13:25

Na bobangi ya Klisto mpe nsango malamu na Ye

Na Mpaka Ulisses Soares

Ya Lisanga Likoki ya Bapostolo Zomi na Mibale

Tika ete bokundoli ya oyo miso na biso emonaki, mpe mitema na biso eyokaki ekolisa esengo na biso na libonza ya bomikabi ya Mobikisi.

Nazali na moninga moko ya malamu, ya mayele, molakisi asilisa kotangisa na eteyelo ya monene, mokomi monene, mpe moyekoli amipesa ya Yesu Klisto. Oyo akendaki na Mabele Esantu koleka mbala zomi na mibale kolanda makita, kotambwisa boluki ya kelasi, mpe kotambwisa mibembo. Na maloba na ye, ntango nyonso akendaki na mabele wapi Yesu atambolaki, asepelaka mpamba te ye ayekolaki eloko ya sika, kokamwa, mpe kitoko na tina ya Mobikisi, mosala na Ye ya kufa, mpe mboka na Ye ya bolingo. Bobangi moninga na ngai alakisaka ntango alobaka na ntina ya nyonso oyo ayekolaki na mabele masantu ezali kozwa basusu; baoyo bayokaki ye koloba bakokaki te kozanga komiyoka na esengo, mpe kokamwa ezalaki mpenza monene na makambo minene ye akokisaki mpe makambo matali kelasi na bomoi na ye.

Ntango nayokaki maye akutanaki na yango mpe nayokaki esengo na ye, nakanisaki na lolenge nini makamwisi ya molimo, mpo na koloba bongo, oyo tokoki koyoka mpo na liteya ya nsango malamu oyo Yesu Klisto ateyaki mpe bokeseni yango ekoki kosala na kimoyekoli na biso mpe na mobembo na biso na nzela ya bomoi ya seko. Esengo nazali kolobela ezali liyoki ya motema, bobangi, to kokamwa oyo baoyo nyonso batiaka bomoi na bango na kati ya Mobikisi mpe mateya na Ye mpe baoyo na komikitisa bazali kondima bozali na Ye na bomoi na bango. Lokola liyoki ya esengo, efulami na bopusi ya Molimo Mosantu, kopusa bosepeli ya lobiko na esengo etondisami ya malongi ya Klisto.¹

Makomi ezali na ndakisa mingi ya lolenge nini liyoki oyo ekoki komonisama. Profeta Yisaya, na ndakisa, atatolaki bozindo ya ya ye botondi epai na Nkolo na nzela na ye ya bosepeli na Ye.² Baoyo bayokaki Yesu koteya na sinagoga na Kapalanauma bakamwaki malongi na Ye mpe na nguya nini ateyaki yango.³ Ezalaki kaka liyoki moko oyo ekotaki na mosisa nyonso ya motema ya elenge Joseph Smith ntango atangaki na Biblia mwa milongo ya mokapo ya yambo ya Yakobo, oyo etindaki ye aluka bwanya ya Nzambe .⁴

Bandeko na ngai mibali mpe basi, ntango tozali solo na bobangi ya Yesu Klisto mpe nsango malamu na Ye, tokozala na esengo mingi, tokozala mingi kosepela na mosala ya Nzambe, mpe tokoyeba loboko na Nkolo na makambo nyonso. Lisusu, boyekoli na biso ya liloba ya Nzambe ezali na ndimbola mingi; bansambo na biso, mingi kati na mabanzo; bogumbameli na biso, mingi ya limemia; mosala na biso na bokonzi na Nzambe, mingi na molende. Misala nyonso oyo ekoti na molongo ya makambo oyo ezali misala ya Molimo Mosantu kozalaka mbala na mbala mingi kati na bomoi na biso.⁵ Bongo, litatoli na biso ya Mobikisi mpe ya nsango malamu na Ye ekokoma makasi, tokobatela Klisto na bomoi kati na biso,⁶ mpe tokotambwisa bomoi na misisa ya kotia misisa mpe ya kotongama kati na Ye, mpe totiami na kondima, … kotondisama na bozongisi matondo.”⁷ Ntango tozali kobika lolenge oyo, tokokoma makasi ya molimo mpe tokobatelama na esika ya kokweya na motambu ya bolembu ya molimo.

