Pwapwa me Ese Much

By Elter Gerrit W. Gong

Seni ewe Mwichen Engon me Ruemon Aposel

Mi pung, pwapwa fochofoch me ese much fiti ekkana sia tonger ir ekkewe wesewesen auchean an Kot ewe kokotun pwapwa.

Chiechiei, pwii, me fefinei achengicheng, ami mi chemeni fansoun ami nuku, ika mochen nuku, non pwapwa feinfeino?

Iwe manau a fis. We “marita.” Pekin nefin a aweires. Ei fonufan a akakurang, etiepach, etieti, fiti foforun esap wesewesan me eingeing. Nge, non “anononun nukanapen ngasangasach,”¹ sia nuku, ika mochen sipwe nuku, ian, ren ew wewe, pwapwa me ese much ir wesewesan met mi tufich.

“Pwapwa me ese much” esap ir ekkewe minen chok anchangei ekkewe porousen tutunap. Mi pung, pwapwa fochofoch me esemuch fiti ekkana sia tonger ir ekkewe wesewesen auchean an Kot ewe kokotun pwapwa. An ewe murinon an mi amoneta a tongeni fori ach sai fochofoch epwe pwapwa me esemuch.

A watte met sipwe fori apwapwan me minne sipwe kinisou ren. Iwe nge, ese wor neich a unusoch, ika pwan kewe famini. Ach marar pachenong tong, mweicheichen aramas, sokofesenin emon me emon nge fan chommong pwan efeikes, metek, fan ekkoch nununo anononun metekin.

“Ussun ren Adam aramas meinisin repwe mano, nge non Kraist meinisin repwe kuna manau.”² Manau non Jises Kraist a pachenong manau fochofoch—An niffang ren manau sefanitan inis. Nupwen sia nom non nuku me anneasosich, manau non Kraist a tongeni pwan pachenong chommongun pwapwan manau ese much ren Kot me ekkana sia tonger.

Non ew amwararen napanap, noun ewe Samon ewe soufos a akana ngenikich ach ewe Chon Amanau, pachenong me ren ekkewe angangepin non ekkewe tempel mi pin me pwon mi pin a arapakan ngenikich non ekkoch neni. A wor ach anononun tufich me niffang ach sipwe kuna wewe non pekin ngun, tong, aier sefan, me omusano fiti emon me emon me ach kewe famini, non fansoun me fansoun meinisin.

Ren mumuta, ua aporousa ruu mettoch mi pin, napengeni chiechiei kewe ra aporousa ussun Jises Kraist a ochufengeni ekkewe famini ren an echikarata pwan mo chommong pinon aramas mi riaffou.³ “Feinfeino me ese much,”⁴ “pochokun seni ekkewe senin mano,”⁵ An Jises Kraist ewe Achasefan a tongeni anisi kich ne wato kinamwe ngeni ach fansoun nom me epinukunuk ngeni ach fansoun mwach.

Nupwen ra choni Ewe Mwichefenin Jises Kraist ren Aramas mi Pin Non Fansoun Soponon, chienei we me punuwan we ra unusen pwapwa ne kaeo nefin non famini esap chok “tori an mano epwe eimufeseni kich.” Non ewe imwen ewe Samon, famini ra tongeni repwe chufengen feinfeino (riri fengen).

Nge chienei we ese mochen epwe riri ngeni saman ewe. “Atewe esap emon mwan mi murinno ngeni inei we. Ese pwan och ngeni noun kewe semirit,” neminewe a apasa. “Semei we epwe witiwit. Ese wor ai pochokunen mochen ne fori an angangen non tempel me riri ngeni i feinfeino.”

Ren ew ier, neminewe a echikefen, iotek, porous chommong ngeni ewe Samon ussun saman ewe. Mwirinon, a moneta. An saman ewe angangen non tempel a taweno. Mwirin, a apasa, “Non ai mour semei we a pwa ngeniei non ew tan, a ufouf mi pwech. Semei we a siwin. Atewe a apasa, ‘nengeniei. Ua unusen nimenimoch. Kinisou ren om fori ewe angang fan itei non ewe tempel.’” Saman ewe a sopweno, “Uta o niwinno ngeni ewe tempel; mongeom ewe a witiwitin an epwe papatais.”

