Kōjeraam̧m̧an an Petriak eo Am—Im̧we in Tōl jān Jemedwōj Ilan̄
Kōjeraam̧m̧an in petriak eo aō ekar jipan̄ n̄a meļeļe kōn lukkuun kadkadū indeeo—lukkuun wōn n̄a im wōn imaron̄ erom̧.
Ikar dik im rūttoļo̧k ippān mama im baba ro rem̧m̧an ro rekar iakwe im tiljek ilo katakin kōj, ajri ro nejier, gospel eo. Ak būromōj eo, jinō im jema rejitōnbōro rekar jeļmae apan̄ ko ilo mour in m̧arre eo aer. Ikar juon būraimere ajri ke ikar jeļā bwe renaaj kar jepel juon raan im ajri ro jeiū im jatū im n̄a kar aikujin kālet ewi iaan pāāren ro am̧ jenaaj kar jokwe ippāer. Āinwōt juon tōprak, ilo elōn̄ iiō ko, ikar en̄jake eļap mijak; bōtaab, juon menin letok jān Jemedwōj Ilan̄ ekar jipan̄ ukōt aolep men n̄an n̄a—kōjeraam̧m̧an in petriak eo aō.
Ke ekar 11 aō iiō, ilo an kar ļapļo̧k aō inepata kōn jemjera eo an jinō im jema, ekar m̧wiļal en̄jake eo aō kōn kōjeraam̧m̧an in petriak eo aō. Ikar jeļā bwe Jema Ilan̄ ekar lukkuun jeļā wōn n̄a im jeļā jekjek ko aō. Im iaar bar jeļā inaaj bōk tōl jen E. Iien eo em̧ōkaj tata ālkin wōt raan eo aō bwe en 12 aō iiō, ikar bōk kōjeraam̧m̧an in petriak eo aō. Emootļo̧k jān 50 iiō, ak ij keememej tipdikin meļeļe ko kōn wōt en̄jake eo ekwojarjar.
Kam̧m̧oolol bwe, ewōr ad im̧we in tōl kōn kōjeram̧m̧an ko an petriak ilo Bok in Bōk Meļeļe Eļap an Kabun̄ in:
“Aolep ro rerreo, membōr eo em̧ōj an peptaij ej pelpel n̄an im naaj bōk juon kōjeraam̧m̧an in petriak, eo im ej boktok im̧we in tōl jān Irooj.
Juon member ej aikuj “rūtto ilo kōlmenļo̧kjen ebwe n̄an meļeļe aorōkin im kwojarjar eo an kōjeraam̧m̧an in” im “meļeļe katak ko an gospel in”
“Em̧m̧an eo membōr eo eaikuj in dik wōt bwe elōn̄ jokālet ko raorōk ilo mour repād im̧aan. … Ritōl ro an priesthood rejjab aikuj in kōm̧m̧ane juon jon̄an iiō n̄an membōr eo n̄an bōk juon kōjeram̧m̧an an petriak. …
“Kajjojo kōjeraam̧m̧an an petriak rej kwojarjar, ņojak, im ad make. …
“Armej eo ej bōk juon kōjeraam̧m̧an an petriak eaikuj in kaorōk naan ko, kōļmenļo̧kjeņ kaki, im mour erreeo n̄an bōk kōjeraam̧m̧an ko kar kallim̧ur kaki ilo mour in im indeeo.”1
Būreejtōn Russell M. Nelson eo ejitōnbōro ekar bar āliji an katakin kōn aorōk eo an kōjeraam̧m̧an eo an petriak,2bwe ej leļo̧k n̄an kajjojo ro rej bōk “juon kean̄ kōn ļain in menmenbwij likļo̧k n̄an Ebream, Aisak, im Jekab ”3 im bwe “kajjojo kōjeram̧m̧an ej am̧ make jeje ko rekwojarjar.”4
Kōjeram̧m̧an in petriak eo aō ekar aorōk n̄an n̄a ke ikar dik kōn elōn̄ un ko. Kein kajuon, kajoor eo an Jetōb Kwojarjar, kōjeraam̧m̧an in petriak eo aō ekar jipan̄ n̄a meļeļe kōn lukkuun wōn n̄a n̄an indeeo—lukkuun wōn n̄a im wōn imaron̄ erom̧. Ekar jipan̄ n̄a jeļā, āinwōt an Būreejtōn Nelson kar katakin, bwe n̄aij “juon ļaddik nejin Anij,” “juon [ajri] in bujen,” im “juon rikaloor an Jisōs Kraist.”5 Ikar jeļā bwe kar kile eō im iakwe jān Jemedwōj Ilan̄ im aō Rilo̧mo̧o̧r im bwe Erro make rekar bōk koņaer ilo mour eo aō. Menin ekar jipan̄ eō ikideelel n̄an epaakeļo̧k Er im kōlapļo̧k tōmak eo aō im lōke ilo Er.
