![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fa6%2Fa2%2Fa6a2e9545392a1693cad2642d1b2e28ee46e0e3d%2Fa6a2e9545392a1693cad2642d1b2e28ee46e0e3d.jpeg/full/!250,/0/default)
Pevense múndope ha pejuhu pytu’u
Tapejuhu pytu’u ko múndo intensida, incertidumbre, ha ñembyasýgui pevensévo múndope pene konveniokuéra Tupã ndive rupive.
Che hermano ha hermana-kuéra pohayhuetéva, cheaguije pomomaiteívo ko rrepóso ára pyhareve gloriósope. Peẽ akóinte peime che akãme. Añemaravilla mba’éichapa peẽ peñemongu’e pehecha vove tapichakuéra oikotevẽva. Añesorprende jerovia ha testimónio pehechauka jey jeývare. Añembyasy pene korasõrasy, desilusiõ ha jepy’apykuérare. Che pohayhu. Amoañete peẽme ñande Ru Yvagagua ha Ita’ýra Ohayhuetéva Jesucristo, penderayhuha. Ha’ekuéra niko oikuaa porã umi pehasáva, pende py’aporãngue, pene remikotevẽ ha pene ñembo’ekuéra pejerure haĝua pytyvõ. Jey jey añembo’e tapeñandu Imborayhu penderehe.
Peñandu Imborayhu imba’eguasueterei, ojogua rupi ára ha ára ñanerenyhẽha umi noticia aleccionadora-gui. Ikatu peguereko umi ára pemoĩsehápe pende pijáma, peñemoakuruchĩ peteĩ pelóta ryepýpe ha pejerure mávape tapenemombáy opa vove ko guyryry.
Ha katu che hermano ha hermana-kuéra pohayhuetéva, heta mba’e porã oupotaite hína. Ko’ã ára oútavape, jahecháta pe Salvador pu’aka jehechauka tuichavéva ko múndo araka’eve ohechava’ekue. Ko’aĝa guive Ha’e ou peve “tuicha pu’aka ha gloria reheve,”1 Ha’e ome’ẽta ojeipapakuaa’ỹva privilegio, jehovasa ha milagrokuéra umi ijeroviarekóvape.
Upevére, ko’aĝaite jaiko hína duda’ỹre ha’éva peteĩ ára ijetu’úveva ko múndo historia-pe. Umi jetu’u ha desafio ojapo heta tekove taipy’aropu ha ikane’õiterei. Upevére, pekonsiderami peteĩ experiencia ramoitéva omyesakãkuaáva mba’éichapa peẽ ha che jajuhukuaa pytu’u.
Pe ramoite Templo de Washington D.C. programa de puertas abiertas aja, peteĩ miembro pe comité de puertas abiertas-pegua opresensia peteĩ ñemongeta oeskolta aja heta periodista prominente-pe upe templo rupive. Oiméne mba’éichapa, peteĩ familia imitãva ojoaju upe medios de comunicación tour rehe. Peteĩ periodista oporandu meme pe “viáhe” rehe peteĩ templo participante ojapóva ohasa aja témplo rupi. Ha’e oikuaase pe témplo viáhepa orrepresenta umi desafio peteĩ persona rekovépe.
Peteĩ familiagua mitã’i ohendu pe ñemongeta. Pe grupo oĝuahẽvo investidura kotýpe, pe mitã’i ohechauka pe altar, hentekuéra oñesũháme ojapo haĝua konveniokuéra Tupã ndive, ha he’i: “Iporãitépiko. Ko’ápe oĩ peteĩ tenda hentekuéra opytu’u haĝua iviáhe témplore.
Aduda pe mitã oikuaánepa ipypukueteha pe he’iva’ekue. Ndorekoichéne idea conexión directa oĩva upe jajapo konvénio Tupã ndive témplope ha pe Salvador promesa hechapyrãitéva:
“Peju cherendápe opaite peẽ peñeha’ãmbáva ha pegueraháva mba’e pohýi, ha che porombopytu’úta.
“Pemoĩ che júgo pende ári ha peaprende chehegui; … ha pejuhúta pytu’u pene ángape ĝuarã.
