13:15

Mengoeas e Olecholt er a Klaumerang

Mla er a Elder Gary E. Stevenson

Er a Chelechad er a Teruich me a terung el Apostol

Rodam ma rodos ak siotai er kau el mo osiik a rolel el mo olecholt er a klaumerang er kau el okiu a omelekoi ma omeruul.

Uchelel a omesodel

Meklou ultutelel el mekdubech er a chelsel a klengar er kid a oumesingd el mei e meang a temel, dirrek el sel de mekekerei. Me bokuuchais er a cheldechedechal a ta el ngalek er a skuul, el Kevin, el ngii a mlengilt el mo ometechei er a rengalek er a skuul el mo er a ikrel a beluu el ngara ongdibel, e a ikaia tekingel.

“Ng mocha temek, e a chad el oungerachel a ulemekedong er a ngklek. Ng ulemes er tia el babilngel e melekoi, ‘Mekau a ngeasek el sechal er a Utah.’

“‘Ke melekoi el Ikmo ng di ta el ngak?’ A kulleker.

“‘Choi, el kmal di chimong.’ Ng mileskak a lecheklel a ngklek el obengkel a ‘Utah’ el luches er cheungel a ngklek. Ak nguu el loiang, e ak mlo melechesuar el kmo ng olengchelek.

“Ak mlara chelsel a elevator er tial hotel lobengterir a reteim er a rengalek er a skuul el olab a lecheklel a ngakl el di uaingak. ‘Choi, kau a chad er a Utah. Kau ke Mormon?’ ng uleker a tara ngalek er a skuul.

“Ak kora mlo metitur el teloi er tirka el bebil er a merreder el ngalek er a skuul er aikal bebil er a beluu. ‘Choi,’ ak ulmair er a renguk e ulenger.

“‘Kemiu tirke el tir a oumerang er a Joseph Smith, el ngii a milesterir a re anghel. Adang, kau ng diak moumerang er sei?’

“Ng mlo diak kudengei el kmo ak dmul kmo ngerang. Tirka el rokui el ngalek er a skuul el mla er tia el elevator a di ulengeng er ngak. Ak kmal dirk kilerd, ea rebek el chad a ulemdasu el kmo ak ngodech. Ak mlo telkib el debsochel e dula lkmo, ‘Ak medengei el kmo a Joseph Smith a mle profet ra Dios.’

“‘Tilchang mlarker el mei?’ Ak mlo melbedebek. Ng dimlak kudengei el kmo ng sebechek el uaisei. Eng di aika el tekoi a kumelechesiu el klemerang.

“‘Choi, klemedengei er ngak a kmo kom kmal chad er a klechelid,’ ngii a melekoi.

“Me tiang, e ng mlo diak a cherodech er tia el elevator e ng mengai a chesmerel. Me a bocha kimolai a torengkam, e ngii a diochecherechur.

“E solai, e a ngor er rullek a uleker, ‘Choi, a re Mormons ng diak el ngar ngii a ta er a Biblia er tir?’

“Ng diak. Kuk lak el luut. Ak ulebult el omes er a ta er a ngalek er a skuul el mlara chelsel tia el elevator el blarngii, el Christopher.

“‘Kede omekedong er ngii el kmo ng Babier er a Mormon,’ ak milekoi, e soak el diak kusaod er ngii. Ak ngilai a tik e mocha merael.

“‘Tilcha sel babiller el Joseph Smith a uleiuiid er ngii?’ ngii a uleker.

“‘Choi, ng uaisei,’ ak kulnger. Ak di milemolem el merael, el oureng a kmo lak bok chebechobel.

“‘Me a leuaisei, ke medengei el kmo ak mekerang e nguu a ta er ngii?’

“Ak mlo melbedebek er a chedaol llechukl el silubii er a seminary. ‘Ng diak merur er a ebangkelio er a Jesus Kristo.’¹ Tia er a lesiseb er a uldesuek, e ak mlo merur er ak chebechobel.

“Tia el rokir el sandei e tia el chedaol lechukl a di ngara uldesuek el diak bol bechikak. Ak ulenger a rokui el ker el kirel a ikelesia el mior sel tkur er bab el sebechek, e mlo er ngii a resechelik.

