Emwirimwirin Pesepes
Ua pesei kemi ami oupwe sopweno ne achocho ren ami oupwe fich ne niwin ngeni Samach won Nang me Jises Kraist.
Pwi me fefinei achengicheng, Ua kinisou ren ai nonnom remi non ei mwichenapenen Ewe Mwichefenin Jises Kraist ren Aramas mi Pin Non Fansoun Soponon. Aua fen mefi ami nuku me ami tong ian chok oua nom ia. Sia mefi pochokununo me ren ewe echipwerun pekin kao, ekkewe manamanen kapasen pwarata, me ewe amwararen kon.
Ua pesei kemi ami oupwe sopweno ne achocho ren ami oupwe fich ne niwinsefan ngeni Samach won Nang me Jises Kraist. Ian chok oua nom ia won ewe aanen pwon, oupwe kuna ew fiu ngeni sossotun manau me ewe ungeni an Setan.
Usun inei we a ureniei nupwen ua anini won ren ifa usun weiresin och mettoch, “O, Hal, ewer mi weires. Ina ururun. Manau a eu tes.”
Mi tongeni apasa ena non pwetete, pwan fiti an amenimen, pokiten I mi sinei ru mettoch. Inamo ren ewe fiu ngeni, met epwe kon nien aucheani ren an epwe tikeri imw an epwe nom ren Saman won Nang. Me mi sinei pwe mi tongeni fori ren nuku non an Chon Amanau.
A mefi pwe Jises Kraist mi arap ngeni i. Non ekkewe ran a sinei pwe epwene mano, a kapas ngeniei usun ewe Chon Amanau nupwen a kokkon non rumwan we. Mi wor eu asam ngeni pwan eu rumw arap ngeni an we pet. A amenimen me nengeni ewe asam nupwen a kapas pwetete usun an epwene ekisino chok a kuna I. Ngang mi chok chechemeni ai nengeni ewe asam me anchangei usun ewe rumw ewe epek.
Iei a nom non ewe fonuen ngun. A tongeni anomu mesan won ewe pisekin win ren met a mochen inamo ren ekkewe ierin sossot ren aion me winikapan.
Ewe emwirimwirin pesepes i a nikitatiw rem a aweweoch me non Moronai 7, ikewe Mormon a pesei noun we at Moronai me noun kewe aramas. Ina ew emwirimwirin pesepes ngeni eu mwirimwirin tappin aramas usun an inei we ngeni an we famini. Mormon a pasini ena emwirimwirin pesepes ngeni meinisin ion mi mochen epwe fich ngeni, non ar tesin manau meinisin, ren manau esemuch.
Mormon a poputa non ekkewe aewin wokisin Moronai 7 ren eu kapasen pwarata usun Jises Kraist, ren chon nang, me usun ewe Ngunun Kraist, minne a mut ngeni kich sipwe sinei och seni ngaw pwe sipwe tufichin finata ewe mi pung.
A akkomwa Jises Kraist, pwan usun meinisin ekkewe ra fisioch ne awora pesepes ngeni ekkewe ir mi fiu ngeni feitan won ewe aan ngeni imwer non nang:
“Pun ese wor emon aramas a tongeni manau, anongonong won ekkewe kapasen Kraist, tiwenon chok ika epwe wor ar nuku non itan we; ina minne, ika ekkei mettoch ra kouno, iwe nuku a pwan kouno; iwe anoninen ewe nonnomun aramas, pun ra usun chok ita ese wor ngaseno a fen affor.
“Nge nengeni, ami pwi achengicheng, ua apungu mettoch mi murino senikemi, pun ua apungu pwe mi wor ami nuku non Kraist pokiten ami tipetekison; pun ika ese wor ami nuku non i iwe ouse fich ami oupwe anneanong nein ekkewe aramasen an we mwichefen.”1
Mormon a kuna mosonoson pwe pisekin pwarata ren ewe pochokunen ar nuku. Mi kuna pwe ra mefi ar anongonong won ewe Chon Amanau. A peseir ren an esinna ena nuku. Mormon a sopweno ne ngeni ir pesepes ren an anisir repwe kuna pwe ar nuku me mosonoson epwe aueta ar pwon me epinukunuk me fetanoch non ar fiu ngeni:
“Iwe pwan, ami pwi achengicheng, ua mochen kapas ngenikemi usun apinukunuk. Ifa usun pwe ami oupwe tongeni angei nuku, tiwenon chok ika epwe wor ami apinukunuk?
“Iwe met ami oupwe apinukunuku non? Nengeni ua apasa ngenikemi pwe epwe wor ami apinukunuk non ewe achasefanin Kraist me ewe manamanen an manausefan, pwe oupwe manaueta ngeni manau esemuch, iwe ei pokiten ami nuku non i anongonong won ewe pwon.
“Ina minne, ika a wor an emon aramas nuku mi auchea epwe wor an apinukunuk; pun ika ese or nuku ese tongeni wor apinukunuk.
“Iwe pwan, nengeni ua apasa ngenikemi pwe i ese tongeni wor an nuku me apinukunuk, tiwenon chok epwe mosonoson me tipetekison non netipan.”2
Mwirin Mormon a apochokuna ir ren an kapasen pwarata pwe ra fetan ngeni ar repwe ne angei ewe niffangen netip epwe ureno ren ewe ennetin tongen Kraist. I a apacha fengeni fan iter ewe fofforun nuku non Jises Kraist, mosonoson, tekison, ewe Ngun mi Fel, me ewe pochokunen epinukunukun angei manau esemuch. I a peser non ei napanap:
“Pun ese wor emon a ketiw me mwen Kot, tiwenon chok ekkewe mi mosonoson me tipetekison non netip; iwe ika emon aramas mi mosonoson me tipetekison non netip, me pwarata me ren ewe manamanen ewe Ngun mi Fel pwe Jises i ewe Kraist, mi auchea pwe epwe wor an tong ennet; pun ika ese wor an tong ennet i mi namotongaw; ina minne mi auchea pwe epwe wor an tong ennet.”3
Ai nenesokur, iei ua kuna ifa usun ena niffangen tong ennet—ewe nimenimochun tongen Kraist—a apochokuna, emweni, anisata, me a fen siwini inei we non an fiu ngeni ne no ngeni imwan nang.
