Rov Qab Tso Siab Rau

Los ntawm Txwj Laug Gerrit W. Gong

Ntawm Pawg Kaum Ob tug Thwj Tim

Kev tso siab rau Vajtswv thiab lwm tus neeg coj tau lub ntuj cov koob hmoov los.

Muaj ib zaug thaum kuv tseem hluas, uas kuv xav txog kev khiav ntawm kuv tsev mus. Ua ib tug me nyuam tub, kuv xav tias tsis muaj neeg hlub kuv.

Kuv niam ua tib zoo mloog kuv lus thiab txhawb pab kuv. Kuv yeej nyob hauv ib lub tsev muaj kev nyab xeeb.

Nej puas tau xav tias nej tab tom khiav ntawm nej tsev mus? Feem ntau mas, khiav ntawm tsev mus txhais tau hais tias yus txoj kev tso siab twb puas los sis ploj tas—kev tso siab rau yus tus kheej, ib leeg rau ib leeg, rau Vajtswv. Thaum muaj teeb meem ntawm yus txoj kev tso siab, peb xav paub seb peb yuav ua li cas thiaj rov qab muaj chaw tso siab rau.

Hnub no kuv zaj xov yog li no, txawm peb tab tom los tsev los sis mus tsev, Vajtswv yeej los ntsib peb.¹ Nyob hauv Nws peb nrhiav tau kev ntseeg thiab ua siab loj, muaj tau tswv yim thiab kev paub kom rov qab tso siab rau. Tib yam li ntawd, Nws thov kom peb ib leeg muab chaw tso siab rau ib leeg, kom peb haj yam zam txim thiab txhob txiav txim rau peb tus kheej thiab rau lwm tus neeg, ces Nws lub Koom Txoos thiaj ua tau chaw nyob rau peb, tab txawm peb tab tom xub los rau hauv los sis tab tom rov qab tuaj xwb.

Kev tso siab yog ib yam ntawm txoj kev ntseeg. Vajtswv tseem ntseeg peb. Tab sis mas, tib neeg txoj kev tso siab yeej txawj puas thiab ploj mus thaum uas:

Ib tug phooj ywg, neeg nrog yus ua hauj lwm, los sis ib tug neeg uas peb tso siab rau yeej ua tsis ncaj, mob peb siab, los sis ua ib yam dab tsi tsis zoo rau peb lawm.²
Ib tug ntawm ib khub niam txiv ua tsis ncaj.
Tej thaum ib tug neeg uas peb hlub yuav tuag, raug mob, los sis muaj mob muaj nkees.
Thaum muaj ib lo lus nug ntawm txoj moo zoo, tej zaum ib yam uas peb tsis txaus siab rau ntawm lub Koom Txoos zaj liv xwm los sis lub Koom Txoos ib txoj kev cai, thiab ib tug neeg liam hais tias peb lub koom txoos zais ib yam dab tsi los sis tsis tau qhia qhov tseeb.

Tej zaum muaj dua lwm yam thiab, uas ua rau peb txhawj.

Tej zaum peb xav tias peb tsis tsim nyog nyob hauv lub Koom Txoos, tias peb tsis haum, los yog xav tias lwm tus neeg txiav txim rau peb.

Los yog, txawm peb twb ua txhua nrho los, txhua yam tsis tau mus zoo. Txawm peb twb nrog tus Vaj Ntsuj Plig Dawb Huv sib raug zoo lawm, peb tseem xav hais tias peb tsis paub tias Vajtswv muaj sia nyob los sis txoj moo zoo no muaj tseeb.

Niaj hnub no neeg coob xav rov qab tso siab rau tib neeg tej kev sib raug zoo thiab rau lub xam khoo.³

Thaum peb xav txog kev tso siab no, peb paub hais tias Vajtswv yog ib tug Vajtswv ntawm qhov tseeb thiab “dag tsis tau.”⁴ Peb paub hais tias qhov tseeb yog kev paub hais tias tej yam zoo li cas tiag tas sim no, yav tas los lawm, thiab rau yav tom ntej.⁵ Peb paub txog kev tshwm sim uas pheej los thiab yeej nyob hauv qhov tseeb uas tsis lam tau lam pauv vim lub neej no hloov ntau.

Peb paub hais tias thaum tib neeg tsis ua raws li lawv tej kev sib khi lus ces tej siab yuav tawg rhe. Nws hais tias “Kuv twb ua tej yam tsis zoo lawm,” “Koj puas yuav zam txim tau rau kuv?” Tej zaum niam thiab txiv yuav sib tuav tes, tseem cia siab hais tias yuav sib tso siab tau. Hauv lwm qhov mas, ib tug neeg uas raug kaw qhov taub xav hais tias, “Yog tias kuv twb ua raws li Lo Lus Txawj Ntse ces, kuv yeej yuav tsis raug kaw hauv no.”