“Che júgo ningo ndahasýi ha ivevyi’asy che kárga.”2
Che hermano ha hermana pohayhuetéva, añembyasy umi ohejávare tupao oñandúgui imembresia ojeruretereiha chupekuéra. Ha’ekuéra ndohechakuaái gueteri jajapo ha ñañongatu konveniokuéra añetehápe ombohasy’ỹveha ñande rekove! Káda tekove ojapóva konvénio umi pila bautismal ha témplope—ha oñongatu umi konvénio—ohupytykuaave Jesucristo pu’aka. Pejepy’amongetamína ko añetegua hechapyrãitévare!
Jehepyme’ẽ ñañongatu haguére umi konvénio Tupã ndive ha’e pu’aka yvagagua, pu’aka ñanemombaretéva jarresisti porãve haĝua ñande pruéva, jeipy’ara’ã ha ñembyasykuéra. Ko pu’aka ombohasy’ỹve ñande rape. Umi ovivíva Jesucristo léi tuichavéva ohupytykuaa Ipu’aka tuichavéva. Upévare, umi oñongatúva konveniokuéra oreko derécho peteĩ pytu’u especial-pe oúva chupekuéra ikonveniogua rrelasiõ Tupã ndive rupive.
Pe Salvador ohasa mboyve pe Getsemani ha Calvario jehasa’asy rupi, omomarandu Ijapostolkuérape: “Múndope peguerekóta jehasa’asy; ha katu pene ánimo porãke; Che avense’akue múndope.”3 Uperire, Jesús ñanemokyre’ỹ peteĩteĩ ñandéve jajapo haĝua upeichaite he’ívo: “Che aipota peẽ tapevense múndope.”4
Che hermano ha hermana-kuéra pohayhuetéva, che mensáhe peẽme ĝuarã ko árape ha’e Jesucristo ovense haguére ko mundo ho’apyréva, ha Oexpia peteĩteĩ ñanderehe, peẽ avei pevensekuaa ko múndo henyhẽva pekádogui, oñesentráva ijehe ha py’ỹi ñanemokane’õva.
Pe Salvador, Iñexpiasiõ ijapyra’ỹva rupive, orredimi haguére peteĩteĩ ñandéve umi kangy, jejavy ha angaipakuéragui, ha Ha’e ohasa haguére opa py’arasy, jepy’apy ha mba’epohýi peguerekova’ekue,5upévare, peñearrepenti añetéramo ha peheka Ipytyvõ, pehasakuaa ko múndo prekário ko’aĝagua ári.
Pegueropu’akakuaa umi plaga espiritual ha emocional ñanemokane’õva oĩva ko mundope, jepe umi ñembotuichase, orgullo, pochy, tekoky’a, odio, mba’epota, sélo ha kyhyje. Oĩrõ jepe ñande jerére umi distracción ha joavy, pejuhukuaa pytu’u añetéva, upéva he’ise alívio ha py’aguapy, jepe umi pene problema hasyvéva mbytépe.
Ko añetegua iñimportánteva oinspira mbohapy porandu:
Peteĩha, mba’épa he’ise ñavense múndope?
Mokõiha, mba’éicha jajapo upéva?
Ha mbohapyha, Mba’éichapa ñavense múndope ohovasa ñande rekove?
Mba’épa he’ise ñavense múndope? He’ise ñavense upe jeipy’ara’ã jajepy’apyve haĝua ko mundogua mba’ekuérare umi Tupã mba’e rãnguére. He’ise jajeroviave Cristo doctrina-re umi yvypora filosofía rãnguére. He’ise javy’a upe añeteguápe, ñadenunsia pe porombotavy ha oiko ñandehegui peteĩ “Cristo rembiguái imirĩva”6 He’ise jaiporavo jajeheky’i oimeraẽ mba’e omomombyrýva Espiritu-gui. He’ise ñaimeha dispuesto “jahejávo” jepe umi pekádo ñandegustavéva.7
Néi, ñavense ko múndo añetehápe nde’iséi pendeperfectotaha ko tekovépe, ni nde’iséi umi pende problema odesaparesétanteha , ndoikomo’ãigui upéicha, ni nde’iséi ndapejavyveitaha. Ha katu ñavense múndope he’ise ñanerresistenteve pekádo kóntrape. Pene korasõ hu’ũvéta pende jerovia Jesucristo-re tuichavévo.8 Ñavense múndope he’ise jahayhuveha Tupã ha Ita’ýra Ohayhuetévape jahayhúvagui oimeraẽvape térã oimeraẽ mba’e.