“Iwe tong ennet mi nikitu, me mi kirekiroch, me ese nonowo, me ese nuapas, ese kutta pwisin an, ese songokai, ese ekieki mi ngaw, me ese pwapwa non angangangaw nge a pwapwa non ennet, engino ngeni mettoch meinisin, nuku mettoch meinisin, apinukunuku mettoch meinisin, nukuchar ngeni mettoch meinisin.
“Ina minne, ami pwi achengicheng, ika ese wor ami tong ennet, ami mi namotongaw, pun tong ennet ese tongeni morono. Ina minne, kamwochuno tong ennet, minne mi nap seni mettoch meinisin, pun mettoch meinisin repwe morono—
“Nge tong ennet ina ewe nimenimochun tong an Kraist, iwe a nikitu ngeni feinfeino; iwe ion a pwá pwe a wor ren atun ewe ranin soponon, epwe murino ren.
“Ina minne, ami pwi achengicheng, iotek ngeni ewe Sam ren unusen pochokunen netip, pwe oupwe ureno ren ei tong, minne a fen wata won ir meinisin chon ennetin tapweno mwirin Noun we, Jises Kraist; pwe oupwe winiti noun Kot; pwe nupwen i epwe pwato sipwe usun chok i, pun sipwe kuna i usun wesewesen i; pwe epwe wor ach ei apinukunuk; pwe sipwe nimenimochuno ussun ren i mi nimenimoch.”4
Ua men kinisou ren ewe pesepes an Moronai pekin appiru me afanafan. Ua pwan fen feioch ren an inei we emwirimwir. Soufos seni Adam ngeni ei ran ikenai, seni afanafan me seni nenien appiru, ra apochokuna ei.
Ren ai sufonuti ekkewe aramas ngang mi sinei me ar kewe famini, ua finata ai usap kutta ne apungano tichikin ar pekin fiungeni ika kapas usun ar niffang mi nap. Nge met ua fen kuna a peseiei me siwiniei ngeni murino.
Ren noninenin ai upwe atai an pekin monomon, upwe apachata ew mwochomwochen repotun an punuwei we peseiei. Ua fori ei non tumunochun. I emon aramas mi monomon ese kutta ika sani emon epwe mwareiti.
Aua fen pupunu non ukukun 60 ier. Iwe pokiten ena iei ua weweiti wewen ekkei foun kapasen pukefel: nuku, apinukunuk, mosonoson, engino, ese kutta pwisin an, pwapwa non ewe ennet, ese ekiek mi ngaw, me nap seni meinisin, tong ennet.5 Won nongunongun ren met ena a fis, uwa tongeni apasata ai kapasen pwarata pwe aramas mi tongeni angei ekkena amwararen nongonong non manauer iteiten ran nupwen ra uta ngeni kewe weiresin manau.
Million ami mi ausening mi sinei ekkenan sokkun aramas. Chommong neimi ir ekkena sokkun aramas. Kich meinisin mi namot ngeni kich ena sokkun neenien appiru me chiechiach mi tong.
Nupwen ka momot ren emon pun en nour fefin ika mwan chon iamwir, en ka tupuni ewe Samon. Ekieki usun met I epwe fori ika apasa. I epwe tingorer ar repwe feito Ren. I epwe peser. I epwe apareni me mwar ren poputan ekkewe siwin mi auchea repwe fori. Me I ewe neenien appiru mi unusoch ngenir ar repwe appiru.
Esor emon mi tongeni unusen fori ena iei, nge ren ami ausening ngeni ei mwichenap, oua tongeni sinei pwe oua fetanoch ngeni ia oupwe no ia. Ewe Chon Amanau mi siniei tichikin ami pekin fiungeni. I mi sinei ami tufich ne mar non nuku, apinukunuk, me tong ennet.
Ekkewe annuk me pwon mi pin I a awora ngeni kemi esap ir tes ar repwe nemeni kemi. Ir eu niffang repwe chunakemita ngeni ami oupwe angei meinisin ekkewe niffangen Kot me oupwe niwino neimw ren Sememi won Nang me ewe Samon, ekkewe ir mi tongei kemi.
Jises Kraist a moni niwinin ach tipis. Kich mi tongeni angei ena feiochun manau esemuch ika epwe wor ach nuku non I epwe naf ne aier me winiti usun emon semirit, nimenimoch me mwonneta ngeni ren angei ewe watten me nein niffang an Kot.
Ua Iotek pwe oupwe etiwa An tingor me oupwe pwan awora ngeni ekkoch noun Samach won Nang semirit.
Ua Iotek fan iten nouch misineri won unusen fonufan. Amwo repwe chengen ne pesei emon me emon aramas an epwe mochen me nuku pwe ewe tingor a feito seni Jises Kraist seni Noun chon angang ekkewe ra wata Itan wor.
Ua pwarata pwe I mi manau me a emweni An Mwichefen. Ngang noun chon pwarata. Preseten Russell M. Nelson I ewe soufosun Kot mi manau fan iten unusen ewe fonufan. Ua sinei pwe mi ennet. Non iten Jises Kraist mi pin, amen.