Bwebwenato eo Em̧m̧antata kōn Ijtō Kar Kwaļo̧k

Jān Elder Gary E. Stevenson

Jān Doulul eo an Jon̄oulruo Rijilōk ro

Kalimjōk Bok in Mormon ilo juon meram eo ekāāl im ļōmņak kōn kam̧ool eo ekabwilōn̄lōn̄ me ej kwaļo̧k kōn m̧ool eo an Kraist eo em̧ōj an jerkakpeje.

Leta jān Būreejtōnji eo Kein Kajuon ilo Ijtō

Komaron̄ in keememej am̧ ron̄ kōn juon leta jān Būreetōnji eo Kein Kajuon ilo ward ak branch eo am̧ jet wiik remootļo̧k. Leta eo kar kōjjeļaik ilo Jabōt eo tok juon—Jabōt in Ijtō—aolep ward im branch ko rej aikuj ioon doon n̄an kweilo̧k in kwojkwoj eo wōt, kōtļo̧k iien n̄an kabun̄jar ilo m̧weo āinwōt baam̧le ko n̄an kakeememej holiday in aorōktata.¹

Leta eo jān Būreejtōnji eo Kein Kajuon ekar kadeel aō ļōmņak, im ekar kōm̧m̧an menin aō ļōmņak likļo̧k kōn wāween an baam̧le eo aō kakeememej Ijtō ilo aolepen iiō ko. Eļak ļap aō ļōmņak kōn iien ko amim kakeememej ijtō, ij ļōmņak ippa make eļan̄n̄e kōmij jab lukkuun kwaļo̧k meļeļein holiday in, epād ioļapļap n̄an aolep ritōmak ilo Jisōs Kraist.

Imminene in Tōmak ko ilo Kūrijim̧ōj im Ijtō

Ļōmņak ko rekar tōl eō n̄an kejokļo̧kjeņ kōn oktak eo ikōtaan wāween amim kakeememej Kūrijim̧ōj āinwōt keidi ippān Ijtō. Ilo Tijem̧ba, jekar maron̄ kobaik “Jingle Bells,” Kūrijm̧ōj stocking ko, im menin leļo̧k ko ippān ko jet, imminene ko rem̧m̧an—ko āinwōt kea kōn ro rej pād ilo aikuj, al kōn al in kūrijm̧ōj ko rem̧m̧antata ippād, im aaet kōpeļļo̧k jeje ko rekwojarjar im riiti bwebwenato in Kūrijim̧ōj eo ilo Luke 2. Aolep iiō ilo ad riiti bwebwenato eo eaorōk jān juon Baibōļ ekilep im m̧ōr, baam̧le eo amim ej kōm̧m̧ane ta eo bōlen baam̧le eo am̧ ej kōm̧m̧ane—ekkōņak to̧o̧l ko ilo ioon bōramim im aeramim im ekkōņak nuknuk to̧o̧l ko n̄an ņa jikin Josep, Meri, im armej ro rellōn̄ rekar itok n̄an kabun̄jar n̄an nin̄nin̄ Jisōs, kōmij arin bwebwenato in kūrijim̧ōj aorōk kōn ļotak eo an Rilo̧mo̧o̧r.

Kakeememej ko an baam̧le eo amim ilo Ijtō, ijo wōt ke, ekar oktak. Ij en̄jake bwe baam̧le eo amim ekar ļapļo̧k aer pedped ilo “etal im jar” n̄an kwaļo̧k aorōkin, likūt Kraist ioļapļap; innem, āinwōt juon baam̧le, em̧ōj amim aiindoon n̄an kwaļo̧k ilo imminene ko jet me rej iookļo̧k Ijtō. Em̧m̧an aō kalimjōk an ajri ro nejim im kiiō ro jibūm āk lep ilo Ijtō im kappok ilo basket in Ijtō ko aer.

Bōtaab leta eo jān Būreejtōnji eo Kein Kajuon ekar juon kūr in karūjrūj. Rekar jab wōt karuwaineneik aoleped n̄an lukkuun kōm̧m̧an ad n̄an kakeememeje iien eo eļap aorōktata ekar waļo̧k ilo laļin—Pinmuur eo im Jerkakpeje eo an Jisōs Kraist—ekoba nebar im kautiej eo ekkar n̄an Irooj, ak rekar bar letok n̄an kōj eļapļo̧k iien ippān baam̧le ko am im ro m̧ōttam ilo Jabōt in Ijtō n̄an kōm̧m̧ane.