Chienei ewe a apasa, “Ai kewe neuo me ekkana ra fen mano ra witiwit non atapwanapwan ren ar angang repwe taweno.”

“Ren ngang,” neminewe a apasa, “ewe tempel ew nenien echikarata, pekin kaeo, me pekin weweiti, me pekin etiwa ewe Achasefan an Jises Kraist.”

Oruen met a fis. Pwan emon chienei a achocho ne kukuta uruon an famini. I a mochen epwe sinei saman inan chinap ika saman chinap.

Non ew sosoran, chieneiwe a apasa pwe a mefi ngunun emon mwan mi nom non rumwan ewe. Ewe mwan a mochen epwe pwa me chon an ewe famini repwe sinei. Ewe mwan a mefi anononun niamam ren ew mwan minne iei a aier ren. Ewe mwan a anisi chieneiwe a esinna pwe chienei ewe ese marar ngeni ewe aramas chienei we a ekieki pwe semen saman chinap ika inan chinap. “Non pwan ew ititin,” chieneiwe a apasa, “ua fen kuna semen semen semei we me kaeo pwe esap inai ewe aramas ach ewe rekotun famini a apasa pwe semen semen semach we.”

Nefinan ngeni an ewe famini a fat, chieneiwe a apasa,“Ua mefi ngaseno, me kinamwe. A fokkun auchea ai upwe sinei ion ai kewe famini.” Chienei we a mwasang, “Efoch panen ira mi pworetiw esap wewen nge efoch ira mi ngaw. Ifa ussun ach feitto non ei fonufan a kukkun auchean nap seni ion kich nupwen sia tou seni.”

Ekkewe pukepin me ekkewe mettoch mi pin ussun an emon chikar won winikapan me kinamwe, pachenong fiti ekkana ra manau non ewe nenien ngun, a esisina nimu chunapen nongonong.

Aewin: Nukanapen non an Kot ewe kokotun ngaseno me pwapwa, Jises Kraist, seni an ewe Achasefan, a pwonei an epwe ochu fengeni ngunuch me inisich, “resap chiwen imufesen, pwe [sipwe] angei ew unusochun pwapwa.”⁶

Oruan: Achasefan—a-cha-sefan non Christ—a fis ussun sia anganga nuku me awora uwan ngeni aier.⁷ Ussun non manauach iei, pwan non manau fochofoch. Ekkewe angangepin non tempel rese ekesiwini kich ika ekkana non ewe nenien ngun. Nge ekkei auchean angangepin ra awora tufichin epinano ekkewe pwon mi pin fiti ewe Samon, minne epwe wato tipeew fengen fiti I me emon me emon ir.

Ach pwapwa a urono nupwen sia mefi an Jises Kraist we chen me an omusa kicheno. Me nupwen sia awora ewe manamanen An ewe chen me omusomus ngeni emon me emon kich, ewe umoumoch sia angei me ewe umoumoch sia awora a tongeni anisi pungungaw epwe pungoch.⁸

Aunungatin: Kot a sineochu kich me unusen tongei kich. “Ese wor io epwe turunufasei Kot,”⁹ ese pwan wor emon epwe tongeni otupu I. Fiti unusochun umoumoch me punguoch, I a rokopwanireno non Poun nepoun tumun ren ekkewe mi tekisoson me chon aier.

Non ewe Tempel Kirtland, ewe Soufos Joseph Smith a kuna non nemesepwi pwin ewe Alvin a manau non ewe muun celestial. Ewe Soufos Joseph a mwar, nupwen Alvin a mano me mwen epwe angei ewe angangepin angasa ren papatais.¹⁰ Non kinamein, ewe Samon a awewei pwata: Ewe Samon “epwe apungu [kich] anongonong won [ach] kewe angang, anongonong won mochenin [ach] kewe netip.”¹¹ Ngunuch kewe ra pwarata usun ach kewe angang me mochen.

