Kev Tsim Nyog Tsis Yog Kev Zoo Tag Nrho

Los ntawm Bradley R. Wilcox

Pab Cuam thib Ob hauv Koom Haum Tub Hluas Pawg Tuam Thawj Tswj Hwm

Thaum nej xav tias nej twb poob ntau zaus es tsis xav siv zog ntxiv, cia li nco ntsoov Khetos txoj Kev Theej Txhoj thiab Nws txoj kev tshav ntuj uas muaj peev xwm pab tau los yeej muaj tiag tiag.

Muaj ib zaug kuv tau xa xov rau kuv tus ntxhais thiab kuv vauv siv kuv lub xov tooj hais lub suab hloov ua ntawv. Kuv hais tias, “Hais rau neb, Kuv hlub neb.” Nkawd twb txais cov lus no, “Ntxub neb. Tsis hlub neb.” Xav tsis thoob uas yooj yim npaum li no kom tsis to taub ib zaj lus zoo siab uas yus xav xa mus. Tej lub sij hawm ntshe Vajtswv tej zaj lus txog kev hloov siab lees txim thiab kev tsim nyog zoo li no.

Ib txhia ua yuam kev xav hais tias peb tsis tas hloov siab lees txim. Vajtswv qhia tias peb yuav tsum hloov siab lees txim.¹ Yog li ntawd Vajtswv puas hlub peb thaum peb ua txhaum? Nws yeej hlub! Nws hlub peb zoo tag nrho. Kuv hlub kuv cov xeeb ntxwv, txawm lawv zoo li cas los xij, tiam sis qhov no tsis txhais hais tias kuv tsis xav kom lawv hloov ua neeg zoo npaum li lawv muaj peev xwm ua. Peb zoo li cas los Vajtswv hlub peb, tiam sis yog vim Nws hlub peb Nws tsis xav cia peb nyob li ntawd tas li xwb.² Kev loj hlob raws li tus Tswv qhia yeej yog lub hom phiaj ntawm lub neej no.³ Kev hloov siab yog lub ntsiab ntawm Yexus Khetos txoj Kev Theej Txhoj. Tsis yog tias Khetos muaj peev xwm muab peb sawv rov los, ntxuav peb kom huv, nplij peb lub siab, thiab kho peb zoo xwb, Nws kuj muaj peev xwm muab peb hloov los ua neeg zoo li Nws ntxiv.⁴

Ib txhia ua yuam kev xav tias kev hloov siab lees txim yog qhov yus ua ib zaug xwb. Vajtswv qhia tias, ib yam li Thawj Tswj Hwm Russell M. Nelson tau qhia, “Kev hloov siab lees txim … yog ib tug txheej txheem.”⁵ Txoj kev hloov siab lees tixm thiab kev zoo los lawm yuav siv me ntsis sij hawm thiaj li ua tau,⁶ yog li ntawd qhov uas yus tso kev txhaum tseg⁷ thiab qhov uas yus “tsis muaj siab xav ua phem ntxiv lawm, tiam sis ua zoo kom tsis tu ncua mus li”⁸ yeej yuav tsum ua tas yus lub neej.⁹

Lub neej no yeej zoo li txoj kev mus hla teb chaws. Peb yeej mus tsis txog qhov chaw peb xav mus yog sam roj ib zaug xwb. Peb yuav tsum rov qab sam roj ntau zaus. Kev txais lub cim nco txog yeej zoo li yus mus rau lub tsev sam roj. Thaum peb hloov siab lees txim thiab rov qab khi lus, peb cog lus tias peb yuav txaus siab ua raws li cov lus txib, thiab Vajtswv thiab Yexus Khetos foom pub tus Vaj Ntsuj Plig Dawb Huv rau peb.¹⁰ Los yog hais tias, peb cog lus tias peb yuav nyiaj mus tom ntej, thiab Vajtswv thiab Khetos cog lus tias yuav sam roj rau peb.

