Lōke Katak an Kraist

Jān Elder Evan A. Schmutz

Jān Jiljilimjuonn̄oul eo

N̄e jej kalōk im̧ōko im̧ōd ioon pedped eo an bujen jemjerā eo ippān Kraist, jej lōke katak an Kraist.

Ilo aō pijaikļo̧k, ij lo rikanaan Nipai eo ebūjwōļā ilo tebōļ eo an, piliej kooļ ko rejepelōkļo̧k im̧aan mejāņ, kein jeje eo an ilo pein.

Nipai ekar pād ilo jekjek eo ej kadedeļo̧k jeje eo an āliktata ilo ļo̧o̧k eo. Ekar je, “Im kiiō, ro jeiū im jatū rejitōnbōro, ij kōm̧m̧an jem̧ļo̧kin ennaan kein aō.”¹ Bōtaab ejjab to, Jetōb eo ekar libjōrjōre Nipai n̄an bar ro̧o̧lļo̧k n̄an ļo̧o̧k eo an im je juon ennaan in kōjjem̧ļo̧k. Ium̧win kareel eo ekajoor an Jetōb Kwojarjar, rikanaan in eļap an em̧m̧an ekar bōk kein jeje eo an bar juon alen ilo peij im je, “Kōn menin, men kein iaar jeje e po buruō kaki, ijello̧kun wōt jet naan … Ij aikuj kōnono kōn katakin an Kraist.”²

Ewi jon̄an ad kam̧m̧oolol indeeo kōn “jet naan ko”³ im kōn Jetōb eo ekar ļujur Nipai n̄an jei. Jeje eo an Nipai kōn katak an Kraist ej juon men eaorōk n̄an ro me rej kwojkwoj ioon. Epād ie juon visōn kōn peptaij eo an Rilo̧mo̧o̧r⁴ im ainikein Nejin kūr aolep n̄an ļoor E⁵ im “kōm̧m̧an men ko [jaar] lo [An] kōm̧m̧an.”⁶ Ej pād ie kam̧ool eo an Nipai bwe ro, kōn tōmak ilo Kraist, m̧ool in ukweļo̧k, jān jerawiwi ko aer im ļoor Rilo̧mo̧o̧r n̄an dān in peptaij ko naaj “bōk Jetōb Kwojarjar; aaet, … innām itok peptaij kōn kijeek im an Jetōb Kwōjarjar.”⁶ Jej barāinwōt ron̄ ainikien an Jemen kwaļo̧k rekoot: “Aaet, naan ko an Aō Jitōnbōro rem̧ool im retiljek. E eo ej niknik n̄an jem̧ļo̧kin, ejja in wōt naaj lo̧mo̧o̧ren.”⁸

Būreejtōn Russell M. Nelson ekar kōmejajaik aorōk eo an katak an Kraist ilo juon an ennaan n̄an ritōl ro an mijen rekāāl: “Eļapļo̧k jān jabdewōt men, jekōņaan bwe mijenede ro ad … ren jeje katak an Kraist ilo būruier—juļ … ilo ņoņoņmej in dii er.”⁹

Preach My Gospel ej kwaļo̧k laļem joor ko aorōk an katak an Kraist. Ej ba ilo tukadu in ļalem m̧ōttan ko raorōk: “[Kōmij] karuwaineneik ro jet n̄an itok n̄an Kraist kōn jipan̄ er bōk gospel eo em̧ōj kōjepļaaktok kōn tōmak ilo Jisōs Kraist im Pinmuur e An, ukweļo̧k, peptaij, bōk menin letok an Jetōb Kwojarjar, im niknik n̄an jem̧ļo̧kin.”⁹

Bōtaab aorōk eo an katak an Kraist ejjab n̄an mijenede ro wōt! Im eļapļo̧k an m̧wilaļ jān juon baj kōmeļeļe āliji an m̧ōttan ko an ļalem raorōk. Ej jepoole kien eo an gospel in. Ej juon karōk eļap an em̧m̧an n̄an mour indeeo.

