Ngoriakl er a Beluulechad e Metik er a Ulengull
Bo betik er a ulengull er a klisichel, rrau a rengud er ngii, me a ringel er tial beluulechad el mo mesisiich er a beluulechad lokiu a telbiliu lobengkel a Dios.
Rodam me a rodos er ngak, ng dmeu a renguk el mesekemiu er tial klebokel tutau er a Chedaol sils. Ko blechoel di ngara uldesuek. Ng mechas a renguk er kemiu el mereched louedikel el kirir a rengesool. Ng mechas a renguk er a klaumerang el kemiu a melemolem lolecholt er ngii. Ak lmangel el kirel a ringel, klekurusii, me a sebekreng er kemiu. Ng betik a renguk er kemiu. Ak subedemiu el kmo a Demad ra Babeluades ma Ngelekel ra, Jesus Kristo, a betik a rengrir er kemiu. Te kmal ungil medengei a teletael el mseluk er a chelsel, a klungiaol, me a ikel mousbech, me a nglunguchiu el kirel a ngesou. Ak melemolem, el meluluuch el kiriu me bo molchesuar a beltik el reng er Tir el kiriu.
Ng klou a ultutelel el bo dodengelii a beltikereng er Tir, le bek sl sils eng uaia dechelbangel a odechelakl el ngara niius. Ng locha ngarngii a taem e ko moureng el ulekum me kom di mo cheroid er a ikal uldikel, e di chelimetemt, e mengiil er a kmo ng techang el me olkiis er kau sel bo lak a uldikel.
Eng di, rodam me a rodos er ngak, ng betok a ungil tekoi er medad. Aika el merael mei el sils, e kede mo mesa kot el ngarbab lolchotel a klisichel Osobel el dirkak a ta me le meues er a beluulechad. Chelecha el mo el muut er se luut er Ngii “loba klisiich me a klebkall,”1 e Ngii a mo odars a diak el mucherangel el techall, klengeltengat, me a ongasireng el mo er a roumerang.
Eng di, kid a meral kiei er sel ngii a meral cheliseksikd el taem er a chelsel a reksi er a beluulechad. A betok el chetituokel me a ringel a rulterir a rebetok el mo omelchesiu loberaod e skarer. Eng di, ka momtab er a dirk dilubech el tekoi locha meskid a telkib llomes er a kmo ng mekera e kau me a ngak a metik er a ulengull.
Tial dirk mlo merek el sel osongelel a Washington D.C. Temple, e a chedal a oungerachel er tial osongel a templo a milsa meang el teletael er a lobeteterir a rebebil er a resemmong el journalist lomais er a chelsel a templo. A tal telungalek a uaia le sa kmal mlo semeriar er el mo uldak er tial osengelel a chelsel a templo. A tal chad er a niius a diokerker el kirel ”omerael” er ngika loureor er a templo sel lorael lomais er a chelsel a templo. Ng mle soal mo medengei el kmo tial lomerael lomais er a chelsel a templo ng uaia lokesiul a ringel er a omerael er a klengar.
A tal ngeasek el buik er tial telungalek meng dirrek el milngedecheduch. Sera lesiseb er a delmerab er a endowment, e ngika el buik a tiletkii a altar, el basio el rechad a mo outubaruach er ngii e meruul a telbiil lobengkel a Dios, e dilu el kmo, ”Ea, tia meral ungil. Tiaikid a basio le me er ngii a rechad e olengull sel bo le merek lomais er a chelsel a tmeplo.”
A kumdasou e ngika el buik a dimlak lodengelii el kmo ng kmal klemerang a tekingel. Ng locha dimlak lodengelii sel klaisisiu er a telbiil meruul lobengkel a Dios er a chelsel a templo me a yaksok er a Osobel el kmo:
“Mei er ngak, kemiu el rokui el chorma er a berraod el chelungel, e ak mo meskemiu a ulengull.
“Mnguu a chelngelek, e mosuub er ngak; … me bo betik a ulengull er a bedengiu.