“Ak mlo melechesuar el kmo ak chemat er a klechelid er ngak.

“Ak milsa Christopher a Babier ra Mormon. A uriul e ng milluches el merngak, louchais el kmo ng ulemekedong ra remisionari el mera blil.

“Ak silubii el kmo diak bok merur el olecholt er a klaumerang er ngak. ”²

Ak dmeu a renguk el kirel a dechal a rengul a Christopher el ouchais er a klaumerang er ngii. Ng dechal a reng el omelekl er a bek el sils er a re oumerang el rechedal a Ikelesia el iliuekl er tia el beluulechad. El kuuchais a uldesuek, e ak siotai er kau el mo melebedebek aika el eua el ker:

Ngak ak medengei e ngar ngii a ungil komakai er a klaumedengei er ngak el kirel a olechotel a klaumerang?
Ngak ak medengei el kmo ng mekera a kulecholt er a klaumerang?
Ngera aike el ngii a melibas er ngak el olecholt er a klaumerang?
Ak mekerang e di melemolem er a klaumerang er ngak?

Ngak Ak Medengei e ngar ngii a Ungil Komakai er a Klaumedengei er ngak el kirel a Olechotel a Klaumerang?

A olechotel a klaumerang er kau a kot el mekreos el mobang, el blechoel el obengkel a delemedemek el chedaol tekoi er a reng. Aika el ulechesuar a blechoel el obengkel a ongelulau e dosoad er ngii el kmo ng “chelellakl e kekerei a otto er ngii.”³ Ng klaumerang er kau me a klaumedengei el kirel a klemerang, a ngii a chedaol sioning er aike el rellel a Chedaol Reng. Omoba tia el sioning a mo ngmodech aike el molekoi me a omerellem. Aikel klou a ututelel er a klaumerang er a kau, el mo ocholt er a Chedaol Reng, a:

Dios a Chedam er Babeluades; e kau a Ngelekel. Ng betik a rengul er kau.
A Jesus Kristo a ngar. Ngii a Ngelekel a ngar el Dios e ngii a Osobel e Osebelem.
Joseph Smith a profet er a Dios el ngii a mlukedong el mo olluut er a Ikelesia er a Jesus Kristo.
A Ikelesia er a Jesus Kristo er a Uriul-klebesei el Santo a mla moluut el Ikelesia ra Dios el ngara beluulechad.
Tia el mla moluut el Ikelesia er a Jesus Kristo a ulekrael er a ngar el profet er chelechang.

Ngak ak Medengei el kmo ak Mekerang e Olecholt er a Klaumerang er Ngak?

Ke olecholt er a klaumerang er kau sel mouchais aikel chedaol tekoi er a rengum lobengterir a rebebil. Sel dechechedal a Ikelesia, e a techall el olecholt a klaumerang er kau a blechoel el sel temel a ongdibel er a Ikelesia me a lechub e ng, delongelem kau me a tang el chedal a telungalek, resechelim, me a rebebil.

A tara rolel el sebechem el olecholtii a klaumerang er kau a sel kmal mo ungil a blekerdelem. A klaumerang er kau er a Jesus Kristo a diak el di tekingem—ng blekerdelem.

Bek el team el mouchais a olechotel a klaumerang er kau me a lechub ke ochotii el okiu omeruul e sel blakerreng er kau el mo oltirakl er a Jesus Kristo, e ke siotai er a rebebil el “mei er a Kristo.”⁴

Rechedal a Ikelesia a dechor el sioning er a Dios er a bek el taem, er a rokui el tekoi, me a bek el basio. ⁵ A techall el doruul aikang er tial el beluulechad er a digital el ousbech aikel ungil omelisiich el tekoi me a lechub e domerk aikel ungil tekoi el oruul a rebebil a diak bolngemed. Kede olecholt er a klaumerang sel doubeltikerreng, ouchais, e outkeu el online. A tweets, tekingem, me aikel mouchais a mo rebab, e mo chedaol a belkul sel mosbech a social media el olcholt er a ebangkelio er a Jesus Kristo el omeliob er a klengar er kau.

Ngera Aikel Ngii a Melibas er Ngak el Olecholt er a Klaumerang er Ngak?