Ro jeiū im jatū, eļan̄n̄e jenaaj bōk kūr eo an Būreejtōn Nelson n̄an kōm̧m̧an bwe katak an Kraist en juļ ilo ņoņoņmej in diid ko ad, jej aikuj kam̧wilaļ kōnono ko ad n̄an Irooj ilo ekkatak, jar, mour tiljek, im waanmanļo̧k n̄an ukweļo̧k. Jej aikluj karuwaineneiktok Jetōb Kwojarjar n̄an an je katak an Kraist ilo “tebōļ in kanniōk ilo bōro [ko] [ad]”¹¹ an m̧wilaļ in wōt im indeeo in wōt kar an jeje jān Nipai ioon gold piliej ko.

Oktoba eo ļo̧k, Būreejtōn Nelson ekar kajjitōk, “Ta meļeļein n̄an anjo̧ ioon laļin?” Ilubwiļjin men ko jet, ekar ba, “Ej meļeļein lōke katak eo an Kraist eļapļo̧k jen katak ko an armej.”¹²

Naan eo lōke ej kōmeļeļeik āinwōt “juon lōke pedped ioon bōnja, maron̄, kajoor, ak m̧ool an juon armej ak juon men.”¹³ Armej eo ej Jisōs Kraist, im men eo ej katak eo An.

Ekōjkan an kar baj ļōmņak wōt in ļōke katak an Kraist ukōt wāween ad mour kōn mour ko ad?

Eļan̄n̄e jej lōke katak an Kraist, enaaj bwe ad lōke Kraist n̄an mour kōn aolep naan ko An.¹⁴ Jenaaj kōm̧m̧an juon ekkatak ilo aolepen mour in kōn Jisōs Kraist,¹⁵ jerbal in karejar eo An, katak ko An, im Pinmuur eo An ejelok jemļo̧kin, ekoba Jerkakpeje to An aiboojoj. Jenaaj ekkatak kallim̧ur ko An im jekjek ko me kallim̧ur ko An rej litok.¹⁶ Ilo ekkatak jenaaj obrak kōn iakwe eo eļap an Anij.

N̄e jenaaj lōke katak an Kraist, jenaaj kepaak Jemedwōj Ilan̄ aolep raan ilo ettā, itino ilo jar, ijo jemaron̄ kwaļo̧k ad kamoolol kōn menin letok eo An Nejin im kōn aolep kōjeraam̧m̧an ko ad.¹⁷ Jemaron̄ jar kōn revelesōn in m̧ōttā eo an Jetōb Kwojarjar,¹⁸ jar n̄an kōm̧m̧an bwe ankilaad en juon wōt Ippān,¹⁹ jar n̄an ekkatak kōn bujen ko ad im kōkāāl bujen eo ad n̄an kōjparoki.²⁰ Jemaron̄ jar n̄an rejtak im kwaļo̧k iakwe n̄an rikanaan, rilolo im ribōk revelesōn ro ad;²¹ jar kōn erreo in kajoor eo an jeorļo̧k bōd;²² im jar kōn kajoor eo n̄an eļļā jān kabo.²³ Ij karuwaineneik eok n̄an kōm̧m̧an bwe jar en juon men aorōk ilo mour eo am, kapukōt kajjojo raan n̄an kōkam̧anm̧anļo̧k ekōnono ko am ippān Anij.

Eļan̄n̄e jej lōke katak an Kraist, jenaaj likūt iturejet kareel ko an laļ in bwe jen maron̄ kalimjōk wōt Rilo̧mo̧o̧r eo an laļ.²⁴ Jenaaj kōm̧m̧an jon̄an ak joļo̧k iien ko julo̧k ilo social media, ikkure ko ilo digital; kein kalimomo ko rejekkar, tōrjān jon̄an, ak jekkar; emejaja eo an menin aorōk ko im arōk ko an laļ in; im jabdewōt bar m̧akūtkūt ko me rej ņa jikin imminene ko rebōd im tōmak ko rej tōl piloik armej. Ej wōt ilo Kraist jej loe kakūrm̧ool in m̧ool indeeo.

