගේ පොළවේ සේවයේදී, යහපත් ඵලය සදාකාලික වටිනාකමක් සහිත දේවල් වලට සමාන කළා. “ඔවුන්ගේ ඵල වලින් ඔබ සැම ඔවුන් ඇඳින ගන්නහුය” කියා උන්වහන්සේ කිව්වා. “සියලු හොඳ ගස් හොඳ ඵල දරයි.” “සදාකාල ජීවනයට අස්වැන්න” එකතුකරගන්නා ලෙස උන්වහන්සේ අපව දිරිමත් කළා.
මෝර්මොන්ගේ පොතෙහි අපි සියල්ලෝම හොඳින් දන්නා විචිත්‍රවත් සිහිනයකදී, අනාගතවක්තෘ ලෙහි “කළු හා අන්ධකාර වනාන්තරයක” සිටින බවක් සොයාගත්තා. එහි අපිරිසිඳු ජලය, අන්ධකාරයේ මීදුමක්, අමුතු පාරවල් සහ තහනම් මාවත්, ඒ වගේම පටු සහ අවහිර මාවත දිගේ යකඩ අත්වැලක් එම “යමෙක් ප්‍රීතියට පමුණුවන ඵලය” ඇති ගස කරා තිබුණා. සිහිනය සිහිපත් කරමින්, ලෙහි මෙසේ කිව්වා: “මම… එම ඵලය අත්වින්දෙමි;… එය ඉතාම රසවත්ය, මීට පෙර කිසිදා විඳි රසයන්ට වඩා මිහිරිය. … [එලෙසම] මාගේ ප්‍රාණය බෙහෙවින් බලවත් ප්‍රීතියකින් පිරුනේය.” මෙම ඵලය “කිසිදු ඵලයකට වඩා ආශා උපදවන්නකි.”
වෘක්ෂයේ සහ ඵලයේ තේරුම
වටිනාම ඵලය ඇති මෙම ගස සංඛේතවත් කරන්නේ කුමක්ද? එය “දෙවියන්වහන්සේගේ ප්‍රේමය” නිරූපණය කරන අතර අපගේ ස්වර්ගික පියාණන්ගේ පුදුමාකාර මිදීමේ සැලැස්ම ප්‍රකාශ කරනවා. “මක්නිසාද දෙවියන්වහන්සේ ස්වකීය ඒකජාතක පුත්‍රයාණන් දෙන තරම් ලෝකයාට ප්‍රේම කළ සේක. එසේ කළේ උන්වහන්සේ කෙරෙහි අදහාගන්නා සෑමදෙනාම විනාශ නොවී සදාකාල ජීවනය ලබන පිණිසය.”
මෙම වටිනා ඵලය ගැලවුම්කරුවාණන්ගේ අසමසම වන්දිගෙවීමෙහි පුදුමාකාර ආශිර්වාද සංකේතවත් කරනවා. අපගේ මරණින් පසු අප නැවත ජීවත් වනවා පමණක් නොව, යේසුස් ක්‍රිස්තුස්වහන්සේ කෙරෙහි ඇති ඇදහිල්ල, අපගේ පසුතැවිල්ල සහ අණ පණත් පිළිපැදීමෙන්, අපගේ පාප වලට සමාව ලබාගත හැකි අතර, යම් දවසක අපගේ පියාණන්වහන්සේ හා උන්වහන්සේගේ පුත්‍රයා ඉදිරියෙහි පවිත්‍රව හා නිර්මලව සිටිමු.
ගසේ ඵල භුක්ති විඳීමෙන් සංකේතවත් කරන්නේ නැවත පිහිටවූ සුභාරංචියේ වත්පිළිවෙත් සහ ගිවිසුම් වන - බෞතීස්ම වීම, ශුද්ධාත්මයාණන්ගේ ත්‍යාගය ලැබීම සහ ස්වාමින්ගේ දේමාළිගාවට ඇතුළු වී ඉහළ බලය තුලින් එන්ඩව්ඩ් වීම වැළඳගැනීමයි. යේසුස් ක්‍රිස්තුස්වහන්සේගේ කරුණාව තුළින් සහ අපගේ ගිවිසුම් වලට ගරු කිරීමෙන් අපගේ ධර්මිෂ්ට පවුල සමග සදාකාලයටම ජීවත් වීමේ ඉමහත් පොරොන්දුව අපට ලැබෙනවා.
