Juon Wōt ilo Kraist
Ej wōt im ilo m̧ool eo ad kajjojo n̄an iakwe Jisōs Kraist me jemaron̄ kōjatdikdik n̄an juon wōt.
Āinwōt an Būreejtōn dallin H. Oaks kar kakeememej, rainin ej Palm Sunday, jinoun Wiik eo Ekwojarjar, ej kōkaļļāik dreļo̧n̄ļo̧k eo eutiej an Irooj n̄an Jerusalem, en̄taan eo An ilo Gethsemane im mej eo ioon drebwāāl jejjo raan tokālik, im Jerkakpeje eo An aiboojoj ilo Jabōt in Ijtō. Jen jab meļo̧kļo̧k ta eo Kraist ekar niknik ie n̄an lo̧mo̧o̧ren kōj.1 Im jen jab meļo̧kļo̧k lan̄lōn̄ eo eļap jej en̄jake bar juon alen ilo Ijtō ilo ad kejokļo̧ijeņ kake An anjo̧ ioon lōb im menin leļo̧k eo an jerkakpeje n̄an aolepen laļin.
Joteenen eo m̧okta jān raan in māllijon̄e im debwāāl eo me ekar kottar E, Jisōs ekar kobaļo̧k ilo juon kejota ippān Rikaļoor ro An. Jem̧ļo̧kinļo̧k Kejota in Āliktata, ilo juon Jar Ekwojarjar kōn Ro Jet, Jisōs ekar kapilōk ippān Jemen ilo naan kein: “Jema Kwōjarjar, Kwōn kōjparok er ilo Etaṃ wōt, ro Kwaar letok n̄an Eō, bwe ren juon wōt, āinwōt Kōj.”2
Innem, ilo meanwōd, Rilo̧mo̧o̧r eo ekar kōdepakpakļo̧k jar eo An n̄an kobaik aolep ritōmak.
“Ak I jab jar kōn rein wōt, a barāinwōt kōn ro renaaj lōke Eō kōn aer in naan;
“Bwe er otemjej ren juon, āinwōt Kwe, Jema ilo N̄a, im N̄a ilo Kwe, bwe er barāinwōt ren ilo Kōj.”3
Erom juon ej juon unin kōnono ālijliji ilo gospel eo an Jisōs Kraist im jerbal ko an Anij ippān ajri ro Nejin. Kōn kautiej n̄an jikin eo Zaion ilo raan ko an Inōk, kar ba bwe “rekar juon wōt ilo bōro im juon wōt ilo ļōmņak.”4 Kōn Rikwojarjar ro m̧oktata ilo Kabun̄ eo an Jisōs Kraist etto, ej jeje ilo Kallim̧ūr Ekāāl, “Jar eo rej tōmak, būrueir wōt juon.”5
Ilo epepen in ad, Irooj ekar kakkōl kōj “Ij ba n̄an kom̧, kom̧in juon; im eļan̄n̄e kom̧ij jab juon kom̧ij jab Aō.”6 Ilubwilijin un ko Irooj ekar lelo̧k n̄an etke Rikwojarjar ro m̧oktata ilo Missouri rekar likjab n̄an kalōk juon jikin Zaion bwe kōnke rekar “jab juon wōt ekkar n̄an ippān doon eo aikuji jān kien eo an aelōn̄ selestial.”7
Ijo Anij ej anjo̧ ilo aolepen būruer im kōlmenļo̧kjen, armej ro rej kōmeļeļe er āinwōt “a raar juon, ro nejin Kraist.”8
Ke Rilo̧mo̧o̧r eo em̧ōj an jerkakpeje ekar waļo̧kļo̧k n̄an armej ro etto ilo Bok in Mormon, Ekar kalikkar ilo an jab erre bwe ilo etto ekar wōr iakweelel ilubwilijin armej ro kōn peptaij im men ko jet. E ekar kakkien:
“Im en ejjeļo̧k iakwāālel ko ilubwiljimi āinwōt eaar wōr m̧oktaļo̧k; im en ejjeļo̧k iakwāālel ko ilubwiljimi kōn unleplep ko an katak ko Aō, āinwōt eaar wōr m̧oktaļo̧k.
“Bwe em̧ool, em̧ool Ij ba n̄an kom̧, eo ewōr jetōb in jum̧ae ilo e ejjab jān Eō, ak ej jān devil, eo ej jemān jum̧ae.”9
Ilo laļ in eļap aitwerōk ie, ekōjkan an tōprak ad juon wōt, eļaptata ilo Kabun̄ in ijo jej aikuj wōr ippād “juon Irooj, juon tōmak, juon peptaij”?10 Paul ej letok n̄an kōj uwaak eo:
“Bwe ro otemjej iaami em̧ōj peptaij er ilo Kraist raar kōņak Kraist.
