Kev Ntseeg Kom Thov ces Kev Ntseeg Kom Ua
Kev ntseeg Yexus Khetos yog qhov uas yuav qhib kev rau peb txais tau kev tshwm sim txog qhov tseeb.
Kuv cov kwv tij thiab cov muam, kuv zoo siab rau lub cib fim no hais lus rau nej hauv tuas Saturday hmo ntuj ntawm lub tuam rooj sab laj. Thaum nws hais lus qhib lub rooj sab laj no tag kis no, Thawj Tswj Hwm Russell M. Nelson hais tias “kev tshwm sim txog tej lus nug hauv nej lub siab yuav ua rau nej nco ntsoov thiab txais lub nqi zog los ntawm lub rooj sab laj no.” Yog tias nej tsis tau thov kom tus Vaj Ntsuj Plig Dawb Huv txhawb pab nej mloog tej lus uas tus Tswv xav kom nej mloog hauv ob hnub no, kuv caw nej ua li ntawd tam sim no.1 Kuv twb thov kom txais tau txoj koob hmoov ntawd thaum kuv npaj txais kev tshwm sim rau lub sij hawm no. Kuv thov kom nej yuav txais kev tshwm sim ntawd los ntawm Vajtswv.
Txoj kev txais kev tshwm sim los ntawm Vajtswv yeej ib txwm tsis tau hloov txij thaum Adas thiab Evas los. Tus txheej txheem no zoo ib yam rau tus Tswv txhua tus tub qhe txij thaum chiv keeb mus txog niaj hnub no. Yeej zoo ib yam rau peb. Txhua zaus yuav tsum muab siab rau ntseeg.2
Joseph Smith muaj kev ntseeg txaus thov Vajtswv, vim nws ntseeg tias Vajtswv yuav teb nws tej lus thov. Vajtswv txoj kev teb tau hloov lub ntiaj teb. Joseph xav paub lub koom txoos twg yuav ntxuav nws tej kev txhaum mus. Cov lus teb tau txhawb nqa nws kom pheej nug tej yam ntxiv thiab ua raws li kev tshwm sim tsis tu tsis tseg.3
Tej zaum yuav zoo li no rau nej nyob hauv lub rooj sab laj. Nej muaj tej lus nug uas nej xav kom Vajtswv teb. Nej muaj kev ntseeg txaus kom cia siab tias tus Tswv yuav teb nej dhau los ntawm Nws cov tub qhe.4 Nej yuav tsis muaj cib fim hais lus nrov kom thov cov hais lus teb nej, tiam sis nej muaj cib fim thov nej Leej Txiv Saum Ntuj.
Kuv paub tias nej yuav txais tej lus teb nyob ntawm seb nej xav tau dab tsi thiab nej tau npaj siab npaum li cas. Yog tias nej xav tau tej lus teb uas tseem ceeb rau nej los sis lwm tus txoj sia nyob mus ib txhis, ces nej haj yam yuav txais tau lus teb. Tiam sis, tej zaum nej yuav txais—ib yam li Joseph Smith—tej lus teb kom ua siab ntev.5
Yog nej txoj kev ntseeg Yexus Khetos ua rau nej lub siab mos siab muag dhau los ntawm Nws txoj Kev Theej Txhoj, nej yuav haj yam txawj hnov tus Ntsuj Plig tej lus ntxhi teb nej tej lus thov. Lub suab yau yau—lub suab uas muaj tiag tiag—yeej meej thiab kuv txawj to taub hauv kuv lub siab thaum kuv muaj siab xav ua raws li tus Tswv lub siab nyiam. Kev txo hwj chim ua rau kuv xav li no “Tsis txhob ua raws li kuv lub siab nyiam, tiam sis ua raws li koj lub siab nyiam xwb.”6
Tus txheej txheem txais kev tshwm sim no yog vim li cas nej yuav hnov cov uas hais lus hauv lub rooj sab laj no qhia txog Khetos cov lus qhuab qhia.7 Peb yuav txais kev tshwm sim npaum li peb xav muaj Yexus Khetos cov lus qhuab qhia hauv peb lub siab thiab npaum li peb xav ua raws li cov lus qhuab qhia ntawd.
Nyob hauv Phau Ntawv Maumoos Nifais tau qhia peb tias Yexus Khetos yog tus yawm sij kom txais tau kev tshwm sim txog qhov tseeb thiab kom paub tias peb taug kev mus rau tus Cawm Seej. Nifais tau sau tej lus no puag thaum ub ua ntej Yexus Khetos yuav yug los hauv lub ntiaj teb no:
“Cov tim tswv hais lus los ntawm tus Vaj Ntsuj Plig Dawb Huv lub hwj chim; yog li ntawd, lawv hais Khetos tej lus. Yog li ntawd, kuv hais rau nej tias, mloog ntsoov Khetos tej lus; vim saib seb, Khetos tej lus yuav qhia nej txhua yam uas nej yuav tsum ua.