දේවදූතයා ඵලය “ප්‍රාණයට වඩාත්ම ප්‍රීතිමත්” ලෙස හැඳින්වීම පුදුමයක් නොවේ. එය සැබවින්ම එසේමයි!
සත්‍යවන්තව සිටීමේ අභියෝගය
අප සියල්ලන්ම ඉගෙනගෙන ඇති පරිදි, නැවත පිහිටුවන ලද සුභාරංචියේ වටිනා ඵල සුරැකීමෙන් පසුවද, ස්වාමීන් වන යේසුස් ක්‍රිස්තුස්වහන්සේට විශ්වාසවන්තව හා විශ්වාසවන්තව සිටීම තවමත් පහසු නැත. මෙම සම්මන්ත්‍රණයේදී බොහෝ වාර ගණනක් පවසා ඇති පරිදි, ගැලවුම්කරුවාණන්ගෙන් සහ උන්වහන්සේව අනුගමනය කිරීමේදී අප අත්විඳ ඇති ප්‍රීතිය හා අලංකාරයෙන් අපගේ හදවත් ඉවතට ඇදගැනීමට උත්සාහ කරන බාධා කිරීම් හා රැවටීම්, ව්‍යාකූලතා සහ කෝලාහල, පෙළඹවීම් සහ පරීක්ෂාවන්ට අපි දිගටම මුහුණ දෙමු.
මෙම විරුද්ධකාරයා නිසා, ලෙහිගේ සිහිනයට අනතුරු ඇඟවීමක්ද ඇතුළත් වේ! ගඟේ අනෙක් පැත්තේ ඇත්තේ සෑම වයස් කාණ්ඩයකම මිනිසුන් ඇඟිලි දික්කරමින්, සමච්චල් කරමින්, යේසුස් ක්‍රිස්තුස්වහන්සේගේ ධර්මිෂ්ටයන්ට සමච්චල් කරමින් සිටින ඉඩකඩ සහිත ගොඩනැගිල්ලකි.
යේසුස් ක්‍රිස්තුස්වහන්සේ හා උන්වහන්සේගේ සුභාරංචිය කෙරෙහි ඇති ඇදහිල්ල අපකීර්තියට පත්කිරීමට හා සමච්චලයට ලක්කිරීමට බලාපොරොත්තුවෙන්, ගොඩනැගිල්ලේ සිටින අය අණ පණත් පිළිපදින අයට සමච්චල් කරති. ඇදහිලිවන්තයන් වෙත එල්ල කරන ලද වාචික සැකයන් හා පිළිකුල නිසා, ඵල රස බැලූ සමහර අය තමන් පිළිගත් සුභාරංචිය ගැන ලැජ්ජාවට පත්වීමට පටන් ගනී. ලෝකයේ ව්‍යාජ රැවටීම් ඔවුන්ව පොළඹවයි; ඔවුන් ගසෙන් හා පලතුරෙන් ඉවත් වන අතර ශුද්ධලියවිලි වල වචන වලින් කියනවානම් “තහනම් මාර්ගවලට වැටී නැතිවී යයි.”
අද අපේ ලෝකය තුළ, සතුරාගේ ඉදිකිරීම් කාර්ය මණ්ඩලය අතිකාල වැඩ කරමින් විශාල හා ඉඩකඩ සහිත ගොඩනැගිල්ල කඩිමුඩියේ සාදමින් සිටී. අපගේ නිවෙස් ආවරණය කරන්නට බලාපොරොත්තුවෙන් මෙම ව්‍යාප්තිය ගඟ හරහා පැතිරී ඇති අතර, දර්ශකයන් සහ සමච්චල් කරන්නන් ඔවුන්ගේ අන්තර්ජාල මෙගාෆෝන්වල දිවා රෑ නොබලා හඬ නගති.
