Mlecha Klisichem, E Zion
A dersta er kid a kired el tiriter a klechad er kid me a ikel chedaol meklou a belkul tekoi lokiu a nglunguuch.
A olachitnger a mesisiich el smodii a teletelel a Rubak el Jesus Kristo sel lolisechakl. A beot el belkul, e a olachitnger er a Osobel a cheldecheduch el mengaisisiu a chedaol klemrang el mo er a klalou me a tekingel a klechad. Okesiul tiang, e a ikel ebangkelio el ngara Beches el Renged a mui er a osisechakl el mengaisisiu er a rengedel Babeluades el mora tane er a mustard,1mekreos el ngisel a chesiuch,2me a oungerachel er a blai me a roureor er a sers,3me a reteruich el klikiid el redil,4me a lmuut el bebil er a tekoi. A telengtengil a urerel a Rubak er a lengara Galilee, e a chedaol llechukl a melekoi el kmo ”ng dimlak a ta me lak lulngedecheduch olachitnger el tekoi el mo er tir.”5
Sel kmal meral belkul a lechub eng klemechel olachitnger a blechoel diak el sal bleketakl. Ng bai, tial cheldecheduch ochotii a chedaol klemerang el mo er a chad el dochelii a telkib er a klaumera er ngii er a Dios, me a kedmeklel er a chedaol tekoi, me a blakereng el mo mesuub. A leuaisei, e a dersta el chad a kirir el mo meduch el melilt e mui “loker, osiik, e melengod” 6 me bol betik er a klemerang er a chelsel aika olachitnger el tekoi.
Ng kmal nglunguchek me a Chedaol Reng bo lomekellomes er kid er chelechal domtab er a klou el ultutelel sel olachitnger el cheldecheduch er a klou el mur er a merengel a chebechiil.
Mur er a Merengel a Chebechiil
“Me a Jesus … a liluut el mengedecheduch er tir lokiu olachitnger, el dilu el kmo,
“A rengedel babeluades a uaia chimo el king, el milngedmokl er a merengel a chebechielel a ngelekel sechal,
“E uldercheterir a remesiungel el mo omekedong er a recahd el mei er a merengel a chebechiil: eng di dimlak el mei.
“Mneg liluut, lodercheterir a rebebil er a remesiungel, e kmo, Bom du er tir el kmo, ak mla kudmeklii a belsoil: ak mla mekeuad a cheremek, me a rokui el tekoi a mla mekedmokl: mei er tial merengel a chebechiil.
“Eng di tir a dimlak loumera er ngii, e mirrael mo cheroid, a tang a mlo er a sers, me a tang a mlo er a urerel.“7
A ngara mong el taem, e a ta er a kot el klou el deureng el tekoi er a re Jews a merengel a chebechiil—el ngii el teletael a tang el mo bedul erul sandei a klsel. Tia ousbech er a klou el taem a kedmeklel, me a re okiasang a di uchei e te spadel, lobengkel a uleklatk er sel sils lomuchel tial tekoi. A siotai er a king el mo er a re okiak el mei er tial merengel a chebechiil a kmal mle klou a ultutelel leng uaia loderuchel. Eng di, te betok el okiaksang er a chelsel tial cheldecheduch a dimlak el mei.8
“A rechad el kotouar e diak el bo er tial mur loruul er ngii a king a bleketakl [lolchotel a kmo] te omtok er a … rengarbab el merredel e olchotel a diak omengull er tir er a merredel me ngika el ngelekel sechal. … Ngike el mirrael el mo er a sers me ngike el kuk chimong el mirrael el mo [meruul a urerel]”9 a olchotel a kmo ng diak el klou a belkul er tir e diak lorrenges a tekingel a king.10
Tial olachitnger a melmeolem:
“Meng dula er a remesiungel el kmo, ngomechela merengel a chebechiil, eng di a kulleker tir el chad a diak el ngara tiang.
“Me morael el mora rael, e moleker tirkel mesterir el mei er tial merengel a chebechiil.
