Dahme Atail Sounkomouro Ketin Wiahiongehr Kitail?
E ketin wiadahr mehkoaros me kesempwal ong atail seilok nan mour wet ong wasa me sansal nan pilahn en Samatail Nanleng.
Nan ehu mihting en ni soutik en ehu Rahnkaunop ni ehu kapokon en steik sounpar kei samwalahr, I tuhong lih emen me nda kempoakepahko pekier re en pwuredo sarawi mwurin sounpar tohto kei me e sohla iang sarawi, ahpw liho sohte kak medewehda kahrepen eh pahn pwuredo. Pwehn kangoange liho, I nda, “Ni ahmw medewe mehkoaros me Sounkomouro wiahionguhkehr, ke pahn ahneki kahrepe tohto pwehn pwuredo iang sarawi oh papah Ih.” I lusikihda en liho pasapengo, Dahme E ketin wiahiongiehier?
Dahme Sises ketin wiahiongehr emenemen kitail? E ketin wiadahr mehkoaros me kesempwal ong atail seilok nan mour wet ong wasa me sansal nan pilahn en Samatail Nanleng. I pahn koasoia ire pahiou me sansal nan pilahno. Nan me pwukat koaros, Sapwellime Ieros, Sises Krais, me wia pahson en ehuehu ire pwukat. Me kamwakidada mepwukat koaros iei limpoak en Koht, me mwerediong nan mohngiong kan en serihkan; kahrehda, ih me keieu anahnepe laud nan pwungen mehkoaros (1 Nephi 11:22).
I.
Mwohnte Rahn Sarawi en Ihster, e wia ansou mwahu en koasoia duwen Iasada en Sises Krais. Iasadao sang mehla me wia kakehlepen en emen emen kitail atail pwoson. E kalaudehla wehwehn atail padahk, kamwakid atail wiewia, oh koapworopwor nan atail mour kohkohdo.
Pwehki kitail kamehlele Pwuhk Sarawi oh Pwuhken Moromon kawehweda duwen Iasada en Sises Krais, kitail pil pwungki padahk kaselel kei me pid duwen iasadahn aramas koaros me kin kouson pohn sampah wet.1 Sises ketin padahngkiher, “Pwehki ei momour kumwail pahn pil momour” (Sohn 14:19). Oh Sapwellime Wahnparonko padahngki me “me melahr kan pahn iasadahng mour me solahr kak mehla” oh “me pahn mwerpeseng pahn kieweklang ni me sohte pahn mwerpeseng” (1 Korint 15:52, 54).
Ahpw Iasadao kihong kitail mehkoat me laudsang kamehlel pen mour sohte pwurehng mehla. E wekidala mwomwen atail kin kilang mour wet.
Iasadao kihong kitail kawehwe mwahu oh kakehlail pwehn powehdi kasongosong kan en nan mour wet me kitail oh irail me kitail kin poakong kin sohpai. E kihong kitail mwomwen atail kin kilang soitar kan en paliwaratail, mwahlielitail, de atail madmadau kan me kitail kolokol sang ni atail ipwidi de alehda erein atail wie momour. E kihong kitail kehl pwehn powehdi pahtou kan, sopweida kan, oh lingeringer. Pwehki kitail kamehlele me kitail pahn iasada, kitail ese me soitar en nan mour pwukat oh uhpene kan sohte pahn werei.
Iasadao pil kihong kitail kahrepe kehlail ehu pwehn kapwaiada kosonned akan en Koht nan erein atail mour kan. Ni atail pwourda sang mehla oh douluhlang atail kadeik lapo me kohkohmpe wiawiher, kitail anahne iang warehng ale kapai me keieu kaselel nin duwen inouo ong me iasada kan.2
Me pil patehng, inou en Iasadao kak iangahki ehu ansou mwahu en patehng tohn atail peneinei--atail pwoud, serihkan, pahpa/nohno, oh --kadaudokatail--met wia ehu kangoang kehlail en kapwaiada atail pwukoahn peneinei kan nan mour wet. E pil sewese kitail en kin poakpene nan mour wet oh e kansenamwahuwi kitail ansou me emen me kitail kin poakpokeo mehla. Kitail ese me katohrohrpeseng pwukat nan mour wet sohte werei, oh kitail kasik me kitail pahn tuhpene ansou kohkohdo. Iasadao kihong kitail koapworopwor oh kehlail en kanengama ni atail kin awiawi. E pil kaunopohng kitail en ahneki eimah oh wahu en sohpai pein atail mehla--mehda ma mehla wet me karuwaru.