සභාපති නෙල්සන් මෙසේ විස්තර කළා: “විරුද්ධකාරයා ඔහුගේ ප්‍රයත්න හතර ගුණයකින් වැඩිකරමින් සාක්ශියන් කඩාකප්පල් කර, ස්වාමින්වහන්සේගේ කාර්යට බාධා කරයි.” ලෙහිගේ වචන අපි මතක තබාගනිමු: “නමුත් අපි ඔවුන්ට සවන් නොදුන්නෙමු.”
අප බිය විය යුතු නැතත්, අප පරෙස්සම් විය යුතුයි. සමහර අවස්ථාවලදී, අපගේ ආත්මික සමතුලිතතාවය ඉහළ නැංවීමට කුඩා දේවලට පුළුවන්. කරුණාකර ඔබේ ප්‍රශ්න, අනුන්ගේ අපහාස, ඇදහිලිවන්ත නැති මිතුරන් හෝ අවාසනාවන්ත වැරදි සහ බලාපොරොත්තු සුන්වීම් නිසා ගසෙහි වටිනා ඵලයෙන් ලැබෙන මිහිරි, පිරිසිදු හා ආත්ම තෘප්තිමත් ආශිර්වාද වලින් ඔබව ඉවත් කිරීමට ඉඩනොදෙන්න. ඔබගේ ඇස් සහ හදවත් ගැලවුම්කරුවාණන් වන යේසුස් ක්‍රිස්තුස්වහන්සේ හා උන්වහන්සේ තුළින් පමණක් ලැබෙන සදාකාලික ප්‍රීතියේ කේන්ද්‍රගත කර තබන්න.
ජේසන් හෝල්ගේ ඇදහිල්ල
ජුනි මාසයේදී මගේ බිරිඳ වන කැතී සහ මම ජේසන් හෝල්ගේ අවමඟුලට සහභාගි වුණා. ඔහු අභාවප්‍රාප්ත වන විට ඔහුගේ වයස අවුරුදු 48 ක් වූ අතර වැඩිහිටි ඝණපූර්ණ සභාපතිවරයෙකු ලෙස සේවය කළා.
ඔහුගේ ජීවිතය වෙනස් කළ සිදුවීමක් පිළිබඳ ජේසන්ගේ වචන මෙන්න:
“[වයස අවුරුදු 15 දී] මම කිමිදුම් අනතුරකට ලක්වුණා. … මගේ බෙල්ල කැඩී පපුවේ සිට පහළට අංශභාග රෝගියෙකු වුණා. මගේ කකුල්වල සම්පූර්ණ පාලනය සහ අත් දෙකේ අර්ධ පාලනයක් මට අහිමි වුණා. මට තවදුරටත් ඇවිදීමට, නැගී සිටීමට හෝ මා විසින්ම ආහාර ගන්නට නොහැකි වුණා. මට හුස්ම ගන්නවත් කතා කරන්නවත් අමාරු වුණා.”
“‘ආදරණීය [ස්වර්ගයේ] පියාණෙනි, ’මම අයැද සිටියා, ‘ මට මගේ දෑත් පමණක් තිබේ නම්, මට එය කළ හැකි බව මම දන්නවා. කරුණාක,ර පියාණෙනි, කරුණාකර. …
“… ‘මගේ පාද තියාගන්න, පියාණෙනි; මට මගේ අත් පාවිච්චි කරන්න දෙන්න.”’