Juon m̧ōtta ejitōn bōro eo ekar kobatok ilo Kabun̄ in āinwōt juon rūm̧m̧an ded ekar kwaļo̧k: “Ke petriak eo ekar likūti pein ioon bōra im ba eta, aolep men rekar oktak, … ejjab iien eo wōt ak aolepen mour in aō. Ikar kaju en̄jake bwe—kōn kajoor in ta eo ekar ba—kar kile iō ilo iakwe im ekanooj in ļap. Naan ko ekar ba rekar un̄ūr aolepen ānbwinū. Ikar jeļā bwe Jemedwōj Ilan̄ ekar jeļā wōn n̄a, itulowa im namōj.”
Jeļā lukkuun wōn n̄a ekar jipan̄ n̄an meļeļe im ikideelel n̄an kōm̧m̧ane ta eo Anij ekōnaan jān eō.6
Menin ekar jipan̄ n̄a n̄an ekkatak bujen ko ikar kōm̧m̧ani im kallim̧ur in kōjeraam̧m̧an ko ilo bujen eo an Anij ippān Ebream.7 Eaar letok n̄an n̄a juon reimaanļo̧k eo indeeo bwe ekar kadeel n̄a n̄an kōjparok bujen ko eļapļo̧k.
Ekar emakijkij aō ekkatak kōn kōjeraam̧m̧an in petriak eo aō, ekkā aolep raan im, āinwōt juon jodikdik, eo me ekar jipan̄ eō en̄jake aeņōm̧m̧an, im̧we in tōl eo an Jetōb Kwojarjar, eo ekar jipan̄ kadikļo̧k aō lukkuun mijak ilo aō ļoore im̧we ko An. Menin ekar kōļapļo̧k ikdeelel eo aō n̄an aolep iien karuwainene meram, m̧ool, im Jetōb Kwojarjar ilo ekkatak jeje ko rekwojarjar im jar aolep raan im ekkatak im ļoor katakin ko an rikanaan im rijiļōk ro an Anij. Kōjeraam̧m̧an in petriak eo aō ekar barāinwōt jipan̄ n̄an koikdeelel n̄an pokake eļapļo̧k n̄an ankilaan Jemedwōj Ilan̄, im pedped in ekar jipan̄ n̄a en̄jake eļap m̧ōņōņō, jekdoon jekjek rot ko aō.8
Ij bōk kajoor in jetōb kajjojo iien ij ekkatak kōjeram̧m̧an in petriak eo aō. Ke jinō im jema rekar jepel, kōjeram̧m̧an in petriak eo aō, āinwōt an Būreejtōn Thomas S. Monson katakin, kar n̄an n̄a n̄an erom̧ “juon menin letok am̧ make aorōk im ejjeļo̧k wonāān,” em̧ool “juon am̧ make kam̧bōj.”9
Kiiō, jouj jab pok. Ikar jab weppān. Iaar kōm̧m̧ani elōn̄ kain bōd ko. Eo karejera indeeo enaaj kam̧oole menin ke ij kōm̧m̧an wōt bōd. Ak kōjeram̧m̧an in petriak eo aō ekar jipan̄ eō im wōnm̧aanļo̧k wōt n̄an jipan̄ n̄a ikideelel n̄an kōm̧m̧an em̧m̧anļo̧k im maron̄ em̧m̧anļo̧k.10 An emakijkij aō ekkatak im riiti kōjeram̧m̧an in petriak eo aō ekar kōļapļo̧k ikdeelel eo aō n̄an jelm̧ae kapo ko. Ekar jipan̄ n̄a bōk ikdeelel eo im peran eo n̄an ukweļo̧k, im ukweļo̧k ekar ļapļo̧k an erom̧ juon jerbal eo elem̧ōņōņō.
