Chelechal Sils
A ngar el profet er kid a meruul a urerel lomekeek ra beluulechad loba Babier er a Mormon. Ng kired loltirakl a blekeklel.
Rodam me a rodos er ngak, chelsel a Babier er a Mormon e a tekoi el “chelechal sils”1 a blechoel desang el uaia lolechau el bedul a llach, telbiil, me a osisechakl. A King Benjamin, er sel cheldechedechal, a millekoi ra rechad, “Mrenges a tekingek el bo kdu er kemiu er chelechal sils; … bok a dingemiu me mrenges, ma rengmiu me bo modengei, ma uldesuiu ma bertelel a Dios bol mocholt er kemiu.”2 A klou el ongdibel a osisiu el teletael. Kede mei el me orrenges osisechakl er “chelechal sils,” me bo de blechoel “loumerang er a bek el taem”3 er a Rubak me a ebangkelio er Ngii. A ngara renguk er “chelechal sils” a klou el ultutelel a domekbeches ra blakereng er kid ra Babier er a Mormon, el Joseph Smith a kmo “ng kot el bleketakl el hong el ngara beluulechad.”4
A kuba ra chimak a Babier er a Mormon. Tia sel lecheklel ra 1970, el kmal mekreos er ngak. Ng mechetong, eng di diak a hong el muut el klou a belkul er ngak ma klaumera er ngak el uai tiang. Sel kunguiu er ngii, eng medechel a sioning er ngak lokiu Chedaol Reng el kmo a Jesus Kristo a Ngelekel a Dios,5e Ngii a Osobelek,6ea ikal chedaol llechukl a tekingel a Dios,7ma ebangkelio a mla moluut.8 Aikal klemrang a kmal medechel ra renguk. Uaia tekingel a Nephi, “A renguk a semeriar a tekingel a Rubak.”9
Klitechetum el mora klisichem: Elder Ronald A. Rasband, ngeasek el misionari; President Harold Wilkinson, president er a Eastern States Mission; ma Elder Marion D. Hanks, General Authority Seventy.
Tiakid a cheldecheduch. Sera kngeasek el misionari, ak rirenges a tekingel a Elder Marion D. Hanks, el mle oldingel er kemam er a Eastern States Mission. Ng mle tal lorredel er a British Mission, ea terung el mle misionari er ngii a ngar er tia er chelechal sils: betik er a renguk el Rodam el Elder Jeffrey R. Holland me a Elder Quentin L. Cook.10 Ng uai tirkal mle misionari er ngii ra England, eng dilu er kemam el mo menguiu ra Babier er a Mormon el erul taem. Ak mlo meruul er ngii. A kot el omengiuek eng mle kirek el loiia olangch aikel rokui el mesaod a lechub eng ouchais el kirel a Jesus Kristo. A kulusbech er a bekerkard loluches, e lilecha olangch ra betok el bades. A ongeru el taem, e a Elder Hanks a dilu el kmo aki locha olangch er a suobel ma osisechakl, e tiaikid el taem e ak ulusbech er a mellemau loluches ra ikal bades. Ng mle erul kunguiu ra Babier er a Mormon, loltirakl a mildung, e liluut el menguiu lerung el taem, e ousbech ra bibrurk ma chedelekelk loluches ra ikel bades el meklou a belkul mei er ngak.11 Sel momes, eng kmal betok ak liluches.