A bebil er a melibas er kau el olecholt er a klaumerang a locha diak modegei el kmo ngera ke mo melekoi. Matthew Cowley, el aposol er a uchelel, a uluchais er a tekoi el dilubech el mo er ngii er a bochal temel merael mora eim el rak el klemisionari er ngii el mora New Zealand er a le teruich me a euid a rekil:

“Ng meral diak bo kubes er a nglunguchel a demak er sel sils er a kurael. Ng dirkak rengesii a klebokel klengeltengat er a chelsel a klengar er ngak. Ea mle ulebongel el cheldechedechal merngak, ‘Rungalek, ke mora mision; ke mo mesuub; ke mo olsisechakl; e a lebebil er a taem el kau a mokedong, e ke locha omdasu el kmo ke kmal ungil kldmokl, engdi sel bom dechor, e a uldesuem a mo bechachau.’ Ng betok el taem el tia mla duubch el mei er ngak.

“Me ak melekingang, ‘Ke mekerang sel bol diak a ngara uldesuem?’

“Ng dula, ‘Ke mo dechor e oba rokir el rengum, e ke dechor el sioning el kmo a Joseph Smith a profet er a ngar el Dios, e a uldesuem a mo mui er a betok me a tekoi er a ngerem … el mora rengrir tirkel tir a orrenges.’ Me a uldesuek, l blechoel di bechachau er temek el ngara … mision … , a mileskak a techall el mo ouchais er a klaumerang er ngak el kirel a kot el klou el dilubech era chelsel a reksi er a beluulechad ruriul er a omengerus er a Mastang. Bo molasm er ngii, rsechal ma redil. Al sekum e ng diak a ngodech el ngeral bomdung, di molecholt er a klaumerang er kau el kmo a Joseph Smith a mle profet er a Dios, e a rokir el reksi er a Ikelesia a mo omaoch el mera uldesuem.”⁶

Osisiu, a President Dallin H. Oaks a uluuchais, “A bebil er a olechotel a klaumerang a ungil denguu sel de dechor el ouchais el kirel er a bai doutubaruach el meluluuch el kirel.”⁷ A Chedaol Reng a sioning er a mengedecheduch me a orrenges el di osisiu.

A tara melibas, a Kevin a ulemeketakl, a dakt. Er a Paulus er a loluches el mora Timothy:

“Le Dios a dimlak el beskid a reng er a dakt, ng bai milskid a klisiich, me a beltik el reng. …

“Me lak kom uaisei el merur er a olechotel a klaumerang er a Rubak.”⁸

A omelechesiu el dakt a diak el lemei er a Rubak ng bai cherarou. Oba klaumerang, el uaia Kevin, a rullau el mo mesisiich el otekau aika el omelechesuar e di beot el ouchais aike el ngii a ngara rengum.

Ng Mekerang e Di Melemolem ra Klaumerang er Ngak?

A kuumerang el kmo a olechotel a klaumerang a uldalem er a chelsel a rengud, e ng di, a di tal rolel bodobang e omekeroul er ngii, a Alma ulsisechakl el kmo ng kired el mengoeas er a klaumerang er kid loba ungil ukerreu.⁹ Me sel de uaisei, “eng morngii a risel, e mo klou, e mo ourodech.”¹⁰ A lak tiang, “eng mo moalech.”¹¹

A derta el rechedal a Kot el Presidency a mla ouchais er kid el kmo mekera a dolemolem lolecholt er a klaumerang er kid.

President Henry B. Eyring ulbeltikelreng e ulsisechakl er kid el kmo “omelai a tekingel a Dios, meral ngara rengud el nglunguuch, ma olengesenges a llechul a Rubak a kmal kirel dmak el melemolem el mekedmokl el mo uchul e a klaumerang a sebechel mukeroul.”¹²

President Dallin H. Oaks a ulemeklatk er kid el kmo a di deberko loba olechotel a klaumerang er kid, “eng kired el mo melai ra sakrament ra bek el sandei (mesa D&C 59:9) el mo uchul eng sebeched el mo nguu sel mekreos el yaksok el mo ‘blechoel loba Chedaol Reng er ngii el [obengked]’ (D&C 20:77).”¹³

Ma President Russell M. Nelson dirk ulemeklatk er kid:

“Momekeek ra [olechotel a klemerang er kau] loba klemerang. …

“… Mongoeas er kau er a tekingir a re profet er a rechuodel me chelechal taem. Molengit er a Rubak el osisecheklau el kmo ke mekerang e mo ungil Rongesii. Mchoit a betok el temem el ngara templo me a ureor ra reksi er a telungalek.