Ib txhia ua yuam kev tias lawv tsis tsim nyog koom ua ke ua raws li txoj moo zoo vim lawv tsis tau tso txhua yam phem tseg lawm. Vajtswv yeej qhia tias kev tsim nyog tsis yog kev zoo tag nrho.¹¹ Kev tsim nyog yog kev ua siab ncaj thiab kev sim ua ntxiv. Peb yuav tsum tsis txhob dag rau Vajtswv, cov thawj coj pov thawj hwj, thiab lwm tus uas hlub peb,¹² thiab peb yuav tsum siv zog ua raws li Vajtswv cov lus txib thiab tsis txhob tso tseg thaum peb rov qab ua txhaum.¹³ Txwj Laug Bruce C. Hafen hais tias yog peb xav muaj Khetos tej cwj pwm “qhov uas peb ua siab ntev thiab nyiaj mus ntev ntxiv yeej yog qhov tseem ceeb dua li qhov peb yog neeg zoo tag nrho.”¹⁴ Tus Tswv tau hais tias “tau muab tej txiaj ntsim [ntawm tus Ntsuj Plig] ntawd los kom pab rau cov uas hlub kuv thiab ua raws li tag nrho kuv tej lus txib, thiab rau tus uas nrhiav kev ua li ntawd.”¹⁵

Ib tug tub hluas hu ua Damon sau hais tias, “Thaum kuv loj hlob tuaj kuv pheej saib duab liab qab. Kuv yeej ib txwm txaj muag vim kuv ua tsis taus zoo.” Txhua zaus Damon ua yuam kev, ua rau nws khuv xim heev nws thiaj li txiav txim tias nws tsis tsim nyog txais kev tshav ntuj los sis Vajtswv txoj kev zam txim. Nws hais tias: “Kuv txiav txim tias tsim nyog uas kuv xav phem txog kuv tus kheej txhua lub sij hawm. Kuv xav tias Vajtswv ntxub kuv vim kuv tsis txaus siab khwv ua hauj lwm thiab kov yeej qhov teeb meem no. Kuv yuav ua zoo rau ib lub lim tiam thiab tej lub sij hawm ib lub hlis, ces kuv yuav rov qab ua phem thiab xav tias, ‘Kuv yeej yuav zoo tsis txaus, yog li ntawd ua cas kuv ho xav sim ntxiv?’”

Muaj ib zaug thaum zoo li no Damon hais rau nws tus thawj coj pov thawj hwj tias, “Tej zaum kuv yuav tsum tsis txhob tuaj ntxiv rau lub koom txoos. Kuv tsis xav ua ib tug neeg siab dag.”

Nws tus thawj coj teb tias: “Koj tsis yog ib tug neeg siab dag vim muaj ib yam phem uas koj xav kov yeej. Koj yog ib tug neeg siab dag yog tias koj dag txog qhov ntawd los sis hais rau koj tus kheej tias lub Koom Txoos muaj teeb meem vim xav kom koj ua raws li ib txoj kev cai siab dhau. Qhov uas koj hais ncaj txog tej yam koj ua thiab sim mus tom ntej tsis yog tej uas ib tug neeg siab dag ua. Qhov ntawd txhais tias koj yog ib tug thwj tim.”¹⁶ Ces tus thawj coj no hais Txwj Laug Richard G. Scott lus, uas qhia tias, “Tus Tswv pom tej kev qaug zog txawv ntawm Nws pom kev ntxeev siab. … Thaum tus Tswv hais txog kev qaug zog, Nws yeej hais los ntawm Nws txoj kev hlub tshua.”¹⁷

Qhov no ua rau Damon muaj kev cia siab. Nws paub tias Vajtswv tsis hais tias, “Damon rov qab ua yuam kev ib zaug ntxiv.” Tiam sis, tej zaum Nws hais tias, “Saib Damon tau ua zoo npaum li cas.” Tus tub hluas no tau tsum tsis txhob saib hauv av vim nws poob ntsej muag los sis ntsia rau lwm yam vim nws xav nrhiav kev daws nws tus kheej. Nws ntsia ntsoov saum ntuj kom tau Vajtswv txoj kev pab.¹⁸

Damon hais tias, “Tib lub sij hawm uas kuv tau thov Vajtswv ua ntej yog thaum kuv xav thov zam txim, tiam sis tom qab ntawd kuv kuj thov kom tau txoj kev tshav ntuj—Nws ‘lub hwj chim txhawb nqa’ [Bible Dictionary, “Grace”]. Kuv yeej ib txwm tsis tau thov li ntawd. Niaj hnub no kuv tsis siv sij hawm pes tsawg ntxub kuv tus kheej vim kuv tau ua txhaum thiab kuv siv sij hawm ntau hlub Yexus rau tej yam uas Nws tau ua lawm.”