Ng mle betok ak suub ra tial omengiuek ra di melecha olangch ra bades. Bek el kunguiu ra Babier er a Mormon, ra uchelel mora ulebongel, ak mal mlo mui ra beltikereng el mora Rubak. Ak mlo melchesuar a mesisiich el delalm el sioning ra klemrang ra Osisecheklel e mekera doltaut er “chelechal sils.” Tial hong a kmal chatter ra dai er ngii, “Tara Ouchais el kirel a Jesus Kristo.”12 A omesubek ma chedaol sioning el kngilai, e ak mlo misionari ra Babier er a Mormon e oltirakl er a Jesus Kristo.13
“Chelechal sils,” ea tara kmal mesisiich el misionari er a Babier er a Mormon a President Russell M. Nelson. Sera le kot el mokedong el Apostol, eng milngedecheduch ra rechad er a beluu ra Accra, Ghana.14 A mlara tial seked a rengarbab el chad, luldimukl ra king ra tara kebliil ra Africa, lulngedecheduch er ngii lokiu a chad loleuiid a tekoi. Ngkal king a mle mesisiich el ngalek ra skuul mesuub ra Biblia e betik a rengul ra Rubak. Uriul ra cheldechedechal a President Nelson, ea king a mle mengedecheduch er ngii, e uleker el melekoi a tekoi ra Merikel kmo, “Kau ke techang?” A President Nelson a silodii el kmo ng mla moterekokl el Apostol er a Jesus Kristo.15 A liluut el keril a king a mle “Ngera sebechem losischeklak er ngii el kirel a Jesus Kristo?”16
A President Nelson a ngiluu a Babier er a Mormon e mekengii el mora 3 Nephi 11. Ng mlo dmak a President Nelson me ngkal king e menguiu el kirel sel osischeklel a Osobel el mora re Nephites: “Ngak Jesus Kristo, el tirkal profet a mla ouchais el kmo ak mei er a beluulechad. … Ngak a llomes e klengar er tia el beluulechad.”17
A President Nelson a milsa king a Babier er a Mormon, ma king a dilu el kmo, “Ng mle sebechem el meskak a diamond ma rubis, eng di diak a mo uai tiang el kmal mekreos er ngak el dechelel a llomes el kirel a Jesus Kristo.”18
Tia diak di el chimong lokesiu ra betik ra rengud el profet louchais el kirel a Babier er a Mormon. Ng mla rousii a Babier er a Mormon el mora rebetok el chad, e blechoel sioning el kirel a Jesus Kristo. A President Nelson sel bol kebetech ngii ma rechad, a remerredel, re king, bdelul a beluu, merredel a siobai me a chelechad ma kakerous el klechelid, a lengara klou el obis ra Ikelesia a lechub eng ikel basio er tir, e ngouchais el kirel tial hong ra mla mocholt el chedaol llechukl. Ng sebechel mesterir a betok el bleiull el omiange el locha ngara bebul a tebel a lechub e ngara blil a klalou lomeklatk ra odngelel. Eng di ng bai, mesterir a kot el mekreos er ngii, el ngaruchei er a diamond ma rubis, el uaia tekingel ngkel king.
“Aikel klemerang er a Babier er a Mormon,” el dilung a President Nelson, “a ngarngii a klisichelmo omekungil, olluut, mengelaod, melkakl, olngeseu, melisiich, e oldeu a rengud.”19 Ak mla mes aikaikid el Babier er a Mormon el mora chimorir a rechad el ngmai lokiu a profet er a Dios. Ng diak a ngaruchei el sengk el uai ngii.
Ng dirk tekoi eng mlo kebetech ngii ma bechil a merredel er a beluu er a Gambia e ngiluu a Babier er a Mormon el msang. Ng dimlak di le bsang el merekong. Ng milkengii e menguiu lobengkel, e olisechakl e ouchais el kirel a Jesus Kristo, Tngakireng er Ngii, me a beltkil a Rengul mora rokui el Ngelekel—er a bek el basio.
A ngar el profet er kid a meruul a urerel lomekeek ra beluulechad loba Babier er a Mormon.20 Eng di diak el sebechel di ngii el tang. Ng kired loltirakl a blekeklel.
A kultirakl ra blekeklel, e ak mla melasm loba ngariou el reng e blak a renguk lomerk er a Babier er a Mormon.