Upeicharõ, mba’éicha ñavense múndope? Rréi Benjamín ñanembo’e mba’éicha. Ha’e he’i “Ha pe yvypóra inaturalva niko ha’e Tupãme ohayhu’ỹva” ha ha’éta tapiaite peve, “noñeme’ẽiramo Espíritu Santo he’ívape, ha ojehekýi pe yvypóra natural-gui, ha oñemomarangatu pe Cristo Ñandejara expiasiõ rupive.”9 Káda peheka ha pesegi jave umi Espiritu ñe’ẽmbegue, pejapo vove iporãva—umi mba’e “pe yvypóra natural” ndojapoichéneva—upérõ pevense hína múndope.
Ñavense múndope ndaha’éi peteĩ mba’e oikóva peteĩ térã mokõi árape. Oiko ñande rekove pukukue aja jaasepta jey jeývo Cristo doctrina. Ñamongakuaa ñande jerovia Jesucristo-re ñañearrepentívo ára ha ára ha ñañongatúvo umi konvénio ñanembopu’akáva. Japyta konveniokuéra rapépe ha jajehovasa mbarete espiritual reheve, rrevelasiõ personal, jerovia tuichavéva ohóvo ha anhelkuéra ministerio reheve. Javivívo Cristo doctrina oguerukuaa pe ciclo ipoderoso ha ivirtuosovéva, omoheñóivo peteĩ mbarete espiritual ñande rekovépe.10
Ñañeha’ãvo javivi umi Jesucristo léi ijyvatevéva, ñane korasõ ha ñane naturalesaite oñepyrũ okambia. Pe Salvador ñanemopu’ã ko múndo ho’apyre pu’aka ári ñanderovasávo tesakãve reheve, ñemomirĩ, generosida, py’aporã, autodisiplína, py’aguapy ha pytu’u reheve.
Néi, ikatu pepensa kóva ojoguaveha peteĩ ñemba’apo espiritual mbaretépe pytu’urãnguegui. Ha katu kóva niko pe añetegua: ko múndo oinsitírõ jepe pu’aka, mba’e jeguereko, popularida, ha umi tetepegua placer ogueruha vy’apavẽ, nahanirĩete, ndoguerúi! Ndaikatúi ogueru! Pe oguerúva ningo ha’eve peteĩ tekovia nandígui upe “vy’apavẽ ha jehovasápe ñeime ohupytýva [umi] iñe’ẽrendúva Tupã rembiapoukapykuérare.”11gui.
Pe añetéva niko hasyeteveha peheka vy’apavẽ umi tenda araka’eve pejuhutahápe upéva! Upevére, pejoajúrõ Jesucristo-re ha pejapo tembiapo espiritual oñeikotevẽva pevense ha͂ĝua múndope, Ha’e ha Ha’e añónte oreko pu’aka penderupi haĝua ko mundo pu’aka ári.
Ko’áĝa, Mba’éichapa ñavense múndope ohovasa ñande rekove? Ñembohovái hesakã porã: jaikévo Tupã ndive peteĩ konvénio rrelasiõme ñanembojoaju Hendive peteĩ forma ojapóva opa mba’e ñande rekovépe tahasy’ỹve. Anikena pechejagarra vaimi; nda’éikuri jajapóvo konvénio ko tekove hasy’ỹvetaha. Uvei, peha’arõ oposisiõ, pe adversario ndoipotáigui pehechakuaa Jesucristo pu’aka. Ha katu pejoajúvo pe Salvador ndive he’ise pehupytykuaaha Imbarete ha Ipu’aka redentor.