Naan kein an Rikanaan Josep Smith ej kameejļo̧k aorōkin iien ko reļļap rekar jepooļ Ijtō: “Katak ko dilepen kabun̄ in ad rej kam̧ool ko an Rijilōk ro im Rikanaan ro, rejelōt Jisōs Kraist, bwe E eaar mij, kar kalbwine, im bar jerkak raan eo kein kajilu, im walōn̄ļo̧k n̄an lan̄; im aolep men ko jet ko toļļo̧kin kabun̄ in ad ej itok ilo ekkejaak ko nai.”²

Em̧ōj am̧ro Lesa kar kōnono kōn jekjek ko me baam̧le eo am̧ro emaron̄ em̧manļo̧k aer kōm̧m̧ani ilo iien Ijtō. Bōlen kajjitōk ko em̧ōj ad kajjitōk ipped make ej eo jej aolep aikuj kam̧wilaļ ad ļōmņak kaki: Ekōjkan ad waanjon̄ak kōn katak eo im ad kakeememej Jerkakpeje eo an Jisōs Kraist. bwebwenato in Ijtōkōn ejja jon̄an eo, tarlep in, im imminene in tōmak eo eaorōk kōn ļotak eo an Jisōs Kraist, bwebwenato in Kūrijim̧ōj?

Āinwōt kōj jej aolep kajjeon̄. Ikar ekkatak kōn juon eddōkļo̧k in kijejeto eo ilubwilijin Armej ro Rekwojarjar n̄an juon Ijtō eļapļo̧k aer pedped ioon Kraist ilo Ijtō. Menin ekūtbuuj juon kile eo eļapļo̧k kōn Palm Sunday im Good Friday āinwōt kōm̧m̧ane jān jet iaan Kūrijin ro rilikūd. Jemaron̄ bar ijjinoe imminene ko rekkar n̄an pedped ioon Kraist ilo Ijtō me jemaron̄ loe ilo manit im tōmak ko an laļ ko ipeļaakin laļ in.

Juon rūkaki eo etimjem̧ļo̧k kōn Kallim̧ūr Ekāāl, N. T. Wright ekar elmakot: “Jej aikuj bōk bun̄tōn ne ko n̄an kakeememej Ijtō ilo jekjek ko rewājapdik im rekāāl: ilo jin̄n̄a, jeje, ikkure ko an ajri, poetry, kōjan̄jan̄, tuuj, festival ko, bell ko, special concert ko. … En̄in ej kakeememej eo eļaptata ad. Joļo̧k Kūrijim̧ōj, im ilo jekjek in kōnono ilo baibōļ kwoj joļo̧k ruo jepta ilo m̧aantata ilo bok in Matu im Luk, im ejjeļo̧k bar. Joļo̧k Ijtō, im ejjeļo̧k ippom̧ Kallim̧ūr Ekāāl; Kwojjab aikujin juon Kūrijin kom̧wij ped wōt ilo jero̧wiwi ko ami.”³

Ijtō, Baibōļ eo, im Bok in Mormon

Jej kaorōk Baibōļ eo kōn aolep men ej katakin kōj kōn ļotak eo, jerbal in karejar eo, Dōbwāāl eo, im Jerkakpeje eo an Jisōs Kraist. Ejjeļo̧k bar jilu naan ko eļapļo̧k aer kalikkar kōjatdikdik im kaje indeeo n̄an aolep armej jān naan ko kar kōnono kaki jān juon enjeļ in lan̄ ilo jibbon̄nin Ijtō ilo: “E ar jerkakpeje.”⁴ Eļap an m̧wilaļ ad kam̧m̧oolol kōn Kallim̧ur Ekāāl me ej dābij im kejparok bwebwenato in Ijtō im jerbal in karejar in Ijtō an Rilo̧mo̧o̧r ilo Judea im Galilee.

