Kom̧win M̧ōņōņō
Tōmak eo ad en jab mejkun ilo katak eo ilo gospel in em̧ōj an jepļaaktok an Jisōs Kraist eo ej tōlļo̧k bun̄ten nee ko need im letok m̧ōņōņō.
Ilo raan ko āliktata ilo mour eo An ilo mour in, Jisōs Kraist eaar jiron̄ Rijilōk ro An kōn matōrtōr ko im apan̄ ko renaaj iooni. 1 Ekar kōjem̧ļo̧k kōn kam̧ool in eļap: “Ilo laļ kom̧ij en̄taan: a kom̧win m̧ōņōņō; N̄a Iar bōk anjo̧ ioon laļ” (Jon 16:33). En̄in ej ennaan eo an Rilo̧mo̧o̧r n̄an aolep ajri ro nejin Jemedwōj Ilan̄. En̄in ej nuuj eo em̧m̧antata n̄an kōj kajjojo ilo mour wabanban ko ad.
“Kom̧win m̧ōņōņō” ekar barāinwōt juon kam̧ool ekar aorōk ilo laļ in eo me jerkakpeje Kraist ekar jilkinļo̧k Rijilōk ro An. “Eḷap kaeñtaan kōm,” Rijilōk Paul ekar tokālik jiron̄ Rikorint ro, “kom̧ij jan̄in obab, kom̧ij pok, a jan̄in jako kōjatdikdik, rej matōrtōre kōm kōm jab make iaam, rej jolaļļo̧k kōm, a kōm jab jako” (2 Korint 4:8–9).
Ruo taujin iiō ko tokālik jej barāinwōt “en̄taan ilo aolep jikin,” im jej barāinwōt aikuji ejja ennaan in wōt n̄an jab ebbwer ak jān m̧ōņōņō wōt. Ewōr juon an Irooj iakwe ejenolo̧k im n̄ūrbōktak n̄an leddik ro nejin raorōk. Ejeļā kōn kōņaan ko ami, aikuj ko ami, im mijak ko ami. Irooj ekajoor pōtata. Leke E.
Rikanaan Josep Smith eaar katakin bwe “jerbal ko, im karōk ko, im jibadbad ko an Anij rej jamin likjab, im ejjab maron̄ lōn̄ ejjeļo̧k tokjāer” (Katak im Bujen Ko 3:1). N̄an ro Nejin rej inepata, Irooj eaar letok kam̧ool kein reļļap:
“Lo, en̄in ej kallim̧ur eo an Irooj n̄an kom̧, O kom̧ ro rikarejera.
“Kōn menin, kom̧in m̧ōņōņō, im jab mijak, bwe N̄a Irooj Ij pād ippemi, im naaj jutak ippemi; im kom̧ naaj jeje kam̧ool kōn Eō, em̧ool Jisōs Kraist, bwe N̄aij eo Nejin Anij emour, bwe N̄a iaar, bwe N̄aij, im bwe N̄a inaaj itok” (Katak im Bujen Ko 68:5–6).
Irooj ej jutak epake kōj, im Ekar ba:
“Men eo Ij ba n̄an juon Ij ba n̄an aolep, kom̧in m̧ōņōņō, ajri reddik, bwe N̄aij pād ilubwijlimi, im Iaar jab eļļo̧k jān kom̧” (Katak im Bujen Ko 61:36).
“Bwe ālkin eļap en̄taan ej itok jeraam̧m̧an ko” (Katak im Bujen Ko 58:4).
Sister ro, Ij kam̧ool bwe kallim̧ur kein, raar waļo̧k ioļapļap in m̧atōrtōr ko im en̄taan ko an juon make, rej jerbal n̄an kom̧ ilo jekjek ko rōjorrāān ami rainin. Kallim̧ur kein raorōk im rej kakeememej kōjwōj bwe jen m̧ōņōņō im bōk lan̄lōn̄ ilo tarlep in gospel eo ilo ad bun̄ m̧aanļo̧k ilo apan̄ ko an mour wabanban.