M̧ool in ukweļo̧k²⁵ enaaj erōm juon lan̄lōn̄²⁶ ekoba ilo mour ko ad—jimōr ilo jeorļo̧k jerawiwi im n̄an oktak ilo nememein Kraist.²⁷ Ukweļo̧k kōn tōmak ilo Kraist ej letok n̄an kōj maron̄ n̄an Pinmuur an Kraist. Būreejtōn Dallin H. Oaks ekar katakin bwe n̄e Rilo̧mo̧o̧r ej jeorļo̧k bōd, E ej “kōm̧m̧an eļapļo̧k jān karreoik [kōj] jān jerawiwi. E ej barāinwōt letok n̄an [kōj] kajoor ekāāl.”²⁸ Kajjojo iaad aikuji kajoor in n̄an kojparok kien ko an Anij im kakūrm̧ool un eo an mour ko ad indeeo.

Ilo Jisōs im ilo katak eo An, jej loe kajoor. Ekar ba, “Em̧ool, em̧ool, Ij ba n̄an kom̧, en̄in ej unleplep in katak eo aō, im eo ej ekkal ioon ej ekkal ioon Aō ejm̧aan, im aor ko an hell reban jutak ņae er.”²⁹

Jej loe kalimuur in ej kūrm̧ool ilo mour ko an armej ro retiljek. Ekar juon iiō emootļo̧k ke ikar jeraam̧m̧an n̄an ioon Travis im Kacie. Raar m̧are ilo kien ilo 2007 eo. Ilo tōre eo, Travis ekar jab juon membōr in Kabun̄ in. Kacie, men̄e ekar rūttoļo̧k ilo juon im̧ōn Armej ro Rekwojarjar ilo Raan Ko Āliktata eniknik, ekar peļo̧k jān tōmak eo an ke ekar jodikdik im kar jōbwabwe jān pedped eo an.

Ilo 2018 eo, Travis eaar iioone jet mijinede im ekar peptaij ilo 2019 eo. Travis ekar erom̧ juon mijenede n̄an Kacie, eo ekar barāinwōt en̄jake juon mour eo oktak. Raar liāp ilo tampeļ ilo Jeptōm̧ba 2020 eo. Enan̄in ruo iiō ālkin peptaij eo an, kar kūr Travis n̄an jerbal ilo bishoprik.

Travis ewōr juon an nan̄inmej eo ejeja me ejjab bōjrak an ejaki bwijin kain tumor ko ilo paat in ānbwinin. Ekar kōm̧m̧an elōn̄ iien m̧wijm̧wij ko n̄an kōm̧akūtļo̧k tumor ko rej beddo waļo̧k, bōtaab nan̄inmej eo ejjeļo̧k unokan. Jejjo iiō remootļo̧k, Travis kar leļo̧k bwe en mour edikļo̧k jān 10 iiō ko.

Kacie ewōr an rentinitis pigmentosa, juon nan̄inmej ejeja me ekōm̧m̧an menin an apan̄ an loļo̧kjeņ m̧ae iien enaaj lukkuun in pilo.

Kacie ekar kōnono kōn ilju im jekļaj eo an. Liin ekar kōtmene iien eo, ejjab ettoļo̧k, n̄e enaaj erom̧ juon eo emej pāleen, pilo, ejjeļo̧k jipan̄ ikkijien jāān, im makeļo̧k n̄an karūttoļo̧k emen ajri ro. Ikar kajjitōk ippān Kacie ekōjkan an naaj kōm̧adm̧ōd kain jekļaj eo ejjeļo̧k kōjatdikdik ie. Liin ekar ettōn̄ dikdik ilo aenōm̧m̧an im ba, “Ijjan̄in kar m̧ōņōņōļo̧k ak kōjatdikdikļo̧k ilo mour eo aō. Kōmij jirok n̄an kallim̧ur ko kōm kar būki ilo tampeļ.”

Travis ej kiiō bisop. Ruo allōn̄ remootļo̧k ekar bar kōm̧m̧ane juon iien m̧wijm̧wij eļap. Bōtaab ej lo̧udin̄din̄ im aenōm̧m̧an. Erre eo an Kacie ekar nanaļo̧k. Liin kiiō ewōr juon nejin kidu ej tōle im ejjab maron̄ kattōr. Bōtaab liin ej m̧ōņōņō kōn mour eo an, karūttoļo̧k ajri ro nejin im jerbal āinwōt juon rikakpilōklōk ilo būreejtōnji eo an Doulul eo an Jiron̄ ro.

