![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F05%2Fc5%2F05c5b5ea8489e4ab0e7f3bf68388aadaa67f77d9%2F05c5b5ea8489e4ab0e7f3bf68388aadaa67f77d9.jpeg/full/!250,/0/default)
Ñamopu’ã peteĩ tekove imbaretéva adversario renondépe
Añembo’e tañamopu’ã meme ñande rekove jasegívo umi designio divíno plan ha especificaciones técnicas ñande Ru Yvagagua ohaiva’ekue.
Heta ary pukukue ko Centro de conferencia púlpito porãite guive, jahupyty momarandu, inspirasiõ, tekombo’e ha rrevelasiõ iporãmbajepéva. Sapy’ánte umi oñe’ẽva oiporújepi ñembojoja ohóva ikuaapy ha jehasapy rehe omoha’anga hesakã ha mbarete porã hag̃ua peteĩ Jesucristo evanhélio principio.
Upéicha, jaikuaa umi aviõ ha vuelo-gui ikatuhápe peteĩ ñemovã iñepyrũrã michĩmíva ñandeguerahakuaa tendápe mombyryetéva jahaseha ypýgui. 1 Upéicha avei, ñañemoarandu oñembojojávo ñane korasõ físico rembiapo pe korasõ ñemoambue mbaretére oñeikotevẽva ñambohovái hag̃ua Ñandejára invitasiõ jasegi hag̃ua Chupe.2
Ko’ág̃a, mirĩme amoĩseve peteĩ ñembojoja oñeinspiráva peteĩ che preparación profesional área-pe. Añe’ẽ hína ingeniería civil múndogui. Añepyrũ guive aestudia universidad-pe, asoña ára reheve ahupytypa vove umi oñeikotevẽva akalifika hag̃ua peteĩ clase-rã chembo’étava mba’éichapa adiseñava’erã umi edificio ha ambue estructura ikatúva oñekonsidera upéi “antisísmica” ramo.
Ipahápe og̃uahẽ ára che clase peteĩrã upe téma reheguáva. Mbo’ehára oñepyrũ ko’ã ñe’ẽ reheve: “Oiméne peñepyrũseitéma ko curso ha peikuaase mba’éichapa pediseñava’erã umi estructura anti-sísmica”, ha heta ore torýpe roñakãity. Upérõ mbo’ehára he’i: “Ambyasyete ha katu ha’eva’erã peẽme upéva ndaikatuitaha, ndaikatúigui pombo’e pediseña hag̃ua peteĩ edificio oĩva en contra, ha’éva ‘anti-’, térã oñemoĩva peteĩ yvyryrýire. Upéva ndorekói sentido,” he’i ha’e “yvyryrýi oikotantevoígui, taha’e ñandegusta térã nahániri.”
Upéi he’ive: “Upe ambo’ekuaáva peẽme ningo mba’éichapa pediseñakuaa umi estructura ikatúva ogueropu’aka yvyryrýi, umi estrutura ogueropu’akakuaáva umi yvyryrýi mbaretekue, ikatu hag̃uáicha opyta oñembo’ývo ohupyty’ỹre chupe daño ivaietéva ha ome’ẽmeme hag̃ua gueteri pe servicio oñemopu’ã haguére”.
Ingeniero ojapo umi cálculo ohechaukáva umi dimensiõ, kalida ha característica orekóva umi cimiento, columna, viga, lósa concreto-guiga ha ambue estructura elemento oñediseñava hína. Ko’ã rresultádo oñembohasa umi plan ha especificaciones técnicas-pe, pe constructor osegi porãva’erã pe obra ojejapo hag̃ua, ha okumpli hag̃ua péicha mba’érepa oñediseña ha oñemopu’ã hína.
Jepe ohasáma 40 áño upe ingeniería resistecia sísmica rehegua clase peteĩha guive, chemandu’a porã gueteri upe momento añepyrũ haguépe aikũmby pypuku ha porãve importancia vital orekóva toĩ presente upe concepto umi estructura adiseñátava che rekove profesional oútavape. Ndaha’éi upévante, ha katu iñimportantevéva, oĩ meméta che rekove tee ñemopu’ãme ha avei umi ikatúva ári areko peteĩ influencia positíva.