Bolembu ya lolenge oyo ezali komonisama na bobungisi esengo na biso moke moke ya komipesa mobimba na nsango malamu ya Nkolo. Yango ebandaka mingi mingi ntango tozali koyoka ete tosili kozwa boyebi mpe mapamboli nyonso esengeli mpo na esengo na biso na bomoi oyo. Komimona bato basila kokoka, soki nakoki koloba bongo, etindaka biso tomona ete makabo ya nsango malamu esili kozwama, mpe kowuta wana, tozali na likama ya kotala mpamba kozindisama na biso na motuya ya nsango malamu ya Yesu Klisto⁸ mpe mayokani tosali. Na nsuka, tozali kokende moke moke mosika na Nkolo; kolembisaka makoki na biso ya “Koyoka Ye,”⁹ kokomaka kokipe te mpe koyoka eloko te na bonene ya mosala na Ye. Ntembe na ntina ya bosolo ya litatoli tosila kozwa kala ekoti na mitu mpe mitema na biso, kokomisaka biso bato ya botawu na mimekano ya monguna .¹⁰

Pastele Aiden Wilson Tozer, mokomi akenda nsango mpe Moklisto ya makasi, akomaki, “Komimona bato bakoka ezali monguna ekomema na kufa ya bokoli nyonso ya molimo.”¹¹ Oyo ezali yango te esalamaki na Bato ya Nefi kala mingi te nsima ya mbotama ya Klisto? Bato “babandaki kokamwa moke moke na elembo moko to likamwa moko uta na lola,”kotiaka ntembe na oyo“[bozangi bondimi] nionso bayokaka mpe bamonaka.” Boye nde Satana “abomaki bango miso mpe amemaki bango mosika mpo na kondima ete malongi ya Klisto ezalaki bozoba mpe eloko ya mpamba.”¹²

Bandeko mibali mpe basi, na bolingo ya bobongi nie mpe ezanga nsuka mpe koyeba kibomoto na biso,¹³ Mobikisi asali nzela mpo na biso tokima kokweya na bozangi ntina ya molimo. Libiangi ya Mobikisi ezali kopesa biso ndimbola makasi, mingi mingi na kotala mokili wapi tozali kobika: “Yekola uta na ngai, mpe tiaka litoyi na maloba na ngai;; tambola kati na bosokemi ya Molimo na ngai, mpe okozwa kimia na ngai.”¹⁴ Ntango tondimi libiangi oyo uta na Mobikisi, tolakisi komikitisa na biso, mposa na biso ya koteyama, mpe elikya na biso ya kokoma lokola Ye.¹⁵ Libiangi oyo ezali lisusu na eteni ya kosalela Ye mpe kosalisa bana ya Nzambe na motema, makasi, mayele, mpe nkonzo na biso mobimba.¹⁶ Na kati ya bokasi na biso na mobembo oyo ezali, mpenza, mibeko minene mibale: kolinga Nkolo Nzambe na biso mpe kolinga bazalani na biso lokola bisomei.¹⁷

Lolenge oyo ya ezaleli ya bonzambe ya Mobikisi mpe ezalaki solo na makambo nyonso Ye asalaki na eleko ya misala na Ye na mabele.¹⁸ Na yango, ntango tomipesi bisomei mpe na bosolo mpo na kotalela Ye mpe koyekola uta na ndakisa na Ye ebonga nie,¹⁹ tokokoma koyeba Ye malamu koleka. Tokoli na esengo mpe na mposa ya kokotisa na bomoi na biso etinda ya likolo ya lolenge nini tokoki kobika, ndakisa tosengeli kopesa, mpe mibeko tosengeli kolanda. Tokozwa lisusu bososoli ya koleka, bwanya, ezaleli ya bonzambe, mpe ngolu epai na Nzambe mpe bazalani na biso.²⁰ Nakoki koyebisa bino ete makoki na biso ya koyoka bopusi mpe bolingo ya mobikisi ekokolisama na bomoi na biso, kokumisa bondimi na biso, mposa na biso ya kosala sembo, mpe makasi ya kosalela Ye mpe basusu.²¹ Mpo na kobakisa, botondi na biso mpo na mapamboli mpe mikakatano tozwi na bomoi ya kufa ekokembisa mpe kokoma ndambo ya bosolo ya losambo na biso.²²

Balingami baninga na ngai, makambo nyonso oyo ekomisaka makasi esengo ya molimo na ntina ya nsango malamu mpe kobatela mayokani tosala na Nkolo na esengo mpenza—atako na kati ya mimekano mpe mikakatano tozali kobika. Ya solo, mpo na matomba oyo ekoya, tosengeli komikotisa solo na mposa ya motema na biso kati na mateya ya mobikisi,²³ kotiaka makanisi kaka na Tata ya Lola mpe Yesu Klisto kolukaka kokotisa bizaleli na Ye kati ya lolenge na biso ya kozalela.²⁴ Lisusu, tosengeli kosalela kondima kati na Ye na nzela ya boyamboli,²⁵ kolukaka bolimbisi na Ye mpe nguya na Ye ya bosikoli kati na bomoi na biso mpe kobatela mibeko na Ye. Nkolo Yemei alakaki biso ete akokamba matambe na biso na nzela na Ye soki tondimeli Ye na mitema na biso mibimba, komonaka Ye na banzela na biso nyonso mpe na koboyaka koyekama na bososoli na biso moko.²⁶