“… Mrullii ma olechotel a klaumerang er kau bol ngaruchei ra rokui.”¹⁴

Ulebongel

Betik er a renguk el rodam me a rodos, ak yaksok er kau el kmo sel bol mui a klaumedengei er kau el kirel a olechotel a klaumerang, e mouchais er ngii, e ke mo mesisiich er a ike el ngii a melibas er kau el uaia oumededenger me a dakt, el rullau meng sebechem el mangoes e mo bang sel mekreos el, olechotel a klaumerang er kau.

Kede ngeltengat el betok a diak el mochur el okesiu er a re profet er a rechuodel ma chelechal taem el tir mesisiich a olechotel a klaumerang er tir.

Uriul er a kodellel a Kristo, a Petrus a ulecholt er a klaumerang er ngii:

“Bo modengei el rokui … el ngara ngklel a Jesus Kristo ra Nazareth, el ngii a mulngerus er ngii, el Rubak a ulekisii er a kodall, … el ngika el chad a dechor er medemiu. …

“… E leng diak a ngodech el ngakl er cheungel a babeluades el uaingii, el uaisei ng kired el mo suobel.”¹⁵

Amulek, el uriul er a osisecheklel a Alma el kirel a klaumerang e ng uluuchais: “Ak olecholt era klaumerang er ngak el kmo aika klemerang. El uaisei, ak melekoi er kau, el kmo ak medengei el kmo Kristo a mei e mo teloi er a rengelekel a chad, … e ngii a mo melenget a kngtil a beluulechad; le Rubak el Dios a mla melekoi.”¹⁶

Joseph Smith me a Sidney Rigdon, er a le sioning er sel klebkellel a ues er a mla mokiis el Osobel, a ulecholt ra klaumerang:

“Me chelechang, el uriul er a betok el olechotel a klaumerang el ngii a mla meruul er ngii, tiia olechotel a klaumerang, el kot el ulebongel er ngii el rokui, el kimodersii: El kmo ng naar!

“Le aki milsang, el dirrek el ngara klisichel a chimal a Dios; e aki rirengesii a ngerel e ouchais el kmo ngii a Di Ta el Ngelekel Sechal.”¹⁷

Rodam ma rodos, ak siotai er kau el mo osiik a rolel el mo olecholt er a klaumerang er kau el okiu a omelekoi ma omeruul. El techall a kmal dirk mlerngak, er a orokiolel a miting el obengkel a mayor er a capital city er a South America, er a chelsel a chamber er ngii lobengterir are cabinet officials er ngii. El kibocha merek el sal kmal mesaul a rengmam, ak mlo omair er a renguk louchais er a olechotel a klaumerang er ngak Uriul er tial ultebengek, eak mlo sioning el kmo a Jesus Kristo a ngii a Ngelekel a ngar el Dios e Osebelel a beluulechad. A rokui a mlengodech er sel taem. A Chedaol Reng er sel delmerab a mle meringel a dolechib er ngii. Ng uaia ma rokui el chad a mlorutch a rengrir. “A Mengelaoud … olchotel a er Edam me a Ngalk.”¹⁸ Ak ungil a renguk el ngilai a blekeu el reng el mo olecholt er a klaumerang er ngak.

Sel lemei sel taem el uai tiang, mnguu e bom chat er ngii. Ke mo melechesuar er a medemedemek el Mengelaod el ngara chelsel a rengum.

Ak odars a olechotel a klaumerang er ngak e sioning er kemiu, a Dios a Demad er Babeluades, Jesus Kristo a ngar, e a Ikelesia ra Jesus Kristo ra Uriul-klebesei el Santo a Ikelesia ra Dios ra beluulechad er chelechal taem el ulekrael er a betik ra rengud el profet, President Russell M. Nelson. El ngara a ngklel a Jesus Kristo, amen.