Ilo am̧ro Lesa wōnm̧aanļo̧k n̄an kejokļo̧kijeņ im kappukot jekjek ko n̄an kōdepakpakļo̧k an baam̧le eo amim kakeememej Ijtō n̄an kōļapļo̧k ad pedped ioon Kraist, kōm ekar kōnono kōn ta imminene in riiti jeje ko rekwojarjar jemaron̄ kwaļo̧k n̄an baam̧le eo am̧ro—ilo Luk 2 ekkar n̄an Ijtō eļan̄n̄e kwonaaj.

Innem kōm ekar bōk juon revelesōn: N̄an kakkobaba n̄an eoon ko raorōk kōn Ijtō ilo Kallim̧ūr Ekāāl, kōj āinwōt Armej ro Rekwojarjar ilo Raan Ko Āliktata jej bōk maron̄ kōn juon menin letok eļap an Ijtō! Juon menin letok ejej uwaan, bar juon kam̧ool kōn kabwilōn̄lōn̄ eo ewōr ilo Ijtō, bōlen eoon ko raiboojojtata kōn Ijtō ilo aolep tōmak in Kūrijin. Aaet ij ekōnono kōn Bok in Mormon eo, im eļaptata, kōn bwebwenato in an Jisōs Kraist waļo̧kļo̧k n̄an armej ro ilo Laļ eo Ekāāl ilo aiboojoj in jerkakpeje eo An.

Rikanaan Josep Smith ekar kōmeļeļeik Bok in Mormon eo āinwōt “bok eo ejim̧we tata jān bok otemjej,”⁵ im ijjino kōn 3 Nipai 11, ej ba kōn bwebwenato eo aiboojoj kōn loļo̧k eo an Kraist eo em̧ōj an jerkakpeje n̄an Rinipai ro, jerbal in karejar eo an Rilo̧mo̧o̧r ilo Ijtō. Eoon kein kōn Ijtō, kam̧ool kōn jeje kōn Jerkakpeje eo an Irooj Jisōs Kraist.

Ilo Jepta kein, Kraist ej kūr rikalo̧o̧r ro jon̄oulruo, katakin āinwōt an kar ilo iien kwaļo̧k naan eo An ioon Toļ eo, kōjjeļā bwe E em̧ōj an kakūrm̧ool kien Moses, im kanaan kōn aiintok Israel ilo raan ko āliktata. E ej kōmour rinan̄inmej im jar kōn armej ilo juon jekjek aiboojoj jon̄an “ejjeļo̧k lo maron̄ kōnono, im jab maron̄ kar jeje jān jabdewōt armej, im ejjeļo̧k bōro ko an armej ļōmņak kōn jon̄an im kabwilōn̄lōn̄ in men ko āinwōt kōm ar jim̧or lo im ron̄ an Jisōs kōnono; im ejjeļo̧k juon emaron̄ ļōmņake lan̄lōn̄ eo eaar kobrak būruōm̧ ilo iien eo kōm ar ron̄ An jar kōn kōm n̄an Jemān.”⁶

Ijtō in, baam̧le eo ad ej tōn mije eoon ko 17 m̧oktata ilo 3 Nipai 11ko im ewōr am̧ jeļā kaki. Kwoj keememej juon jarlepju eļap itōrerein tampeļ ilo āne Ekilm̧ūr eo rekar ron̄ ainikien Anij eo Jemān im loe Jisōs Kraist ej walļaļļo̧k jān lan̄ n̄an lelo̧k kūr eo aiboojojtata kōn Ijtō:

“Kom̧in jutak im wōnm̧aantak n̄an Ippa, … kom̧in maron̄ en̄jake jenkwan dila ko ilo peiū im ilo neō, bwe kom̧in maron̄ jeļā bwe N̄a ij … Anij an aolepān laļ im kar m̧ane Eō kōn jero̧wiwi ko an laļ.