¡Jajehovasaite niko ñande jaikuaávo ñande Ru Yvagagua Plan Salvasiõ rehegua, jarekóvo Jesucristo evanhélio rrestaurado ha jajeroviávo umi proféta oikovéva sãmbyhy inspirado rehe! Opa umíva ha’e umi “plan” oñediseñava’ekue divinamente ha umi “especificaciones técnicas” ñanembo’e hesakãva mba’éichapa ñamopu’ãkuaa tekove henyhẽva vy’águi, ogueropu’akakuaáva angaipa, py’ara’ã ha Satana atakekuéra, ha’e oñeha’ãmbaitégui ombyai ñane destino eterno ñaime haĝua ñande Ru Yvagagua ndie ha ñane familiakuéra jahayhuetéva ndie.
Pe Salvador, Iministerio ñepyrũme, “ojeheja ojeipy’ara’ã hag̃ua añáre”.3 Ha katu Jesús osẽporãmbaite upe py’ara’ã guasuetégui. ¿Mba’éichapa oipytyvõnera’e chupe orekórõ peteĩ actitud anti-satana térã anti-py’ara’ã? Jesús niko osẽporãmbaite umi ára hasyvévagui Iñembosako’i espiritual rupi, ohejáva chupe togueropu’aka pe adversario py’ara’ãnguéra.
¿Mba’e mba’épa oipytyvõra’e pe Salvador-pe oñemosako’i porã hag̃ua upe ára ha’etévape g̃uarã?
Peteĩha, oajunákuri cuarenta ára ha cuarenta pyhare, peteĩ ajúno oñemoĩrũnevara’e ñembo’ememe rehe. Upéicha, Hete ikangyrõ jepe, Ijespiritu imbareteterei. Ndojejeruréirõ jepe ñandéve ja’ajuna hag̃ua upéicha pukukue, ha katu 24 aravo añónte ha peteĩ jave káda mes, pe ajúno ome’ẽ ñandéve mbarete espiritual ha ñanembosako’i jagueropu’aka hag̃ua ko tekovegua py’ara’ãita.
Mokõiha, umi jeipy’ara’ã pe Salvador ohasava’ekue ñemombe’úpe, jahecha Ha’e ombohovaimemehague Satanápe orekóvo Iñakãme umi escritura, omombe’u ha oiporúvo umíva ha’etépe.
Satana oipy’ara’ã vove Chupe ojapo hag̃ua itágui mbujape oñemohyg̃uatã hag̃ua pe ajuno pukuete rire, Ñandejára he’i chupe: “Ojehaíkuri: Yvypóra ndoikomo’ãi mbujape rupi añónte, ha katu opa ñe’ẽ rupi osẽva Tupã jurúgui”.4 Upéi, oĩ vove Ñandejára templo ru’ãme, Aña oñeha’ã oipy’ara’ã Chupe ohechauka hag̃ua Ipu’aka, ha katu Ñandejára ombohovái autorida reheve: “Ojehaíkuri avei: Ndereipy’ara’ãmo’ãi Ñandejára ne Tupãme”.5 Ha Satana mbohapyha ñeha’ãme, Ñandejára ombohovái: “Ojehaíkuri: Ñandejára ne Tupãme retupãitũta, ha Chupe añónte reservíta.”6
Peteĩ yvyryrýi oheja hapykuere jepe umi estructura oñediseña ha oñemopu’ãporãva’ekuépe, umi hapykuere niko ikatu tiri, umi mueble térã técho ho’áva, ha ovetã ojekáva. Ha katu upe edificio oñediseña ha oñemopu’ãporãva okumplíta ipropósito omo’ã hag̃ua umi oikóva ipypépe, ha ñemyatyrõ’imi reheve, oñemoĩjeýta oĩ’ypy haguéicha.