Peb paub hais tias yuav muaj kev zoo siab li cas yog tias taug tus Tswv txoj kev sib khi lus no thiab tej hauj lwm hauv Nws lub Koom Txoos yog txoj kev caw peb los hnov hais tias Vajtswv tso siab rau peb thiab qhia tias nws hlub peb thiab lwm tus neeg. Cov mej zeej hauv lub Koom Txoos, nov kuj hais txog cov neeg laus uas tsis tau muaj khub, yeej ua hauj lwm hauv lub Koom Txoos thiab hauv peb tej koog zej zog.

Los ntawm kev tshoov siab los, ib tug npisov hu tej khub niam txiv hluas los ua hauj lwm pab zov me nyuam tom tshawj. Thaum xub thawj mas, tus txiv lam zaum tom ces kaum tsev, tsis pab thiab tsis muaj lub siab xav nyob ntawd. Nyob nyob ces, nws pib luag nyav rau cov me nyuam. Yav tom ntej ces, khub niam txiv ntawd muaj kev ris txiaj. Yav nram ntej, nkawd hais tias, tus poj niam yeej xav muaj me nyuam, tiam sis tus txiv tsis xav muaj. Nim no, txoj hauj lwm ntawd tau hloov nkawd thiab pab nkawd sib koom siab. Nws kuj coj kev zoo siab los rau nkawd txoj kev ua ib khub niam txiv thiab lub tsev vim muaj me tub me nyuam.

Hauv lwm lub nroog, ib tug niam hluas uas muaj me nyuam yaus thiab nws tus txiv xav tsis thoob thiab nyuaj siab tiam sis tseem pom zoo ua thaum lawv hu nws los uas Koom Haum Niam Tsev tus thawj tswj hwm. Tsis ntev tom qab ntawd, huab cua no heev ua rau cov fai fab tuag hauv thaj chaw ntawd, ces tej kiab khw tsis muaj khoom txaus sawv daws thiab tej vaj tej tsev no cuag li ib lub tub yees. Vim nkawd lub tsev muaj fai fab thiab cua sov, yim neeg hluas no tau cia ob peb tsev neeg thiab lwm cov neeg los nyob kom dhau plaws qhov cua daj cua dub ntawd.

Txawm muaj kev tso siab rau tiag tiag thaum peb muaj kev ntseeg ua tej yam uas nyuaj kawg. Kev ua hauj lwm thiab kev txi ua rau peb haj yam muaj cuab kav thiab hloov tau peb lub siab lub ntsws. Kev tso siab rau Vajtswv thiab lwm tus neeg coj tau lub ntuj cov koob hmoov los.

Tom qab ib tug txiv neej rau siab ntseeg twb mob khas xawj zoo los, txawm muaj ib lub tsheb los tsoo nws. Nws tsis tu siab rau nws tus kheej, nws tsuas thov Vajtswv hais tias, “Kuv yuav kawm dab tsi los ntawm qhov xwm txheej no?” Thaum pw hauv lub tsev kho mob, nws tau kev tshoov siab los hais lus rau ib tug nais maum uas txhawj txog nws tus txiv thiab cov me nyuam. Ib tug neeg mob tseem txais lus teb thaum nws tso siab rau Vajtswv thiab ncav tes mus pab lwm tus neeg.

Thaum ib tug txiv neej muaj teeb meem saib duab liab qab tseem tos sab nraum ceg txheem ntseeg ib tug thawj tswj hwm lubhoob kas, ceg txheem ntsseg tus thawj tswj hwm tab tom thov Vajtswv seb nws yuav pab tus txiv neej ntawd li cas. Nws txawm tau kev tshoov siab hais tias: “Qhib lub qhov rooj cia nws los hauv koj hoob.” Muaj kev ntseeg thiab tso siab hais tias Vajtswv yuav pab, tus thawj coj hauv lub pov thawj hwj ntawd qhib lub qhov rooj thiab khawm nkaus tus txiv neej ntawd. Nkawd ob leeg hnov kev hlub thiab kev tso siab rau Vajtswv ib thiab ib leeg rau ib leeg. Vim muaj zog li no, tus txiv neej thiaj tau pib hloov siab lees txim thiab hloov nws lub neej.

Txawm hais tias peb sawv daws nyias muaj nyias zaj los, txoj moo zoo tej ntsiab cai thiab tus Vaj Ntsuj Plig Dawb Huv yuav pab peb paub seb yuav tsum tso siab rau lwm tus neeg li cas thiab thaum twg. Thaum kev tso siab poob los sis puas lawm, yeej yuav muaj kev poob siab thiab kev tsis zoo siab; ces yus yuav tsum paub thaum twg tsim nyog muaj kev ntseeg thiab ua siab loj rov qab tso siab tau rau lwm tus neeg.