Kahrepe pwukat koaros en Iasadao wia kisehn pasapeng keieu ong peidek wet Dahme Sises Krais ketin wiahiongehr kitail?
II.
Ong pali moron en kitail, ansou mwahu en ale mahkpen dipatail kan me wia kahrepe keieu en Tomw en Sises Krais. Nan kaudek kitail kin ni wahu koulki:
Ketin kakerehdi Sapwellime nta mwakelekel ni soh isepe;
E ketkihda Sapwellime ieias ni soh isepe,
Tohnmetei soh dipe ehu,
Pwehn doarehla sampa ehu me melahr.3
Atail Sounkomour oh Soundor powehdi kalokolok mwuledek pwehn wiahla ehu tohnmetei ong dihp kan en aramas koaros me pahn koluhla. Tohnmetei en tomw wet meirongkihla me keieu kaselel--sihmpwul me mwakelekel--ong me suwed me keieu kouwahlap--dihp kan en sampa pwon. E langahda wenihmw ong kitail en widen sang dipatail kan pwe kitail en kak pwurehng pedelong pahn silahngin Koht, Samatail Soutuk. Wenihmw wet wie langalang ong seri en Koht koaros. Nan kaudek kitail kin koulki:
I kapingki eh kak ketidihdo sang nan mwaole sarawi
Pwehn doarehla aramas emen me inenen aklapalap oh pohnmwahso duwehte ngehi,
Pwe en pil ketikido sapwellime limpoak mwuledek ong soangen aramas duwehte ngehi.4
Kahrepe kouwahlap oh mwuledek me Tomw en Sises Krais ketin wia pahsonda pohn limpoak en Koht ong emenemen kitail. E katengehdi Sapwllime kalohk me kesempwal en mour kan--en aramas koaros--me inenen laud pahn silahngin Koht (Doctrine and Covenants 18:10). Nan Pwuhk Sarawi, Sises Krais ketin kawehwe duwen limpoak en Samatail Nanleng: “Pwe iei duwen Koht eh ketin loalloale sampa, me e ketikihdohki sapwellime Iehros, pwe mehmen me kin pwosonla ih en dehr salongala, a en ahneki mour soutuk” (Sohn 3:16). Nan kaudial kapw atail Soundor Sises Krais ketin kalohkihda me pwehki Ah ketin poakong sampa me e ketikihdahki pein sapwellime ieias, pwe koaros me kamehlele en kak wiahla seri en Koht kan (Doctrine and Covenants 34:3).
Eri, kitail kak pwuriamweiki atail wadek nan Pwuken Mormon, “Pil ehu Kadehde pen Sises Krais,” kaimwsengkihla padahk me pwehn “unsekla” oh “kesepwilda rehn Krais” kitail anahne “poakohng Koht ki [atail] kehl, lamalam oh kehl unsek?” (Moroni 10:32–33). Sapwellime pilahno me pahsonki limpoak anahne pil alahlda ki limpoak.
III.
Dahnge kan me atail Sounkomour Sises Krais, ketin wiahiongehr kitail? Sang nan padahk kan en Sapwellime soukohpko oh sang Sapwellime rongamwahuo, Sises ketin padahkihongehr kitail duwen pilahn en komour. Pilahn wet iangahki Kepikipiko, kahrepen mour, katep kan en uhpene, oh kisakis en saledek en pilipil. E pil ketin padahkihongehr kitail kosonned akan oh inou kan me kitail anahne kapwaiada oh tiahk sarawi kan me kitail anahne ale pwehn pwurehng lel rehn atail pahpa/nohno kan en nanleng.
Nan Pwuhk Sarawi kitail kin wadek Sapwellime padahk kan, “Ngehi kamarainpen sampah: meh men me pahn idawehn ie sohte pahn alu nan rotorot, ahpw pahn ahniki marain en mour” (Sohn 8:12). Oh nan kaudial kapw kitail wadek, Kilang, Ngehi Sises Krais, … marain ehu me sohte kak rirla nan rotorot (Doctrine and Covenants 14:9). Ma kitail idawehn Sapwellime padahk kan, E pahn ketin kamarainda atail ahl nan mour wet oh koasonehdi dewatail nan mour kohkohdo.