Non kinisoun, sia sinei ekkewe mi manau me “ekkewe mi mano ra aier repwe ngaseno, seni anneasosich ngeni ekkewe angangepinin ewe imwen Kot ”¹² me an Kraist ewe Achasefan. Non ewe nenien ngun, pwan mo ekana ir mi nom non tipis me atai annuk mi wor ar tufichin aier.¹³

Non sokofesenin, ekkana ra mochen pusin finata anganganaw, ekana ra pusin mochen amangano aier, ika ion non an pwisin awora an ekieki me mwan ika sinei pwe epwe atai ekkewe annuk, kokkot ngeni mecheresin aier, epwe kapung meren Kot me ew “fatochun chemensefanin meinisin [ar] tipis.”¹⁴ Sise tongeni sinei pwe sipwe fori tipis non Ammon, iwe, sa ekieki pwe epwe chok automatik musono ren ach angei ewe sakramen non Raninifen. Ngeni kewe misineri ika ekkoch io ra apasa tapweno mwirin ewe Ngun wewen esap ren an epwe anneasosichi ekkewe nongonongun misin ika ekkewe annuk, ouse mochen chechemeni pwe anneasosichi nongonongun misin me ekkewe annuk a korato ewe Ngun. Esap wor neich epwe amangano aier. Ekkewe feiochun aier a poputa nupwen sia poputa ne aier.

Oruanun: Ewe Samon a ngeni kich auchean tufich ach sipwe winiti ussun I nupwen sia awora chon angang fan iten ekkoch ekkewe angangepin non tempel ekkoch ra mochen angei nge rese tongeni fori pusin fan iter. Sia kon winiti mi awesochuno me unusochuno¹⁵ nupwen sia winiti “chon amanaua … won mount Zion.”¹⁶ Nupwen sia anisi ekkoch, ewe Ngun mi Felin pwon a tongeni apungano ekkewe angangepin me epinano ir me ruemon, chon awora me chon angei. Ir me ruemon chon awora me chon angei ra tongeni fori me anonnonuono ne siwini ekkewe angangepin, non fansoun angei ekkewe feioch ra pwon ngeni Abraham, Isaac, me Jacob.

Amuchunon, enimuan: Nupwen ewe Auchean Annuk¹⁷ a aitikich, ew epinipinin anonnopok non aier me omusano a kori kich ach sipwe en me awora ngeni ekkoch met kewe kich won inisich sia mochen me auchea ngeni kich.

Fan ekkoch ach moneta ne omusano emon a otufichir me kich ne nuku sia tongeni aier me omusano. Fan ekkoch ew moneta ne mochen aier me ew tufichin omusano a feitto ren sokofesenin fansoun. Ach Chon Amanau i nouch chon Affor nefinach me Kot, nge I a pwan aninis ne uweato inisich me emon me emon nupwen sia feitto ngeni I. Akaewin nupwen metek me riaffou ra anonnon, forsefani nefinach me echikara netipach mi weires, nge meni weires ngenikich won pusin ach. Nge nang a tongeni ngenikich pochokun me mirit pekinon pusin ach sipwe sinei nupwen sia komochuno me ifa ussun sipwe epichono.

A kukununo ach mefi anamon nupwen sia mefi pwe sise anamon. Ach Chon Amanau a weweiti fansoun meinisin.¹⁸ Fiti an ach Chon Amanau aninis, sia tongeni fangetani ach namanamtekia, ach kewe metek, ach kewe tipis ngeni Kot. Nge met chok sipwe mefi nupwen sa poputa, sa unusochuno nupwen sia nuku I an epwe fori nefinach epwe unusono.

Ewe Samon, ewe a kuna me unusen weweiti, a omusano ion kewe Epwe omusereno; kich (non ach sise unusoch) sipwe omusano meinisin. Nupwen sia feitto ren ach Samon, a kukununo ach anonga ach ekiek won pusin kich. Sia akukunano ach apungu ekkoch me napeno ach omusano. Nukuochu non An echipor, umoumoch, me chen¹⁹ a tongeni epichikich seni tipefesen, song, efeiengawa, suseni, pungungaw, me ekkewe sosotun inis me ekiek, ena mi fan ekkoch feitto fiti ewe inis non ew manauen fonufan. Pwapwa me esemuch esap wewen pwe meinisin marar repwe pwapwa me esemuch. Nge ew ngoroun ier nupwen Setan a fofo²⁰ meni epwe ngeni kich fansoun mi auchea me amairun ekkewe anen ach sipwe tong, wewe, me asosonochuono mettoch, nupwen sia amonata ngeni esemuch.