“Re ban ri Ju ak ri Grik, re ban karijeran im anemkwōjan, re ban m̧aan ak kōrā: bwe kom̧ otemjej juon ilo Kraist Jisōs.”11
Eļap ad oktak jān doon im jet iien ļap ad jab errā ippān doon n̄an ad maron̄ itok ippān doon āinwōt juon wōt ilo jabdewōt ļōmņak ko ak ium̧win jabdewōt et. Ilo Jisōs Kraist wōt jemaron̄ m̧oolin erom̧ juon wōt.
Erom juon wōt ilo Kraist ej waļo̧k juon illak juon—kajjojo iaad jej ijjinoe ippād make. Jej erom ruo ilo juon armej ilo kanniek im jetōb im jet iien jej tariņae ippād make. Āinwōt an Paul kar kwaļo̧k:
“Bwe ij lan̄lōn̄ ilo kien Anij ilo̧kan armej eo ilowaō;
“A ij lo bar juon kien [ilo] raaō [ilo anbwinū], ej tariņaek kien aō ļoļātāt, im kajipo̧kweik eō n̄an kien jero̧wiwi eo ej pad ilo raaō.”12
Jisōs ekar barāinwōt juon armej in kanniek im jetōb. Kar māllijon̄ E; E emeļeļe; E emaron̄ jipan̄ kōj tōpar juon wōt ilo kōj make.13 Kōn menin, depdepļo̧k ilo meram eo im ilo tūriam̧o an Kraist, jej kate kōj n̄an leļo̧k jetōb—ko ad im im̧we eo an Jetōb Kwojarjar—ioon kanniek. Im n̄e jej likjab, Kraist, jān Pinmuur eo An, em̧ōj letok n̄an kōj menin letok eo an ukweļo̧k im iien eo em̧m̧an n̄an bar kajjeon̄.
N̄e kajjojo iaad ej “kōņak Kraist,” innem ippān doon jemaron̄ kōjatdikdik n̄an erom̧ juon, āinwōt an Paul kar ba, “ānbwinnen Kraist.”14 N̄an “kōņak Kraist” em̧ool ekūtbuuj kōm̧m̧ane “kien eo m̧oktata im eļap” An15 bween kallim̧ūr eo m̧oktata im eļaptata ad, im eļan̄n̄e jej iakwe Anij, jenaaj kejparok kien ko An.16
Juon wōt ippān ro jeid im jatid ilo ānbwin in an Kraist ej eddōkļo̧k ilo ad pokake kien eo kein karuo—eo eļap an ekkeijel ippān kien eo m̧oktata—n̄an iakwe ro jet āinwōt kōj make.17 Ij ļōmņak ippān doon eo ewāppenļo̧k enaaj maron̄ tōprak ilubwilijid eļan̄n̄e jej ļoor en̄jake eo eutiejļo̧k im ekwojarjaļo̧k an Rilo̧mo̧o̧r kōn kien eo kein karuo—n̄an iakwe doon ejjab wōt āinwōt ad iakwe kōj make, bōtaab āinwōt An kar iakwe kōj.18 Ilo dipdiki, ej an “aolep armej kappukot ļapļo̧k eo an eo riturun, im kōm̧m̧an aolep men otemjeļo̧k kōn mejōkļo̧k wōt aiboojoj eo an Anij.”19
Būreejtōn Marion G. Romney, juon kar rikakkpilōklōk ilo Būreejtōnji eo Eutiejtata, ilo kōmeļeļeik wāween ad bōk ainōm̧m̧an indeeo im juon wōt, ekar ba:
“Eļan̄n̄e juon armej, ej ekkeijel ippān Setan, ej obrak kōn jerbal ko an kanniek, ej tariņae ippān make. Eļan̄n̄e rej ekkeijel ippān doon, rej tariņae ippāer make im ire ippāer make. Eļan̄n̄e elōn̄ im lōn̄ armej rej ekkeijelļo̧k, juon jukjuk in ped ej [bōk leen] eļap inepata im iakweelel. Eļan̄n̄e ritōl ro an laļ eo rej ekkeijelļo̧k, ewōr juon iakweelel ilo aolepen laļin.”