ජේසන්ට කිසි විටෙකත් ඔහුගේ දෑත් වල භාවිතය හම්බුනේ නෑ. ඉඩකඩ සහිත ගොඩනැගිල්ලේ හඬවල් ඔබට ඇසෙනවාද? “ජේසන් හෝල්, දෙවියන්වහන්සේ ඔබේ යාච්ඤා වලට සවන් දෙන්නේ නෑ! දෙවියන්වහන්සේ ප්‍රේමණීය දෙවියෙක් නම්, උන්වහන්සේ ඔබව මේ ආකාරයෙන් අත්හරින්නේ කොහොමද? ක්‍රිස්තුස්වහන්සේ කෙරෙහි විශ්වාස කරන්නේ ඇයි? ” ජේසන් හෝල්ට ඔවුන්ගේ හඬවල් ඇසුණු නමුත් ඔහු ඒවාට අවනත වුණේ නෑ. ඒ වෙනුවට ඔහු ගසේ ඵල අනුභව කළා. යේසුස් ක්‍රිස්තුස්වහන්සේ කෙරෙහි ඔහු තුළ තිබූ ඇදහිල්ල සෙලවිය නොහැකි වුණා. ඔහු විශ්ව විද්‍යාලයෙන් උපාධිය ලබා, කොලෙට් කෝල්මන් සමඟ දේවමාළිගාවේ විවාහ වූ අතර ඔහු ඇයව විස්තර කළේ “ඔහුගේ ජීවිතයේ ආදරය” ලෙසයි. විවාහයෙන් වසර 16 කට පසු තවත් ප්‍රාතිහාර්යයක් වන ඔවුන්ගේ වටිනා පුත් කෝල්මන් උපත ලැබුවා.
ඔවුන්ගේ ඇදහිල්ල වර්ධනය වූයේ කොහොමද? කොලෙට් මෙසේ පැහැදිලි කළා: “අපි දෙවියන්වහන්සේගේ සැලැස්ම කෙරෙහි විශ්වාසය තැබුවා. එය අපට බලාපොරොත්තුවක් ලබාදුන්නා. අපි දැනගෙන හිටියා ජේසන් [අනාගත දවසක] සම්පූර්ණ වෙයි කියලා. … උන්වහන්සේගේ වන්දිගෙවීමේ පරිත්‍යාගය අපට අත්හැරීමට අවශ්‍ය වූ විට බලා සිටීමට අපට හැකියාව ලබාදෙන, ගැළවුම්කරුවෙකු වන දෙවියන්වහන්සේ අපට ලබාදී ඇති බව අපි දැන සිටියා.”
ජේසන්ගේ අවමංගල්‍ය උත්සවයට අදහස් දක්වමින් 10 හැවිරිදි කෝල්මන් පැවසුවේ ඔහුගේ පියා ඔහුට ඉගැන්වූයේ “ස්වර්ගික පියාණන්ට අපට සැලැස්මක් ඇති බවත්, පෘථිවි ජීවිතය ප්‍රීතිමත් බවත්, අපට පවුල් ලෙස ජීවත් විය හැකි බවත්ය. … නමුත්… අපට දුෂ්කර දේවලට මුහුණදීමට සිදු වන අතර අපි වැරදි කරන බවත්ය”
කෝල්මන් තවදුරටත් මෙසේ කිව්වා: “ස්වර්ගික පියාණන් තම පුත් යේසුස්වහන්සේව පොළොවට එව්වා. උන්වහන්සේගේ කාර්යය වූයේ පරිපූර්ණ වීමයි. මිනිසුන් සුව කිරීමයි. ඔවුන්ට ආදරය කිරීමයි. ඉන්පසු අපගේ වේදනාවන්, දුක් සහ පාප වෙනුවෙන් විඳවීමයි. ඉන්පසු උන්වහන්සේ අප වෙනුවෙන් මැරුණා.” ඉන්පසු කෝල්මන් මෙසේ එකතු කළා, “උන්වහන්සේ මෙය කළ නිසා, මට දැන් හැඟෙන ආකාරය යේසුස්වහන්සේ දන්නවා.”