“Yog li ntawd, nim no tom qab kuv tau hais tej lus no, yog hais tias nej tsis to taub tej ntawd ces yog vim nej tsis nug, thiab nej tsis khob; yog li ntawd, Vajtswv tsis coj nej los rau hauv qhov kaj, tiam sis nej yeej yuav piam sij nyob hauv qhov tsaus ntuj.
“Vim saib seb, kuv hais rau nej ntxiv tias yog nej yuav nkag mus rau hauv txoj kev, thiab txais yuav tus Vaj Ntsuj Plig Dawb Huv, nws yuav qhia rau nej txhua yam uas nej yuav tsum ua.
“Saib seb, nov yog Khetos txoj lus qhuab qhia, thiab yuav tsis muaj cov lus qhuab qhia ntxiv kom txog tom qab nws yuav ua nws tus kheej tshwm los rau nej ntawm cev nqaij daim tawv. Thiab thaum nws yuav ua nws tus kheej tshwm los rau nej ntawm cev nqaij daim tawv, tej yam uas nws yuav hais rau nej los nej yuav tsum mob siab ntso ua.”8
Tus Tswv yuav hais tej yam dhau los ntawm Nws cov tub qhe rau peb niaj hnub no thiab thaum yav tom ntej. Nws yuav qhia txog tej yam peb yuav tsum ua.9 Tus Cawm Seej yeej yuav tsis qw nrov nrov kom txib peb mus. Ib yam li Nws tau qhia Eliyas:
“Tus Tswv teb Eliyas hais tias, Koj cia li tawm mus sawv saum ncov roob tab meeg kuv. Tus Tswv txawm hla los mus thiab ua cua daj cua dub ntsawj tej pov roob tawg pleb zom zaws thiab tej pob zeb tawg dawb vog, tiam sis tus Tswv tsis nyob hauv cov cua ntawd. Tom qab cua tu lawm, txawm muaj av qeeg, tiam sis tus Tswv tsis nyob hauv qhov av qeeg ntawd thiab:
“Tom qab av qeeg tas txawm muaj hluav taws, tiam sis tus Tswv tsis nyob hauv cov hluav taws ntawd li thiab. Ces thaum cov hluav taws dhau lawm, txawm muaj ib lub suab hais yau yau tuaj.”10
Peb yuav hnov lub suab ntawd yog peb ntseeg tus Tswv. Yog peb muaj kev ntseeg txaus, thaum peb thov Vajtswv peb yuav muaj siab xav mus thiab ua txhua yam uas Vajtswv hais.11 Peb yuav muaj kev ntseeg txaus kom paub tias tej yam Nws xav kom peb ua yuav foom koob hmoov rau lwm tus thiab peb yuav hloov ua neeg dawb huv vim Nws hlub peb.
Vim peb txoj kev ntseeg Yexus Khetos yuav coj peb mus thov Leej Txiv, kev ntseeg ntawd kuj yuav ua rau peb lub siab mos muag txaus kom peb hnov Nws tej lus qhia thiab muaj kev zoo siab xav ua raws li Nws hais ntawd. Ces peb yuav muaj kev xyiv fab hu zaj nkauj no, tsis hais thaum tes hauj lwm nyuaj heev los yog: “Txoj dej num zoo, kuv tus Vajtswv.”12
Thaum peb muaj Yexus Khetos cov lus qhuab qhia hauv peb lub siab, peb hlub cov uas tsis tau muaj kev ntseeg Yexus Khetos txaus los sis cov uas tab tom ua nyuaj rau lawv muaj kev ntseeg. Yeej nyuaj rau peb ua raws li tus Tswv cov lus txib yog peb tsis muaj kev ntseeg thiab tso siab rau Nws. Thaum ib txhia tsis ntseeg tus Cawm Seej ntxiv li lawm, tej zaum lawv yuav tawm tsam Nws tej lus ntuas, hu qhov phem ua qhov zoo thiab qhov zoo ua qhov phem.13 Yog peb xav dim kev txhaum no, peb yuav tsum txais kev tshwm sim raws nraim li tus Tswv thiab Nws cov yaj saub tej lus qhia.
Cov kwv tij thiab cov muam, yuav tsum muaj kev ntseeg kom mloog tus Tswv tej lus txib. Yuav tsum muaj kev ntseeg Yexus Khetos kom ua hauj lwm pab lwm tus. Yuav tsum muaj kev ntseeg mus qhia Nws txoj moo zoo rau cov neeg uas tsis hnov tus Ntsuj Plig lub suab los sis tej zaum yuav xyeej tsis ntseeg nej tej zaj xov. Tiam sis thaum muab siab rau ntseeg Khetos—thiab ua raws li Nws tus yaj saub tej lus—kev ntseeg yuav loj tuaj mus thoob plaws lub ntiaj teb. Vim peb muaj txuj ci technology, tej zaum nyob rau ob hnub no Vajtswv cov me nyuam coob tshaj yav tas los yuav hnov thiab to taub Vajtswv txoj lus.