Būreejtōn Romney ekar wōnm̧aanļo̧k wōt: “Āinwōt an jerbal ko an kanniek maron̄ jelōt aolepen laļ, ejjeļo̧k oktak jān ainōm̧m̧an eo an gospel in. Eļan̄n̄e juon armej ej mour kake, ewōr ainōm̧m̧an ilo e make. Eļan̄n̄e ruo armej rej mour kake, kajjojo iaer ewōr ainōm̧m̧an ilo er make im n̄an doon. Eļan̄n̄e laļ eo ej mour kake, laļ eo ewōr ainōm̧man ie. N̄e ebwe laļ ko rej m̧ōņōņō ilo leen Jetōb n̄an kajebwebweik inepata ko an laļ in, innem, im wōt innem, ainikien kōjjerak tariņae naaj jako im flag in tariņae naaj limiļo̧k n̄an kwaļo̧k ke enaaj bar ejeļo̧k tariņae. … (Lale Alfred Lord Tennyson, “Locksley Hall,” The Complete Poetical Works of Tennyson, ed. W. J. Rolfe, Boston: Houghton-Mifflin Co., 1898, p. 93, lines 27–28.)”20
N̄e jej “kōņak Kraist,” ej erom̧ maron̄ n̄an kajim̧we ak n̄an likūtļo̧k oktak ko, jab errā ko, im pok ko. Juon waanjon̄ak eļap kōn anjo̧ jān jepelļo̧k ej loe ilo bwebwenato ko an Kabun̄ in. Elder Brigham Henry Roberts (ekkā jeļā kake āinwōt B. H. Roberts), ekar ļoktak ilo England ilo 1857 eo, ekar jerbal āinwōt eo uwaan Ko̧o̧njeļ eo Eutiejtata an Jiljilimjuonn̄oul ro—ta eo jej ņae etan rainin āinwōt Būreejtōnji eo an Jiljilimjuonn̄oul ro. Elder Roberts ekar juon rikejparok ekajoor im eniknik an kabun̄ in em̧ōj an jepļaaktok im Kabun̄ in ilo jet iaan iien ko reppentata ie.
Ilo 1895, ijo wōt ke, jerbal in jipan̄ eo an Elder Roberts ilo Kabun̄ in ekar pād ilo kajjitōk kōn aitwerōk. B. H. kar kāālet āinwōt juon iaan ro renaaj kar jino je juon jemenei n̄an Utah ke ekar erōm juon state. Ālikin, kāālet n̄an juon rittōr n̄an United States Congress bōtaab ilo ejjeļo̧k kōjjeļāik ak bōk mālim jān Būreejtōnji eo Kein Kajuon. Būreejtōn Joseph F. Smith, juon rikakpilōklōk ilo Būreejtōnji eo Kein Kajuon ekar lukkuun kabōd B. H. kōn likjak eo an ilo juon kweilo̧k eļap an priesthood. Elder Roberts ekar luuji ekāālel eo an im en̄jake bwe an jab tōprak ekar iookļo̧k juon m̧ōttan eļap ilo meļeļe ko an Būreejtōn Smith. Ekar jab erre ippān ritōl ro an Kabun̄ in ilo jet political speech ko im intōrpiu ko an. Ekar joļo̧k an jerbal ilo Kabun̄ in. Ilo juon kweilo̧k aitok ilo Salt Lake Tampeļ eo ippān ro uwaan Būreejtōnji eo Kein Kajuon im Doulul eo an Jon̄oulruo ro, B. H. ekar dim wōt ilo an jutak kōn ijo an make. Tok ālik, Būreejtōn [Wilford] Woodruff ekar leļo̧k n̄an [Elder Roberts] jilu wiik n̄an ļōmņak kake ijo ej ped ie. Eļan̄n̄e enaaj kaben būruon im jab ukweļo̧k, renaaj aikuj kōtļo̧k jān Jiljilimjuonn̄oul ro.”21
Tokālik ilo juon kweilo̧k ettiņo ippān Rijilōk ro Heber J. Grant im Francis Lyman, B. H. ekar m̧okta kapen būruon, bōtaab āliktata iakwe im Jetōb Kwojarjar rekar anjo̧. Denin kemjaaļaļ ekar to̧o̧r jān mejen. Rijilōk ro ruo rekar maron̄ uaake jet en̄jake in kalijōkļo̧k ko im menin kalulu ko me rekar kainepaitaiki B. H., im rekar ilo̧k kōn juon bōro in bar kajim̧weiki ta eo ebōd. Jibbon̄ eo tok juon, ālikin juon jar aitok kitien, Elder Roberts ekar jilkinļo̧k juon noot n̄an Elders Grant im Lyman bwe ekar pojak n̄an bar kobaļo̧k ippān likao ro karejeran.22