Tab sis mas, thaum hais txog Vajtswv thiab kev tshwm sim rau yus tus kheej, Thawj Tswj Hwm Russell M. Nelson qhia tias, “Nej tsis tas xav seb nej yuav tso siab taus rau leej twg.”⁶ Peb muaj peev xwm tso siab rau Vajtswv txhua lub caij. Tus Tswv paub peb thiab hlub peb zoo dua peb paub los sis hlub peb tus kheej. Nws txoj kev hlub tag nrho thiab paub txhij txhua ntawm lub caij tas los, niaj hnub nim no, thiab yav tom ntej ua rau Nws tej kev sib khi lus thiab kev cog lus muaj tseeb thiab yuav muaj raws li hais tseg tiag.

Tso siab rau yam uas cov vaj lug kub hais tias “nyob nyob ces.”⁷ Hais txog Vajtswv tej koob hmoov mas, nyob nyob ces, thaum yus rau siab ntseeg thiab mloog lus, peb thiaj yuav nrhiav tau qhov zoo thiab kev thaj yeeb nyab xeeb.

Tus Tswv nplij peb hais tias:

“Thaum tsaus ntuj muaj kev quaj ntsuag, tiam sis thaum kaj ntug muaj kev zoo siab.”⁸

“Muab nej tej kev nyuaj siab [tso rau] Tswv thiab cia siab rau nws txoj kev saib xyuas.”⁹

“Tsis muaj kev tu siab tus Tswv kho tsis taus.”¹⁰

Tso siab rau Vajtswv¹¹ thiab Nws tej txuj ci. Peb thiab peb txoj kev nrog lwm tus neeg sib raug zoo yeej hloov tau. Dhau ntawm tus Tswv Yexus txoj Kev Theej Txhoj, peb tso tau peb tej kev qias dub tseg thiab ua tau Vajtswv ib tug me nyuam uas, txo hwj chim, ua siab mos siab muag,¹² muaj kev ntseeg puv npo thiab tso siab rau nws. Thaum peb hloov siab lees txim, thaum peb lees peb tej kev txhaum thiab tso peb tej kev txhaum pov tseg, tus Tswv hais tias Nws tsis nco txog tej ntawd ntxiv li lawm.¹³ Tsis yog hais tias Nws hnov qab xwb, tiam sis, zoo nkaus li Nws txiav txim kom tsis txhob nco qab txog tej ntawd, thiab peb yuav tsum ua li ntawd thiab.

Tso siab rau Vajtswv txoj kev tshoov siab kom pab peb paub xaiv qhov zoo. Peb muaj cuab kav zam txim rau lwm tus neeg thaum txog caij thiab ua raws li tus Tswv hais tias peb yuav tsum ua,¹⁴ thaum peb tseem “txawj ntse ib yam li nab, thiab tsis tsis ua rau lwm tus raug mob ib yam li ib tug nquab.”¹⁵

Tej lub sij hawm mas thaum peb ua siab mos siab muag thiab ua tib zoo xav, thaum ntawd peb txais tau tus Vaj Ntsuj Plig Dawb Huv txoj kev nplij siab thiab kev coj kav.¹⁶ Txoj kev rau txim thiab kev zam txim tib si muaj qhov uas yus lees hais tias twb muaj ib qho yuam kev lawm. Feem ntau kev rau txim pheej hais txog yav tas los lawm. Es kev zam txim yog muaj kev cia siab rau yav tom ntej. “Qhov uas Vajtswv txib nws Leej Tub los rau hauv ntiaj teb no, tsis yog los txiav txim rau neeg ntiaj teb, tiam sis yog los cawm neeg ntiaj teb kom lawv dim lawv lub txim.”¹⁷

Tus Thwj Tim Pov Lauj nug hais tias, “Tsis muaj ib yam dab tsi yuav cais tau peb tawm ntawm Yexus Khetos txoj kev hlub?” Nws teb tias, “Kev tuag, los yog kev ua neej nyob, … los yog qhov siab, los yog qhov qis, … yuav cais tsis tau peb ntawm Vajtswv txoj kev hlub, tus uas yog Yexus Khetos peb tus Tswv.”¹⁸ Tab sis mas, muaj ib tug neeg uas txawj muab peb cais tawm ntawm Vajtswv thiab Yexus Khetos—thiab tus neeg ntawd twb yog peb ntag, peb tus kheej kiag. Yam li Yaxayas hais, “Nej tej kev txhaum muab nej cais tawm ntawm Vajtswv.”¹⁹