Vim cov mej zeej ntseeg ntxiv nov yog tus Tswv lub Koom Txoos thiab lub nceeg vaj hauv lub ntiaj teb, lawv them ib feem kaum ntau zog thiab pub nyiaj rau cov uas xav tau kev pab, txawm yog lawv kuj raug tej kev sim siab thiab. Vim lawv ntseeg tias Yexus Khetos yog tus uas hu lawv ua hauj lwm, cov tub txib ntxhais txib nyob thoob plaws lub ntiaj teb tau kov yeej tej teeb meem uas los ntawm phaum mob, es lawv ua siab loj thiab zoo siab ua tej ntawd. Thiab vim lawv siv zog ntxiv, lawv txoj kev ntseeg tau loj tuaj ntxiv.
Kev tawm tsam thiab kev sim siab yeej ib txwm yog tej uas pab yus txoj kev ntseeg loj tuaj. Qhov no yeej ib txwm muaj tseeb, qhov tseem ceeb yog txij thaum tau muab tus Tswv lub Koom Txoos Txum Tim Rov Qab Los.14
Qhov uas Thawj Tswj Hwm George Q. Cannon hais thaum ub los muaj tseeb niaj hnub no thiab yuav muaj tseeb txog thaum tus Tswv rov qab los kom coj Nws lub Koom Txoos thiab Nws cov neeg: “Kev ua raws li Txoj Moo Zoo ua rau [cov neeg] paub tus Tswv thiab nrog Nws sib raug zoo. Ua rau tib neeg hauv lub ntiaj teb no sib raug zoo nrog tus uas tau Tsim peb nyob saum ntuj ceeb tsheej. Ua rau tib neeg tso siab plhuav rau tus uas Muaj Hwj Chim Tag Nrho thiab Nws txoj kev txaus siab mloog thiab teb tib neeg tej lus thov. Thaum yus raug kev sim siab thiab tej yam nyuaj heev ces txoj kev tso siab plhuav no muaj nqis tshaj plaws. Thaum tib neeg raug teeb meem, muaj tej xwm txheej ceev thiab txhua tus poob siab lawm, thaum [cov neeg] tau cov koob hmoov uas los ntawm kev ua raws li Txoj Moo Zoo, ces lawv sawv hauv ib qho chaw ruaj nrees; ib lub pob zeb uas yuav tsis txav hlo li.”15
Kuv hais lus tim khawv tias lub pob zeb ntawd yog peb zaj lus pov thawj tias Yexus yog tus Khetos, nov yog Nws lub Koom Txoos uas Nws coj, thiab Thawj Tswj Hwm Russell M. Nelson yog Nws tus yaj saub.
Thawj Tswj Hwm Nelson thov thiab txais tus Tswv tej lus coj kev. Nws coj yam ntxwv rau kuv txog kev txiav txim siab tias nws yuav ua raws li tus Tswv qhia. Tag nrho cov neeg uas yuav hais lus, thov Vajtswv, los sis hu nkauj hauv lub tuam rooj sab laj ntawm Nws lub Koom Txoos no kuj tau txiav txim siab lawv yuav ua raws li tus Tswv qhia thiab.
Kuv thov kom cov neeg nyob thoob plaws lub ntiaj teb uas mloog los yog saib lub rooj sab laj no yuav paub tias tus Tswv hlub lawv. Leej Txiv Saum Ntuj Ceeb Tsheej tau teb kuv tej lus thov kom kuv yuav paub me ntsis txog tus Cawm Seej txoj kev hlub nej thiab Nws txoj kev hlub Nws Leej Txiv Saum Ntuj Ceeb Tsheej, tus uas yog peb Leej Txiv Saum Ntuj Ceeb Tsheej.
Kuv ua tim khawv tias Yexus Khetos muaj txoj sia nyob. Nws yog peb tus Cawm Seej thiab peb tus Txhiv Dim. Nov yog Nws lub Koom Txoos. Nws yog tus coj. Nws tau nrog Nws Leej Txiv Saum Ntuj Ceeb Tsheej tshwm sim rau Joseph Smith pom nyob hauv ib koog ntoo hauv New York. Cov tub xa xov saum ntuj ceeb tsheej tau muab Yexus Khetos txoj moo zoo thiab Nws lub pov thawj hwj txum tim rov qab los.16 Los ntawm tus Vaj Ntsuj Plig Dawb Huv lub hwj chim, kuv paub tias qhov no muaj tseeb.
Kuv thov kom nej yuav txais kev ua tim khawv li no thiab. Kuv thov kom nej yuav thov Leej Txiv Saum Ntuj Ceeb Tsheej kom muaj kev ntseeg Yexus Khetos txaus ua raws li nej tej kev khi lus thiaj li muaj tus Vaj Ntsuj Plig Dawb Huv nrog nraim nej nyob. Kuv hlub nej thiab ua tim khawv li no los ntawm Yexus Khetos lub npe dawb ceev, amees.