Ekar menin aikuj n̄an n̄a n̄an bōk kōjeram̧m̧an in petriak eo aō ke ikar dik wōt im ilo an kar naan in kam̧ool eo aō kar eddōkļo̧k wōt. Im ej aō kam̧m̧oolol indeeo bwe pāāren ro aō im bisop rekar meļeļe bwe ikdeelel eo aō ekar kwaļo̧k ke ikar pojak.
Ke ekar 12 aō iiō, laļin ekar dik an kaipokpok im kamad kōj jān laļin rainin. Būreejtōn Nelson ekar kōmeļeļeik rainin āinwōt “juon tōre eo ej make wōt pen ilo bwebwenatoin laļ in,” juon laļ eo ej “obrak kōn jerawiwi” im “armej rej ļōmņak kōn er make.”11 Jeraam̧m̧an bwe jodikdik ro ad rainin eļap aer rūtto ilo kōlmenļo̧kjen jān n̄a ke ekar 12 aō iiō, im er barāinwōt ewōr aer kāālet aorōk n̄an kōm̧m̧ane ilo aer dik wōt! Rej aikuj barāinwōt jeļā lukkuun wōn er im bwe Anij ej iakwe er im elukkuun jeļā kōn er.
Ejjab aolep renaaj ikdeelel n̄an kōjeram̧m̧an in petriak eo aer āinwōt kar n̄a. Ak Ij jar bwe membōr ro rejan̄in bōk kōjeram̧m̧an in petriak eo aer renaaj jar n̄an kappukōt n̄an jeļā iien eo renaaj pojak. Ij kallim̧ur bwe eļan̄n̄e kwonaaj kōppopo ilo jetōb, am̧ en̄jake, āinwōt aō, enaaj ekwojarjar n̄an eok. Ij barāinwōt jar bwe ro emōj aer bōk kōjeram̧m̧an in petriak eo aer renaaj ekkatak jān e im kaorōke. Kaorōk kōjeram̧m̧an in petriak eo aō ke iaar dik ekar kōjeram̧m̧an n̄an kōn peran ke ikar ebweer, kaeņōm̧m̧an ke ikar mijak, aeņōm̧m̧an ke ikar en̄jake mijak, kōjatdikdik ke ikar en̄jake ejjeļo̧k kōjatdikdik, im lan̄lōn̄ eo ikar aikuji eļaptata. Kōjeraam̧m̧an in petriak eo ekar jipan̄ eō kōļapļo̧k aō tōmak im lōke ilo Jemedwōj Ilan̄ im ad Rilo̧mo̧o̧r. Eaar bar kōļapļo̧k aō iakwe n̄an Er—im eaar āindein.12
Ij kam̧ool bwe kōjeram̧m̧an ko an petriak rej letok im̧we in tōl jān Jemedwōj Ilan̄. Ij kwaļo̧k aō naan in kam̧ool kōn m̧ool eo ke Jemed ilo Lan̄ im Eo Nejin—ad Rilo̧mo̧o̧r, Jisōs Kraist—ro rejeļā kajjied, iakwe kōj, im kōņaan kōjeraam̧m̧an kōj. Ij barāinwōt jeļā ilo m̧ool bwe Būreejtōn Russell M. Nelson ej rikanaan an Anij ioon laļ in rainin. Ilo etan Jisōs Kraist, amen.