Xav txog qhov uas ua nyuaj rau Damon ntev li no, ces ua rau peb to taub tias yeej yuav tsis pab nws yog nws niam nws txiv thiab cov thawj coj hais rau nws tias “txhob ua ib zaug ntxiv” sai dhau los sis tau lam tsa ib txoj kev cai kom nws thiaj li yuav “tsim nyog.” Tiam sis, lawv pib cuab hom phiaj me uas nws ua taus. Lawv twb muab txoj kev xav tias nws yuav ua taus zoo tag nrho tso tseg thiab tsom ntsoov rau nws txoj kev ua zoo zuj zus tuaj, Damon thiaj li vam meej zuj zus thiab tsis poob tas li.¹⁹ Zoo ib yam li cov neeg Leehais, nws kawm tias nws yuav “vam meej … nplua mias ntau ntxiv.”²⁰

Txwj Laug D. Todd Christofferson tau hais tias: “Yog peb xav ua ib yam dab tsi loj [heev], tej zaum peb yuav tsum muab faib thiaj li ua taus ib qho me ntsis ntxiv rau ib qho txhua hnub. … Yog peb yuav coj cwj pwm ua tej yam tshiab thiab ncaj ncees los sis kov yeej tej yam tsis zoo los sis kov yeej tej kev muaj yees ces [feem ntau] peb yuav tsum siv zog hnub no es siv zog tag kis ces ua nag kis li ntawd, tej zaum yuav tsum ua ntau hnub, los sis ntau lub hlis thiab ntau xyoo. … Tiam sis peb muaj peev xwm ua vim peb thov tau Vajtswv … kom txais tau txoj kev pab uas peb xav tau txhua hnub.”²¹

Cov kwv tij thiab cov muam, phaum mob COVID-19 yeej ua nyuaj rau txhua leej txhua tus, tiam sis qhov uas tau muab neeg sib cais yeej nyuaj heev rau cov neeg uas xav kov yeej tej cwj pwm phem. Cia li nco ntsoov tias nej muaj peev xwm hloov, kev hloov siab lees txim yog ib tug txheej txheem, thiab kev tsim nyog tsis yog kev zoo tag nrho. Qhov tseem ceeb tshaj plaws, cia li nco qab tias Vajtswv thiab Khetos txaus siab pab peb tam sim no.²²

Ib txhia ua yuam kev xav tias Vajtswv tos ntsoov yuav pab peb tom qab peb hloov siab lees txim. Vajtswv yeej qhia tias Nws yuav pab peb thaum peb tab tom hloov siab lees txim. Nws muab Nws txoj kev tshav ntuj rau peb “txawm peb coj ncaj ncees npaum li cas los yog.”²³ Txwj Laug Dieter F. Uchtdorf tau hais tias: Vajtswv tsis yuav cov neeg uas zoo tag nrho. Nws xav yuav cov uas txaus siab pab [Lus Qhuab Qhia thiab Kev Khi Lus 64:34], thiab Nws yuav muab lawv hloov los ‘ua neeg zoo tag nrho dhau los ntawm Yexus Khetos’ [Maulaunais 10:32–33].”²⁴

Neeg coob twb tu siab vim lawv tsis sib raug zoo nrog lawv tsev neeg lawm ua nyuaj rau lawv ntseeg tias Vajtswv muaj kev khuv leej thiab Nws ua siab ntev. Nyuaj rau lawv xav tias Vajtswv yog ib Leej Txiv uas pab peb thaum peb xav tau²⁵ thiab paub “muab tej yam uas zoo ntau dua rau cov uas thov nws.”²⁶ Nws txoj kev tshav ntuj tsis yog ib lub nqi zog rau cov neeg tsim nyog xwb. Yeej yog “ntuj txoj kev pab” uas Nws pub rau peb kom pab peb hloov los ua neeg tsim nyog. Tsis yog ib lub nqi zog rau cov neeg ncaj ncees xwb. Yog “vaj txiaj ntsim dag zog” uas Nws pub kom pab peb hloov los ua neeg ncaj ncees.²⁷ Tsis yog peb taug kev mus rau Vajtswv thiab Yexus Khetos. Peb yeej nrog Nkawd taug kev.²⁸