“යේසුස්වහන්සේ මියගොස් දින තුනකට පසු, උන්වහන්සේගේ පරිපූර්ණ ශරීරයත් සමග නැවත ජීවතුන් අතර සිටියේය. මෙය මට වැදගත් වන්නේ… මගේ [තාත්තාගේ] ශරීරය පරිපූර්ණ වන අතර අපි පවුලක් ලෙස එකට සිටින බව මම දන්නා නිසයි.”
පසුව කෝල්මන් මෙසේ අවසාන කළා: “මම කුඩා කාලයේ සිට සෑම රාත්‍රියකම මගේ තාත්තා මට කිව්වා,‘ තාත්තා ඔයාට ආදරෙයි, ස්වර්ගික පියාණන් ඔයාට ආදරෙයි, ඔයා හොඳ කොල්ලෙක්.”
යේසුස් ක්‍රිස්තුස්වහන්සේ නිසා ප්‍රීතිය පැමිණේ
හෝල් පවුලට ප්‍රීතිය හා බලාපොරොත්තුව දැනෙන්නේ මන්දැයි සභාපති රසල් එම්. නෙල්සන් විස්තර කළා. ඔහු කිව්වා:
“අපට දැනෙන ප්‍රීතියට අපගේ ජීවිතයේ තත්වයන් හා අපගේ ජීවිතයේ කේන්ද්‍රය සමග එතරම් සම්බන්ධයක් නැත.
“අපගේ ජීවිතයේ අවධානය යොමුවී ඇත්තේ දෙවියන්වහන්සේගේ ගැලවීමේ සැලැස්ම හා යේසුස් ක්‍රිස්තුස්වහන්සේ සහ උන්වහන්සේගේ සුභාරංචියට විට, අපගේ ජීවිතයේ සිදුවෙමින් පවතින දේ හෝ සිදු නොවෙන දේ කුමක් වුවත් අපට ප්‍රීතිය අත්විඳිය හැකියි. ප්‍රීතිය පැමිණෙන්නේ උන්වහන්සේගෙන් සහ උන්වහන්සේ නිසායි. සියලු ප්‍රීතියේ උල්පත උන්වහන්සේයි.
“අපි ලෝකය දෙස බැලුවොත්, අපි කිසි විටෙකත් ප්‍රීතිය දැනගන්නේ නෑ. … “ප්‍රීතිය” යේසුස් ක්‍රිස්තුස්වහන්සේ ඉගැන්වූ පරිදි හිතාමතාම ධර්මිෂ්ට ජීවිතයක් ගතකිරීමට උත්සාහ කිරීමෙන් ලැබෙන ත්‍යාගයයි.”
ඔබ නැවත එන විට ඇති පොරොන්දුව
ඔබ කලක් ගසේ ඵල නොමැතිව සිටියා නම්, ගැලවුම්කරුවාණන්ගේ දෑත් සැමවිටම ඔබට දිගු කරන බවට කරුණාකර දැනගන්න. “පසුතැවිලි වී මා වෙතට එන්න” කියා උන්වහන්සේ ආදරයෙන් ඉල්ලා සිටිනවා. උන්වහන්සේගේ ඵල බහුල වන අතර සෑම විටම කන්නයේ තිබෙනවා. එය මුදලින් මිලදී ගත නොහැකි අතර අවංකවම එම ඵලයට ආශා කරන කිසිවෙකු ප්‍රතික්ෂේප කරනු ලැබෙන්නේ නෑ.
නැවත ගසට ගොස් ඵල රස බැලීමට ඔබ කැමතිනම්, ඔබේ ස්වර්ගික පියාණන්ට යාච්ඤා කිරීමෙන් පටන් ගන්න. යේසුස් ක්‍රිස්තුස්වහන්සේ කෙරෙහි සහ උන්වහන්සේගේ වන්දිගෙවීමේ පරිත්‍යාගය විශ්වාස කරන්න. “සෑම සිතුවිල්ලකදීම” ඔබ ගැළවුම්කාරයාණන් දෙස බලන විට, ගසේ ඵල නැවත වරක් ඔබ සතු වන අතර, ඔබේ රසයට රසවත්, ඔබේ ආත්මයට ප්‍රීති වන, “දෙවියන්වහන්සේගේ සියලු දීමනා අතරින් ශ්‍රේෂ්ටතමතම දේ” වනු ඇතැයි මම ඔබට පොරොන්දු වෙනවා.