“Le chelngelek a beot, me a berraod el ngar ngak a kebekakl.”2
Kemiu el rodam me a rodos, ng mekngit a renguk er tirkel tuobed er a Ikelesia le te omelchesiu el kmo ng kmal meringel er tir. Te dirkak bo lodengei el kmo a meruul e oltirkal a telbiil a bai sobecheklii a klengar! A bek el chad el sosiseb er a telbiil er a taem er a techolbechelid me a templo—e oltirakl—a kmal klou a techellel ngmai a klisiich er a Jesus Kristo. A kulengit me molbedebek er tial meang el klemerang!
A klungiolel otireklel a telbiil lobengkel a Dios a klisiich er a babeluades—klisiich el smisichid el ngoriakl er a ongarm, ongetikaik, me a ringel. Tial klisiich a sobechklii omerolled. Tirkel kiei loltirakl a ngarbab el llechul a Jesus Kristo a sebechir el nguu a ngarbab el Klisichel. A leuaisei, e tirkel loltirakl a telbiil a nguu a tokubets el bedengel a ulengullel mei er tir lokiu a deleuill er tir er a telbiil lobengkel a Dios.
Uchei er a lekengei Osobel el mo er a ringel er a Gehtsemane me a Kolkata, eng dilu er a re Apostol er Ngii el kmo, ”IKo mo obangel a betok longarm er a beluulechad” eng di bol deu a rengmiu; le ak mla mo mesisiich er a beluulechad.”3 Osisiu el tekoi, a Jesus a mla olengit er kid el mo meruul er a osisiu er ser a le du el kmo, “Akdmuer kemiume bo mesisiicher a beluulechad.”4
Rodam me a rodos, a klemechek le ko er kemiu er chelechal sils a kmo a Jesus Kristo el mlo mesisiich er tial mla ruebet el beluulechad, e mlo churam el kirel a dersta er kid a uchul, e kemiu a dirrek el sebechiu el mo mesisiich er tial mui er a klengit, e bechechelingaol, e meringel el beluulechad.
A Osobel a uchul, lokiu sel cherrungel el Tngakireng er Ngii, e ngolsobel er a dertsa er kid er a chelitechetud, cheleuid er kid, kngtid, e dirrek el Ngii el mla soiseb er a bek el ringel, sebekreng, me a berraod el kemiu a mla soiseb er ngii el dirrek e sel, 5omeral louchel a rengmiu e mosiik a ngesou er Ngii, eng sebechiu el ngoriakl el mo er bab er tial beluulechad.
Ng sebechiu el mo mesisiich er a ikel ongarm er tial beluulechad lomekringel a reng, luldimukl a delcherecher reng, kldidai el reng, klsibelreng, mekngit lomeruul, klauketui, bechelingaol, chelechei, me a dakt. Meng diak el iior er a olibesongel me a blulak el meliuekl er kemiu, leng sebechiu el metik a ulengull—el belkul a kmo selbechakl me a budech—er a chelsel aikel meringel mondai el mchelebangel.
Tial klou a belkul klemerang a meskid a kldei meklou a belkul ker:
A kot, e ngera belkul a mo mesisiich er a beluulechad?
Ongerung, ng mekera doruul er ngii?
Ea ongedei, a bo de mesisiich er a beluulechad eng mekera lomekngeltengat a klengar kid?
Ngera belkul a mo mesisiich er a beluulechad? Ng belkul a kmo kede mo mesisiich er sel ongetikaik el ngmai a tekingel a beluulechad el mo ruchei er a tekingel a Dios. Ng belkul a kmo kede mo oumerang osischeklel a Kristo e diak dultuil a di uldesuir a rechad. Ng belkul a kmo kede semeriar er a klemerang, mo cheroid a blulak lomengesuseu, e meral mo ”oba ngariou el reng el chedal a Kristo.”6 Ng belkul a kmo kede mengeroid er kid er a ikel tekoi luchul e a Chedaol Reng a mo er cheroid er kid. Ng belkul a kmo ng meral ngarngii er a rengud el ”mo cheroid” er a ikel kmal soad el klengit.7
Chelecha, e a mo mesisiich er a beluulechad a diak el belkul a kmo kede mo cherrungel er tial klengar, a lechub e a mondai el mchelbangel a di kiul mo diak— leng diak el bol uaisei. E dirrek el diak el belkul a kmo ng di mereko el diak bo moruul a mekngit. A mo mesisiich er a beluulechad a belkul a kmo a klisichem lodngeklii a klengit a mo chachisois. Ng mo medemdemk a rengum sel lorael mo mesisiich a klaumera er kau er a Kristo.8 A mo mesisiich er a beluulechad a belkul a kmo ng mukeroul a beltikereng er kau el mo er a Dios me a Betik er a Rengul Ngelekel er a ngii di el techang a lechub a ngii di el ngerang.