Pwehki E poakohng kitail, E ketin kangoangei kitail en medemedewe Ih, kaidehn dipwisou kan en nan mour wet. Sapwellime padahk lapo me pid pwreht en mour, Sises ketin padahngki me kitail sohte anahne patehng irail kan me kin poakohng dipwisou kan en sampa--dipwisou kan me kin kamaur aramas pohn sampa ahpw sohte kin kakairda mour soutuko.5 Ni en Sises ketin luklukei kitail pwurehng oh pwurehng oh pwurehng, “Idawehn ie.”6
IV.
Kaimwsekla, Pwuken Mormon padahngki me kisehn Sapwellime Tomwo, Sises Krais “ketin lokolong[kiehr] medek oh kahpwal kan oh songosongen kasongosong koaros; oh pwe mahseno en kak pweida me mahsani e pahn ketikihda weirek kan oh kapelsalehd akan en sapwellime aramas (Alma 7:11).
Dahme kahrehda atail Sounkomouro lokolongki songosongen kahpwal en mour pwukat? E pahn ketikihda powe arail luwet kan, pwe nan kapehde en ketin audaudiki kupwur kalahngan, nin duwen paliwar, pwe en mwahngi nin duwen paliwar mwomwen eh pahn ketin sowese sapwellime aramas akan nin duwen arail luwet kan (Alma 7:12).
Atail Sounkomouro kehn oh mwahngi atail kasongosong kan, atail kahpwal kan, atail mongmedek kan, oh atail lokolok kan, pwe E ketin pein ale mepwukat koaros me wia kisehn Sapwellime Tomwo. Irehn pwuhk sarawi teikan pil kadehde mepwukat. Kadehde Kapw kalohkihda, “Eri met, e kakehr ketin sewese irail kan me kin ale songosong, pwehki pein ih ketin iangehr ale songosong sang ni sapwellime lokolok” (Ipru 2:18). Aiseia padahngki, “Kumwail dehr masak; pwe I kin ieiang kumwail: … I pahn kin kakehlakei kumwail; oh. sewesei kumwail” (Aiseia 41:10). Koaros me kin lokolongki songosongen kalokolok kan en mour wet anahne tamataman me atail Sounkomouro pil alehier soangen medeko, oh pwehki Sapwellime Tomwo E ketikihong emen emen kitail kehlail en ale mepwukat.
Soukohp Joseph Smith kapatapene ire pwukat koaros nan kesiluhn atail Irehn Pwoson: Se kamehlel me pwehki Tomw en Krais, aramas koaros kak komourla, sang ni peikiong kosonned akan oh tiahk sarawi kan en Rongamwahuo.
Dahme Sises Krais ketin wiahiongiehier? liho idek. Nan pilahn en Samatail Nanleng, E ketin kapikada nanleng kan oh sampa (Doctrine and Covenants 14:9) pwe kitail en kak ahneki koahiek nan mour wet pwehn rapahki dewatail sarawio. Kisehn pilahn en Sahmo iei, Iasadahn Sises Krais powehdier mehla pwe emenemen kitail en powehdi mehla pwe en alehda mour soutuk. Tohnmetei en tomw en Sises Krais kihong kitail ansou mwahu en koluhkihla dipatail kan oh pwurala mwakelekel nan dewatail nanleng. Sapwellime kosonned akan oh inou kan kasalehiong kitail ahlo, oh Sapwellime prihsduhd kihda mweimwei en wia tiahk sarawi kan me kesempwal pwehn lel nan dewatail. Oh atail Sounkomouro kupwurki ale kamedek en mour koaros oh kahpwal kan pwe En kak mwahngi mwomwen kakelakai kitail nan atail kahpwal kan.
Sises Krais ketin wiadahr mepwukat koaros pwehki E ketin poakohng seri en Koht koaros. Limpoak me pahsone mepwukat koaros, oh e tepda sang ni tapio. Koht mahsanihong kitailehr nan kaudial kapw me e ketin kapikada … ohl oh lih, nin duwen mwomwe … ; oh ketikihong ira kosonned akan pwe ira en kin poakohng oh papah ih” (Doctrine and Covenants 20:18–19).
I kadehdeki mepwukat koaros oh kapakap pwe kitail koaros pahn tamataman dahme atail Sounkomouro ketin wiahiongehr emenemen kitail oh pwe kitail koaros pahn poakohng oh papah Ih, ni mwaren Sises Krais, amen.