Upeichaite avei, umi adversario rovapete ikatu “ombotiri” térã ombyai’imi ñande rekove, ñañeha’ãrõ jepe ñamohenda ñande rekove pe designio divino porãmbaitére. Ko’ã “tiri” ikatu ojehechauka ñañandúvo ñembyasy térã angekói jajavy ha ndajajapoporãmbai haguére, térã ñañandu nañaneporãmbái jaipotaháicha.
Ha katu imba’eguasu añetéva niko ñañembo’yha gueteri, upéva jasegi haguére umi plan ha especificaciones divinamente oñediseñava’ekue, ha’éva Jesucristo evanhélio. Ha ñande rekove estructura ndo’ái pe adversario ñeha’ã térã umi jehasa’asy rupi ñambohovakéva; Uvei, ñaimeporã jaha hag̃uáicha tenonde gotyo.
Pe vy’apavẽ oñeprometéva ñandéve escriturakuérape ñande rekove propósito ramo7nde’iséi ndajaguerekomo’ãiha jeiko’asy térã ñembyasy, ndajaguerekomo’ãiha “tiri” oúva jeipy’ara’ã, jehasa’asy térã ko tekove yvy’arigua py’ara’ã teéva rupi.
Ko vy’apavẽ niko ojehecha Nefi ohechaháicha ko tekove he’i vove: “ahecháramo jepe heta jeikoʼasy che rekove aja, upevére, heta avei añepytyvõ Ñandejárare opaite che ára.”8 ¡Opaite hi’ára! Jepe umi ára Nefi ohasa’asývo iñermanokuéra rechakuaa’ỹ ha ñembotove rupi, jepe ombyepoti vove chupe hikuái pe ygápe, jepe pe ára itúva, Lehi, omano vove, jepe Lamán ha Lemuel-gui oiko vove itavayguakuéra enemigo mortal. Jepe umi ára hasyetépe, Nefi oñandu heta avei oñepytyvõha Ñandejárare.
Ikatu ñandepy’aguapy jaikuaávo Ñandejára araka’eve ndohejamo’ãiha jajeipy’ara’ãve ikatúvagui jagueropu’aka. Alma ñaneinvita “ha peñemboʼe meme, ani hag̃ua pejeipyʼaraʼãve ikatúva pegueropuʼakágui, ha péicha pejegueraha hag̃ua pe Espíritu Santo rupive, peñemomirĩvo, penerekomarangatúvo, peneñeʼẽrendúvo, pehaʼarõkuaávo, penerenyhẽvo mborayhu ha pyʼaporãgui.”9
Upevaite ikatu oje’aplika ko tekove py’ara’ãre. Ammón ñanemomandu’a Ñandejára ñe’ẽre: “Peho … ha pehasa ñehaʼarõme pende jehasaʼasykuéra, ha che ameʼẽta peẽme poʼa.”10
Ñambohovake vove jeiko’asy, jeipy’ara’ã, jehechakuaa’ỹ, kangy ha jepe ñemano, Ñandejára ñanepytyvõ katuete. Ha’e he’i: Ha koʼág̃a, añetehápe Che haʼe peẽme, ha upe Che haʼéva peteĩme, Che haʼe opavavépe, peñemokyreʼỹ, mitãmikuéra; Che aimégui pene mbytépe, ha Che ndapohejareíri.”11 ¡Ha’e araka’eve nañanderejareimo’ãi!
Añembo’e tañamopu’ãmeme ñande rekove jasegívo umi designio divíno plan ha especificaciones técnicas ñande Ru Yvagagua ohaiva’ekue ha okumpli ñande Salvador Jesucristo rupive. Upéicha, pe grásia rupi jahupytýva ñande Salvador expiasiõ rupive, jajapoporãmbáta ñamopu’ãvo peteĩ tekove ikatúva ogueropu’aka umi angaipa, jeipy’ara’ã ha imbarete porãva ohasaporã hag̃ua umi ñande rekove ára hasýva ha oñembyasýva. Ha avei ikatúta jahupyty opaite umi jehovasa oñeprometeva’ekue ñande Ru ha ñande Salvador mborayhu rupive. Jesucristo rérape, Amén.