A leuaisei, eng mekera, bo de misisiich er a beluulechad? A King Benjamin a mekerang.ulsischeklid el kmo ng mekerang. Ngullisechakl el kmo a ”klechad er a tech a cheraro el mo er a Dios” e melemolem el uaisei el mo er a ulebongel”el di merekmobo loltirakl er a odbechel a Chedaol Reng, e bol becherei a klechad e bol santo lokiu a tngakireng er a Kristo el Rubak.”9 Bek el taem el mosiik e moltirakl er a odbechel Chedaol Reng, me a bek el taem el mrelii a kmo ngera el ungil—el ngii el tekoi a diak ”di klechad er a chad” el remuul— e kau a mesisiich er a beluulechad.
A mo mesisiich er a beluulechad a diak el teletael el di duuebch er a chelsel a tang a lechub eng erul klebesei. Ng duubech er a chelsel a klengar rokir sel de blechoel mengeluolou a osischeklel a Kristo. Kede mekdebechii a klaumerang er a Jesus Kristo lokiu ouchel reng me a otireklel a telbiil el ngii a meskid a klisiich. Kede melemolem el ngara rolel a telbiil e mukngeltengat er a chedaol klisiich, chedaol ocholt, mesisiich el klaumerang, me a odngelir a reanghel. A otireklel osischeklel a Kristo a mekdebechii a mesisiich el klisiich, klikiid el klengar e mekdebechii a chedaol klengar kid.10
Sel dolasm el mo kiei loltirakl a ngarbab llechul a Jesus Kristo, e a rengud me sel kmal klechad er kid a omuchel mengodech. A Osobel a tikeuid el mo er bab er a omengurs er tial beluulechad el mo omekngeltengat er kid er a dmolech el beltikereng, ngariou el reng, blekururau, blekokouii, mo meduch lomtebechel er kid, budech, me a ulengull.
Chelecha, e kom locha omdasou el kmo aika ko er a kmal meringel chedaol ureor e bai diak a lulengull Eng di tiakid a meang el klemerang: a beluulechad a melemolem el kmo a klisiich, iilteet, merael chisel, me a deureng er a tech a meskid a deureng, eng di ng kmal diak! Aika diak el sebechel! Ng diak a ngera el mokdubech er ngii er a bai tirkel tir a ”ngeltengat e ngara deureng” le [tir] loltirakl a llechul a Dios.”11
A mera er ngii ng bai lmuut el meringel el tekoi a omosiik er a deureng el ngii a diak kobetik er ngii! Eng di, sel mrengedau el mo er a Jesus Kristo e moruul a chedaol ureor el uchul e ko mo mesisiich er a beluulechad, e Ngii, e di Ngii el tang, a ngarngii a klisichel el tikeuau el mo er a bab er a omengurs er a beluulechad.
Chelecha, kede mekera e mo ngeltengat a bo de meisiich er a beluulechad? A nger a bleketakl: a sisbelled er a telbiil lobengkel a Dios a omak er kid el mo er Ngii e remuul a rokui el tekoier a klengar el mo beot. A kulengit me lak bol rrau a rengmiu er a tekingek: Ng dimlak kdu el kmo a desiseb er a telbiil eng rulii a klengar el mo beot. A mera er ngii, eng kirel ngarngii a ultok, le cherarou a diak el soal a bo modengelii a klisichel a Jesus Kris Eng di a omerenged el mo er a Osobel eng belkul a kmo ngarngii a techellem er a Klisichel lolsobel.