“Me a remesiungel a tilobed el mo er a rael, e ulelker er a betok el chad, a rungil me a remekngit: me tial merengel a chebechiil a mlo mui er a rechad.”11
A siukang er sel taem a ngkel loungerachel er a mur er a merengel a chebechiil—me tial cheldecheduch, eng king oungerachel—a kirel lomekbail er a rechad el mei. Ng mle beot el bail, el diak el sal louberberingel a lulubail a rechad. Tiaikid el teletael, eng dimlak el blibii a rechad, a rokui el chad el mla er a mur a di mle osisiu.12
A rechad er a rael el mlei er tial merengel a chebechiil a dimlak a temir el smiik a beches el bilir el kirel tial tekoi. A leuaisei, ea king a locha ngilai a bilel lomekbail er tirkal chad. A rebek el chad a mlo er ngii a techellir loubail a meringel chad el bail.13
A king er a lesiseb er a blai, eng ulemes er tial seked e tilab osengel er a tal chad el dimlak lebleiull er a bail el kirel tial merengel a chebechiil. Ngika el chad a mlengai, el mei er medal a king me nguleker ngii el kmo, “Kau, ke milkera me tmuu el diak mbleiull er a kirem loubail bail? Ngika el chad a dimlak a ngera ledung.”14 Ng belkul a kmo, a king a uleker, “Ngera meng diak moubail er a bail el kirel tial chebechiil, el ki mngiluu el meskau?“15
Ngika el chad a meral dimlak el ungil bleiull el kirel tial mur, me sel tekoi el kmo “Ng dimlak a ngera ledung“ a belkul a kmo ng mlo diak el sodii.16
A Elder James E. Talmage a meskid tiakid el klou a belkul tekoi el kirel a blekerdelel ngika el chad: “A dimlak lungil bleiull el chad a olchotel a diak omengull er ngii, a lechub e ngarngii, a klou el telmellel, el kmal meringel er ngii. A kot a king a kmal mle ungil mengedecheduch, loker el kmo ng milkera ngika el chad e soiseb el diak lungil bleiull. Omko ngika el chad a mle sebechel smodii a teletelel, a lechub e ngungil luchul, eng locha mle sebechel mengedecheduch; eng di kede medengei el kmo ng di liluk. A meirei er a king a mlo er a rokui el chad el tirkel mesiungel a miltik er tir; eng di tir el rokui el mle kirir el soiseb er a tuangel el mo tmuu er a blai; e a uchei er a bo el siseb er a blil a blengur, el king a ngara chelsel, eng kirir el ungil bleiull; eng di ngika el chad, a kmo ng milkera e soiseb lokiu a tara tuangel; el mengkar er a medal a tuangel a dimlak lesa lengelakl, meng uaia le mekngit el chad.”17
A Kristiano el chad er a omeluches el, John O. Reid, a melekoi el kmo a teletelel ngika el chad el dimlak el soal loubail a ungil bail a bleketakl lolchotel a “diak omengull er ngii el mo er a king me a ngelekel sechal.“ Ng dimlak lak a bail sebechel loubail; eng di, ngmillilt el diak el soal loubail. Ng kmal mla er ngii er a rengul a diak el soal lungil loubail el mo er tial mur. A omerellel a king a mle mereched e ulterekokl: “Mlechet ochil me a chimal, e mnguu el choridii, lotebedii el mora iilkolk; me bo lodidelangel e lolsiu a ungelel.“18
A uldesuel a king el kirel ngika el chad a diak el sal lultuil er a kmo ng dimlak lungil a bilel—ng bai, ultuil, er sel “rengul el dimlak“ el soal loubail. Ngika el chad … a mle soal mo er tial mur er a merengel a chebechiil, eng di … dimlak el soal loltirakl a tekingel a king. Ng mle soal meruul er sel soal. A teletelel dimlak lungil a bilel ochotii a rengul lomtok er a king me a tekoi ledilung.”19
Betok a Mokedong, eng di Kesai a Mengilt
A ulebongel er tial cheldecheduch eng meskid tiakid el mesisiich el bades: “Le te betok a mokedong, eng di te mekesai a mengilt.“20
Ng mengasireng, le Joseph Smith a dilii tiakid el tekoi el kirel tial bades el ngara Mateus er sera loleuiid er a Biblia: ”Le te betok a mokedong, eng di te kesai a mengilt; le te betok a diak el bleiull er a bilel a merengel a chebechiil.”21
A siotai el mo er a mur er a merengel a chebechiil me a omelilt er kid el mo er tial mur a kabekbuk eng di ng kakerous . A siotai a mo er a rokui el sechal me a redil. A chad a sebechel kongei er a ongit e mo dengchokl e ngara mur—eng di diak el mengilt el mong le ngii el diak lungil bleiull er a mui el klaumerang er a Rubak el Jesus me a chedaol krazia er Ngii. A leuaisei, e kede oba okedong er a Dios me a nger kid el kirel tial okedong, me te locha betok a mo mokedong eng di te mekesai a mengilt.22
A mo mengilt a diak el ileakl el deruchall el denguu. Ng bai, kau me a ngak a sebeched el melilt el mo mengilt lokiu a melemlat lomelilt er kid.