Vim muaj kev hlub thiab txoj kev cai uas los saum ntuj los, peb muaj kev lav ris rau tej yam uas peb xaiv ua thiab tej yam uas peb raug ntawd. Tiam sis peb tus Cawm Seej txoj kev hlub yeej “zoo tag nrho thiab nyob mus ib txhis.”²⁰ Thaum twg peb npaj rov los tsev, txawm peb “tseem nyob nrug deb los xij,”²¹ Vajtswv yeej npaj siab tos vim muaj kev khuv leej xav tos txais peb, muaj kev zoo siab muab qhov zoo tshaj plaws rau peb.²²

Thawj Tswj Hwm J. Reuben Clark hais tias, “Kuv ntseeg hais tias peb Leej Txiv Saum Ntuj Ceeb Tsheej xav cawm nws txhua tus me nyuam, … vim nws muaj kev txim lij thiab kev hlub tshua nws yuav muab qhov nqi zog zoo tshaj plaws rau peb raws li peb tej hauj lwm, thiab qhov fab ntxeev mas, kuv ntseeg hais tias nws yuav rau txim sib npaum li sib tau raws li txoj kev cai hais.”²³

Nyob saum tus ntoo khaub lig, peb tus Cawm Seej tseem taij thov Nws Leej Txiv hais tias “Txiv, thov koj zam txim rau lawv; rau qhov lawv tsis paub hais tias lawv ua dab tsi.”²⁴ Peb txoj kev ywj siab xaiv thiab kev ywj pheej txhais tau hais tias peb yuav tsum lav rau ntawm Vajtswv thiab peb tus kheej hais tias peb yog leej twg, peb paub dab tsi thiab tau ua li cas lawm. Muaj kev ris txiaj heev, vim peb muaj peev xwm tso siab rau Vajtswv txoj kev txim lij thiab kev hlub tshua uas zoo tag nrho kom los txiav txim seb peb xav thiab tau ua li cas.

Peb xaus ntawm qhov pib—nrog Vajtswv txoj kev hlub tshua thaum peb los tsev yuav cuag Nws thiab lwm tus neeg.

Nej puas nco qab Yexus Khetos zaj paj lug txog tus txiv neej uas muaj ob tug tub?²⁵ Ib tug tub khiav ntawm tsev thiab siv nws tej qub txeeg qub teg rau tej yam tsis tseem ceeb. Thaum nws nco qab lawm, tus tub no sim los tsev. Lwm tus tub, xav tias nws twb ua raws li txhua txoj lub txib “tau ntau xyoo no,”²⁶ tsis xav tos nws tus kwv los tsev.

Cov kwv tij thiab cov muam, nej puas kam xav hais tias Yexus tab tom thov kom peb yuav qhib peb lub siab lub ntsws, peb txoj kev to taub, kev khuv leej, thiab kev txo hwj chim, pom hais tias peb yeej zoo li ob tug tub ntawd tib si?

Ib yam li thawj tus tub los sis ntxhais, tej zaum peb yuav ua yuam kev thiab yav tom ntej mam li sim rov los tsev. Vajtswv tseem yuav tos txais peb.

Thiab zoo li lwm tus tub los sis ntxhais ntawd, Vajtswv tseem maj mam thov kom peb yuav zoo siab ua ke tos txais txhua tus neeg los tsev los cuag Nws. Nws caw peb kho peb tej pawg ntseeg, pawg sab laj, hoob kawm, thiab tej kev ua si yuav qhib rau sawv daws, ua ib qho chaw nyab xeeb—ib lub tsev xis nyob rau txhua leej txhia tus. Thaum ua siab zoo, sib to taub, thiab ib leeg saib ib leeg rau nqi, peb thov kom txhua leej txhia tus yuav txo hwj chim nrhiav tus Tswv thiab thov Vajtswv thiab pab muab Nws txoj moo zoo tej koob hmoov rau sawv daws.

Peb nyias muaj nyias txoj kev taug hauv lub neej no, tiam sis peb muaj cuab kav rov qab los cuag Vajtswv peb Leej Txiv thiab Nws Tib Leeg Tub thaum peb tso siab rau Vajtswv, ib leeg rau ib leeg, thiab rau peb tus kheej.²⁷ Yexus hu peb kom, “Tsis txhob ntshai, cia li ntseeg xwb.”²⁸ Ib yam li tus Yaj Saub Joseph ua, thov kom peb yuav tso siab plhuav rau peb Leej Txiv Saum Ntuj Ceeb Tsheej txoj kev saib xyuas.²⁹ Cov kwv tij, cov muam, cov phooj ywg es, thov kom nej yuav rov qab muaj kev ntseeg thiab kev tso siab plhuav—ib qho txuj ci uas Nws cog lus rau nej niaj hnub nim no. Los ntawm Yexus Khetos lub npe dawb ceev zoo, amees.