Ak lmuut el dulii a dmolech a belkul osischeklel el mlara President Ezra Taft Benson: ”A rsechal me a redil el mult a klengar tir el mo er a Dios a mo metik el kmo Ngii a sebechel remuul a lmuut el betok er a chelsel a klengar tir er a bai di el tir. Ng mo dochel a deureng er tir, e komanget osengir, e mok a uldesuir, … e sobechakl a rengrir, e mdois a klengeltengat el mo er tir, e omdois a techellir, e olaod a rengrir, e mesterir a resechelirir, e mesterir a budech.”12
Aika el diak a mo mekesiu el techall luldimukl er tirkel losiik a ngesou er a babeluades el mo ngosuterir el mo mesisiich er a beluulechad. Me lmuut er chelechang, e ak dulii el mo er a rechedal a Ikelesia el rokir a osisiu el tekoi el kdilii el mo er a rengeasek er tial mlomerek el Ongeim el buil. Ak milngelechel er tir er els taem—e olengiter kemiu er chelechang—me bo motebechelii a klaumera er kemiu er a Jesus Kristo me a bangkelio er Ngii. Mouedikel el kirel. Mokerulii el mo klou. Momekeroul er ngii er a klemerang. Lak mtemelii lolab a cheleuid luldesuir a re diak loumerang el sechal me a redil. Me sel molemolem el melisiich er a klaumera er kemiu er a Jesus Kristo el mo kot el ngaruchei el tekoi, e momtab ongasireng el mo duubech er a klengar kemiu.13
A ongtik er kemiu er chelechal tutau a kmo bo betik er a ulengull er a klisichel, rrau a rengud er ngii, me a ringel er tial beluulechad el mo mesisiich er a beluulechad lokiu a telbiliu lobengkel a Dios. Bo Lodengei lokiu a nglunguchiu me a omerelliu el kmo ng meral ngarngii er a rengmiu a mo mesisiich er a beluulechad. Molengit er Ngii me bo lomekellomes a uldesuiu e lodurokl a ngesou el mousbech. Bek el sils, e mluches a ngara uldesuem sel moluluuch; e bol blak a rengum lotirakl. Mchoit a betok el temiu el ngara templo e mosiik el mo medengei el kmo ng mekera templo losischeklemiu el ngoriakl er tial beluulechad.14
Ng ua ikel blak dung, a omengidb er a Israel a kot el klou a belkul ureor el ngara beluulechad er chelechal sils. A kot el klou a belkul ngercheled er tial omengidb a mengedmokl er a rechad el sebechir, e kldmokl, e klikiid el mo mesa Rubak sel Luut el mei, el rechad el tir a mla ngiltii a Jesus Kristo el mo ruchei er tial beluulechad, el rechad el tir a dmeu a rengrir el mimokl el melilt el mo oltirakl a ngarbab, e chedaol llechul a Jesus Kristo.
A kumekedong er kemiu, e rodam me a rodos er ngak, el mo tirkaikid el melemalt el chad. Mongeluolou e mongull a telbiliu el mo kot el ngarbab er a rokui el tekoi. Sel bechere Dios me bo lomtebechel a klengar kemiu, e ak yaksok er kemiu a klou el budech, selbechakl reng, deureng, me a dirrek el, ulengull.
Ngultuil er a klisiich er a kle apostol el kubang, e a kumekngltengat er kemiu me molasm el mo mesisiich er a beluulechad. A kumekngeltengat er kemiu me bo moleketek er a klaumera er kemiu er a Jesus Kristo e mungil mesuub el kirel a ngeiul a Klisichel. A kumekngeltengat er kemiu me bo meduch el mtebengar a klemerang er a chelbirukl. A kumekngeltengat er kemiu me bom kerekikl a tekingel a Dios er a tekingel a beluulechad. A kumekngeltengat er kemiu el mes a ngelsengesir tirkel ngara bita er kemiu e molisiich er a rebetik er a rengmiu. Le Jesus Kristo el mlo mesisiich er a beluulechad, me kemiu meng sebechiu el mo uaisei. Aika kuuchais el ngara chedaol ngklel a Jesus Kristo, amen.