Moto moko nakutanaki na ye kala mingi te, kombo na ye ezali Wes, andimaki libiangi ya Klisto koyekola na ntina na Ye mpe na ntina ya nsango malamu mpe abandaki kokamwa bolingo na ye nsima mibu 27 ya kozala mosika ya nzela ya boyokani. Alobaki na ngai ete mokolo moko bakomelaki ye na Facebook na misionele moko, Mpaka Jones, oyo atindamaki mpo na ngonga moke na etuka ya Wes liboso akende na esika naye atindama na misio Panama. Ntango Mpaka Jones akotaki na lokasa ya elongi ya Wes, kozanga koyeba liboso ete azalaki mondimi ya Eklezia, atutamaki na Molimo Mosantu mpe ayebaki ete asengelaki mbala moko kosolola na Wes. Asalelaki llikanisi oyo na lombango Wes akamwaki bokutani ekanama te oyo mpe abandaki komona ete Nkolo azalaki nzinganzinga na ye atako mosika ezalaki ye na nzela ya boyokani.

Banda wana, Wes mpe bamisionele babandaki kosolola mingimingi. Mpaka Jones mpe moninga na ye basalaki misala ya mosala mpe bansango ya molimo oyo esungaki Wes mpo na kofuta nyongo na ye ya Mobikisi mpe nsango malamu na Ye. Epelisaki lisusu moto ya litatoli na ntina ya solo mpe bolingo ya Mobikisi mpo na Ye. Wes ayokaki kimya oyo ewutaka na Molendisi mpe azwaki bokasi azalelaki na mposa mpo na kozonga na ndako. Ayebisi ngai ete makambo oyo ememelaki ye mbotama ya sika na molimo mpe na makanisi mpe esungaki ye kolongola bamposa ya bololo uta mibu ebele mpo na makambo ya mikakatano alekaki na yango to.

Lokola molakisi na ngai alobaki, ezalaka kaka na eloko moko ya kosepela mpe malamu koyekola na ntina ya Yesu Klisto mpe nsango malamuna Ye.²⁷ Nkolo asalaki bilaka ya kosepela oyo esangisi baoyo banso, kobakisa na biso, oyo bazali koluka koyekola na ntina na Ye mpe kokotisa liloba na Ye kati na bomoi na bango. Na Enoka Alobaki, “ Tala Molimo na ngai [ezali] likolo na yo, yango wana nakokomisa maloba nayo sembo; mpe bangomba ekokima liboso na yo, mpe bibale ekobaluka nzela ewuti ; mpe okozala kati na ngai, mpe ngai kati na yo.”²⁸ Mpe na Mokonzi Benjamin Alobaki, “bokobiangema bana ba Klisto, bana babali ba ye, mpe bana basi ba ye; mpo tala, mokolo moye aboti bino o molimo; mpo bolobi ete mitema mya bino mibongwani na bondimi likolo lya nkombo ya ye; yango wana, bobotami na ye mpe bokomi bana babali mpe bana basi ba ye.”²⁹

Na bongo, ntango tozali kosala makasi na bosolo mpe na kokoba koyeba Mobikisi mpe kolanda ndakisa na ye, nalaki bino na nkombo na Ye, ete bizaleli naye ya bonzambe ekokomama na elimo mpe mitema na biso,³⁰ ete tokokoma mingi lokola Ye, mpe ete tokotambola na Ye.³¹

Bandeko na ngai ba bolingoi, nasambeli ete to tindikama kaka na Yesu Klisto mpe na bolingo na Ye mobimba, ezanga nsuka mpe ebongi nie. Tika ete bokundoli ya oyo miso na biso emonaki, mpe mitema na biso eyokaki ekolisa esengo na biso na libonza ya bomikabi ya Mobikisi, oyo ekoki kobikisa bampota na biso ya molimo mpe ya makanisi mpe kosunga biso topusana penepene na Ye. Tika ete tosepela na bilaka minene ezali na maboko ya Tata mpe oyo Abongisi mpo na baoyo bazali sembo:

“Bokonzi ezali ya bino mpe mapamboli na yango ezali ya bino, mpe bomengo ya boseko ezali ya bino.

“Mpe ye oyo akoyamba makambo nyonso na botondi akokoma na nkembo.”³²

Yesu azali Mosikoli ya mokili, mpe oyo ezali Eklezia na Ye. Napesi litatoli ya babosolo oyo na nkombo ya monene, bule, mpe ezanga ndelo ya Mobikisi na biso, Yesu Klisto, amene.