“Im … jarlepju eo ar wōnm̧aanļo̧k, … juon ilo̧k juon … im kar lo kōn mejaer im en̄jake kōn peier, … im kar kam̧ool e, bwe E enkar E eo. …

“Im… raar kūr kōn juon wōt ainikien, im ba:

“Hosana! Em̧ōņōņō etan Anij Eutiejtata! Im eaar wōtlo̧k n̄an laļ ineen Jisōs, im kar kabun̄-jar n̄an E.”⁷

Kōļmenļo̧kijeņ kōn, Rinipai ro ilo tampeļ rekar un̄ūri pein Irooj eo ekar jekakpeje. Jej kōjatdikdik bwe jenaaj kōm̧m̧an bwe jepta kein ilo 3 Nipai ren m̧ōttan imminene ko ad ilo Ijtō āinwōt ilo Luk 2 in imminene ko ad ilo Kūrijim̧ōj. Ilo m̧ool, Bok in Mormon ej kwaļo̧k bwebwenato eo em̧m̧antata kōn Ijtō kar kwaļo̧k. Jab kōtļo̧k bwe en juon bwebwenato in Ijtō eo em̧m̧antata me rejjan̄in kar kwaļo̧k.

Ij karuwaineneik eok n̄an kalimjōk Bok in Mormon ilo juon meram ekāāl im ļōmņak kōn kam̧ool eo eļap ej kwaļo̧k kōn Kraist eo em̧ōj an jerkakpeje im barāinwōt aorōkin im m̧wilaļ in katak eo an Kraist.

Bok in Mormon eo ej Kam̧ool kōn Jisōs Kraist.

Jemaron̄ kajjitōk: Ekōjkan riiti eoon ko ilo Bok in Mormon ilo Ijtō kōjeram̧m̧an mour ko ad im ro jej iakwe er ilo juon jekjek eļap meļeļein? Eļapļo̧k jān an juon maron̄ kile. Jabdewōt iien kwoj riit im ekkatak jān Bok in Mormon kwomaron̄ kōtmene tōprak ko reļļap.

Jidik iien emootļo̧k, kom̧ro Lesa ekar kobaļo̧k ilo ilomej eo an juon m̧ōttamim ejitōnbōro, juon kōrā in tōmak, eo mour eo an ekar kadu kōn nan̄inmej. Kōm ekar kuk ippān baam̧le eo an im ro m̧ōttan repaake, kwaļo̧k n̄an doon emeemļo̧kjeņ ko am kōn jetōb in aiboojoj eo ekar im̧we mour ko amim.

Ilo aō kar jutak ettoļo̧k jidik jān bo̧o̧k eo im ekōnono ippān ro jet, ikar kile ruo leddik jidikdik ro dettān iiō ko an būraimere rej kepaakļo̧k bo̧o̧k eo im jutak lōn̄ļo̧k kōn addiin neer—mej ko mejeer rej kalimjōk lōn̄—n̄an kwaļo̧k aer kautiej n̄an eo nej jineer ejitōnbōro. Ilo an ejjeļo̧k armej repaak er, Lesa ekar kadikdik badikdik lalļo̧k itūrierro n̄an leļo̧k naan in kōkajoor im katakin. Ekar kajjitōk ejet aerro ped im eļan̄n̄e rejeļā ewi kiiō kōrā eo nej jineer. Rekar kwaļo̧k aer būrom̧ōj, bōtaab leddik rein raorōk nejin Anij, kōn peran ilo mejeer, rekar ba rejeļā bwe eo nej jineer ej m̧ōņōņō kiiō im emaron̄ pād ippān Jisōs.

Ilo dettān kein rej iddik wōt, rekar lo aenōm̧m̧an ilo karōk in m̧ōņōņō eo im, ilo aer manitin wōt ajri, rekar kam̧ool kōn m̧oolin im an ļam waan aiboojoj in Jerkakpeje eo an Rilo̧mo̧o̧r. Rekar jeļā menin ilo būruweer kōnke kōn katak ko an ro jineer im jemeer rej iakwe, baam̧le ko, im ritōl ro an Būraimere ej kaddōk ine in tōmak ilo Jisōs Kraist im mour indeeo. Kapeel n̄an iiō ko aer, leddik jiddik rein rekar meļeļe m̧ool ko rej itok n̄an kōj ilo ennaan eo an Ijtō im jerbal in karejar eo an Rilo̧mo̧o̧r ejerkakpeje im naan ko an rikanaan ro āinwōt kar ba ilo Bok in Mormon.

