Ngera Sel Meral Klemerang?
A Dios a uchul a rokui el klemerang. A Ikelesia er a Jesus Kristo er a Uriul-Klebesei el Santo a melecheech a rokui el klemerang el Dois a ocholt el mora Rengelkel.
Betik er a renguk rodam me a rodos, omereng el saul el mora rokui el chad el kirel tia el longasireng longdibel! Sera Ongeua el buil er a klou el ongdibel el mei er chelechang, e kede mla mes a betok el mla duubech er a beluulechad el ngara klengit el reng el mora klebokel e mechas a rengud el kirel.
Aki dmeu a rengmam el louchais er a chisel klou longdibel er a rengeask el mlar ngii el meliuekl er a beluulechad.1 Ngara chelsel aika el ongdibel, ea rengellitel el rengeask a milsuub el kmo a lengarngii a ngidil ngera el duubech er a chelsel a klengar er tir, ea kot el mesisiich el klisich a lenguu er a Rubak.2
Aki oldeu a rengmam er a betok el templo el mla mekedechor el meliuekl er a beluulechad. Ngokiu a chedaol oterkeklel aika el beches el templo, eng mla medechel a klisichel a kledios el mora beluulechad el melisiich er kid e ometok er a mesisiich el klisichel a cherarou.
A ulekringel el teletael a mekdebechii a klisichel a cherarou. Tia meral oberaod el klengit.3 Ngak el Merredel er a Ikelesia, a meral louchais er a ike el osisecheklel a Rubak el Jesus Kristo el kirel a ikal teletael. Mei e kuuchais el di bleketakel:a ngidil omeruul er a ulekringel el teletael el mora redil, rengalek, me a ngidil chad a klengit er a medal a Rubak. Ngii a ngara klengit el reng me ngak mak ngara klengit el reng sel sekum a ngidil chad a mo chuarm. Ng ngara klou el klengit el reng, me a kid el rokui mede ngara klou el klengit el reng el kirel a dersta el chad el ngii a chuarm er a ngidil ulekringel el teletael. Tireke el chad el meruul aikal meklou el longarm a diak dil mutaut er a lechul a beluu te dirrek el mutaut er a llechul a Dios el lolab a Klisiich.
Mla mo betok el rak, ea Ikelesia a mla meruul a betok el llechul me a omeruul el mo omekerreu—tokuni—a rengalek er a ulekringel teletael. Ng kmal betok a ngeseu el ngara website er a Ikelesia. Ak mengemedaol er kemiu el mo omes e mesuub a ikei.4 Aika el llach a ngar er ngii el mo omekerreu er a ulekidakl. Ak kurimel er a dersta me a dersta er kid el mo beiuusch a medad el kirel a ngidi el chad el ngara tekudel el ulekringel teletael me a demerreched el ngusuterir. A Osobel diak el kengei a ngidil ulekringel teletael, me a reoltirakl er Ngii, me a kid el dirrek el diak dekengei.
A cherarou a ngarngii a kikiongel e mekngit el teletelel. Tara mekngit el teletelel a mo ngodechii a osenged er a klemerang er a diak el klemerang. Aika el obdois el tekoi el dengai lokiu a cheldngelel a chimad, a bai, rulii meng kmal mo meringel er kid el melilt er a klemerang.
Tia el teletael a milkletkak er a taem el ngak me a Sister Nelson a mlo oldingel er a kuoll el chad er a tara beluu el mekesai er tir a mla rongesii el kirel a Jesus Kristo. Ngika el ungil sechelimam a meketekt el smecher. Ng uluuchais el kmo aikel betok el klebesei el dengarch er a dukelel, eng blechoel lomes er a tensio e oker el kmo, “Ngera sel meral klemerang?”
Te betok el ngara beluulechad er a chelechal taem “a diak lodengelii a klemerang eleng ng diak lodengei el kmo te mo metik er ngii er ker.”5 Te bebil a omdasu el kmo diak a klemerang—e chadmengii el mo ngiltii a klemerang. Tia berrous luldasu el mo er tirke el cheleuid el omdasu el kmo ng diak mo oukerkeriil er a medal a Dios.
Rodam me a rodos, a Dios a olab a rokui el klemerang. A Ikelesia er a Jesus Kristo er a Uriul-klebesei el Santo olab arokuii klemerang el Dios a mla mesterir el mora Rengelekel, el mlengai er a omsuub er chesel a scientific laboratory me a lechub e ng bleketakl ocholt el mla er Ngii.
Ngar er tial olbeiungel er chelechal el sils me a klukuk, e ko melemolem el remenges a klemerang. Moutekangel el omtab a uldasu el merkemiu me a ikel mei er a chelsel a uldesuiu e mo medechel er a chesel a rengmiu. Mngara nglunguuch el olengit er a Rubak mel lochotii el morkemiu el kmo aikel blamrenges a klemerang.
Ng betik a renguk er kemiu, e rodam me a rodos er ngak. Ak meluluuch el kmo tial ongdibel a meskemiu a chedaol el klisiich el mosiik er ngii. El ngara chedaol ngklel a Jesus Kristo, amen.