Sia kuna an nang kochufengen non emon me emon kich.²¹ An Kot angang me ning a pachenong an wato pwapwa me esemuch.²² Manau ese much me manau mi tekia ren ach sipwe sinei Kot me Jises Kraist iwe, seni manamanen Kot, ikewe Ra nom ian kich sipwe pwan nom ie.²³

Achengicheng pwi me fefinei, Kot Samach won Nang me Noun we Achengicheng ir mi manau. Ra awora kinamwe, pwapwa, me chikar ngeni meinisin einang me kapas, ngeni emon me emon kich. Noun ewe Samon soufos ra emweni ewe an. Pwarata fansoun soponon mi chok soposopono. Amo sipwe arap ngeni ach Chon Amanau non imw mi pin imwen ewe Samon, me amo I a arapakana kich ngeni Kot me emon me emon kich nupwen sia ochu fengeni netipach ren ewe kirekirochun Krist, ennet, me umoumoch non meinisin ekkewe tappin aramas—non fansoun me ese much, pwapwa me feifeino. Non Jises Kraist, mi fokkun tufich; non Jises Kraist, mi fokkun ennet. Ua wesen pwarata, non ewe it mi pin iten Jises Kraist, amen.

Esinesin

1. William Butler Yeats, “The Lake Isle of Innisfree,” in The Norton Anthology of English Literature, 5th ed. (1986), 1936.

2. 1 Corinthians 15:22.

3. Mei wor chommong mettoch sia sinei mi pin ussun epinukunuk me ekkewe pwon ren siwin nupwen kich me ekkana sia tonger ra feitto ngeni Jises seni angangepin non tempel me ekkewe pwon won ir me ruepek ewe eppet.

4. Alma 34:10.

5. Doctrine and Covenants 121:44.

6. Doctrine and Covenants 138:17.

7. Nengeni Matthew 3:8 (or Joseph Smith Translation, Matthew 3:35 [non ewe Bible appendix]); Luke 3:8; Alma 5:15; 12:15; 13:11–13; 34:30–33; Moronai 6:1–4; 7:25; 8:25.

8. Nengeni Alma 42:13–15; pwan nengeni Robert Frost, “A Masque of Mercy,” Complete Poems of Robert Frost, ed. by Edward Connery Lathem (1969), 521, where Frost writes, “Nothing can make injustice just but mercy.”

9. Galatians 6:7.

10. Nengeni Doctrine and Covenants 137:1–6.

11. Doctrine and Covenants 137:9; nengeni pwan uwokisin 7–8, 10. Ennetin, “meinisin rafen mano nge rese sinei ei kapas allim, ita repwe angei ika mi mumuta ar repwe nom non ewe neni, ir repwe chon nikomwiri ewe muun celetial an Kot.” Soposopono, ewe Samon a sopweno, “meinisin kana repwe ma seni iei feinno ese wor ar repwe weweiti, ion kana ita repwe ururun angei fiti unusen netiper, repwe chon nikomwiri ena muu.”

12. Doctrine and Covenants 138:58.

13. Nengeni Doctrine and Covenants 138:32.

14. Alma 11:43.

15. Nengeni Doctrine and Covenants 128:15 me footnote b non Matthew 5:48, minne a pwari ewe chiakun non fosun Greece perfect ussun “unusono, taweno, marochuno.”

16. Obadiah 1:21.

17. Nengeni Matthew 7:12.

18. “I [a] mefi riaffou me metek; ese wor emon epwe mo nge nenengeni i, sise mo afanni ussun ita nge esap i emon aramas” (Isaiah 53:3), nge pwan emon Mwan ewe a ochufengeni ekkewe kukkun semirit me kechiw fiti ew pwapwa a urono (nengeni 3 Nifai 17:20–24).

19. Nengeni 2 Nifai 2:8.

20. Nengeni Doctrine and Covenants 43:30–31. 1 Nifai 22:26 a achema ngeni kich pwe an Setan manaman epwe oukuk non ewe 2,000 ier “pokiten ewe wenechar an noun [ewe Samon] kewe aramas .”

21. Nengeni Doctrine and Covenants 130:2

22. Nengeni Moses 1:39.

23. Nengeni Doctrine and Covenants 132:23–24; pwan nengeni Doctrine and Covenants 29:29, minne a apasa, “Pun ikewe ua nom ie rese tongeni feitto, pun ese wor ar manaman”.