Ke ekar tokālik ioon Būreejtōnji eo Kein Kajuon, Elder Roberts ekar ba, “Ikar jibadōk Irooj im bōk meram im kōmeļeļe ko kōn Jetōb eo An n̄an ajeļo̧k n̄an maron̄ eo an Anij.”23 Kipel e kōn iakwe eo an Anij, B. H. Roberts ekar ped wōt ilo an tiljek im juon ritōl an Kabun̄ in ewōr an maron̄ n̄an jem̧lo̧kin mour eo an.24
Jemaron̄ barāinwōt lo ilo waanjon̄ak in bwe bōro kuk ejjab wōt meļeļein errā bwe aolep rej aikuj kōm̧m̧ane men ko an juon make ak etal ilo jekjek eo aer make. Jeban maron̄ erom̧ juon wōt m̧ae iien aoleped ej kubōl kijejeto ko ad ippān doon n̄an un eo eļap. Meļeļein, ilo naan ko an B. H. Roberts, ajeļo̧k n̄an maron an Anij. Jej ra ko ilo ānbwinin Kraist reoktak, rej kakūrm̧ool jerbal ko eoktak ilo iien ko reoktak—, mej eo, uleej eo, pā eo, ne eo—aet aolepān juon ānbwin.25 Kōn menin, kōttōpar eo ad ej “bwe en ejjeḷọk kiojaḷjaḷ ilo ānbwin, a bwe ra ko otemjej ren jiṃor kōjparok doon.”26
Bōro kuk ejjab aikuji āin juon, bōtaab ej aikuji ainiikien eo ej kwaļo̧k ippān doon. Jemaron̄ kōm̧m̧an bwe būruod en loklok ippān doon ilo iakwe, erom̧ juon ilo tōmak im katak, im wōnm̧aanļo̧k ilo ad kotak tiim ko reoktak, jab errā ilo men ko an politic, leto letak kōn kotōpar ko im wāween eo ejim̧we n̄an kotōpari, im jabdewōt bōnbōn in men ko āinļo̧k kein. Bōtaab jejjab aikuj jab errā ak dāpdep kōn illu ak illu ņae doon. Rilo̧mo̧o̧r eaar ba:
“Bwe em̧ool, em̧ool Ij ba n̄an kom̧, eo ewōr jetōb in jum̧ae ilo e ejjab jān Eō, ak ej jān devil, eo ej jemān jum̧ae, im ej pukwōj buruōn armej n̄an aitwerōk kōn illu, ippān doon.
“Lo, en̄in ej jab Aō unleplep in katak, n̄an pukwōj būruōn armej kōn illu, ippān doon; a en̄in ej unleplep in katak eo Aō, bwe men rot kein rej aikuj jako.”27
Juon iiō emootļo̧k, Būreejtōn Russell M. Nelson ekar akweļap ippād ilo naan kein: “Ejjeļo̧k iaad emaron̄ in peek laļ ko ak m̧akūtkūt ko an ro jet ak aaet ro uwaan baam̧le ko ad make. Ak jemaron̄ peek kōj make. Kūr eo aō rainin, ro jeiū im jatū rejitōn bōro, ej n̄an kōjem̧ļo̧k poktak ko me rej kalluik būruōm̧, m̧weo im̧ōm̧, im mour eo am̧. Kalbwin jabdewōt im aolep kōņaan n̄an kōmetak ro jet—men̄e kōņaan kein remaron̄ in jidikimkij in illu, juon lo eo ekkan̄, ak juon paļ in bōro n̄an juon armej eo ekar kōmetak eok. Rilo̧mo̧o̧r ekar kakien kōj n̄an ukōtļo̧k jep eo juon [lale 3 Nipai 12:39], n̄an iakwe rikōjdat ro ad, im jar kōn ro rej ikkure kake kom̧ [lale 3 Nipai 12:44].”28
Ij bar āliji bwe ej wōt ilo im kōn m̧ool eo ilo kajjojo iaad n̄an iakwe Jisōs Kraist bwe jemaron̄ bōk kōjatdikdik eo n̄an erom̧ juon—juon ilo kōj make, juon ilo m̧weo, juon ilo Kabun̄ in, āliktata juon ilo Zaion, im ilōn̄tata, juon ippān Jemen im Nejin im Jetōb Kwojarjar.
Ij ro̧o̧ltok iien makūtkūt eo an Wiik eo Ekwojarjar an Rikūrijin im m̧ōņōņō eļap eo n̄an ad Ripinmuur. Jerkakpeje eo an Jisōs Kraist ej kam̧ool kōn ekwojarjar eo An im bwe E em̧ōj an anjo̧ ioon aolepmen. Jerkakpeje eo an ej kam̧ool bwe, lukwoj kōj n̄an E kōn bujen, bar kōj jemaron̄ anjo̧ ioon aolep men im erom̧ juon wōt. Jerkakpeje eo An ej kam̧ool bwe kōn E, jab wabanban im mour indeeo rej m̧ool.
Jibbon̄in, ij kwaļo̧k aō kam̧ool kōn Jerkakpeje eo An im aolepmen ej iookļo̧k, ilo etan Jisōs Kraist, Amen.