Nyob thoob plaws lub Koom Txoos no, cov hluas hais Koom Haum Ntxhais Hluas thiab Pawg Pov Thawj Hwj Aloos ob zag ntsiab lus. Nyob hauv New Zealand, Spain, Ethiopia, thiab Nyij Pooj Teb, cov ntxhais hluas hais tias, “Kuv xav tau lub txiaj ntsim kev hloov siab lees txim.” Nyob hauv Chile, Guatemala, thiab Moroni, Utah, cov tub hluas hais tias, “Thaum kuv siv zog ua hauj lwm, muab siab rau ntseeg, hloov siab lees txim, thiab ua zoo dua txhua hnub, kuv yuav ua neeg tsim nyog txais cov koob hmoov hauv lub tuam tsev thiab txoj kev xyiv fab ntawm txoj moo zoo uas nyob mus ib txhis.”

Kuv cog lus tias cov koob hmoov thiab txoj kev xyiv fab muaj tseeb tiag thiab nej cov uas ua raws li cov lus txib thiab “rau tus uas nrhiav kev ua li ntawd” yeej yuav txais.²⁹ Thaum nej xav tias nej twb poob ntau zaus es tsis xav siv zog ntxiv, cia li nco ntsoov Khetos txoj Kev Theej Txhoj thiab Nws txoj kev tshav ntuj uas muaj peev xwm pab tau los yeej muaj tiag tiag.³⁰ Nws “ob txhais caj npab ntawm kev hlub tshua tseem ncav rau lawv.”³¹ Nws hlub nej—hnub no, 20 xyoo tom ntej, thiab tas mus ib txhis. Los ntawm Yexus Khetos lub npe, amees.

Lus Cim

1. Saib Yauhas 3:3–6; Mauxiyas 27:25.

2. Saib Neal A. Maxwell, “I Will Arise and Go to My Father,” Ensign, Cuaj Hlis Ntuj 1993, 65–68.

3. Saib Hilamas 3:21.

4. Saib 2 Kauleethaus 5:17; Mauxiyas 3:19.

5. Russell M. Nelson, “Peb Muaj Peev Xwm Ua Zoo Dua thiab Ua Neeg Zoo Dua,” Liahona, Tsib Hlis Ntuj 2019, 67.

6. Saib Mauxiyas 26:30; Maulaunais 6:8; Lus Qhuab Qhia thiab Kev Khi Lus 1:31–32.

7. Saib Lus Qhuab Qhia thiab Kev Khi Lus 58:43.

8. Mauxiyas 5:2.

9. Saib Yakhauj 6:11; Amas 15:17.

10. Saib 2 Nifais 31:20; Mauxiyas 18:10; Lus Qhuab Qhia thiab Kev Khi Lus 20:77.

11. Saib Lukas 15:11–32; Loos 3:23–25. Txwj Laug Gerrit W. Gong hais tias, “Qhov uas peb tsim nyog tsis txhais hais tias peb zoo tag nrho” (“Always Remember Him,” Liahona, Tsib Hlis Ntuj 2016, 109). Hais rau cov tub ntxhais kawm ntawv nyob hauv Brigham Young University, Thawj Tswj Hwm Cecil O. Samuelson piav hais tias: “Tej zaum ib tug yuav tsim nyog tiam sis nws tseem muaj tej yam tsis zoo tag nrho. … Kev tsim nyog yeej tseem ceeb, tiam sis tsis yog kev ua neeg zoo tag nrho” (“Be Ye Therefore Perfect” [Brigham Young University kev sib ntsib hawm Vajtswv, Cuaj Hlis Ntuj 6, 2011], 1, 5, speeches.byu.edu). Txwj Laug Marvin J. Ashton hais tias: “Kev hloov ua neeg tsim nyog yog ib tug txheej txheem, thiab kev ua neeg zoo tag nrho yog ib txoj kev uas mus ib txhis li. Peb yeej ua tau neeg tsim nyog kom txais tau tej txiaj ntsim es peb tsis tas ua neeg zoo tag nrho” (“On Being Worthy,” Ensign, Tsib Hlis Ntuj 1989, 20).