සති තුනකට පෙර අද, කැතී සහ මම ලිස්බන් පෘතුගාල දේවමාළිගාවේ කැපවීමට සහභාගි වූ විට ගැලවුම්කරුවාණන්ගේ ඵලයේ ප්‍රීතිය පූර්ණ ලෙස ප්‍රදර්ශනය වුණා. ආගමික නිදහස ලැබීමත් සමග නැවත පිහිටුවන ලද සුභාරංචියේ සත්‍යතාවන් 1975 දී පෘතුගාලයට විවෘත වුණා. සභා, ක්ණ්ඩායම් හා සැතපුම් 1,000 (1600km) ට වඩා ලඟ දේවමාළිගාවක් නොමැති විට පළමුවෙන්ම ඵල රස බැලූ බොහෝ උතුම් සාන්තුවරයන් අප සමඟ ප්‍රීති වූයේ ගසෙහි වටිනා ඵල දැන් පෘතුගාලයේ ලිස්බන්හි ස්වාමීන්වහන්සේගේ නිවසේ බහුල වී ඇති නිසයි. ගැලවුම්කරුවාණන් කෙරෙහි හදවත් තබාගෙන සිටින මෙම පසුකාලීන සාන්තුවරයන්ට මා කෙතරම් ගෞරව කරනවාද.
ගැලවුම්කරුවාණන් මෙහෙම කිව්වා, “යමෙක් මා තුළෙහි පවතින්නේද, මම ඔහු තුළෙහි පවතිම්ද, ඒ තැනැත්තේ බොහෝ ඵල දරයි. මක්නිසාද මාගෙන් වෙන්ව කිසිවක් කරන්ට ඔබ සැමට බැරිය.”
අද උදෑසන ලොව පුරා සභාවේ සාමාජිකයන් අමතමින් සභාපති නෙල්සන් මෙසේ කිව්වා, “මාගේ ආදරණීය සහෝදර සහෝදරියනි, ඔබ යේසුස් ක්‍රිස්තුස්වහන්සේගේ ඉගැන්වීම් අනුගමනය කිරීමෙන් ලැබෙන ඵල වලට ආදර්ශයක්. ඉන්පසු ඔහු එකතු කළා; “මම ඔබට ස්තූති කරනවා! මම ඔබට ආදරෙයි.”
සභාපති නෙල්සන් අපි ඔබට ආදරෙයි.
මම අපගේ ආදරණීය සභාපතිවරයා මත රැඳී සිටින එළිදරව් කිරීමේ බලය පිළිබඳ ඇසින් දුටු සාක්ෂිකරුවෙක්. ඔහු දෙවියන්වහන්සේගේ අනාගතවක්තෘවරයා. පුරාණ ලෙහි මෙන්, සභාපති රසල් එම්. නෙල්සන්, ගස කරා පැමිණ ඵල ලබාගන්නා ලෙස දෙවියන්වහන්සේගේ පවුල වන අපට ආරාධනා කරනවා. ඔහුගේ උපදෙස් පිළිපැදීමට අපට නිහතමානිකම හා ශක්තිය ලැබේවා.
යේසුස් ක්‍රිස්තුස්වහන්සේ දෙවියන්වහන්සේගේ පුත්‍රයාණන් බව මම නිහතමානීව සාක්ෂි දරනවා. උන්වහන්සේගේ ප්‍රේමය, උන්වහන්සේගේ බලය හා උන්වහන්සේගේ කරුණාව සදාකාලික වටිනාකමක් ඇති සියල්ලම ගෙන එනවා. මම සාක්ෂි දරන්නේ යේසුස් ක්‍රිස්තුස්වහන්සේගේ නාමයෙන්, ආමෙන්.