Ng dirk tekoi eng mlarngii a urerek el mora Mozambique. A rechad er tial klebokel beluu a ngara chuarm er a chelebuul, mekngit el ulekeruul, skel a ureor, eolt, me a uldikel er a remengeteklel a beluu. Ng mlarngii a techellek el kebetech lobengkel a merredel er tial beluu, el Filipe Nyusi. Ngullengit, mak milluluuch el kirel ma belual; ak dilu er ngii el kmo aki omekedechor ra templo er a Jesus Kristo21ra belual. Uriul ra odngelam, ak milsang a Babier er a Mormon el tekoi ra Portuguese, el ngii a tekingel. Ng mle ungil a rengul nguu tial hong, ma kuluchais el kirel a yaksok el kirir a rechedal, el debetik ra tekingel a Rubak el ngara tial hong.22
A kuk mle tara tekoi, e a bechik, ra Melanie, me ngak a mlo kebetech kemam ma Queen Letsie III er a Lesotho ra blirir.23 A denguu er kemam, ea mle klebekelel tial odingel a mesterir a Babier er a Mormon e ouchais ra klaumera er ngak. Chelecha sel kulatk aikal teletael ma lmuut el bebil, e a bades ra chedaol llechukl ra uriul-klebesei a mei ra uldesuek: A cherrengelel a ebangkelio er ngak a mo muchais el mo er a remechitechut ra rokir el beluulechad, ma re king ma re queen.24
Ak mla rousii a Babier er a Mormon el mora Ambassador ra India el mora Inited Nations er a Geneva, el Indra Mani Pandey25; me a Chetengakl el Patriarch Bartholomew26ra Eastern Orthodox Church; ma lmuut el betok. Ak mla melchesuar a Chedaol Reng er a Rubak lobengkemam sel knguu tial ngii a “kisel a klechelid er kid”27e kuuchais er a sioning er ngak ra Jesus Kristo, el ngii a kmal moktek ra klechelid er kid.28
Chelecha e rodam me a rodos, ng diak el sal kirem el mora Mozambique a lechub a India a lechub e kemo kebetech kau ma re king ma remerredel el mo mesterir tial hong ra mekreos el osisechakl ma telbiil. Ak siotai er kemiu er, chelechal sils, el mo nguu a Babier er a Mormon el msa sechelim ma telungalek er kau, rechad el mdak loureor, a oungerachel er kau ra soccer, a lechub a chad el ngara siobai er kau. Te ousbech aikel tekingel a Rubak el de betik er a chelsel tial hong. Te ousbech a nger ra ker ra bek el sils ma diak a ulebenggelel klengar el merael mei. Ng kirir el mo medengelii a rolel a telbiil el medechel er mederir me sel beltikereng ra Rubak el mor tir. Ngii el rokui el ngara chelsel tial Babier er a Mormon.
Sel om nguu tial Babier er a Mormon el mesterir, e ke mok a uldesuir me a rengrir el mo er a tekingel a Dios. Ng diak a belkul molab aikal babier el obengkem. Ng sebechem el beot louchais el kirel lousbech ra dengua er kau er sel bliongel ra chedaol llechukl ra Gospel Library app.29
Momdasu er tirkel rokui el sebechir el mukngeltengat a klengar rtir lokiu a ebangkelio, e modurokl a Babier ra Mormon el mortir loba dengua rkau. Lak mobes lodekiar a olechotel a klaumerang er kau e mekera tial babier blal lomekngeltengat ra klengar kau.
Kemiu el sechelik, ngak el Apostol er a Rubak, a siotai me bo doltirakl ra betik ra rengud el profet, el President Nelson, el mo mekekii a beluulechad loba Babier er a Mormon. Ng klou a usbechellel; e kired lomuchel er chelechang. Ak yaksok er kemiu el mo teloi ra “kot el ngarbab lureor ra beluuelchad,” el ngii omengidb ra Israel,30 sel bo mukrael el mo er tirkel dirkak bo “lodengelii a klemerang leng diak lodengei el kmo te metik er ngii er ker.”31 Te ousbech ra klaumerang ma sioning er kau el kmo ng mekera tial hong e mla ngodechii a klengar kau e ngoikau el mo kmeed er a Dios, ma budech er Ngii,32 ma Klemechel er a “klou el deureng.”33
A kuuchais el kmo ngokiu chedaol teletael e a Babier er a Mormon a mlekedmokl ra uodel Merikel el me chemolt louchais el kirel a tekingel a Dios, e melai ra rechad el mora Rubak el Jesus Kristo me a mla moluut el ebangkelio er Ngii er “chelechal sils.” El ngara a ngklel a Jesus Kristo, amen.