12. Txwj Laug Neil L. Andersen tau hais kom tib neeg “ua ncaj tsis tu tsis tseg” thiab qhia hais tias, “Kev ua ncaj txhawb nqa yus sab ntsuj plig thiab yuav tsum ua li ntawd kom hloov siab lees txim tiag tiag li” (The Divine Gift of Forgiveness [2019], 193, 48).

13. Txwj Laug Neil L. Andersen sau hais tias, “Tej lub sij hawm peb yuav ua yuam kev, tiam sis thov kom peb yuav txo hwj chim txhos caug thov Vajtswv thiab rov qab mus taug txoj kev yog lawm” (The Divine Gift of Forgiveness, 208).

14. Bruce C. Hafen, The Broken Heart (1989), 186.

15. Lus Qhuab Qhia thiab Kev Khi Lus 46:9; ntxiv qhov uas ntawv qaij.

16. Saib Lus Qhuab Qhia thiab Kev Khi Lus 10:67.

17. Richard G. Scott, “Kev Muaj Zog Los ntawm Yexus Khetos txoj Kev Theej Txhoj,” Liahona, Kaum Ib Hlis Ntuj 2013, 83.

18. Saib Lus Qhuab Qhia thiab Kev Khi Lus 6:35–37.

19. Thawj Tswj Hwm Russell M. Nelson hais tias: “Tus Tswv tsis xav tias peb yuav ua neeg zoo tag nrho nyob rau lub sij hawm no hauv peb txoj kev vam meej mus ib txhis li. Tiam sis Nws xav tias peb yuav ua neeg huv ntxiv zuj zus mus” (“We Can Do Better and Be Better,” 68; ntxiv qhov uas ntawv qaij).

20. Mauxiyas 21:16.

21. D. Todd Christofferson, “Recognizing God’s Hand in Our Daily Blessings,” Liahona, Ib Hlis Ntuj 2012, 28–29; kuj saib D. Todd Christofferson, “The Divine Gift of Repentance,” Liahona, Kaum Ib Hlis Ntuj 2011, 38–41.

22. Saib Yausuas 1:5, 9; Yaxayas 41:10; Mathais 11:28–30; 2 Nifais 28:32; Lus Qhuab Qhia thiab Kev Khi Lus 24:8.

23. D. Todd Christofferson, “Muaj Kev Ywj Siab Xaiv Tas Mus Li, Kom Ua Tau Lawv tus Kheej,” Liahona, Kaum Ib Hlis Ntuj 2014, 19.

24. Dieter F. Uchtdorf, “Five Messages That All of God’s Children Need to Hear” (Brigham Young University kev sib ntsib hawm Vajtswv, Yim Hli Ntuj 17, 2021), 3, speeches.byu.edu.

25. Saib Ethaws 1:42–43.

26. 3 Nifais 14:11.

27. Dieter F. Uchtdorf, “Lub Txiaj Ntsim Tshav Ntuj,” Liahona, Tsib Hlis Ntuj 2015, 107; kuj saib 2 Nifais 2:3; Yakhauj 4:7. Thawj Tswj Hwm Russell M. Nelson tau hais tias, “Tus Tswv tsis xav tias peb yuav muaj kev ntseeg zoo tag nrho ua ntej peb txais tau Nws lub hwj chim uas zoo tag nrho” (“Khetos Sawv Rov Los Lawm; Kev Ntseeg Nws Yuav Muab cov Roob Txav Tau,” Liahona, Tsib Hlis Ntuj 2021, 102).

28. Saib 2 Kev Cai 2:7; Mathais 1:23; Lus Qhuab Qhia thiab Kev Khi Lus 100:12. Txwj Laug Robert E. Wells sau hais tias: “Peb Leej Txiv Saum Ntuj Ceeb Tsheej tsis yog ib tug Vajtswv uas tsis quav ntsej txog peb, thiab Yexus yeej tsis yog ib tug uas tuag lawm xwb. Nkawd yeej muaj nqi heev rau peb niaj hnub nim no tshaj lwm lub sij hawm” (The Mount and the Master [1991], 26).

29. Lus Qhuab Qhia thiab Kev Khi Lus 46:9.

30. Saib Sheri Dew, Amazed by Grace (2015), 4.

31. 3 Nifais 9:14.