Travis im Kacie kar kalōk im̧weer ioon dekā. Travis im Kacie rej lōke katak an Kraist im kallim̧ur eo bwe Anij “enaaj ukōti en̄taan ko [ad] n̄an [ad] ļapļo̧k.”³⁰ Ilo karōk eo an Anij eweppān, en̄taan kōn tōmak ilo Jisōs Kraist ej juon wōt n̄an erōm weppān ilo Kraist.³¹ Āinwōt em̧m̧aan eo emeletlet ilo būrabōļ eo ekar kalōk m̧weo im̧ōn ioon dekā,³² ke wōt ej wōtļo̧k im ibwijleplep ko rej itok im kōto ko rej letlet im kakkure m̧weo Travis im Kacie raar kalōke, eban okjak, bwe enaaj loe ilo ioon juon deka.³³

Jisōs ekar jab kōnono kōn maron̄ an wōt im ibwijleplep im kōto ilo mour ko ad; Ekar kōnono kōn m̧ool eo jenaaj ioon apan̄ ko ilo mour ko ad. Oktak eo ilo būrabōļ in ejjab n̄e lan̄ ko renaaj itok ak ekōjkan ad uwaake iakwe in karuwainene eo An n̄an jimōr ron̄ im kōm̧m̧ane ta eo E ekar katakin.³⁴ Ejjeļo̧k bar juon iaļ n̄an anjo̧.

N̄e jej kalōk im̧ōko im̧ōd ioon pedped eo an bujen jemjerā eo ippān Kraist, jej lōke katak an Kraist, im ilo an itok n̄an E, epād ipped kalimuur eo An n̄an mour in indeeo. Armej ro rej lōke katak an Kraist rej un maanļo̧k kōn pen ilo Kraist im niknik n̄an jemļo̧kin. Ejjeļo̧k bar juon iaļ jej maron̄ mour ilo aelōn̄ in Anij.³⁵

Ij kwaļo̧k aō kam̧ool kōn, Kraist eo ej emour em̧ool ekar jerkakpeje. Ij kam̧ool bwe Anij eo Jemed elukkuun iakwe laļ in jon̄an E ekar jilkintok Nejin n̄an lo̧mo̧o̧ren kōj jān jerawiwi³⁶ im kemour kōj jān būrom̧ōj.³⁷ Ij kam̧ool bwe E ekar kūr juon rikanaan an Anij ilo tōre in ad, em̧ool Būreejtōn Russell M. Nelson, kōn e Ej kōnono im tōl kōj.

Kōn aolepān būruō, ij karuwainene eok n̄an lōke katak an Kraist im kalōk mour ko ami ioon ejmaan an ami Ripinmuur. E ejjamin likjab jān eok. Ilo etan Jisōs Kraist, amen.

Kakeememej ko

1. 2 Nipai 30:18.

2. 2 Nipai 31:2; eoon ko raorōk kar kobaiktok.

3. Lale 2 Nipai 31–32.

4. Lale 2 Nipai 31:7–8.

5. Lale 2 Nipai 31:10.

6. 2 Nipai 31:12.

7. 2 Nipai 31:13.

8. 2 Nipai 31:15.

9. In Marianne Holman Prescott, “Elder Russell M. Nelson: ‘Epistles of the Lord,’” Church News, July 1, 2015, thechurchnews.com.

10. Preach My Gospel: A Guide to Missionary Service (2018), 1. “Jibadbad an mijenede” ej kwaļo̧k ļalem joor ko an katak an Kraist. Katak ko an 2 Nipai 31–32 ej kitbuuj jejjo bar jet m̧ōttan ko raorōk me rej m̧ōttan katak an Kraist, ko āinwōt jirok likatōttōt n̄an naan an Kraist (lale 2 Nipai 31:19–20; 32:3); kōjparok kien ko (lale 2 Nipai 31:7, 10, 18); jar (lale 2 Nipai 32:8–9); im ilo lukkuun dilepān, katak eo bwe en̄taan in pinmuur eo an Kraist ej iaļ eo de in me jemaron̄ mour (lale 2 Nipai 31:21). M̧ōttan ko an katak an Kraist loi ilo aolepān jeje ko rekwojarjar, men̄e eo iien ekōnono ko eļap tata kōnono kaki an katak eo rej loi ilo 2 Nipai 31:5–21, 3 Nipai 11:31–39, 3 Nipai 27:13–21, im Moses 6:59–62.