Poktak ko im apan̄ ko rej en̄jake ko iminene kaki an mour wabanban. Jum̧ae ej juon m̧ōttan aorōk ilo karōk eo ekwojarjar n̄an jipan̄ kōj eddōkļo̧k, 2 im io̧lepen menin, ewōr ippān kam̧ool eo an Anij bwe ilo lale jum̧ae eo indeeo ejjamin naaj kōm̧m̧an bwe en anjo̧ iood. Kōn jipan̄ eo An im ad tiljek im kijenmej, jenaaj anjo̧. Āinwōt mour in eo rej m̧ōttan, aolep ikurbalōklōk ko rej an jidik wōt iien. Ilo aitwerōk ko me rekar kwaļo̧k juon tariņae ekauwōtata, būreejtōn eo an Amedka Abraham Lincoln ekar lo̧le ilo an kar kakeememej riron̄jak ro an kōn māletlet eo etto me “menin barāinwōt, enaaj jako.” 3
Ilo ami jeļā, apan̄ ko an mour in ko ij kōnono kaki—eo ekōm̧m̧an bwe en pen bwe jen m̧ōņōņō—jet iien ej itok n̄an kōj ilo men bajjōk ippāņ elōn̄ men ko jet, āinwōt an milien kiiō en̄taan kōn jet iaan elōn̄ jorrāān ko waļo̧k jān COVID-19 ajeded eo. Ejjeļo̧k oktak, ilo United States milien rej en̄taan ilo jidik iien kōn kōjdāt im aitwerōk me aolep iien rej āinwōt etal ippānļo̧k ekāālel ko an būreejtōn bōtaab iien in ekanooj lōn̄ iaam ro rōrūtto maron̄ keememej.
Ilo kōm̧m̧an ko ad make, elōn̄ iaad kajjojo rej apan̄ kōn jet iaan men ko rellōn̄ an mour in, āinwōt jeram̧ōl, kil, nan̄inmej, luuji jerbal ak inepata, an ajri ro bōt, m̧are ko renana ak jab m̧are, im jerawiwi—ko ad ak an ro jet’.
Aaet, ilo io̧lepen menin, ewōr ippād juon naan in kapilōk jān lan̄ bwe kom̧win m̧ōņōņō n̄an kappukot lan̄lōn̄ ilo pedped ko im kallim̧ur ko ilo gospel eo im leen jerbal ko ad. 4 Kapilōk jab in ekar iien otemjej āindein, n̄an rikanaan ro im n̄an kōjwōj aolep. Jejeļā menin jān en̄jake ko an ro raar bōk jerbal kein im̧aanļo̧k im ta eo Irooj ekar ba n̄an er.
Keememej bwe jekjek ko an Rikanaan Josep Smith. Eļan̄n̄e jej lale jān apan̄ ko ilo mour eo an, mour eo an ekar jerata, matōrtōr, inepata, an baam̧le būrom̧ōj, im em̧ool kar m̧ane. Ke eaar en̄taan jān kalbuuji, kōrā eo pāleen im ajri ro nejin im ro Rekwojarjar jet raar en̄taan eļap ke raar diwōjļo̧k jen Missouri.
Ke Josep eaar akweļap n̄an kōtļo̧k, Irooj ekar uwaak:
“Neju maan. Aenōm̧m̧an n̄an jetōb eo am; inebata im jorrāān kein am rej n̄an wōt jidik iien.
“Innām, eļan̄n̄e kwo naaj kijejetoiki em̧m̧an, Anij enaaj kotak eok ijo eutiej; kwo naaj anjo̧ ioon aolep rijum̧ae ro am” (Katak im Bujen Ko 121:7–8.
Kapilōk in an make, indeeo me ekar jipan̄ Rikanaan Josep n̄an dāpij wōt m̧ōņōņō eo an im iakwe eo im ettā eo an armej ro an. Ejja jekjek kein wōt raar kōkajoorļo̧k ritōl ro im bainiier ro me raar ļoor im maron̄ kōkajoorļok kom̧ barāinwōt.
Ļōmņak kōn membōr ro m̧okta! Elōn̄ im lōn̄ alen, aer diwōjļo̧k jān jikin n̄an jikin. Āliktata raar ioon apan̄ ko n̄an kajutak m̧oko im̧weer im Kabun̄ in ilo āne jem̧aden. 5 Ruo iiō tokālik baineeer ro m̧oktata raar tōkeakļo̧k ilo valley in Great Salt Lake, baineer ro eaar apan̄ aer mour ilo jikin eo. Enan̄in aolep membōr ro raar itok wōt ilo iaļ eo kijoon toļ ko ak en̄taan n̄an bōk kein jipan̄ ko. Aaet ritōl ro im membōr ro raar kōjatdikdik im m̧ōņōņō wōt.
Men̄e Rikwojarjar ro rekar jab kajutak m̧ōko im̧weer, ilo Oktoba 1849 kweilo̧k eo eļap, juon jarlepju eļap in mijinede ro rekar jilkinļo̧k er n̄an Scandinavia, France, Germany, Italy im South Pacific. 6 Men̄e raar ioon būrom̧ōj ak raar etal wōt im kadedeļo̧k men ko reļļap. Jilu iiō tokālik, bar 98 kar bar kūr n̄an jino aiintok Israel. Juon iaan ritōl ro an Kabun̄ in ekar ba bwe mijen kein “ekkā aer, jab lukkuun aetok, emaron̄ 3 ļo̧k n̄an 7 iiō enaaj to tata jabdewōt em̧m̧aan enaaj jako jen baam̧le eo an.” 7
Sister ro, Būreejtōnji eo Kein Kajuon ej ļōmņak kōn apan̄ ko ami. Kōm̧ij iakwe kom̧ im jar kōn kom̧. Ilo ejja tōre in wōt, emakijkij am leļo̧k kam̧m̧oolol bwe apan̄ ko ad ilo kanniōk—jenolo̧k jān m̧akūtkūt in laļ ko, kijeek ko, ibwijleplep ko, im hurricane ko—ekkā aer iddik jāņ ko im̧aad raar jelm̧ai.