A kulengit me motebengar a usbechellel a tekoi el mengilt er a ikakid el dodengei el bades er a Doctrine and Covenants.
A leuaisei e te betok a mokedong, e kesai a mengilt. E ngera uchul me te diak el mengilt
”Le rengrir a ngara kloklel tial beluuelchad, e sorir a chetengakl er a rechad.”23
A kuumera el kmo a belkul aika el bades a kmal bleketakl. A Dios a diak a beldukl el ngklir a re soal chad el sebeched el ko er a oureng me a ta er a klebesei e bo de teloi er tir. Ng diak losebech a iidisir a ”remengilt” el di mo er a rekesai el chad. Ng bai, rengudme a, soadme a, otirekleder a chedaol telbiil me a ruoll, me a blekongesengeser kid er a llach, e sel, kmal klou a ultutelel, a sel tngakireng er a krazia er a Osobel a ochotii a kmo kede ulecherangel el ngellitel er a Dios.24
”Le kede meringel loureor el meluches, el mo mengesuseu er a rengeleked, me a rodam er a kid, el mo oumerang er a Kristo, e mo tang lobengkel a Dios; le kede medengei el kmo ngokiu a krazia e kid a mo suobel, lultuil er a ikel rokui el kired el meruul.”25
A chelsengud er a bek el sils me a nglemuu er tial beluulechad er chelechang el kid a kiei er ngii, eng sebeched el mo cheroid er a ikel diak a ulebengelel tekoi el ngii a kmal meklou a ultutelel a lsekum e kede ngmai omilil, iilteet, chetengakl, me a deruchall el mo ngaruchei. A kedeb el taem el demechesang er a ”tekingel tial beluulechad” me a ”chetengakl er a rechad” a sebechel mo ngaruchei er sel chedaol dikesed el ngii a lmuut el kmal kekerei er a telkib el sub.26
Yaksok me a Klaumerang
A klmuut el dulii a tekingel a Rubak el mo er a Rechedal ledillii a profet Haggai er a Uodel Renged: ”Chelecha e a Rubak er a rokui el tekoi a dmu el kmo; Momtab omoruul tekoi.”27
Ng kirel a dersta er kid el mo ungil mes aikel meklou a belkul chedaol tekoi me a tekingel a klechad e mesi aikel ngii a sebechel mo tomer a betok el klengeltengat el Chedam er a Babeluades me a Osobel a semeriar lomeskid. A Chedaol Reng a mo ngosukid el mo mesa sel meral kid.28
Sel dengara ungil rolel a skel chedaol sengk er a mad me a ding lorrenges,29 le ak yaksok er kemiu el kmo kede mo ngeltengat er a duch me a llomes el mo smisiich a telbiled lobengkel a ngar el Rubak. Kede dirrek el mo nguu a klisichel a Kledios er a klengar kid30—e a uriul e kede mo okedongall el ngellitel el mo er a mur er a Rubak.
“Bekiis, bekiis; e mlecha klisichem, e Zion.”31
Le zion a kirel klou a klebekelel, e chedaol; e kilou a tkul; me a tekeklel meng mo mesisiich; oi, a kmal dmu er kemiu, a Zion a kirle mekiis e milii er a klebokel bail.”32
Ak ngara deureng e ouchais er a sioning er ngak el kirel a chedaol e meral Dios, el Diak a Ulebengelel Chedam, me a Betik er a rengul Ngelekel, el Jesus Kristo. A kuchais el kmo a Jesus Kristo a Osobeled e Olsobel e Ngii a ngar. E dirrek el sioning el kmo a Chedam me a Ngalek a dilum er a buik el Joseph Smith, el mlo uchul a uchelel Olutel a ebangkelio er a Osobel er a Uriul-klebesei. A dersta er kid be dosiik e bo dengeltengat er a mad lomes me a ding lorrenges, a nglunguchek el ngara chedaol ngklel a Rubak el Jesus Kristo, amen.