Em̧ōj aō ekkatak bwe n̄e Būreejtōn Russell M. Nelson ej letok juon menin letok in Bok in Mormon n̄an juon armej ejjab jān tōmak eo ad, ekoba ritōl ro an laļin, ekkā an oktakļo̧k n̄an 3 Nipai im riit kōn waļo̧kļo̧k eo an Kraist ejerkakpeje n̄an Rinipai ro. Ilo kōm̧m̧ane menin, emour rikanaan eo ej juon jon̄o̧k in kam̧ool kōn Kraist eo Emour.

Jejjab maron̄ jutak āinwōt rikam̧ool ro an Jisōs Kraist m̧ae jemaron̄ kam̧ool kōn E. Bok in Mormon ej bar juon kam̧ool kōn Jisōs Kraist kōnke ilo aolepen peij ko ie rekwojarjar, juon rikanaan ālikin bar juon ej kam̧ool ejjab wōt bwe Kraist enaaj kar itok, ak bwe E ekar itok.

Kōnke kōn E

Ij jibwe ilo peiū juon kape in bok eo jinointata in Bok in Mormon. Kōm̧m̧ane menin aolep iien ej kōm̧akūt eō. Ilo aolepen mour in rūtto e aō, ej kadeel eō, ļo̧kjen aō, im kadim eō kōn ta eo Josep Smith eo edik ekar kōm̧m̧ane n̄an bōk bok in ekwojarjar em̧ōj ukote im kadiwōjļo̧k. Kabwilōn̄lōn̄ ko me rej waļo̧k reļļap n̄an ļōmņak kaki.

Bōtaab men eo ejjab unin an bok in kōm̧akūt eō. Ej kōnke bok in, eļapļo̧k jān jabdewōt me rekar publish ioon laļ in, kwaļo̧k kam̧ool kōn mour in, iien kwaļo̧k naan, katak ko an, pinmuur eo, im Jerkakpeje eo an Jisōs Kraist. Ro jeiū im jatū rejitōnbōro, ekkatak aolep iien jān bok in kōn Jisōs Kraist enaaj ukot mour eo am̧. Enaaj kōpeļļo̧k mejam̧ n̄an men ko maron̄i rekāāl. Enaaj kōļapļo̧k kōjatdikdik eo am̧ im kobrak eok kōn iakwe em̧ool. Eļaptata, enaaj kalōk im kōkajoor tōmak eo am̧ ilo Jisōs Kraist im kōjeram̧m̧an eok kōn juon jeļāļo̧kjeņ edim bwe E im Jemed rejeļā kajjiem̧, iakwe eok, im kōņaan bwe kwon kappukot iaļ eo n̄an ro̧o̧l n̄an m̧weo, kōn juon capital H.

Ro jeiū im jatū rejitōnbōro, iien eo em̧ōj an itok, kar kanaan kake jān rikanaan ro etto, “n̄e jeļā kōn juon Rilo̧mo̧o̧r naaj ajeeded iaolepān laļ, bwij, lo, im armej.”⁸ Jej loe an kūrm̧ool kanaan in im̧aan mejed, kōn kam̧ool eo kōn Jisōs Kraist me ej waļo̧k ilo Bok in mormon.

Ejjeļo̧k bar bok eļap an kwaļo̧k men eo:

Kōn Jisōs Kraist, aolepmen renaaj oktak.
Kōn E, aolepmen rej em̧m̧anļo̧k.
Kōn E, mour maron̄e—eļaptata iien ko rekōmmetak.
Kōn E, aolep men remaron̄ tōprak.

Loļo̧k eo an āinwōt juon Rilo̧mo̧o̧r ejerkakpeje, kwaļo̧k kajjien jān Anij Jemed, ej juon ennaan in Ijtō aiboojoj im utiej. Enaaj jipan̄ baam̧le eo am̧ bōk juon kam̧ool an juon make kōn Jisōs Kraist āinwōt ad Rilo̧mo̧o̧r im Ripinmuur, eo ekar jaļōt to ko an mej ko.

Ij kilōke kōn naan in kam̧ool kōn m̧ool ko an Bok in Mormon im Jisōs Kraist āinwōt eo Nejin Anij eo emour. Ilo etan Jisōs Kraist, amen.