11. 2 Korint 3:3.

12. Russell M. Nelson, “Anjo̧ Ioon laļ n̄an Lo Ami Kakkije,” Liaona, Nob. 2022, 96; eoon ko raorōk kobaitok.

13. Merriam-Webster.com Dictionary, “trust.”

14. Lale Katak im Bujen Ko 84:44.

15. Lale Matu 11:29.

16. Lale Russell M. Nelson, “Bōktok Kajoor eo an Jisōs Kraist ilo Mour ko Ad,” Liaona, May 2017, 39: “Jej jino menin ilo ad ekkatak kōn E. … An ļapļo̧k ad jeļā kōn kwaļo̧k im mijen eo an Rilo̧mo̧o̧r—ej ļapļo̧k ad meļeļe kōn katak ko An im ta eo Ekar kōm̧m̧ane n̄an kōj. … Ij [kajjitōk ippāmi] bwe ren kōm̧m̧an bwe meļeļe ko ilo eoon ko kōn Jisōs Kraist ilo Topical Guide eo ren erom laajrak in kein katak ko [ami].”

17. Lale Matu 6:6–13.

18. Lale 1 Nipai 19:9.

19. Lale 2 Nipai 4:35; 3 Nipai 19:24; Katak im Bujen Ko 46:30.

20. Lale Russell M. Nelson, “Tampeļ Eo im Pedped Eo Am Ilo Jetōb,” Liaona, Nob. 2021, 95: “Ij karuwaineneik eok bwe kwon kakoņe juon iien ilo iien ko am̧ n̄an kōmālmele ilo ļōmņak eo am̧ bujen ko kwaar kōm̧m̧ani.”

21. Lale Katak im Bujen Ko 107:22.

22. Lale Mosaia 4:10.

23. Lale Matu 6:13.

24. Lale Matu 6:19–21, 33.

25. Kiin̄ Benjamin ekar kōmeļeļeik m̧ool in ukweļo̧k: “Im bar juon alen, kom̧in tōmak bwe kom̧ij aikuj ukeļo̧k jān jero̧wiwi ko ami im eļļo̧k jān i, im kōttāik kom̧ im̧aan Anij; im kajjitōk ilo m̧ool in bōro bwe Enaaj jeorļo̧k bōd ko ami; im kiiō, eļan̄n̄e kom̧ij tōmak aolep men kein lale bwe kom̧in kōm̧m̧ani.” (Mosaia 4:10).

26. Lale Russell M. Nelson, “Kajoor in Jetōb eo ej Im̧we Jerbal eo,” Liaona, Māe 2022, 98–99: “Jino rainin n̄an en̄jake lan̄lōn̄ eo n̄an utikļo̧k armej ilo lukkuun biktokin. Rilo̧mo̧o̧r eo ej iakwe kōj aolep iien ak eļaptata ilo ad ukweļo̧k. … En̄jake lan̄lōn̄ im deoor kōn ukweļo̧k.”

27. Lale Alma 5:14–15.

28. Dallin H. Oaks, “Our Message for Missionaries” (worldwide missionary broadcast, Jan. 20, 2016); see also Dallin H. Oaks, “Sin and Suffering,” Ensign, July 1992, 73.

29. 3 Nipai 11:39; eoon ko raorōk kar kobaitok.

30. 2 Nipai 2:2.

31. Lale Hibru 5:8–9.

32. Lale 3 Nipai 14:24–27.

33. Lale 3 Nipai 14:24–25.

34. Lale 3 Nipai 14:24.

35. Lale 2 Nipai 31:20–21.

36. Lale Jon 3:16–17.

37. Lale Jon 16:20.