Amoañete jey peteĩ presidente Ezra Taft Benson ñehekombo’e pipuku: “Kuimba’e ha kuñanguéra ome’ẽva hekove Tupãme ohechakuaáta Ha’e ikatuha ojapo hekovekuéragui hetave mba’e ha’ekuéra ikatúvagui ojapo. Ha’e ombopypukuvéta ivy’apavẽ, oipysovéta ivisiõ, omoakãporãvéta chupekuéra, … omopu’ãta ijespíritu, ombohetavéta hovasakuéra, ha ijoportunida, omoangapyhýta hi’ánga, omopu’ãta angirũnguéra ha oñohẽta py’aguapy hi’arikuéra.”12
Ko’ã privilegio ijojaha’ỹva osegi umi ohekávape ijepytaso yvágape ojeipytyvõ haĝua ovensévo múndope. Upevarã, aipyso opavave tupaogua miembrokuérape pe tembiapor͂ã ame’ẽva’ekue ñande jóvenes adultos-pe mayo ohasava’ekuépe. Ambyapurákuri chupekuéra upérõ, ha ko’áĝa ajerure’asy peẽme, tapeñangareko pende propio testimonio-re Jesucristo ha Iñevanhéliogui. Pemba’apo pehupyty haĝua. Penutri okakuaa haĝuáicha. Pemongaru añetegua reheve. Ani pembyai umi kuimba’e ha kuña oguerovia’ỹva filosofía gua’u reheve. Pejapóvo pende testimónio Jesucristo-gui ñemombarete meme pende priorida tuichavéva, pejesarekóke umi hetaite milagro ojehútavare pende rekovépe.13
Che jerure’asy peẽme ko pyharevépe ha’e tapejuhu pytu’u ko múndo intensida incertidumbre ha ñembyasýgui pevensévo múndope pene konveniokuéra rupi Tupã ndive. Peikuaauka Chupe pene ñembo’e rupi peñe’ẽha añete pe múndo ñevense rehe. Pejerure Chupe tohesape pene akã ha tombou pytyvõ peikotevẽva. Ára ha ára, pehai umi pensamiénto oúva peẽme peñembo’évo; upéi pesegi jesarekópe. Pehasave tiempo témplope, ha peñeha’ã pentende mba’éichapa témplo penembo’e pepu’ã haĝua ko múndo ho’apyre ári.14
Ha’éma haguéicha, Israel ñembyaty ha’e tembiapo Iñimportantevéva oikóva hína ko’aĝa yvy ári. Peteĩ elemento imba’eguasuvéva ko ñembyatýpe ha’e toñembosako’i peteĩ pueblo ikatupyrýva, oĩva listo ha hekojojáva orresivi haĝua Ñandejárape Ha’e ou jey vove, peteĩ pueblo oiporavómava Jesucristo-pe ko mundo ho’apyre ári, peteĩ pueblo horýva isãsome oiporavo haĝua ovivi umi Jesucristo léi ijyvateve ha imarangatuvéva.
Pohenói, che hermano ha hermana-kuéra pohayhuetéva, oiko haĝua pendehegui upe pueblo hekojojáva. Pemomba’e ha pe’onrra pene konveniokuéra opa ambue kompromiso ári. Pehejávo Tupã taipu’akapa pende rekovépe, apromete peẽme py’aguapy tuichave, jerovia, vy’apavẽ ha avei, pytu’u.
Pu’aka reheve, pe santo apostolado omoĩva che ári, pohovasa pene ñeha’ãme pevense haĝua múndo. Pohovasa pende jerovia Jesucristo-re okakuaave haĝua ha peaprende porãve haĝua mba’éicha peñemo’aĝuivéta Ipu’akáre. Pohovasa pehechakuaa haĝua añetegua jejavýgui. Pohovasa pejesarekove haĝua Tupã mba’ekuérare mundogua rãnguégui. Pohovasa pehecha haĝua umi oĩva pende jerére remikotevẽ ha pemombarete haĝua umi pehayhúvape. Jesucristo ovense haguére ko mundo, peẽ avei pevensekuaa. Upévagui atestifika, Jesucristo réra sagrádope. Amén