Ilo apan̄ kein, kam̧ool eo ekwojarjar ej iien otemjej “kom̧in m̧ōņōņō, bwe Inaaj tōlļo̧k kom̧. Aelōn̄ in kiin̄ eo ej ami im kōjeraam̧m̧an ko ie rej ami, im m̧weiie ko an indeeo rej ami” (Katak im Bujen Ko 78:17–18. Elmen an menin waļo̧k? Elmen an kar waļo̧k n̄an baineer ro? Elmen an naaj waļo̧k n̄an kōrā ro an Anij rainin? Kōn ad ļoor kanaan in, “aor ko an hell rej jamin anjo̧ ņae kom̧,” Irooj eaar ba kōn Revelesōn ilo Eprōļ 1830. “Aaet,” E eaar ba, “… Irooj Anij enaaj kajjeplōklōk kajoor ko an marok jān imami, im kōm̧m̧an bwe lan̄ ko ren wūdiddid n̄an em̧m̧an eo ami, im aiboojoj an etan” (Katak im Bujen Ko 21:6). “Jab mijak, bwij jidikdik in sip; kōm̧m̧an em̧m̧an; laļ im hell ren koba ņae kom̧, bwe eļan̄n̄e kom̧ ej ekkal ioon Aō ejm̧aan, rej jamin anjo̧” (Katak im Bujen Ko 6:34).
Ippān kallim̧ur eo an Irooj jej “kotak būru[wōd] im m̧ōņōņō” (Katak im Bujen Ko 25:13), im “kōn bōro eo elem̧ōņōņō im im paoktok ko rem̧ōņōņō” (Katak im Bujen Ko 59:15), jej wōnm̧aanļo̧k ilo iaļen bujen in. Elōn̄ iaad rejjab ioon kālet ko reļļap, āinwōt etal jen m̧ōko im̧ōd im etal n̄an juon jikin jab jeļā kake. Jokāālet ko ad eļap wōt aer ilo jekjek ko ad raan otemjej in mour, ak āinwōt an kar Irooj jiron̄ kōj, “Kom̧in jar m̧ōk ilo kōm̧m̧an em̧m̧an, bwe kom̧ij likūt pedped in juon jerbal eļap. Im jān men ko reddik ej jebarļo̧k men eo eļap.” (Katak im Bujen Ko 64:33).
Ewōr kajoor ejjeļo̧k jemļo̧kin ilo katak eo an gospel eo kar jepļaaktok an Jisōs Kraist. Tōmak eo ad ejjab mejkun ilo katak ej tōlļo̧k bun̄ten nee ko need im letok m̧ōņōņō. Ej kōmeramļo̧k kōļmenļo̧kjeņ ko ad im letok kajoor im leke ilo kōm̧m̧an ko ad. Tōl im meram in im kajoor in rej kallim̧ur in menin letok ko jaar būki jān Jemedwōj Ilan̄. N̄an meļeļe im ļoor pedped in katak ko ilo mour ko ad, ekoba menin letok eo an ukweļo̧k, jemaron̄ in kom̧in m̧ōņōņō ilo ad kōjparok kōj make ilo iaļ in m̧aanļo̧k n̄an mejen kajjik eo ad—ippān doon im mour ilo aiboojoj eo eutiejtata ippān jined im jemed Ilan̄.
Elder Richard G. Scott eaar ba, “Komaron̄ jelm̧ae eļap apan̄ ko.” “Jet iien remaron̄ kajoor, ak eddo, me kwomaron̄ en̄jake aer eddo jen kajoor eo am. Jab jelm̧ae laļin make. ‘Kwōn lōke Irooj kōn aolepān būruom̧, im kwōn jab atartar ioon jeļāļo̧kjeņ eo am̧’ [Jabōn Kōnnaan Ko 3:5]. … Ekar baj wōt bwe mour en pen, ejjab bwe kwon likjab, ak kwon maron̄ anjo̧ jeni.” 8
Ekar m̧ōttan karōk eo an Aniij Jemed im Nejin, Jisōs Kraist, eo ij kam̧ool, ij jar bar jenaaj aolep jibadōkļo̧k mejen kajjik eo ad ilan̄, ilo etan Jisōs Kraist, amen.